Izaayii 46:1-13
46 Bɛɛlɩ pam kotaaa,+ Nebo kpilini ɛsɩndaa.
Pakpaɣ pa-sɩʋ kpelisi nɛ pasʋʋ kpɩna, kpɩna wena asɩɣlɩɣ sʋʋtʋ yɔ,+Ɛzɩ wondu ndʋ tɩwɛ yuŋ kpɩna wena pɩnɩ-yɛ yɔ a-yɔɔ yɔ.
2 Pa-tɩŋa pekpiliɣ nɛ papaŋ;Paapɩzɩɣ nɛ paya sʋʋtʋ* ndʋ tɩ-ñʋʋ,Nɛ pa-maɣmaɣ powoki* yomiye taa.
3 «Iwelisini-m, Oo Yakɔɔb ɖɩɣa, nɛ mɩ mba payɩ pɩkazɩ Izrayɛɛlɩ ɖɩɣa taa yɔ,+Mɩ mba mansɩnɩ-mɩ kpaɣnɩ ɖooo mɩ-lʋlʋʋ wiye nɛ mɔnɖɔkɩ-mɩ kpaɣnɩ ɖooo lotu taa yɔ.+
4 Pɩkɔɔ nɛ pɩtalɩ mɩ-akpadɩyɩtʋ taa, mankaɣ kɛʋ kʋɖʋm ɛnʋ;+Pɩkɔɔ nɛ pɩtalɩ alɩwaatʋ ndʋ mɩ-ñɔsɩ hʋlʋmaa yɔ, mankaɣ wobu pɩ-yɔɔ nɛ mɔnɖɔkɩ-mɩ.
Ɛzɩ malabʋ nɛ pɩkɔɔ pɩtalɩnɩ sɔnɔ yɔ, mankaɣ-mɩ kpaɣʋ nɛ mɔnɖɔkɩ-mɩ nɛ maya mɩ-ñʋʋ.+
5 Anɩ ɩkaɣ kpaɣʋ se ɩkɛdɩnɩ-m yaa se ma nɛ ɩ ɖɩwɛ kɩmaŋ yaa se ɩmaɣzɩnɩ-m,+Se pɩsa nɛ ma nɛ ɩ ɖɩlɩɩ ɖama?+
6 Nabɛyɛ wɛɛ nɛ pohutuu sika ŋga kɛwɛ po-huyuu taa yɔ;Pamaɣzɩɣ liidiye yuŋ kɩmaɣzʋʋ yɔɔ.
Pɛtɛɣʋ ñɩɣtʋ wondu luɖu, nɛ ɛlɛ kpaɣ-ɖɩ nɛ elubini ɛsɔ.+
Pʋwayɩ lɛ poluŋuu ɛ-tɛɛ, ɛɛɛ, pɛsɛɣ-ɩ.+
7 Pɔhɔɔlʋʋ-ɩ pa-hazasɩ yɔɔ;+Pakpakɩɣ-ɩ nɛ pasɩɩ e-lone taa, nɛ ɛsɩŋ yem peeɖe.
Eeciɣdiɣ e-lone taa.+
Pamakɩ kubusi nɛ payaɣ-ɩ, ɛlɛ eecosuu;Ɛɛpɩzɩɣ nɛ ɛlɩzɩ nɔɔyʋ kʋñɔŋ taa.+
8 Ɩtɔzɩ pɩ-yɔɔ, nɛ ɩwɛɛ abalɩtʋ.
Ɩsɩɩ-tʋ mɩ-laŋɩyɛ taa, kɩwɛɛkɩm laɖaa mɩ.
9 Ɩtɔzɩ mbʋ pɩlabɩ ɖooo lɔŋ* nɛ pɩɖɛɛ yɔ pɩ-yɔɔ,Se mɛkɛnɩ Ɛsɔ, nɛ nɔɔyʋ tɩtasɩ wɛʋ.
Mɛkɛnɩ Ɛsɔ, nɛ nɔɔyʋ fɛyɩ ɛzɩ ma yɔ.+
10 Ðooo kiɖe tɛɛ mɔyɔɔdʋʋ mbʋ pɩkaɣ labʋ yɔ pɩ-tɔm,Nɛ ɖooo lɔndaa mɔyɔɔdʋʋ mbʋ pɩtɩlabɩta yɔ pɩ-tɔm.+
Mɔyɔɔdʋʋ se: “Lɩmaɣzɩyɛ nɖɩ mankpaɣaa yɔ* ɖɩkaɣ labʋ,+Nɛ mankaɣ labʋ mbʋ payɩ pɩkɛdɩnɩ-m yɔ.”+
11 Menɖiɣni yaʋ sumaɣ ŋga kɔtɔkɩ nandʋ yɔ nɛ wɩsɩ ɖɩlɩyɛ taa,+Ðooo poliŋ ɛjaɖɛ taa mayaɣnɩ ɛyʋ weyi ɛkaɣ labʋ lɩmaɣzɩyɛ nɖɩ mankpaɣaa yɔ* ɖɩ-yɔɔ yɔ.+
Mɔyɔɔdaa, nɛ mankaɣ yebu nɛ pɩla mbʋ.
Malabɩ pɩ-kaɖʋwa, nɛ mankaɣ yebu ɖɔɖɔ nɛ pɩla.+
12 Iwelisini-m, mɩ mba ɩwɛ laŋɩyɛ kpɩzɩŋ* yɔ,Mɩ mba iposini siɣsiɣ wɛtʋ yɔ.
13 Meyeba nɛ men-siɣsiɣ wɛtʋ ñɔtɩ;Tɩfɛyɩ poliŋ,Nɛ ñʋʋ yabʋ mbʋ mɔnkɔŋna yɔ pɩɩkaɣ caɣʋ wayɩ.+
Mankaɣ kɔnʋʋ ñʋʋ yabʋ Siyɔŋ taa, nɛ maha men-keɖeɣa Izrayɛɛlɩ.»+
Pɩ-tɛɛ tɔm
^ Pʋ-tɔbʋʋ se sɩʋ kpelisi nzɩ pasʋʋ kpɩna yɔ.
^ Yaa «pa-kalɩzasɩ woki.»
^ Piye piye, «mbʋ pɩlabɩ kajalaɣ taa.»
^ Yaa «Man-kaɖʋwa; Mɔ-lɔŋ tasʋʋ.»
^ Yaa «man-kaɖʋwa; mɔ-lɔŋ tasʋʋ.»
^ Piye piye, «ɖoŋ.»
