Yakubu takayaɣ 3:1-18
3 Mon-koobiya, mɩ-taa sakɩyɛ ɩtaapɩsɩ wɩlɩyaa, ɩsɩm mbʋ se pakaɣ-ɖʋ tɔm hʋnʋʋ siŋŋ nɛ pɩkɩlɩ.+
2 Mbʋ pʋyɔɔ yɔ pituuluu* ɖa-tɩŋa tam sakɩyɛ.+ Ye piituuluu nɔɔyʋ yɔɔdaɣ taa yɔ, ɛkɛ ɛyʋ weyi ɛtalɩ pilim yɔ, weyi ɛpɩzɩɣ nɛ ɛɖɔkɩ ɖɔɖɔ e-tomnaɣ kpeekpe yɔ.
3 Ye ɖɩɖʋʋ ñɩɣtʋ kpaŋnaŋ nɔsɩ taa se ɖɩla nɛ ɩñam-ɖʋ yɔ, ɖiɖiyiɣ ɖɔɖɔ i-tomnaɣ kpeekpe.
4 Ɩcɔnɩ ɖɔɖɔ mɛlɛnaa: Paa papaɣlaa siŋŋ nɛ paa helim ɖoŋ ñɩmbʋ etuyuuni-wɛ yɔ, ɖaʋ cikpeluu nakʋyʋ yɔɔ mɛlɛ sayʋ tɩŋɩɣna nɛ eɖiyiɣ-kʋ nɛ ewokini ɖenɖe ɛsɔɔlaa se ewolo yɔ.
5 Mbʋ ɖɔɖɔ, nzʋlʋmɩyɛ kɛ tomnaɣ hɔɔlʋʋ cikpeluu nakʋyʋ, paa mbʋ yɔ ɖɩkpazɩɣ ɖɩ-tɩ siŋŋ. Ɩna ɛzɩma miŋ cikpeŋ pɩzɩɣ nɛ ɩñaɣ laʋ sɔsɔʋ yɔ!
6 Nzʋlʋmɩyɛ kɛ ɖɔɖɔ miŋ.+ Nzʋlʋmɩyɛ sɩŋnɩ mbʋ pɩfɛyɩ siɣsiɣ yɔ pɩ-ɛjaɖɛ ɖo-tomnaɣ pilinzi taa, mbʋ pʋyɔɔ yɔ ɖipisiɣ tomnaɣ tɩŋa+ nɛ ɖɩñaɣzɩɣ wezuu caɣʋ kpeekpe* miŋ, nɛ Gehena* ñaɣzɩɣnɩ-ɖɩ miŋ.
7 Mbʋ pʋyɔɔ yɔ, paa tɛtɛgbɩnɛ nɖɩ nɛ paa sumaɣ ŋga nɛ paa kpɩnɛ nɖɩ ɖituu yɔ, nɛ paa teŋgu taa kpɩnɛ nɖɩ lɛ, ɛyaa pɩzɩɣ nɛ pahayɩsɩ-ɖɩ nɛ ɖɩña, nɛ mbʋ palaba ɖɔɖɔ.
8 Ɛlɛ nɔɔyʋ ɛɛpɩzɩɣ nɛ ɛhayɩsɩ nzʋlʋmɩyɛ nɛ ɖɩña. Ðɩkɛ mbʋ ɛyʋ ɛɛpɩzɩɣ nɛ ɛwɛɛnɩ ɖoŋ pɩ-yɔɔ kɛlɛʋ yɔ nɛ ɖɩkɛ kɩdɛkɛdɩyɛ, sɔtʋ ndʋ tɩkʋʋ yɔ tisu ɖɩ-taa ɖo.+
9 Ðɩtɩŋɩɣnɩ ɖɩ-yɔɔ nɛ ɖɩsaŋ Yehowa,* weyi ɛkɛ Caa yɔ, ɛlɛ ɖɩtɩŋɩɣnɩ ɖɩ-yɔɔ ɖɔɖɔ nɛ ɖɩlɔʋ nɔɔ kɩdɛkɛdaɣ mba palɩzɩ-wɛ nɛ «pɛwɛɛ ɛzɩ Ɛsɔ» yɔ pɔ-yɔɔ.+
10 Nɔɔ kʋɖʋmaɣ ŋga ka-taa wazaɣ nɛ nɔɔ kɩdɛkɛdaɣ lɔʋ palɩɣna.
Mon-koobiya, pɩtɩmʋna se pɩwɛɛ nɛ pɩlakɩ mbʋ.+
11 Lɩm leleŋ ñɩmbʋ* nɛ lɩm ñaŋ ñɩmbʋ paapɩzɩɣ nɛ palɩɩnɩ hiɖe kʋɖʋmɖɩyɛ taa, yaa we?
12 Mon-koobiya, fiigi tɩʋ ɛɛpɩzɩɣ nɛ kɩlʋlɩ oliivi pee, yaa viiñi ɛɛpɩzɩɣ nɛ kɩlʋlɩ fiigi pee, yaa we?+ Hiɖe nɖɩ ɖɩ-taa lɩm wɛ ɖɔm yɔ, lɩm mbʋ pɩwɛ leleŋ yɔ pɩɩpɩzɩɣ ɖɔɖɔ nɛ pɩlɩɩnɩ ɖɩ-taa.
13 Mɩ-taa anɩ wɛ lɔŋ nɛ ɛwɛɛnɩ tɔm taa nɩʋ lɛɣtʋ? Ɛtɩŋnɩ ɛ-ɖɔnɛ kɩbanɖɛ yɔɔ nɛ ɛwɩlɩ tʋma wena ɛlabɩ-yɛ nɛ hɛɛɛ wɛtʋ ndʋ tɩlɩnɩ lɔŋsɩnɖɛ taa yɔ.
14 Ɛlɛ, ye ɩwɛnɩ sʋsɩ kadadayaɣ+ nɛ nɔɔhɔnɖɛ*+ mɩ-laŋa taa yɔ, ɩtaawɛɛ nɛ ɩkpazɩɣ mɩ-tɩ+ nɛ ɩcɛtɩɣnɩ toovenim taa.
15 Pɩtɩkɛnɩ lɔŋsɩnɖɛ nɖɩ ɖɩlɩnɩ hayo yɔ; pɩkɛ tɛtʋ yɔɔ ñɩnɖɛ,+ kpɩna ñɩnɖɛ, aleewaa ñɩnɖɛ.
16 Mbʋ pʋyɔɔ yɔ ɖenɖe sʋsɩ nɛ nɔɔhɔnɖɛ* pɛwɛɛ yɔ, peeɖe ɖɔɖɔ yem yem lakasɩ nɛ paa kɩdɛkɛdɩm lakasɩ nzɩ lɛ, sɩkaɣ wɛʋ.+
17 Ɛlɛ lɔŋsɩnɖɛ nɖɩ ɖɩlɩnɩ hayo yɔ, kajalaɣ lɛ, ɖɩwɛ kele kele,+ pʋwayɩ lɛ ɖɩkɔŋnɩ laŋhɛzɩyɛ,+ ɖɩnɩɣ tɔm taa,+ ɖitisiɣ faaa nɛ ɖɩñaŋ, pʋtɔdɩyɛ naʋ nɛ pee kɩbana posu ɖɩ-taa ɖo,+ ɖɩɩɖʋʋ tʋkaɣ ɛyaa taa,+ ɖɩɩlakɩ pɩ-tɛɛ nɛ pɩ-yɔɔ lakasɩ.+
18 Pɩtasɩ lɛ, poɖuu siɣsiɣ wɛtʋ piye laŋhɛzɩyɛ taa,+ mba palakɩ laŋhɛzɩyɛ yɔ pɔ-yɔɔ.*+
Pɩ-tɛɛ tɔm
^ Yaa «piyiɣdiɣ.»
^ Piye piye, «ɖɩñaɣzɩɣ lʋlʋʋ kpeɖe.»
^ Cɔnɩ Tɔm pee sɔsɔna tɔbʋʋ lɩzʋʋ.
^ Cɔnɩ Tɔm kɩsɔzɩtʋ A5.
^ Yaa «Lɩm kɩbam.»
^ Pɩpɩzɩɣ pɩkɛ, «piɖeni men-ɖeke lɩmaɣza.»
^ Pɩpɩzɩɣ pɩkɛ, «piɖeni men-ɖeke lɩmaɣza.»
^ Pɩpɩzɩɣ pɩkɛ, «mba palakɩ laŋhɛzɩyɛ yɔ, poɖuu siɣsiɣ wɛtʋ piye laŋhɛzɩyɛ taa.»
