Izaayii 44:1-28
44 «Lɛɛlɛɛyɔ lɛ welisi, Oo ma-lɩmɖʋyʋ Yakɔɔb,Nɛ ña, Oo Izrayɛɛlɩ, weyi malɩzaa yɔ.+
2 Tɔm tʋnɛ Yehowa yɔɔdʋʋ,Ña-Laɖʋ nɛ Weyi ɛma-ŋ yɔ,+Weyi ɛsɩnɩ-ŋ kpaɣnɩ ɖooo lotu taa yɔ:*
“Sɔɔndʋ ɛtaakpa-ŋ, ma-lɩmɖʋyʋ Yakɔɔb,+Nɛ ña, Yesurun,*+ weyi malɩzaa yɔ.
3 Mbʋ pʋyɔɔ yɔ mankaɣ pɩyʋʋ lɩm weyi lɔkɔtʋ ɖɛ-ɩ yɔ ɛ-yɔɔ*+Nɛ mankaɣ yebu nɛ lemisi kpeŋ wɩlɩŋ tɛtʋ yɔɔ.
Mankaɣ pɩyʋʋ men-fezuu ña-lʋlʋʋ taa mba* yɔɔ+Nɛ manpɩyɩ ma-wazaɣ ñe-liɖe taa piya yɔɔ.
4 Nɛ pakaɣ ñɔʋ ɛzɩ ñɩtʋ ndʋ tɩñɔʋ nɛ tɩnɛɣdɩɣ ñɩtʋ lɛŋ ñɩndʋ hɛkʋ taa yɔ,+Ɛzɩ pepliyee tɩŋ weyi ɩwɛ lemisi nɔsɩ yɔ.
5 Nɔɔyʋ kaɣ yɔɔdʋʋ se: ‘Mɛnkɛ Yehowa pʋyʋ.’+
Lɛlʋ kaɣ ɛ-tɩ yaʋ nɛ Yakɔɔb hɩɖɛ,Nɛ lɛlʋ ɖɔɖɔ kaɣ maʋ e-nesi yɔɔ se: ‘Yehowa pʋyʋ.’
Nɛ ɛkaɣ kpaɣʋ Izrayɛɛlɩ hɩɖɛ.”
6 Tɔm tʋnɛ Yehowa yɔɔdʋʋ,Izrayɛɛlɩ Wiyaʋ+ nɛ Weyi ɛɖaɣnɩ-ɩ yabʋ yɔ,+ yoyaa tɛ Yehowa:
“Mɛkɛnɩ kajalaɣ tʋ nɛ mɛkɛnɩ kɛdɛzaɣ tʋ.+
Ɛsɔ nɔɔyʋ fɛyɩ nɛ pɩtasɩnɩ-m.+
7 Awɛ ɛzɩ ma yɔ?+
Ekoo nɛ ɛyɔɔdɩ nɛ ɛwɩlɩ-m se pɩkɛ toovenim!+
Kpaɣnɩ alɩwaatʋ ndʋ meyeba nɛ ɖooo lɔndaa ɛyaa wɛɛ yɔ,Pɔyɔɔdɩ mbʋ pɩkaɣ kɔmNɛ mbʋ pɩkaɣ labʋ yɔ pɩ-tɔm.
8 Sɔɔndʋ ɛtaakpa-mɩ,Nɛ itaayele nɛ sɔɔndʋ camɩ-mɩ.+
Ɛzɩ mantaatɛ heyuu mɩ-taa paa weyi nɛ monsusi-tʋ?
Ɩkɛ ma-aseɣɖe tɩnaa.+
Ɛsɔ nɔɔyʋ wɛɛ nɛ pɩtasɩnɩ-m yaa we?
Aayɩ, Kaaʋ lɛɛkʋ nakʋyʋ fɛyɩ;+ maasɩŋ nakʋyʋ.”»
9 Mba payɩ poluki sɩʋ kpelisi yɔ patɩkɛ pʋyʋ,Nɛ wondu ndʋ pɔsɔɔlaa siŋŋ yɔ, tɩɩkaɣ wɛʋ wazaɣ nakɛyɛ.+
Sɩkɛ* pa-aseɣɖe tɩnaa mba paanaɣ nabʋyʋ nɛ paasɩŋ nabʋyʋ yɔ;+Pʋyɔɔ lɛ, mba palabɩ-sɩ yɔ fɛyɛ kaɣ-wɛ kpaʋ.+
10 Akaɣ labʋ ɛsɔ nɔɔyʋ yaa akaɣ lubu ñɩɣtʋ sɩʋ kpeliɣa*Ŋga kaapɩzɩɣ nɛ kɔkɔnɩ kɛzɛɣa nakɛyɛ yɔ?+
11 Ɩna! Fɛyɛ kaɣ kpaʋ ɛ-ɛgbaɣdɩnaa tɩŋa!+
Mba poluki sɩʋ kpelisi nzɩ yɔ, pɛkɛ ɛyaa yem.
Pa-tɩŋa pekpeɣli nɛ pɛwɛɛ po-lona taa.
Sɔɔndʋ kaɣ-wɛ kpaʋ nɛ fɛyɛ kpa pa-tɩŋa.
12 Kolu ɖʋʋ ñɩɣyʋʋ miŋ mamala taa nɛ ɛkpaɣ ɛ-tʋmɩyɛ wonuu* nɛ ɛñɔɔzɩ-kʋ.
Ɛkpakɩɣ hamanaa nɛ elukini-kʋ,Elukini ɛ-nɩŋgbɛɛŋa ɖoŋ.+
Nɛ ñɔɔsɩ paɣzɩ-ɩ wɩʋ nɛ e-ɖoŋ tɛŋ;Ɛɛñɔʋ lɩm nɛ pʋyɔɔ lɛ pɩnɩɣ-ɩ.
13 Tɩŋ saɣyʋ posuu nimaɣ ŋga pamaɣzɩɣna yɔ, ɛkpakɩɣ kɩɖɛɛ kɩsɛɛmʋʋ nɛ ɛlɩzɩɣnɩ sɩʋ kpeliɣa ŋga kɛ-wɛtʋ.
Ɛkpakɩɣ wonuu ŋgʋ pakayɩɣnɩ ɖasɩ yɔɔ yɔ nɛ ɛlabɩnɩ kɔ-yɔɔ tʋmɩyɛ nɛ ɛkpaɣ wonuu ŋgʋ pɛhɛɣnɩ kulukulu yɔ nɛ ɛhɛɛnɩ-kɛ.
Ɛlakɩ-kɛ nɛ kɛ-wɛtʋ nɩɣzɩnɩ ɛyʋ,+Nɛ kɛwɛɛnɩ ɛyʋ keɖeɣa,Se kacaɣ ɖɩɣa taa.*+
14 Nɔɔyʋ wɛɛ nɛ ɛ-tʋmɩyɛ lɛ se etiŋ sɛɛdrɩ tɩŋ.
Ɛtɔzʋʋ tɩŋ taa nɛ ɛlɩzɩ tɩʋ nakʋyʋ, sɛɛnɩ tɩʋ,Nɛ eyeki nɛ kɩpaɣlɩ nɛ kɩpɩɩ laʋ tɛɛ tɩŋ hɛkʋ taa.+
Ɛsɔʋ loriyee tɩʋ, nɛ tɛʋ la nɛ kɩpaɣlɩ.
15 Pʋwayɩ lɛ, kɩpɩsɩɣ ɖasɩ nzɩ ɛyʋ ɖʋʋnɩ miŋ yɔ.
Ɛkpakɩɣ kɩ-hɔɔlʋʋ nakʋyʋ nɛ ɛɖʋnɩ miŋ nɛ ehoyi;Ɛɖʋʋ miŋ nɛ ɛhɔ kpɔnɔ.
Ɛlɛ ɛkpakɩɣ-kʋ ɖɔɖɔ nɛ elubini ɛsɔ nɛ ɛsɛɣ-ɩ.
Ɛkpakɩɣ-kʋ nɛ elubini sɩʋ kpeliɣa, nɛ eluŋuu kɛ-tɛɛ.+
16 Ɛkpakɩɣ kɩ-hɔɔlʋʋ nɛ ɛɖʋ miŋ taa;Nɛ hɔɔlʋʋ ŋgʋ ɛwɩsɩɣnɩ nandʋ, nɛ ɛtɔɔ nɛ ɛhaɣ.
Ehoyuu miŋ ɖɔɖɔ nɛ ɛtɔŋ se:
«Ɛhɛɛ! Pisoŋi-m alɩwaatʋ ndʋ mɛwɛɛ nɛ manaɣ miŋ yɔ.»
17 Ɛlɛ mbʋ pɩkazaa yɔ, ɛkpakɩɣ-pʋ nɛ elu ɛsɔ, ɛsaɣ ɛ-sɩʋ kpeliɣa.
Eluŋuu kɛ-tɛɛ nɛ ɛsɛɣ-kɛ.
Ɛtɩmɩɣnɩ-kɛ nɛ ɛyɔɔdʋʋ se:
«Ya ma-ñʋʋ, mbʋ pʋyɔɔ yɔ ŋkɛ mɛ-ɛsɔ.»+
18 Paasɩŋ natʋyʋ, paanɩɣ tɔm natʋyʋ tɔbʋʋ,+Mbʋ pʋyɔɔ yɔ pɛ-ɛsa taaɖaa nɛ paapɩzɩɣ nɛ pana,Nɛ pa-laŋa fɛyɩnɩ lɛɣtʋ.
19 Nɔɔyʋ ɛɛmaɣzɩɣ ɛ-laŋɩyɛ taa,Nɔɔyʋ fɛyɩnɩ sɩmtʋ yaa tɔm taa nɩʋ lɛɣtʋ se ɛyɔɔdɩ se:
«Mankpaɣ kɩ-hɔɔlʋʋ nɛ manɖʋnɩ miŋ,Nɛ mɔhɔ kpɔnɔ nɛ mawɩsɩ nandʋ kɩ-mamala yɔɔ nɛ mɔntɔɔ.
Lɛɛlɛɛyɔ, pɩwɛɛ se mankpaɣ mbʋ pɩkazaa yɔ nɛ malabɩnɩ kʋzɔɔtʋ pʋyʋ yaa we?+
Pɩwɛɛ se mɛnsɛɛ tɩʋ titiɖe* yaa we?»
20 Tɔlɩma ɛtɔkɩ.
Ɛ-laŋɩyɛ nɖɩ pipeɣzaa yɔ ɖilesi-i.
Ɛɛpɩzɩɣ nɛ ɛya ɛ-maɣmaɣ ɛ-ñʋʋ,* nɛ ɛɛyɔɔdʋʋ ɖɔɖɔ se:
«Ɛzɩ pɩtɩkɛ cɛtɩm wɛnɩ me-nesi kɩbanzɩ tɛɛ?»
21 «Tɔzɩ pʋnɛ pɩ-yɔɔ, Oo Yakɔɔb, nɛ ña, Oo Izrayɛɛlɩ,Mbʋ pʋyɔɔ yɔ ŋkɛ ma-lɩmɖʋyʋ.
Mama-ŋ, nɛ ŋkɛ ma-lɩmɖʋyʋ.+
Oo Izrayɛɛlɩ, maakaɣ sɔʋ ñɔ-yɔɔ.+
22 Mankaɣ huuzuu ña-kɩdɛkɛdɩm yɔɔ ɛzɩ ɛsɔmɩnʋʋ pohuuzinaa yɔ+Nɛ mohuuzi ña-kɩwɛɛkɩm yɔɔ ɛzɩ ɛsɔmɩnʋʋ sɔsɔʋ pohuuzinaa yɔ.
Pɩsɩ mɔn-cɔlɔ, mbʋ pʋyɔɔ yɔ mankaɣ-ŋ ɖaɣnʋʋ yabʋ.+
23 Ma kubusi nɛ taa leleŋ, Oo ɛsɔdaa,Mbʋ pʋyɔɔ yɔ Yehowa labɩ pʋnɛ!
Ikoo wabɩtʋ kogoye, Oo tɛtʋ lona wena awɛ cukaŋ yɔ!
Ɩma taa leleŋ kubusi, Oo pʋŋ,+Oo laʋ, nɛ ña-tɩŋ kpeekpe!
Mbʋ pʋyɔɔ yɔ Yehowa ɖaɣnɩ yabʋ Yakɔɔb,Nɛ ɛwɩlɩɣ e-keɖeɣa Izrayɛɛlɩ taa.»+
24 Tɔm tʋnɛ Yehowa yɔɔdʋʋ, Weyi ɛɖaɣnɩ-ŋ yabʋ yɔ,+Weyi ɛma-ŋ kpaɣnɩ alɩwaatʋ ndʋ ŋŋwɛ lotu taa yɔ:
«Mɛkɛnɩ Yehowa, weyi ɛlabɩ pɩtɩŋa payɩ yɔ.
Ma-maɣmaɣ moposini ɛsɔdaa,+Nɛ moposini tɛtʋ.+
Aawɛ mɔn-cɔlɔ?
25 Mɛwɛɛ nɛ mensidiɣ falaa tɔm yɔɔdɩyaa* yʋsasɩ taa,Nɛ mɛkɛnɩ Weyi eyeki nɛ tɩyaa lakɩ ɛzɩ kɩmɛlɛmɩŋ yɔ;+Weyi eyeki nɛ pisidiɣ lɔŋsɩnɖaaNɛ eyeki nɛ pa-sɩmtʋ pɩsɩɣ kɩmɛlɛndʋ yɔ;+
26 Weyi eyeki nɛ ɛ-lɩmɖʋyʋ tɔm lakɩ yɔNɛ eyeki nɛ mba etiyiɣ yɔ pɔ-tɔm tɩŋa lakɩ yɔ;+Weyi ɛyɔɔdʋʋ Yeruzalɛm tɔm se: “Ɛyaa kaɣ kɩ-taa wɛʋ” yɔ,+Nɛ ɛyɔɔdʋʋ Yuuda tɛtʋ ndɩ ndɩ tɔm se: “Pakaɣ-tʋ ɖaɣnʋʋ maʋ,+Nɛ mankaɣ ɖaɣnʋʋ kʋsʋʋ kɩ-njaa” yɔ;+
27 Weyi eheyiɣ lɩm cukaŋ ñɩmbʋ se: “Sɔyɩ,Nɛ mankaɣ yebu nɛ ñɔ-pɔsɩ tɩŋa sɔɔ” yɔ;+
28 Weyi ɛyɔɔdʋʋ Siiruusi+ tɔm se: “Ɛkɛ me-ninɖiɣyu,Nɛ ɛkaɣ labʋ mɔn-sɔɔlɩm tɩŋa yɔɔ” yɔ;+Weyi ɛyɔɔdʋʋ Yeruzalɛm tɔm se: “Pakaɣ-kʋ ɖaɣnʋʋ maʋ” yɔ,Nɛ ɛyɔɔdʋʋ templo tɔm se: “Pakaɣ sɩʋ ñe-tigiɖe” yɔ.»+
Pɩ-tɛɛ tɔm
^ Yaa «kpaɣnɩ alɩwaatʋ ndʋ palʋlɩ-ŋ yɔ.»
^ Pʋ-tɔbʋʋ se «Ɛyʋ siɣsiɣ tʋ,» paya hɩɖɛ kɩsɛsɛyɛ nɖɩ Izrayɛɛlɩ se paɖʋnɩ-ɩ hɩɖɛ.
^ Yaa «pɩyʋʋ lɩm lɔkɔtʋ tɛtʋ yɔɔ.»
^ Piye piye, «ño-ɖomaɣ.»
^ Pʋ-tɔbʋʋ se sɩʋ kpelisi.
^ Yaa «sɩʋ kpeliɣa ŋga poyolisi ñɩɣtʋ nɛ polubina yɔ.»
^ Yaa «ɛ-sɩɣa ŋga kɛwɛ loozo tɩyɛ yɔ.»
^ Yaa «agɔlɩma kuduyuu tɛɛ.»
^ Yaa «tɩʋ hɔɔlʋʋ ŋgʋ kɩwɩlaa yɔ.»
^ Yaa «ɛya ɛ-kalɩzaɣ ñʋʋ.»
^ Yaa «cɛtɩm nayaa.»
