Sofonii 1:1-18
1 Yehowa tɔm tʋnɛ tɩtalɩnɩ Sofonii* weyi ɛkɛ Kuusii pɩyalʋ, Gedaliya pɩyalʋ, Amariya pɩyalʋ, Ezekiyaasɩ pɩyalʋ yɔ; tɩtalɩ-ɩ Yuuda wiyaʋ Yoziyaasɩ+ weyi ɛkɛ Amɔɔnɩ+ pɩyalʋ yɔ ɛ-alɩwaatʋ taa:
2 «Mankaɣ ɖɩzʋʋ mbʋ payɩ pɩwɛ tɛtʋ yɔɔ yɔ caɣ caɣ, Yehowa yɔɔdʋʋna.+
3 Mankaɣ ɖɩzʋʋ ɛyʋ nɛ kpɩnɛ.
Mankaɣ ɖɩzʋʋ ɛsɔdaa sumasɩ nɛ teŋgu taa kpakpasɩ,+Nɛ mbʋ pituuluu yɔ*+ nɛ pɩkpɛndɩnɩ ɛyaa kɩdɛkɛdaa;Nɛ mankaɣ kʋsʋʋ ɛyaa tɛtʋ yɔɔ, Yehowa yɔɔdʋʋna.
4 Mankaɣ sezuu me-nesi Yuuda yɔɔNɛ mba payɩ pɛwɛ Yeruzalɛm yɔ pɔ-yɔɔ,Nɛ mankaɣ hɩzʋʋ lone ɖɩnɛ ɖɩ-taa mbʋ payɩ pɩkazɩ Baalɩ+ yɔ,Agbaaɣdaa ɛsɔnaa cɔjɔnaa hɩla nɛ pɩkpɛndɩnɩ cɛtɩm cɔjɔnaa,+
5 Nɛ mba poluŋuu kuduyuŋ ñʋŋ taa se pɛsɛɛ ɛsɔdaa yoyaa yɔ,+Nɛ mba poluŋuu nɛ poɖukini Yehowa se pɛwɛɣ siɣsiɣ ɛ-ɛsɩndaa+Ɛlɛ peɖiɣni ɖuunuu Malɩkam se pɛwɛɣ siɣsiɣ ɛ-ɛsɩndaa yɔ;+
6 Nɛ mba peyebi Yehowa wayɩ tɩŋʋʋ yɔ+Nɛ mba paañɩnɩɣ Yehowa yaa paapɔzʋʋ se patɩlɩ ɛ-lɩmaɣza yɔ.»+
7 Isu ɖiɣ ɖiɣ Kɩbaɣlʋ Kɩlɩm Yehowa ɛsɩndaa, mbʋ pʋyɔɔ yɔ Yehowa kɩyakʋ ñɔtaa.+
Yehowa ñɔɔzɩ kɩlaʋ nakʋyʋ; ɛpɩsɩ mba ɛya-wɛ yɔ kiɖeɖema.
8 «Yehowa kɩlaʋ kɩyakʋ wiye lɛ, mankaɣ pɔzʋʋ akɔnta awumbiya,Wiyaʋ pɩyalaa,+ nɛ mba payɩ posu agbaaɣdaa wondu yɔ.
9 Kɩyakʋ ŋgʋ ki-wiye lɛ, mankaɣ pɔzʋʋ akɔnta mba payɩ pakpaɣ tendene* yɔɔ yɔ,Mba peyeki nɛ puuyaɣ lakasɩ nɛ cɛtɩm suu pa-ñʋʋdʋ ɖɩɣa taa yɔ.
10 Kɩyakʋ ŋgʋ ki-wiye lɛ,Pakaɣ nɩʋ kubuka nakɛyɛ taŋ, kalɩnɩ Kpakpasɩ Nɔnɔɔ+ cɔlɔ,Peenduu kubusi kaɣ lɩnʋʋ tɛtʋ Kooka Naalɛ ñɩŋga+ taa,Nɛ pakaɣ nɩʋ yɔkʋʋ sɔsɔm taŋ piyisi yɔɔ, Yehowa yɔɔdʋʋna.
11 Ipeendi, mɩ Makɩtɛɛsɩ* mba,Mbʋ pʋyɔɔ yɔ pakʋ tadɩyɛ laɖaa tɩŋa;*Mba payɩ pamaɣzɩɣ liidiye yɔ, paɖɩzɩ-wɛ.
12 Alɩwaatʋ ndʋ tɩ-taa lɛ, mankaɣ kpaɣʋ kanɖʋnaa nɛ mañɩnɩ camɩyɛ Yeruzalɛm taa,Nɛ mankaɣ pɔzʋʋ akɔnta mba pacaɣ yem kaalɛyɩtʋ* nɛ pɔyɔɔdʋʋ pa-laŋa taa se:
“Yehowa ɛɛkaɣ labʋ kɩbandʋ, nɛ ɛɛkaɣ labʋ kɩdɛkɛdɩm” yɔ.+
13 Pakaɣ lazʋʋ pa-ñɩm nɛ pakaɣ yɔkʋʋ pa-ɖɩsɩ.+
Pakaɣ maʋ ɖɩsɩ, ɛlɛ paakaɣ sʋʋ sɩ-taa;Pakaɣ sɔʋ viiñi tɩŋ, ɛlɛ paakaɣ ñɔʋ ɩ-tɛ vɛɛ.+
14 Yehowa kɩyakʋ sɔsɔʋ ñɔtaa!+
Kɩñɔtaa nɛ kɩwɛɛ nɛ kɩkɔŋ lɛɛ lɛɛ siŋŋ!*+
Yehowa kɩyakʋ kɔkɔɖɛ wɛ ñaŋ.+
Ki-wiye lɛ, you laɖʋ makɩ kubusi.+
15 Kɩyakʋ ŋgʋ kɩkɛ pana sɔsɔna kɩyakʋ,+Siziŋ nɩʋ nɛ laŋwɛɛkɩyɛ kɩyakʋ,+Tɛʋ sɔsɔʋ ŋgʋ kɩnɩɣnɩ helim yɔ nɛ ɖɩzʋʋ kɩyakʋ,Cɩkpɛndʋʋ kɩyakʋ nɛ kɩyakʋ ŋgʋ pɩkaɣ yuu kpimm yɔ,+Mɩndʋ nɛ cɩkpɛndʋʋ sɔsɔʋ kpimm kɩyakʋ,+
16 Nɔndɔʋ yaʋ nɛ you kubuka mabʋ kɩyakʋ,+Se poyooni tɛtʋ ɖoŋ ñɩndʋ nɛ kɔnanaa yɔɔ tilima kʋkʋya.+
17 Mankaɣ kɔnʋʋ laŋwɛɛkɩyɛ ɛyaa yɔɔ,Nɛ pakaɣ ɖɔm ɛzɩ yʋlʋmaa yɔ,+Mbʋ pʋyɔɔ yɔ Yehowa payʋsɩnaa.+
Pakaɣ pa-calɩm mɩzʋʋ ɛzɩ mʋzʋʋ yɔ,Nɛ po-tomnasɩ* ɛzɩ pɩndʋ yɔ.+
18 Pe-liidiye yaa pe-sika ɛɛkaɣ pɩzʋʋ nɛ pɩya pa-ñʋʋ Yehowa pana sɔsɔna kɩyakʋ wiye;+Mbʋ pʋyɔɔ yɔ e-kpekpeka miŋ kaɣ ñaɣʋ tɛtʋ kpeekpe,+Mbʋ pʋyɔɔ yɔ ɛkaɣ kɔnʋʋ ɖɩzʋʋ, ɖɩzʋʋ mbʋ pɩcaɣ sɔɔndʋ kpem yɔ, tɛtʋ yɔɔ ɛyaa kpeekpe yɔɔ.»+
Pɩ-tɛɛ tɔm
^ Pʋ-tɔbʋʋ se «Yehowa mɛsaa; Yehowa sɩ camɩyɛ.»
^ Pɩtʋʋ fɛyɩ se pɩkɛ wondu yaa tʋma wena alakɩ nɔɔ kʋɖʋmaɣ nɛ sɩɩnaa latʋ yɔ.
^ Pɩpɩzɩɣ pɩkɛ wiyaʋ kewiyaɣ kpelaɣ tendene.
^ Pɩkɛɣnɩ Yeruzalɛm hɔɔlʋʋ ŋgʋ kɩñɔtɩnɩ Kpakpasɩ Nɔnɔɔ yɔ.
^ Piye piye, «posuli tadɩyɛ laɖaa tɩŋa nɔsɩ.»
^ Yaa «mba pɛwɛ ɛzɩ vɛɛ ŋgʋ kɩ-tɛɛtʋ tiba nɛ tɩcaɣ yɔ.»
^ Yaa «kɩwɛɛ nɛ kikpidisiɣ siŋŋ.»
^ Piye piye, «pa-taa lotu.»
