Roma mba 12:1-21
12 Ye mbʋ, koobiya, Ɛsɔ pʋtɔdɩyɛ naʋ yɔɔ lɛ, mentendiɣ-mɩ se ɩcɛlɩ mi-tomnasɩ+ ɛzɩ kɩlaʋ ŋgʋ kɩwɛ wezuu, kɩkɛ kiɖeɖeu+ nɛ kɩkɛdɩnɩ Ɛsɔ yɔ, se pɩsa nɛ ɩlabɩ-ɩ tʋmɩyɛ kiɖeɖeye nɛ mɩ-ñʋʋ taa maɣzɩm.+
2 Nɛ ɩtaatasɩ maɣzɩnʋʋ ɛyaa mba pɛwɛ ɛjaɖɛ ɖɩnɛ ɖɩ-yɔɔ yɔ pɛ-wɛtʋ,* ɛlɛ ɩpɩsɩ mɩ-maɣzɩm kɩfam nɛ ɩpɩzɩ nɛ ɩlɛɣzɩ mɩ-wɛtʋ,+ se pɩsa nɛ mɩ-maɣmaɣ ɩpɩzɩ nɛ ɩtɩlɩ+ Ɛsɔ sɔɔlɩm, pʋ-tɔbʋʋ se mbʋ pɩwɛ ɖeu, pɩmʋna nɛ pɩwɛɛ pilim yɔ.
3 Mbʋ pʋyɔɔ yɔ lootiye nɖɩ paha-m yɔ ɖɩ-yɔɔ lɛ, meheyiɣ mɩ-taa paa weyi se ɛtaamaɣzɩ ɛ-tɩ yɔɔ nɛ pɩcɛzɩ ɛzɩma pɩwɛɛ se ɛmaɣzɩ yɔ;+ ɛlɛ ɛmaɣzɩ nɛ ɛna ɛzɩma ɛpɩzɩɣ nɛ ɛwɛɛnɩ maɣzɩm mbʋ pɩwɛ kele kele yɔ,* nɛ pɩla nɔɔ kʋɖʋmaɣ nɛ tisuu mbʋ Ɛsɔ ha-ɩ* yɔ.+
4 Mbʋ pʋyɔɔ yɔ ɛzɩ pilinzi sakɩyɛ wɛʋ tomnaɣ kʋɖʋmaɣ yɔɔ,+ ɛlɛ pilinzi tɩŋa ɩɩlakɩ tʋmɩyɛ kʋɖʋmɖɩyɛ yɔ,
5 mbʋ ɖɔɖɔ ɖa, paa ɖɩɖɔwa yɔ, ɖɩkɛ tomnaɣ kʋɖʋmaɣ Krɩstʋ taa; ɛlɛ ye pakpaɣ-ɖʋ kʋɖʋm kʋɖʋm yɔ, ɖɩkɛ ɖama pilinzi.+
6 Ye mbʋ, ɖɩwɛnɩ kʋjɔŋ ndɩ ndɩ ɛzɩ palabʋ-ɖʋ lootiye yɔ;+ nɛ pʋyɔɔ lɛ ye pɩkɛ natʋ tɔm yɔɔdʋʋ kʋjɔʋ palabɩ-ɖʋ yɔ, ɖɩyɔɔdɩ-tʋ nɛ pɩmʋnɩ ɖe-tisuu;
7 ye pɩkɛ lɩm ɖʋʋ tʋmɩyɛ naɖɩyɛ yɔ, iyele nɛ ɖɩwɛɛ tʋmɩyɛ nɖɩ ɖɩ-taa; weyi ɛwɩlɩɣ tɔm yɔ, ɛwɛɛ ɛ-tɔm wɩlʋʋ yɔɔ;+
8 weyi ɛkpazɩɣ ɖoŋ* yɔ, ɛkpazɩ ɖoŋ;*+ weyi ɛhaɣ* yɔ, ɛhanɩ laŋɩyɛ faaa;+ weyi eɖiyiɣ* yɔ, eɖiyini kpekpeka;*+ weyi ɛnaɣ pʋtɔdɩyɛ yɔ, ɛla mbʋ nɛ taa leleŋ.+
9 Mɩ-sɔɔlɩm ɛtaakɛ pɩ-tɛɛ nɛ pɩ-yɔɔ sɔɔlɩm.+ Ɩpaɖɩ mbʋ pɩkɛ kɩdɛkɛdɩm yɔ;+ ɩñɔɔnɩ mbʋ pɩkɛ kɩbam yɔ.
10 Koobiye sɔɔlɩm nʋmɔʋ taa lɛ, ɩsɔɔlɩ ɖama nɛ sɔɔlɩm sɔsɔm. Ðama hɩɖɛ ɖʋʋ nʋmɔʋ taa lɛ, ɩkɛ mba pɛɖɛɣ nɔɔ yɔ.*+
11 Ɩla tʋmɩyɛ nɛ kpekpeka,* ɩtaala feendu.*+ Fezuu eyele nɛ ɩwɛɛ kpekpeka.+ Ɩla Yehowa* tʋmɩyɛ ɛzɩ yomaa yɔ.+
12 Ɩmɛyɩ amɛya lidaʋ taa. Ɩɖɔkɩ mɩ-laŋa kʋñɔŋ taa.+ Ɩwɛɛ adɩma yɔɔ tam.+
13 Ɩha ɛyaa kiɖeɖema mbʋ ɩwɛna yɔ ɛzɩ pa-kɩcɛyɩm pɔzʋʋ yɔ.+ Ɩsɔɔlɩ ɛgɔndʋ mʋʋ.*+
14 Ɩwɛɛ mba panazɩɣ-mɩ yɔ pa-wazʋʋ yɔɔ;+ ɩwazɩ nɛ ɩtaalɔ nɔɔ kɩdɛkɛdaɣ.+
15 Mba pɛmɛyɩɣ amɛya yɔ, mɩ nɛ wɛ ɩmɛyɩ amɛya; mba pewiɣ yɔ, mɩ nɛ wɛ iwii.
16 Maɣzɩm mbʋ ɩwɛnɩ mɩ-tɩ yɔɔ yɔ, ɩwɛɛnɩ-pʋ ɖɔɖɔ lalaa yɔɔ; ɩtaaka mɩ-maɣzɩm wondu sɔsɔtʋ yɔɔ,* ɛlɛ iyele nɛ wondu cikpetu hɔmnɩ-mɩ.+ Ɩtaakɛ lɔŋsɩnɖaa mɩ-maɣmaɣ mɩ-ɛsɩndaa.+
17 Ɩtaahɛyɩ nɔɔyʋ kɩdɛkɛdɩm kɩdɛkɛdɩm lone taa.+ Ɩmaɣzɩɣ mbʋ pɩwɛ ɖeu ɛyaa tɩŋa ɛsɩndaa yɔ pɩ-yɔɔ.
18 Ye pɩsaŋ, nɛ ye pɩlɩɣnɩ mɩ-cɔlɔ na yɔ, mɩ nɛ ɛyaa tɩŋa ɩwɛɛ laŋhɛzɩyɛ taa.+
19 Man-kʋsɔɔlaa, mɩ-maɣmaɣ ɩtaakpa kɩmɩyɛ, ɩha nʋmɔʋ pana;*+ mbʋ pʋyɔɔ yɔ pamawa se: «“Matɩnɩ kɩmɩyɛ kpaʋ; makaɣnɩ hɛyʋʋ,” Yehowa* tɔŋna.»+
20 Ɛlɛ «ye ñɔɔsɩ ɛwɩɣ ño-koyindu yɔ, ha-ɩ nɛ ɛtɔɔ, ye lɔkɔtʋ ɛɖɛ-ɩ yɔ, ha-ɩ nabʋyʋ nɛ ɛñɔɔ; mbʋ pʋyɔɔ yɔ ŋŋlakɩ mbʋ lɛ, ŋɖiɣni kpeɣluu miŋ mamala ɛ-ñʋʋ taa.»*+
21 Taayele ña-tɩ nɛ kɩdɛkɛdɩm wabɩ-ŋ, ɛlɛ tɩŋɩɣnɩ kɩbandʋ labʋ yɔɔ nɛ ŋwɛɛ kɩdɛkɛdɩm wabʋ yɔɔ.+
Pɩ-tɛɛ tɔm
^ Yaa «maɣzɩnʋʋ ɛjaɖɛ yɔɔ ɖʋtʋ tʋnɛ tɩ-wɛtʋ; maɣzɩnʋʋ pɩnzɩ sɩnɛ sɩ-wɛtʋ.» Cɔnɩ Tɔm pee sɔsɔna tɔbʋʋ lɩzʋʋ (Ɛjaɖɛ yɔɔ ɖʋtʋ).
^ Yaa «maɣzɩm mbʋ pɩmʋnaa yɔ.»
^ Yaa «Ɛsɔ tayɩnɩ-ɩ.»
^ Yaa «eɖiyi camɩyɛ.»
^ Yaa «ɛɖɛɣ nɔɔ.»
^ Yaa «ɛtayɩɣ.»
^ Yaa «ɛsazɩ.»
^ Yaa «weyi ɛsazɩɣ.»
^ Yaa «mba pacalɩɣ nɩŋgbaŋaɣ kpɛzʋʋ yɔ.»
^ Yaa «nɛ ɛsɩyɛ kɩsɛɛmɩyɛ.»
^ Yaa «Ɩtaawɛɛ nɛ ikiitiɣ yem mɩ-tʋmɩyɛ labʋ taa.»
^ Cɔnɩ Tɔm kɩsɔzɩtʋ A5.
^ Yaa «Ɩmalɩsɩ mɩ-tɩ nɛ camɩyɛ lakasɩ labʋ lalaa.»
^ Yaa «ɩtaaɖʋ mɩ-lɩmaɣza wondu sɔsɔtʋ yɔɔ.»
^ Pʋ-tɔbʋʋ se Ɛsɔ pana.
^ Cɔnɩ Tɔm kɩsɔzɩtʋ A5.
^ Pʋ-tɔbʋʋ se piyeki nɛ ɛhɛzɩ ɛ-tɩ nɛ ɛlɛɣzɩ ɛ-lakasɩ.
