Izaayii 66:1-24
66 Tɔm tʋnɛ Yehowa yɔɔdʋʋ:
«Ɛsɔdaa kɛnɩ men-kewiyaɣ kpelaɣ, nɛ tɛtʋ kɛ ma-nɩŋgbanzɩ ɖɩzɩyɛ.+
Ye mbʋ, ɖɩɣa ŋga ɩpɩzɩɣ nɛ ɩma-m?+
Nɛ le lone nɖɩ ɖɩ-taa mɛhɛzɩɣ yɔ ɖɩwɛɛ?»+
2 «Ma-maɣmaɣ me-nesi labɩnɩ pɩtɩŋa payɩ mbʋ yɔ,Nɛ mbʋ pɩlaba nɛ pɩtɩŋa payɩ pɩwɛɛ,» Yehowa yɔɔdʋʋna.+
«Ɛyʋ ɛnɛ mankaɣ cɔnʋʋ:
Weyi eluzuu ɛ-tɩ nɛ ɛwɛɛ laŋwɛɛkɩyɛ taa nɛ mɔn-tɔm yeki nɛ eseliɣ* yɔ.+
3 Weyi ɛkʋʋ nɔ abalɩñɩnʋ yɔ, ɛwɛ ɛzɩ weyi ɛkʋʋ ɛyʋ yɔ.+
Weyi ɛlaɣ heu yɔ, ɛwɛ ɛzɩ weyi ɛpɛlɩɣ haɣ pondone yɔ.+
Weyi ɛhaɣ haɖɛ yɔ, ɛwɛ ɛzɩ weyi ɛkpaɣ afa calɩm se ɛlaɣ yɔ!+
Weyi ɛlaɣ tɩlaaɖɩ kʋhʋlʋmʋʋ se pɩkɛ kɩlaʋ kɩtɔzʋʋ yɔ,+ ɛwɛ ɛzɩ weyi ɛtɩŋɩɣnɩ maajiki tɔm pee yɔɔ nɛ ɛwazɩɣ yɔ.*+
Palɩzɩ pa-maɣmaɣ pa-nʋmɔŋ,Nɛ panɩɣ leleŋ* mbʋ pɩkɛ kʋzɔɔtʋ pʋyʋ yɔ pɩ-yɔɔ.
4 Pʋyɔɔ lɛ mankaɣ lɩzʋʋ nʋmɔŋ weyi ɩ-yɔɔ pɩwɛɛ se mantɩŋna nɛ mɔhɔ pa-nɩŋgbaŋʋʋ yɔ,+Nɛ mbʋ ɖeyi ɖeyi pɩɖʋʋ-wɛ sɔɔndʋ yɔ, mbʋ mankaɣ kɔnʋʋ pɔ-yɔɔ.
Mbʋ pʋyɔɔ yɔ alɩwaatʋ ndʋ mayawa yɔ, nɔɔyʋ ticosi;Alɩwaatʋ ndʋ mɔyɔɔdaa yɔ, pa-taa nɔɔyʋ tiwelisi.+
Paawɛɛ nɛ palakɩ mbʋ pɩfɛyɩ ɖeu mɛ-ɛsɩndaa yɔ,Nɛ palɩzɩ se palakɩ mbʋ pɩtɩkɛdɩnɩ-m yɔ.»+
5 Iwelisi tɔm ndʋ Yehowa yɔɔdʋʋ yɔ, mɩ mba ɛ-tɔm yeki nɛ iseliɣ yɔ:*
«Mi-koobiya mba papaɖɩɣ-mɩ nɛ palɩzɩɣ-mɩ pɛ-hɛkʋ taa ma-hɩɖɛ yɔɔ yɔ, pɔyɔɔdaa se: “Pasa Yehowa!”+
Ɛlɛ ɛkaɣ lɩʋ nɛ ɛkɔnɩ-mɩ taa leleŋNɛ mba fɛyɛ kaɣ kpaʋ.»+
6 Kɔkɔɖɛ naɖɩyɛ wɛɛ nɛ ɖɩlɩɣnɩ tɛtʋ taa, kɔkɔɖɛ naɖɩyɛ wɛɛ nɛ ɖɩlɩɣnɩ templo taa!
Pɩkɛ Yehowa taŋ, weyi ɛwɛɛ nɛ ɛhɛyɩɣ e-koyindinaa mbʋ pɩmʋnɩ-wɛ yɔ.
7 Pʋcɔ nɛ e-hoɣa wɩzasɩ paɣzɩ lɛ, ɛtɛm lʋlʋʋ.+
Pʋcɔ nɛ lʋlʋʋ wɩzasɩ paɣzɩ lɛ, ɛtɛm lʋlʋʋ abalɩbɩɣa.
8 Atɛm tɔm ndʋ nɩʋ wiɖiyi?
Atɛm lakasɩ nzɩ naʋ wiɖiyi?
Ɛzɩ palʋlʋʋ ɛjaɖɛ naɖɩyɛ kɩyakʋ kʋɖʋmʋʋ na?
Yaa ɛzɩ palʋlʋʋ ɛjaɖɛ naɖɩyɛ tam kʋɖʋm taa?
Ɛlɛ Siyɔŋ tɩɩpaɣzɩ nɩʋ lʋlʋʋ wɩzasɩ lɛ, kɩcaŋ nɛ kɩlʋlɩ kɩ-pɩyalaa.
9 «Ɛzɩ manpɩzɩɣ meyele nɛ papaɣzɩ pɩɣa lʋlʋʋ nɛ pʋwayɩ lɛ, menkizi se kataalɩɩ?» Yehowa yɔɔdʋʋna.
«Yaa manpɩzɩɣ meyele nɛ pɩɣa paɣzɩ lɩʋ nɛ pʋwayɩ lɛ, manɖɩɣ nʋmɔʋ se pataalʋlɩ-kɛ?» ñɛ-Ɛsɔ yɔɔdʋʋna.
10 Mɩ nɛ Yeruzalɛm ɩmɛyɩ, nɛ mɩ nɛ kʋ ɩwɛɛ taa leleŋ taa,+ mɩ mba payɩ ɩsɔɔlɩ-kʋ yɔ.+
Mɩ nɛ kʋ ɩmɛyɩ siŋŋ, mɩ mba payɩ ɩwɛ kʋñɔwiye taa kɩ-yɔɔ yɔ,
11 Mbʋ pʋyɔɔ yɔ ɩkaɣ mʋzʋʋ ɛ-laŋɩyɛ hɛzʋʋ hɩɖɛ nɛ ɩñɩɣzɩ camɩyɛ,Nɛ ɩkaɣ ñɔʋ sakɩyɛ nɛ ihiɣ taa leleŋ, samtʋ sɔsɔtʋ ndʋ paha-ɩ yɔ tɩ-yɔɔ.
12 Mbʋ pʋyɔɔ yɔ, tɔm tʋnɛ Yehowa yɔɔdʋʋ:
«Ɩna, menɖiɣni posuu laŋhɛzɩyɛ ɛ-yɔɔ ɛzɩ pɔɔ yɔ+Nɛ malakɩ nɛ ajɛɛ samtʋ kɔɔ ɛ-cɔlɔ ɛzɩ lemeɣa ŋga kosuwa nɛ kawadɩɣ yɔ.+
Ɩkaɣ mʋzʋʋ nɛ pakaɣ-mɩ kpaɣʋ tɩnaɣ yɔɔ.
Nɛ pakaɣ-mɩ sɩʋ nʋmbɔla yɔɔ nɛ peleɣyini-mɩ.*
13 Ɛzɩ ɖoyo hɛzʋʋ ɛ-pɩɣa laŋɩyɛ yɔ,Mbʋ ɖɔɖɔ mankaɣ wɛʋ nɛ mɛhɛzɩɣ mɩ-laŋa;+Nɛ pakaɣ hɛzʋʋ mɩ-laŋa Yeruzalɛm yɔɔ.+
14 Ɩkaɣ pʋnɛ naʋ, nɛ mɩ-laŋa wɛɛ amɛya taa,Mɩ-mɔɔ kaɣ nɛɣdʋʋ ɛzɩ ñɩtʋ kɩfatʋ yɔ.
Nɛ Yehowa lɩmɖʋyaa kaɣ tɩlʋʋ e-nesi,*Ɛlɛ ɛkaɣ e-koyindinaa yɔɔ kuluu.»+
15 «Mbʋ pʋyɔɔ yɔ, Yehowa kaɣ kɔm ɛzɩ miŋ yɔ,+Nɛ ɛ-kɛɛkɛɛnaa wɛ ɛzɩ helim sɔsɔm yɔ,+Se ɛhɛyɩ-wɛ nɛ pana sɔsɔna,Nɛ ɛkalɩ-wɛ nɛ miŋ nzʋlʋma.+
16 Mbʋ pʋyɔɔ yɔ Yehowa kaɣ tɔm hʋʋ nɛ miŋ,Ɛɛɛ, ɛkaɣ kpaɣʋ ɛ-laɣɖɛ tomnasɩ kpeekpe* yɔɔ;Nɛ mba Yehowa kaɣ kʋʋ yɔ pakaɣ ɖɔʋ.
17 «Mba papɩsɩɣ pa-tɩ kiɖeɖema nɛ papɩsɩɣ pa-tɩ kele kele tɩnaa se pasʋʋ kaɖasɩ* taa,+ nzɩ sɩwɛ weyi ɛwɛ hɛkʋ taa yɔ ɛ-wayɩ yɔ, mba pɔtɔkɩ afa nandʋ+ nɛ mbʋ pɩwɛ kiniŋ yɔ nɛ holaa yɔ,+ pa-tɩŋa pakaɣ ɖɩm,» Yehowa yɔɔdʋʋna.
18 «Mansɩm pa-tʋma nɛ pa-lɩmaɣza nɛ pʋyɔɔ lɛ, menɖiɣni kɔm se menkpeɣli ajɛɛ nɛ kʋnʋmɩŋ kpeekpe taa ɛyaa, nɛ pakaɣ kɔm nɛ pana man-samtʋ.»
19 «Mankaɣ ɖʋʋ yʋsaɣ nakɛyɛ pɛ-hɛkʋ taa, nɛ mankaɣ tiyuu mba pesewa nɛ patʋlɩ yɔ pa-taa nabɛyɛ ajɛɛ taa—Tarɩsiisi,+ Puli, nɛ Ludi,+ (ajɛɛ wena atɔʋ tɔʋ yɔ); Tubaalɩ nɛ Yavaanɩ,+ nɛ lɩm hɛkʋ taa tɛtʋ ndɩ ndɩ ndʋ tɩwɛ ɖooo poliŋ yɔ—ajɛɛ wena atɩnɩɩ mɔ-yɔɔ tɔm natʋyʋ yaa atɩna man-samtʋ yɔ; nɛ pakaɣ susuu man-samtʋ ajɛɛ taa.+
20 Pakaɣ kpaɣʋ mi-koobiya kpeekpe nɛ ajɛɛ kpeekpe taa nɛ pɔkɔna+ se pɛkɛ kʋjɔʋ Yehowa; pakaɣ-wɛ kpaɣʋ kpaŋnaŋ yɔɔ, kɛɛkɛɛnaa taa, kɛɛkɛɛnaa mba pohuuzi pɔ-yɔɔ yɔ pa-taa, kpaŋasɩ yɔɔ nɛ aɖaaɖaanaa mba peseɣ lɛɛ lɛɛ yɔ pɔ-yɔɔ, nɛ pakpanɩ man-pʋʋ kiɖeɖeu yɔɔ, Yeruzalɛm, ɛzɩ alɩwaatʋ ndʋ Izrayɛɛlɩ samaɣ kɔŋnɩ ka-haɖɛ ñanaɣ kele kele ñɩŋga taa Yehowa ɖɩɣa taa yɔ,» Yehowa yɔɔdʋʋna.
21 «Mankaɣ ɖɔɖɔ nabɛyɛ lɩzʋʋ nɛ pɛkɛ cɔjɔnaa nɛ malɩzɩ lalaa nɛ pɛkɛ Leevi mba,» Yehowa yɔɔdʋʋna.
22 «Mbʋ pʋyɔɔ yɔ ɛzɩ ɛsɔdaa kɩfalʋʋ nɛ tɛtʋ kɩfatʋ+ ndʋ menɖiɣni labʋ yɔ pɔkɔŋʋʋ wɛʋ mɛ-ɛsɩndaa tam yɔ, mbʋ ɖɔɖɔ mɩ-lʋlʋʋ taa mba* nɛ mɩ-hɩɖɛ kaɣ wɛʋ tam,»+ Yehowa yɔɔdʋʋna.
23 «Nɛ kpaɣnɩ fenaɣ kɩfalaɣ nɛ piwolo fenaɣ kɩfalaɣ nɛ kpaɣnɩ sabaatɩ nɛ piwolo sabaatɩ lɛ,Tomnasɩ kpeekpe* kaɣ sʋʋ nɛ siluŋ mɛ-ɛsɩndaa,»*+ Yehowa yɔɔdʋʋna.
24 «Nɛ pakaɣ lɩʋ nɛ pɔcɔnɩ sɩɖaa tomnasɩ, ɛyaa mba pakaɖɩnɩ-m yɔ po-tomnasɩ;Mbʋ pʋyɔɔ yɔ pɔ-yɔɔ sonzoowa ɩɩkaɣ sɩbʋ,Nɛ miŋ weyi ɩñakɩ-wɛ yɔ ɩɩkaɣ ɖɩm,+Nɛ pakaɣ pɩsʋʋ mbʋ pɩwɛ kiniŋ yɔ ɛyaa kpeekpe* ɛsɩndaa.»
Pɩ-tɛɛ tɔm
^ Yaa «nɛ ɛnɩɣzɩɣ.»
^ Yaa «Nɛ pa-kalɩzaɣ nɩɣ leleŋ.»
^ Pɩpɩzɩɣ pɩkɛ, «ɛwɛ ɛzɩ weyi ɛhaɣ samtʋ sɩʋ yɔ.»
^ Yaa «mɩ mba ɩnɩɣzɩɣ ɛ-tɔm yɔɔ yɔ.»
^ Ɛzɩ ɖoyo sɩɣʋ ɛ-pɩɣa ɛ-nʋmbɔla yɔɔ nɛ eleɣyiɣni-kɛ nɛ ɛkpazɩɣ-kɛ nɛ etisiɣ yɔ.
^ Yaa «e-ɖoŋ.»
^ Yaa «ɛyaa kpeekpe.»
^ Pʋ-tɔbʋʋ se ŋgee kaɖasɩ nzɩ palakɩnɩ tʋmɩyɛ sɩɩnaa latʋ taa yɔ.
^ Piye piye, «mi-ɖomaɣ.»
^ Yaa «Ɛyaa kpeekpe.»
^ Yaa «nɛ sɩsɛ-m.»
^ Piye piye, «tomnasɩ kpeekpe.»
