Ruti 4:1-22
4 Nɛ Bowaazɩ kpa tɛtʋ nɔnɔɔ taa+ nɛ ɛcaɣ peeɖe. Pɩkɛdaa lɛ, Elimelɛɛkɩ hɔʋ taa tʋ weyi ɛñɔtɩnɩ-ɩ kpam yɔ, weyi ɛ-tɔm Bowaazɩ kaayɔɔdaa yɔ+ ɛkɔɔ nɛ ɛɖɛɣ. Ðɩnɛ ɛlɛ Bowaazɩ heyi-i se: «Akele, kɔɔ nɛ ŋcaɣ cɩnɛ.» Nɛ ɛlɛ wolo nɛ ɛcaɣ.
2 Nɛ Bowaazɩ yaa tɛtʋ taa ɛzʋtʋyaa 10+ nɛ eheyi-wɛ se: «Ɩcaɣ cɩnɛ.» Nɛ paba caɣ.
3 Nɛ Bowaazɩ heyi-i se:+ «Pɩwɛɛ se Nawomii weyi ɛlɩnɩ Mowaabʋ+ egeetiye taa nɛ ɛkɔɔ yɔ, ɛpɛdɩ ɖo-koobu Elimelɛɛkɩ tɛtʋ.+
4 Pʋyɔɔ mamaɣzaa se pɩwɛɛ se meyele nɛ ŋtɩlɩ-tʋ nɛ meheyi-ŋ se: “Yabɩ-tʋ tɛtʋ taa mba nɛ man-samaɣ taa ɛzʋtʋyaa ɛsɩndaa.+ Ye ŋsɔɔlaa se ŋɖaɣnɩ-tʋ yabʋ yɔ, ɖaɣnɩ-tʋ yabʋ. Ɛlɛ ye ŋtɩsɔɔlɩ se ŋɖaɣnɩ-tʋ yabʋ yɔ, heyi-m nɛ mana, mbʋ pʋyɔɔ yɔ ŋwɛnɩ waɖɛ se ŋɖaɣnɩ-tʋ yabʋ, nɛ ña-wayɩ lɛ mɔkɔŋna.”» Nɛ ɛlɛ kitini-i se: «Mɔnsɔɔlaa se manɖaɣnɩ-tʋ yabʋ.»+
5 Ðɩnɛ ɛlɛ Bowaazɩ yɔɔdɩ se: «Kɩyakʋ ŋgʋ ŋyakɩ tɛtʋ ndʋ Nawomii cɔlɔ yɔ, pɩwɛɛ ɖɔɖɔ se ŋyabɩ-tʋ sɩɖʋ halʋ Mowaabʋ tʋ Ruti cɔlɔ, se pɩsa nɛ sɩɖʋ hɩɖɛ wɛɛ ɛ-ñɩm yɔɔ.»+
6 Peeɖe weyi pɩɩwɛɛ se ɛɖaɣnɩ-tʋ yabʋ yɔ ɛyɔɔdaa se: «Maapɩzɩɣ nɛ manɖaɣnɩ-tʋ yabʋ, pɩtaakɛdɩ nɛ mɛwɛɛkɩ ma-ñɩm. Maha-ŋ waɖɛ nɖɩ mɛwɛna se manɖaɣnɩ-tʋ yabʋ yɔ; yabɩ-tʋ, mbʋ pʋyɔɔ yɔ maapɩzɩɣ nɛ manɖaɣnɩ-tʋ yabʋ.»
7 Caanaʋ taa, Izrayɛɛlɩ taa, ye nabɛyɛ ɩñɩnɩɣ se pɔcɔnɩ tɔm ndʋ titukuuni waɖɛ nɖɩ nɔɔyʋ wɛna se ɛɖaɣnɩ nabʋyʋ yabʋ yaa ɛla kɩlɛɣzʋʋ nakʋyʋ nɛ pañɩnɩɣ se pañɩɣ niye tɩ-yɔɔ yɔ ti-ɖeɖe yɔ, ɛzʋnɔ palakaɣ: Pɩwɛɛ se lɛlʋ ɛhɔzɩ ɛ-naataŋgbaɖɛ+ nɛ ɛcɛlɩ-ɖɩ hɔɔlʋʋ lɛɛkʋ taa tʋ, mbʋ palakaɣ Izrayɛɛlɩ taa nɛ pawɩlɩɣ se ɛyaa nabɛyɛ nɩnɩ ɖama tɔm natʋyʋ yɔɔ.
8 Pʋyɔɔ alɩwaatʋ ndʋ weyi ɛwɛnɩ waɖɛ se ɛɖaɣnɩ tɛtʋ yabʋ yɔ eheyi Bowaazɩ se: «Yabɩ-tʋ» lɛ, ɛhɔzɩ ɛ-naataŋgbaɖɛ.
9 Ðɩnɛ ɛlɛ, Bowaazɩ heyi ɛzʋtʋyaa nɛ samaɣ kpeekpe se: «Ɩkɛ aseɣɖe tɩnaa+ sɔnɔ se mayakɩ Nawomii cɔlɔ Elimelɛɛkɩ ñɩm kpeekpe nɛ Kiliyooni nɛ Maalɔɔnɩ pa-ñɩm kpeekpe.
10 Mankpakɩɣ ɖɔɖɔ Maalɔɔnɩ halʋ, Mowaabʋ tʋ Ruti se ɛpɩsɩ ma-halʋ, se pɩsa nɛ sɩɖʋ hɩɖɛ wɛɛ ɛ-ñɩm yɔɔ,+ ɖɩnɛ ɛlɛ sɩɖʋ hɩɖɛ ɛɛkaɣ ɖɩm e-koobiya hɛkʋ taa nɛ tɛtʋ taa ɛyaa hɛkʋ taa.* Ɩkɛ aseɣɖe tɩnaa sɔnɔ.»+
11 Ðɩnɛ ɛlɛ, samaɣ ŋga payɩ kaawɛ tɛtʋ nɔnɔɔ taa yɔ nɛ ɛzʋtʋyaa pɔyɔɔdɩ se: «Ðɩkɛ aseɣɖe tɩnaa! Yehowa eyele nɛ halʋ weyi eɖiɣni sʋʋ ña-ɖɩɣa taa yɔ, ɛwɛɛ ɛzɩ Rasɛɛlɩ nɛ Leeya yɔ, mba pa-naalɛ pama Izrayɛɛlɩ ɖɩɣa yɔ.+ Tɛtɛ nɛ piɖeni-ŋ Efrata taa+ nɛ ŋwɛɛnɩ hɩɖɛ kɩbanɖɛ* Bɛtɩlɛhɛm taa.+
12 Piya nzɩ Yehowa yeki se asɛyɩbɩɣa kanɛ kalʋlɩ-ŋ yɔ,+ tɛtɛ nɛ siyele nɛ ña-ɖɩɣa wɛɛ ɛzɩ Perɛɛzɩ+ ɖɩɣa yɔ, Perɛɛzɩ weyi Tamaarɩ lʋlɩ Yuuda yɔ.»
13 Mbʋ Bowaazɩ kpaɣ Ruti nɛ ɛlɛ pɩsɩ ɛ-halʋ. Ɛsʋʋnɩ-ɩ, nɛ Yehowa yele nɛ ɛlɛ haɣ hoɣa nɛ ɛlʋlɩ abalɩbɩɣa.
14 Ðɩnɛ ɛlɛ, halaa heyi Nawomii se: «Pasa Yehowa, ɛnʋ weyi sɔnɔ, etikizi se ŋwɛɛnɩ weyi pɩwɛɛ se ɛɖaɣnɩ-ŋ yabʋ yɔ. Tɛtɛ nɛ posusi ɛ-hɩɖɛ Izrayɛɛlɩ taa!
15 Abalɩbɩɣa ŋga, keyeba nɛ ŋɖaɣnɩ wɛʋ wezuu nɛ kakaɣ ñɔ-yɔɔ cɔnʋʋ ña-akpadɩyɩtʋ taa, mbʋ pʋyɔɔ yɔ ño-wolu lʋlɩnɩ-kɛ, ño-wolu weyi ɛsɔɔlɩ-ŋ+ nɛ ɛmʋ ñɩm ñɛ-ɛsɩndaa nɛ pɩkɩlɩ pɩyalaa 7 yɔ.»
16 Nɛ Nawomii kpaɣ pɩɣa ɛ-nɔkɔyʋʋ taa nɛ ɛcɔnɩ kɔ-yɔɔ.*
17 Ðɩnɛ ɛlɛ, halaa mba pɛwɛ pɩ-cɔlɔ yɔ payaa-kɛ hɩɖɛ. Pɔyɔɔdaa se: «Palʋlɩ Nawomii abalɩbɩɣa nakɛyɛ,» nɛ payaa-kɛ se Obɛɛdɩ.+ Ɛnʋ lʋlɩnɩ Daviid caa Yesee.+
18 Perɛɛzɩ+ lʋlʋʋ taa mba* yɔ: Perɛɛzɩ lʋlɩ Ɛsɩrɔɔnɩ;+
19 Ɛsɩrɔɔnɩ lʋlɩ Raam; Raam lʋlɩ Aminadaabɩ;+
20 Aminadaabɩ+ lʋlɩ Naasɔɔnɩ; Naasɔɔnɩ lʋlɩ Salɩmɔɔnɩ;
21 Salɩmɔɔnɩ lʋlɩ Bowaazɩ; Bowaazɩ lʋlɩ Obɛɛdɩ;
22 Obɛɛdɩ lʋlɩ Yesee+ nɛ Yesee lʋlɩ Daviid.+
Pɩ-tɛɛ tɔm
^ Piye piye, «nɛ e-lone nɔnɔɔ taa.»
^ Piye piye, «nɛ ŋsusi hɩɖɛ naɖɩyɛ.»
^ Yaa «nɛ ɛpɩsɩ ka-pʋnʋʋyʋ.»
^ Piye piye, «Perɛɛzɩ kpaɖɩŋ.»
