Izaayii 37:1-38
37 Wiyaʋ Ezekiyaasɩ tɩɩnɩ tɔm ndʋ lɛ, ɛcɩyɩ e-tokonaa nɛ esuu* fɔlɔtɔ nɛ ewolo ɛsʋʋ Yehowa ɖɩɣa taa.+
2 Nɛ etiyi Eliyaakim weyi ɛkɛ ɖɩɣa* yɔɔ cɔnɩyʋ yɔ, takayaɣ taa mayʋ Sebɩna, nɛ cɔjɔnaa taa ɛzʋtʋyaa, nɛ powolo nayʋ Izaayii+ weyi ɛkɛ Amoozɩ pɩyalʋ yɔ ɛ-cɔlɔ; paasu* fɔlɔtɔnaa.
3 Peheyi-i se: «Tɔm tʋnɛ Ezekiyaasɩ yɔɔdʋʋ: “Kɩyakʋ kʋnɛ kɩkɛ kʋñɔŋ kɩyakʋ, kakalaɣ* kɩyakʋ, nɛ fɛyɛ kɩyakʋ; mbʋ pʋyɔɔ yɔ piya talɩ lʋlʋʋ,* ɛlɛ ɖoŋ fɛyɩ se palʋlɩ-sɩ.+
4 Pʋtɔma yɔ ñɛ-Ɛsɔ Yehowa kaɣ nɩʋ Rabɩsakee tɔm, weyi ɛ-kɩbaɣlʋ Asiirii wiyaʋ tiyaa se ɛcaa tɔm Ɛsɔ ɛsadʋ yɔ,+ nɛ ɛkaɣ-ɩ pɔzʋʋ akɔnta tɔm ndʋ ñɛ-Ɛsɔ Yehowa nɩwa yɔ tɩ-yɔɔ. Pʋyɔɔ lɛ, tɩmɩ+ mba pɩkazaa yɔ pɔ-yɔɔ, mba pehiɣ ñʋʋ yabʋ yɔ.”»+
5 Nɛ Wiyaʋ Ezekiyaasɩ lɩmɖʋyaa wolo Izaayii cɔlɔ,+
6 nɛ Izaayii heyi-wɛ se: «Tɔm tʋnɛ pɩwɛɛ se iheyi mɩ-kɩbaɣlʋ: “Tɔm tʋnɛ Yehowa yɔɔdʋʋ: ‘Sɔɔndʋ ɛtaakpa-ŋ+ nɛ tɔm ndʋ ŋnɩwa yɔ, tɔm kɩdɛkɛdɩtʋ ndʋ Asiirii wiyaʋ lɩmɖʋyaa+ yɔɔdɩ mɔ-yɔɔ yɔ.
7 Na, manɖʋʋ lɩmaɣzɩyɛ naɖɩyɛ ɛ-maɣzɩm taa,* nɛ ɛkaɣ nɩʋ tɔm natʋyʋ nɛ ɛpɩsɩ ɛ-maɣmaɣ ɛ-ɛjaɖɛ taa;+ nɛ mankaɣ yebu nɛ pakʋ-ɩ nɛ laɣɖɛ ɛ-maɣmaɣ ɛ-ɛjaɖɛ taa.’”»+
8 Rabɩsakee nɩwa se Asiirii wiyaʋ yebi Lakisi yonuu lɛ, ɛpɩsɩ ɛ-cɔlɔ nɛ ɛmaɣnɩ-ɩ eɖiɣni yonuu Libna.+
9 Nɛ Asiirii wiyaʋ nɩɩ pɔyɔɔdʋʋ Etiyoopii wiyaʋ Tirihakaa tɔm se: «Ɛlɩwa se eyooni-ŋ.» Ɛnɩ-tʋ lɛ, ɛɖaɣnɩ tiyuu ɛyaa Ezekiyaasɩ cɔlɔ+ se peheyi-i se:
10 «Tɔm tʋnɛ pɩwɛɛ se iheyi Yuuda wiyaʋ Ezekiyaasɩ: “Taayele nɛ ñɛ-Ɛsɔ weyi ŋtaɣ liu yɔ epeɣzi-ŋ mbʋ pʋyɔɔ yɔ eheyiɣ-ŋ se: ‘Paakaɣ Yeruzalɛm ɖʋzʋʋ Asiirii wiyaʋ nesi tɛɛ.’+
11 Na! Ŋnɩ mbʋ Asiirii awiya labɩ ajɛɛ tɩŋa yɔ, ɛzɩma aɖɩzɩ-yɛ yɔ.+ Ñe-ɖeke ñakaɣnɩ hiɣu ñʋʋ yabʋ na?
12 Ajɛɛ wena mɔn-cɔzɔnaa ɖɩzɩ-yɛ yɔ a-ɛsɔnaa yabɩ a-ñʋʋ na?+ Le Gozaŋ, Haraanɩ,+ Rezɛɛfʋ, nɛ Edɛɛnɩ ñɩma mba paawɛ Tɛɛlɩ-Asaarɩ yɔ pɛwɛɛ?
13 Le Hamatɩ wiyaʋ, Arpaadɩ wiyaʋ, nɛ Sefarɩvayim+ tɛtʋ nɛ Ena tɛtʋ, nɛ Iva tɛtʋ awiya wɛɛ?”»
14 Ezekiyaasɩ mʋ takayɩsɩ mba petiyaa yɔ pe-nesi tɛɛ nɛ ɛkalɩ-sɩ. Pʋwayɩ lɛ, Ezekiyaasɩ kpa Yehowa ɖɩɣa taa nɛ eposi-sɩ* Yehowa ɛsɩndaa.+
15 Nɛ Ezekiyaasɩ paɣzɩ tɩmnʋʋ Yehowa+ nɛ ɛyɔɔdʋʋ se:
16 «Hayɩ yoyaa tɛ Yehowa,+ Izrayɛɛlɩ tɛ Ɛsɔ, ña weyi ŋcaɣ kewiyaɣ kpelaɣ yɔɔ kerebimwaa ñʋʋ yɔɔ* yɔ, ñe-ɖeke koŋ ñɛkɛnɩ tɛtʋ yɔɔ kewiyisi kpeekpe tɛ Ɛsɔ toovenim tʋ. Ñalabɩnɩ ɛsɔdaa nɛ tataa.
17 Hayɩ Yehowa, kʋ nɩŋgbaŋʋʋ nɛ ŋnɩɩ!+ Hayɩ Yehowa, kuli ñɛ-ɛsa nɛ ŋna!+ Nɩɩ tɔm ndʋ payɩ Senakeribʋ tiyinaa se ɛcaanɩ tɔm ña Ɛsɔ ɛsadʋ yɔ.+
18 Hayɩ Yehowa, pɩkɛ toovenim se Asiirii awiya yɔkɩ ajɛɛ tɩŋa,+ pɩkpɛndɩnɩ pa-maɣmaɣ pɛ-ɛjaɖɛ.
19 Nɛ pɔlɔ a-ɛsɔnaa miŋ taa,+ mbʋ pʋyɔɔ yɔ pataakɛ ɛsɔnaa ɛlɛ ɛyaa nesi tɛɛ tʋma,+ ɖasɩ nɛ pɛɛ pɛkɛnaa. Pʋyɔɔ papɩzaa nɛ paɖɩzɩ-wɛ.
20 Ɛlɛ lɛɛlɛɛyɔ lɛ, hayɩ ɖɛ-Ɛsɔ Yehowa, holi-ɖʋ e-nesi tɛɛ, nɛ pɩsa nɛ tɛtʋ yɔɔ kewiyisi tɩŋa pɩzɩ nɛ sɩtɩlɩ se ñe-ɖeke koŋ ñɛkɛnɩ Ɛsɔ, hayɩ Yehowa.»+
21 Peeɖe Amoozɩ pɩyalʋ Izaayii tiyini tɔm tʋnɛ Ezekiyaasɩ se: «Tɔm tʋnɛ Izrayɛɛlɩ tɛ Ɛsɔ Yehowa yɔɔdʋʋ: “Ɛzɩma ŋtɩmnɩ-m pɩlɩɩnɩ Asiirii wiyaʋ Senakeribʋ yɔɔ yɔ pʋyɔɔ lɛ,+
22 Tɔm tʋnɛ Yehowa yɔɔdʋʋ ɛ-yɔɔ:
‘Siyɔŋ pɛlɛ weyi ɛtɩtɩlɩ abalʋ yɔ eniŋi-ŋ, ehoŋuu-ŋ.
Yeruzalɛm pɛlɛ sekiɣ-ŋ ɛ-ñʋʋ.
23 Anɩ ŋca tɔm+ nɛ ŋyɔɔdɩ ɛ-yɔɔ tɔm kɩdɛkɛdɩtʋ?
A-yɔɔ ŋholaa+Nɛ a-yɔɔ ŋkpazɩ ñɛ-ɛsa nɛ tɩ kpazʋʋ?
Izrayɛɛlɩ tɛ Kiɖeɖeu yɔɔ!+
24 Ŋtɩŋnɩ ña-lɩmɖʋyaa yɔɔ nɛ ŋcaa Yehowa tɔm+ nɛ ŋyɔɔdɩ se:
“Mankaɣ kpaɣʋ mo-you kɛɛkɛɛnaa sakɩyɛNɛ mankpa pʋŋ ñʋŋ taa,+Libaŋ hɔɔlɩŋ weyi ɩkɩlɩ posuu yɔ ɩ-taa.
Mankaɣ sɛtʋʋ kɩ-tɛ sɛɛdrɩ tɩŋ kʋkʋyɩŋ, kɩ-tɛ jenevriyee tɩŋ weyi ɩkɩlɩ ɖeu yɔ.
Mankaɣ sʋʋ kɩ-hɔɔlɩŋ weyi ɩkɩlɩ kʋyʋʋ yɔ ɩ-taa, kɩ-laŋ weyi ɩkpaɖɩ suu kpimm yɔ ɩ-taa.
25 Mankaɣ huyuu lɔkɔnaa nɛ mɔñɔɔ lɩm;Mankaɣ tɩŋnʋʋ ma-naataŋ yɔɔ nɛ meyele nɛ Ejipiti lemisi* taa lɩm sɔɔ.”
26 Ŋtɩnɩɩ yaa we? Ðooo lɔŋ malabɩ ɖʋtʋ ndʋ.
Kpaɣnɩ ɖooo caanaʋ taa mɔñɔɔzɩ-tʋ.*+
Lɛɛlɛɛyɔ lɛ mankaɣ yebu nɛ tɩla.+
Ŋkaɣ yebu nɛ tɛtʋ ɖoŋ ñɩndʋ ndɩ ndɩ pɩsɩ njaa tambaɣ huwa.+
27 Tɩ-taa ɛyaa kaɣ kɛʋ mba pɛfɛyɩnɩ ɖoŋ nɩɩyɩ yɔ;Pakaɣ wɛʋ sɔɔndʋ taa nɛ fɛyɛ kpa-wɛ.
Pakaɣ pɩsʋʋ ɛzɩ hayɩm taa ñɩtʋ nɛ ñɩtʋ lɛŋ ñɩndʋ yɔ,Ɛzɩ kuduyuŋ ñʋŋ taa ñɩtʋ ndʋ wɩsɩ ɖɩlɩyɛ taa helim laba nɛ tɩwɩlɩ yɔ.
28 Ɛlɛ mansɩm camɩyɛ alɩwaatʋ ndʋ ŋcakɩ, alɩwaatʋ ndʋ ŋlɩɣ, alɩwaatʋ ndʋ ŋsʋʋ,+Nɛ alɩwaatʋ ndʋ ŋkɔʋ-m nɛ pana yɔ,+
29 Mbʋ pʋyɔɔ yɔ, ŋkɔ-m nɛ pana wena yɔ+ nɛ kɔkɔɖɛ nɖɩ ŋlakɩ yɔ, pɩtalɩ ma-nɩŋgbaaŋ taa.+
Pʋyɔɔ lɛ, mankaɣ ɖʋʋ mon-kokooye ñɔ-mɔɔʋ tɛɛ nɛ manɖʋ kpaŋnaŋ nɔsɩ yɔɔ ñɩɣtʋ+ ño-ndomee hɛkʋ taa,Nɛ mankaɣ-ŋ pɩsɩnʋʋ nɛ nʋmɔʋ ŋgʋ ŋtɩŋnaa nɛ ŋkɔɔ yɔ.’
30 «“Nɛ pʋnɛ pɩkaɣnɩ-ŋ* kɛʋ yʋsaɣ: Pɩnaɣ kanɛ ɩkaɣ tɔɔʋ mbʋ pɩñɔʋ pɩ-tɩ yɔɔ yɔ;* nɛ pɩnaɣ 2 ñɩŋga taa lɛ, ɩkaɣ tɔɔʋ mbʋ pɩñɔʋ lone kʋɖʋmɖɩyɛ nɖɩ ɖɩ-taa yɔ pi-pee; ɛlɛ pɩnaɣ 3 ñɩŋga taa lɛ, ɩkaɣ ɖuu ɖomaɣ nɛ ɩkʋ, nɛ ɩkaɣ sɔʋ viiñi tɩŋ nɛ ɩtɔɔ i-pee.+
31 Yuuda ɖɩɣa taa ñɩma mba pehikiɣ ñʋʋ yabʋ yɔ, mba pɩkazaa yɔ,+ pakaɣ kam lila nɛ pɩ-tɛɛ kiŋ nɛ palʋlɩ pee nɛ hayo kiŋ.
32 Mbʋ pʋyɔɔ yɔ, mba pɩkazaa yɔ pakaɣ lɩnʋʋ Yeruzalɛm nɛ mba pehiɣ ñʋʋ yabʋ yɔ palɩɩnɩ Siyɔŋ Pʋʋ yɔɔ.+ Yoyaa tɛ Yehowa kpekpeka kaɣnɩ labʋ mbʋ.+
33 «“Pʋyɔɔ lɛ, tɔm tʋnɛ Yehowa yɔɔdʋʋ Asiirii wiyaʋ yɔɔ:+
‘Ɛɛkaɣ sʋʋ tɛtʋ tʋnɛ tɩ-taa+Nɛ ɛɛkaɣ tɔʋ ñɩmɩyɛ naɖɩyɛ tɔʋ peeɖeNɛ ɛɛkaɣ tɩ-wayɩ wobu nɛ kpayʋʋNɛ ɛɛkaɣ siɣu you wondu nɛ pɩcɔɔ-tʋ nɛ pɩta.’”+
34 “Nʋmɔʋ ŋgʋ ɛtɩŋnaa nɛ ɛkɔɔ yɔ, ŋgʋ ɛkaɣ tɩŋnʋʋ nɛ ɛpɩsɩ;Ɛɛkaɣ sʋʋ tɛtʋ tʋnɛ tɩ-taa,” Yehowa yɔɔdʋʋna.
35 “Ma-maɣmaɣ mɔ-yɔɔ,+ nɛ ma-lɩmɖʋyʋ Daviid yɔɔ+ lɛ,Mankaɣ kandɩyʋʋ tɛtʋ tʋnɛ tɩ-yɔɔ+ nɛ maya tɩ-ñʋʋ.”»
36 Nɛ Yehowa tiyiyu lɩɩ nɛ ɛkʋ ɛyaa 185 000 Asiirii mba ɖigbeɣliye* taa. Ɛyaa kʋyɩ tanaŋ tɛɛ pala lɛ, sɩɖaa ɖeke panaɣ.+
37 Nɛ Asiirii wiyaʋ Senakeribʋ ɖɛɛ nɛ ɛpɩsɩ Niniivi+ nɛ ɛcaɣ peeɖe.+
38 Nɛ kɩyakʋ nakʋyʋ, eluŋaɣ ɛ-ɛsɔ Nisirɔɔkɩ ɖɩɣa* taa lɛ, ɛ-maɣmaɣ ɛ-pɩyalaa Adɩramelɛkɩ nɛ Sarezɛɛrɩ pakʋ-ɩ nɛ laɣɖɛ+ nɛ pese powolo Arara+ ɛjaɖɛ taa. Nɛ ɛ-pɩyalʋ Esarɩ-Hadɔɔnɩ+ pɩsɩ wiyaʋ e-lone taa.
Pɩ-tɛɛ tɔm
^ Yaa «ehuuzi ɛ-yɔɔ.»
^ Yaa «paahuuzi pɔ-yɔɔ.»
^ Yaa «awiya ɖɩɣa.»
^ Yaa «tʋtʋ.»
^ Piye piye, «mbʋ pʋyɔɔ yɔ piya kɔm halɩtʋ nɔɔ yɔɔ.»
^ Piye piye, «manɖʋʋ fezuu nakʋyʋ ɛ-taa.»
^ Piye piye, «eposi-kɛ.»
^ Pɩpɩzɩɣ pɩkɛ, «kerebimwaa hɛkʋ taa.»
^ Yaa «Niili lɔɔŋ.»
^ Yaa «malabɩ-tʋ.»
^ Yaa «ɩkaɣ tɔɔʋ alɛnda pee.»
^ Pʋ-tɔbʋʋ se Ezekiyaasɩ.
^ Yaa «maalika.»
^ Yaa «templo.»
