Roma mba 3:1-31
3 Ye mbʋ, ye ɛyʋ ɛkɛ Yuuda tʋ pɩwazɩɣ we, nɛ pɛlɩtʋ wazaɣ lɛ ŋga?
2 Wazasɩ ɖɔ sakɩyɛ. Kajalaɣ lɛ, pe-nesi tɛɛ paɖʋzɩ tɔm kiɖeɖetu ndʋ tɩlɩnɩ Ɛsɔ cɔlɔ yɔ.+
3 Ye mbʋ, suwe ɖɩpɩzɩɣ nɛ ɖɩyɔɔdɩ? Ye Yuuda mba nabɛyɛ ɩfɛyɩnɩ tisuu, ɛzɩma pɛfɛyɩnɩ tisuu yɔ, piyeki se Ɛsɔ ɛtaawɛɛ siɣsiɣ yaa we?
4 Pɩɩlakɩ mbʋ kpa! Ɛlɛ pɩwɛɛ se patɩlɩ se Ɛsɔ kɛ toovenim tʋ,+ paa ɛyaa tɩŋa ɩkɛ cɛtɩyaa yɔ;+ ɛzɩ pamaʋ yɔ se: «Se ŋpɩzɩ nɛ ŋwɩlɩ se ŋwɛ siɣsiɣ ñɔ-yɔɔdaɣ taa nɛ ŋpɩzɩ nɛ ŋwa alɩwaatʋ ndʋ pahʋʋnɩ-ŋ tɔm yɔ.»+
5 Ɛlɛ ye ɖa-lakasɩ nzɩ sɩfɛyɩ siɣsiɣ yɔ siyeki se pana Ɛsɔ siɣsiɣ wɛtʋ yɔ, ndʋ ɖɩyɔɔdʋʋ yɔ? Ye Ɛsɔ ɛwɩlɩɣ ɛ-pana yɔ, pɩwɩlɩɣ se ɛfɛyɩ siɣsiɣ yaa we? (Mɔyɔɔdʋʋ ɛyʋ yɔɔdaɣ.)
6 Aayɩ kpa! Ye pɩtɩkɛ mbʋ yɔ, ɛzɩma Ɛsɔ kaɣ tɔm hʋnʋʋ ɛjaɖɛ?+
7 Ɛlɛ ye mɛn-cɛtɩm eyeki se patɩlɩ Ɛsɔ tɛ toovenim tɔm nɛ pɩkɩlɩ nɛ pɩkɛnɩ-ɩ samtʋ yɔ, ɛbɛ yɔɔ pahʋʋnɩ-m tɔm ɖɔɖɔ ɛzɩ kɩwɛɛkɩm laɖʋ yɔ?
8 Nɛ ɛbɛ yɔɔ ɖɩɩtɛzɩɣ yɔɔdʋʋ se: «Iyele nɛ ɖɩla mbʋ pɩfɛyɩ ɖeu yɔ nɛ mbʋ pɩwɛ ɖeu yɔ pɩkɔɔ» ɛzɩ ɛyaa nabɛyɛ cɛtʋʋnɩ ɖa-taa se ɖɔyɔɔdʋʋnɩ mbʋ yɔ? Pakaɣ hɔm ɛyaa mba pa-nɩŋgbaŋʋʋ ɛzɩ pɩmʋnʋʋ yɔ.+
9 Ye mbʋ, ɖɩmaɣzɩɣ suwe? Ðɛ-wɛtʋ kɩlɩ ɖeu yaa we? Aayɩ, pɩlɩ! Mbʋ pʋyɔɔ yɔ ɖɩɩtɛm yɔɔdʋʋ nɛ pɩɖɛɛ se Yuuda mba nɛ Grɛɛkɩ mba, pa-tɩŋa pɛwɛ kɩwɛɛkɩm nesi tɛɛ;+
10 ɛzɩ pamaʋ yɔ: «Ɛyʋ siɣsiɣ tʋ nɔɔyʋ fɛyɩ, paa ɛyʋ kʋɖʋm maɣmaɣ;+
11 nɔɔyʋ fɛyɩ se ɛwɛnɩ lɛɣtʋ; nɔɔyʋ fɛyɩ se ɛñɩnɩɣ Ɛsɔ.
12 Ɛyaa tɩŋa posini nʋmɔʋ kɩbaŋʋ, pa-tɩŋa paawazɩɣ pʋyʋ; nɔɔyʋ fɛyɩ se ɛwɛnɩ camɩyɛ lakasɩ, paa kʋɖʋm maɣmaɣ.»+
13 «Pe-likiyuu kɛ pɩlaʋ ŋgʋ kɩha nɔɔ haaa yɔ; pepeɣzini pa-nzʋlʋma.»+ «Cakpadanaa sɔtʋ wɛnɩ pɔ-nɔsɩ taa.»*+
14 «Nɛ nɔɔ kɩdɛkɛdaɣ lɔʋ nɛ tɔm ndʋ tɩɖʋʋ ɖɩwɩzɩyɛ yɔ tisu pɔ-nɔsɩ taa.»+
15 «Pa-nɩŋgbanzɩ seɣ lɛɛ lɛɛ se siwolo nɛ sɩkpɛdɩ calɩm.»+
16 «Ðɩzʋʋ nɛ kʋñɔŋ wɛ pa-nʋmɔŋ taa,
17 nɛ paasɩŋ laŋhɛzɩyɛ nʋmɔʋ.»+
18 «Ɛsɔ sɔɔndʋ seu fɛyɩ pɛ-ɛsɩndaa.»+
19 Ðɩsɩm mbʋ se tɔm ndʋ payɩ Paɣtʋ yɔɔdʋʋ yɔ, mba pɛwɛ Paɣtʋ tɛɛ yɔ mba paɣtʋ heyiɣ-tʋ, se pɩsa nɛ paa nɔɔ ŋga lɛ kosu nɛ ɛjaɖɛ tɩŋa mʋna se Ɛsɔ ɛhɔ ɖɩ-nɩŋgbaŋʋʋ.+
20 Pʋyɔɔ lɛ, paakaɣ tɩŋnʋʋ paɣtʋ tʋma yɔɔ nɛ payaa nɔɔyʋ* se siɣsiɣ tʋ ɛ-ɛsɩndaa,+ mbʋ pʋyɔɔ yɔ paɣtʋ yɔɔ pɩtɩŋɩɣna nɛ ɛyʋ tɩlɩ kɩwɛɛkɩm camɩyɛ.+
21 Ɛlɛ lɛɛlɛɛyɔ, pɩnaɣ kpayɩ kpayɩ se pɩtɩkɛ paɣtʋ yɔɔ ɖɔm yekina se ɛyʋ ɛwɛɛ siɣsiɣ Ɛsɔ ɛsɩndaa,+ ɛzɩ Paɣtʋ nɛ Nayaa palɩzʋʋ aseɣɖe yɔ,+
22 ɛɛɛ, mba pɛwɛnɩ tisuu yɔ, pɛwɛɣ siɣsiɣ Ɛsɔ ɛsɩndaa pɩtɩŋnɩ tisuu mbʋ pɛwɛnɩ Yesu Krɩstʋ yɔɔ yɔ pɩ-yɔɔ. Mbʋ pʋyɔɔ yɔ tʋkaɣ nakɛyɛ fɛyɩ ɛyaa hɛkʋ taa.+
23 Toovenim taa lɛ, pa-tɩŋa palabɩ kɩwɛɛkɩm nɛ paatalɩɣ Ɛsɔ samtʋ,+
24 nɛ Ɛsɔ tɩŋnɩ e-lootiye+ yɔɔ nɛ ɛlabɩ-wɛ kʋjɔʋ*+ nɛ ɛyaa-wɛ se siɣsiɣ tɩnaa pɩtɩŋnɩ ɛzɩma Krɩstʋ Yesu kɩhɛyʋʋ pʋ-ñʋʋ taa holi-wɛ yɔ pɩ-yɔɔ.+
25 Ɛsɔ kpaɣ-ɩ nɛ ɛcɛlɩ ɛzɩ kɩlaʋ ŋgʋ kɩhɩzɩɣ kɩwɛɛkɩm yɔ*+ pɩtɩŋnɩ tisuu mbʋ ɛyʋ wɛɣnɩ ɛ-calɩm yɔɔ yɔ pɩ-yɔɔ.+ Ɛsɔ labɩ mbʋ se ɛwɩlɩ ɛ-maɣmaɣ e-siɣsiɣ wɛtʋ, mbʋ pʋyɔɔ yɔ ɛ-pʋtɔdɩyɛ naʋ* yɔɔ lɛ, ekpeɣaɣ kɩwɛɛkɩm mbʋ paalaba nɛ pɩɖɛɛ yɔ.
26 Ɛɛlabɩ mbʋ se ɛwɩlɩ ɛ-maɣmaɣ e-siɣsiɣ wɛtʋ+ alɩwaatʋ tʋnɛ tɩ-taa, se pɩsa nɛ ɛwɛɛ siɣsiɣ halɩ pɩkpɛndɩnɩ alɩwaatʋ ndʋ ɛyaɣ ɛyʋ weyi ɛwɛnɩ tisuu Yesu yɔɔ yɔ se siɣsiɣ tʋ yɔ.+
27 Ye mbʋ, lɩmaɣzɩyɛ naɖɩyɛ wɛɛ se ɛyʋ pɩzɩɣ nɛ ɛkʋndɩ ɖɩ-yɔɔ yaa we? Lɩmaɣzɩyɛ naɖɩyɛ fɛyɩ. Paɣtʋ ndʋ yɔɔ ɖɩfɛyɩnɩ lɩmaɣzɩyɛ naɖɩyɛ se ɖɩkʋndɩ? Tʋma ñɩndʋ na?+ Aayɩ, toovenim lɛ tisuu paɣtʋ ɛɛhaɣnɩ-ɖʋ nʋmɔʋ.
28 Mbʋ pʋyɔɔ yɔ ɖɩmaɣzɩɣ se tisuu yɔɔ pakpakɩɣ ɛyʋ se ɛkɛ siɣsiɣ tʋ, ɛlɛ pɩtɩkɛ paɣtʋ tʋma yɔɔ.+
29 Yaa Yuuda mba ɖeke tɛ Ɛsɔ ɛkɛnaa?+ Ɛtɩkɛ ɖɔɖɔ ajɛɛ taa mba tɛ Ɛsɔ yaa we?+ Ɛɛɛ, ɛkɛ ɖɔɖɔ ajɛɛ taa mba tɛ Ɛsɔ.+
30 Ɛsɔ kɛ kʋɖʋm+ nɛ pʋyɔɔ lɛ, ɛkaɣ yaʋ mba pɛpɛlɩ-wɛ yɔ se siɣsiɣ tɩnaa+ tisuu yɔɔ, nɛ mba patɩpɛlɩ-wɛ yɔ ɛkaɣ-wɛ yaʋ se siɣsiɣ tɩnaa+ pe-tisuu yɔɔ.
31 Ye mbʋ, ɖɩtɩŋɩɣnɩ ɖe-tisuu yɔɔ se ɖɩɖɩzɩ paɣtʋ yaa we? Aayɩ, pɩlɩ! Ɛlɛ ɖɩtɩnɩɣ paɣtʋ yɔɔ kɩtɩnʋ.+
Pɩ-tɛɛ tɔm
^ Yaa «po-ndomee tɛɛ.»
^ Piye piye, «tomnaɣ nakɛyɛ.»
^ Yaa «falaa kʋjɔʋ.»
^ Yaa «ɛzɩ kɩlaʋ ŋgʋ kihuuzuu kɩwɛɛkɩm yɔɔ yɔ; ɛzɩ ceɣu kɩlaʋ yɔ.» Cɔnɩ Tɔm pee sɔsɔna tɔbʋʋ lɩzʋʋ (Kɩwɛɛkɩm hɩzʋʋ).
^ Yaa «ɛ-tɩ ɖɔkʋʋ.»
