Izaayii 7:1-25
7 Nɛ Yuuda wiyaʋ Ahaazɩ,+ Uziya pɩyalʋ Yotam pɩyalʋ alɩwaatʋ taa lɛ, Siirii wiyaʋ Reziini nɛ Izrayɛɛlɩ wiyaʋ Peeka,+ Remaliya pɩyalʋ, pakpa se poyooni Yeruzalɛm, ɛlɛ patɩpɩzɩ* nɛ pamʋ-kʋ.+
2 Nɛ powolo peheyi Daviid ɖɩɣa se: «Siirii sɔɔjanaa labɩ nɔɔ nɛ Efrayim sɔɔjanaa.»
Nɛ Ahaazɩ laŋɩyɛ nɛ ɛ-samaɣ laŋɩyɛ paɣzɩ maʋ, ɛzɩ helim makʋʋ nɛ pɩñamsɩɣ laʋ tɛɛ tɩŋ yɔ.
3 Nɛ Yehowa heyi Izaayii se: «Mentendi-ŋ, ña nɛ ña-pɩyalʋ Seyar-Yaasubɩ,*+ ɩlɩɩ nɛ ɩkatɩ Ahaazɩ, hayo kiŋ lɩŋgamʋʋ lɔɔʋ* tɩnaɣ yɔɔ,+ wondu cɔtɩyʋ hayɩm habɩyɛ sɔsɔɖɛ cɔlɔ.
4 Pɩwɛɛ se ŋheyi-i se: “Ðɔkɩ ña-tɩ nɛ ŋcaɣ ɖiɣ ɖiɣ. Sɔɔndʋ ɛtaakpa-ŋ, nɛ ña-laŋɩyɛ ɛtaalɩɩnɩ ɖeekukulisi kila 2 anɛ, wena awɛɛ nɛ alɩɣ ñɔsɩ yɔ, Reziini nɛ Siirii nɛ Remaliya pɩyalʋ pa-pana sɔsɔna yɔɔ.+
5 Mbʋ pʋyɔɔ yɔ Siirii nɛ Efrayim nɛ Remaliya pɩyalʋ pɛkpɛyaa se palakɩ-ŋ kɩdɛkɛdɩm, nɛ pɔtɔŋ se:
6 ‘Iyele nɛ ɖɩkpa Yuuda wayɩ nɛ ɖɩcɩyɩ-kʋ* nɛ ɖɩmʋ-kʋ* nɛ kɩpɩsɩ ɖa-pʋyʋ, nɛ iyele nɛ ɖɩlɩzɩ Tabeyɛɛlɩ pɩyalʋ nɛ ɛkɛ ki-wiyaʋ.’+
7 «“Tɔm tʋnɛ Kɩbaɣlʋ Kɩlɩm Yehowa yɔɔdʋʋ:
‘Pɩɩkaɣ ɖɔm,Nɛ pɩɩkaɣ labʋ mbʋ.
8 Mbʋ pʋyɔɔ yɔ Siirii ñʋʋ lɛ Damaasɩ,Nɛ Damaasɩ ñʋʋ lɛ Reziini.
Pɩnzɩ 65 ɖeke taa lɛPakaɣ yɔkʋʋ Efrayim caɣ caɣ nɛ kɩɩtasɩɣ kɛʋ samaɣ.+
9 Efrayim ñʋʋ lɛ Samaarii,+Nɛ Samaarii ñʋʋ lɛ Remaliya pɩyalʋ.+
Ye ɩfɛyɩnɩ tisuu mbʋ pɩkam camɩyɛ yɔ,Ɩɩkaɣ kam camɩyɛ.’”»
10 Yehowa wolo pɩ-yɔɔ nɛ ɛyɔɔdʋʋnɩ Ahaazɩ se:
11 «Pɔzɩ ñɛ-Ɛsɔ Yehowa se ɛwɩlɩ-ŋ yʋsaɣ nakɛyɛ;+ kapɩzɩɣ nɛ kelimi ɛzɩ Pɩlaʋ* yɔ yaa kakʋyɩ ɛzɩ ɛsɔdaa yɔ.»
12 Ɛlɛ Ahaazɩ yɔɔdɩ se: «Maakaɣ pɔzʋʋ, nɛ maakaɣ takʋʋ Yehowa.»
13 Nɛ Izaayii yɔɔdɩ se: «Mentendi-mɩ, iwelisi, Oo Daviid ɖɩɣa. Ɩtakʋʋ ɛyaa tɛ suuɖu yɔ, pɩtɩmaɣ mbʋ? Pɩwɛɛ se ɩtakɩ ɖɔɖɔ Ɛsɔ tɛ suuɖu?+
14 Pʋyɔɔ lɛ, Yehowa maɣmaɣ kaɣ-mɩ haʋ yʋsaɣ nakɛyɛ: Ɩna! Pɛlɛ kaɣ haɣʋ hoɣa nɛ ɛlʋlɩ abalɩbɩɣa,+ nɛ ɛkaɣ-kɛ yaʋ se Emaanʋyɛɛlɩ.*+
15 Pʋcɔ nɛ katɩlɩ ɛzɩma kekizi kɩdɛkɛdɩm nɛ kalɩzɩ kɩbam lɛ, kakaɣ tɔɔʋ naanum nɛ tʋŋ num.
16 Mbʋ pʋyɔɔ yɔ pʋcɔ nɛ abalɩbɩɣa tɩlɩ ɛzɩma kekizi kɩdɛkɛdɩm nɛ kalɩzɩ kɩbam lɛ, awiya 2 wena ŋseɣ-yɛ sɔɔndʋ yɔ a-ɛjaɖɛ kaɣ caɣʋ kpɛɖɛ.+
17 Yehowa kaɣ kɔnʋʋ ñɔ-yɔɔ nɛ ña-samaɣ yɔɔ nɛ ña-caa ɖɩɣa yɔɔ kaɖɛ alɩwaatʋ ndʋ tɩtɩkɔɔ wiɖiyi, kpaɣnɩ kɩyakʋ ŋgʋ Efrayim lɩzɩ kɩ-tɩ nɛ hɔɔlʋʋ nɛ Yuuda yɔ,+ mbʋ pʋyɔɔ yɔ ɛkaɣ kɔnʋʋ Asiirii wiyaʋ.+
18 «Kɩyakʋ ŋgʋ ki-wiye, Yehowa kaɣ kancʋʋlaɣ hʋlʋʋ nɛ ɛyaa Ejipiti Niili lemisi nzɩ sɩwɛ ɖooo poliŋ yɔ sɩ-taa kɔjɔsɩ nɛ Asiirii ɛjaɖɛ taa tʋŋ,
19 nɛ pa-tɩŋa pakaɣ kɔm nɛ pacaɣ pʋŋ hɛkʋ taa lɔɔŋ taa,* kaaŋ hɛɛnzɩ taa, sɔɔ cɔka tɩŋa yɔɔ, nɛ lona wena a-taa payɩ lɩm wɛɛ yɔ a-taa.
20 «Kɩyakʋ ŋgʋ ki-wiye, Yehowa kaɣ tɩŋnʋʋ hʋnʋʋ ŋgʋ pakɩndɩ Pɔɔ* egeetiye taa yɔ kɩ-yɔɔ, ɛkaɣ tɩŋnʋʋ Asiirii wiyaʋ yɔɔ+ nɛ ɛhʋ ña-ñʋʋ koloŋgolo nɛ ña-nɩŋgbanzɩ yɔɔ hʋndʋ, nɛ hʋnʋʋ ŋgʋ kɩkaɣ hazʋʋ ɖɔɖɔ ña-tandaʋ caɣ caɣ.
21 «Kɩyakʋ ŋgʋ ki-wiye, ɛyʋ kaɣ yebu ɛ-nɔ* halɩñɩnʋ nɔɔyʋ nɛ e-heŋ 2 nɛ pɛwɛɛ wezuu.
22 Nɛ ɛzɩma naalɩm tɔyʋʋ yɔ pʋyɔɔ lɛ, ɛkaɣ tɔɔʋ naanum, mbʋ pʋyɔɔ yɔ mba payɩ pɩkazɩɣ ɛjaɖɛ taa yɔ pakaɣ tɔɔʋ naanum nɛ tʋŋ num.
23 «Kɩyakʋ ŋgʋ ki-wiye, ɖenɖe payɩ viiñi tɩŋ 1 000 mʋwaɣ liidiye pɔɔyɩsɩ 1 000 yɔ, sɔɔ cɔka nɛ ñɩtʋ kɩdɛkɛdɩtʋ pe-ɖeke pakaɣnɩ wɛʋ peeɖe.
24 Tɔŋ nɛ tɔŋ ñɩma ɛyaa kaɣ ɖɔkʋʋ pʋcɔ nɛ powolo peeɖe, mbʋ pʋyɔɔ yɔ sɔɔ cɔka nɛ ñɩtʋ kɩdɛkɛdɩtʋ kaɣ suu ɛjaɖɛ tɩŋa taa.
25 Nɛ pʋŋ weyi payɩ pakpaŋaɣ ɩ-yɔɔ nɛ hakuu yɔ, ŋŋkaɣ-ɩ ñɔtɩnʋʋ, mbʋ pʋyɔɔ yɔ ŋseɣ sɔɔndʋ sɔɔ cɔka nɛ ñɩtʋ kɩdɛkɛdɩtʋ; pʋŋ ɛnɩ ɩkaɣ pɩsʋʋ naŋ ñɩtʋ ɖɩdɔɔyɛ nɛ ɖenɖe heŋ mɩtɩɣ yɔ.»
Pɩ-tɛɛ tɔm
^ Pɩpɩzɩɣ pɩkɛ, «ɛtɩpɩzɩ.»
^ Pʋ-tɔbʋʋ se «Mba pɩkazaa yɔ pe-ɖeke pakaɣnɩ pɩsʋʋ.»
^ Yaa «lɩm lɔɔʋ.»
^ Pɩpɩzɩɣ pɩkɛ, «nɛ ɖɩla nɛ sɔɔndʋ kpa-kʋ.»
^ Yaa «ɖɩtʋlɩ pɔŋ ki-kolonzi taa.» Piye piye, «ɖɩfaɣ-kʋ.»
^ Yaa «Sewɔɔlɩ,» pʋ-tɔbʋʋ se ɛyaa tɩŋa pɩlaʋ. Cɔnɩ Tɔm pee sɔsɔna tɔbʋʋ lɩzʋʋ.
^ Pʋ-tɔbʋʋ se «Ɛsɔ wɛ ɖɔ-cɔlɔ.»
^ Yaa «nɛ pacaɣ lemisi taa.»
^ Pʋ-tɔbʋʋ se Efraatɩ.
^ Nɔ weyi ɛ nɛ e-ɖoŋ nɛ ɛtɩkpadɩyɩ yɔ ɛ-tɔm pɔyɔɔdʋʋ.
