Yakubu takayaɣ 5:1-20
5 Lɛɛlɛɛyɔ, iwelisi, mɩ ñɩm tɩnaa, iwii nɛ ipeendi kʋñɔmɩŋ weyi ɩkɔŋ mɩ-yɔɔ yɔ ɩ-yɔɔ.+
2 Mɩ-ñɩm ɖazaa, nɛ ŋgbam* tɔɔ mi-tokonaa.+
3 Kalɩkɔdaɣ kpa mi-sika nɛ mi-liidiye, nɛ pa-kalɩkɔdaɣ kaɣ lɩzʋʋ aseɣɖe mɩ-yɔɔ nɛ kakaɣ tɔɔʋ mi-tomnaɣ. Mbʋ ɩcazaa nɛ ikpeɣli yɔ pɩkaɣ wɛʋ ɛzɩ miŋ yɔ kɛdɛzaɣ kɩyakɩŋ taa.+
4 Ɩna! Kɩhɛyʋʋ ŋgʋ ɩpɛm tʋmlaɖaa mba pakʋm mɩ-hayɩm taa tɔɔnaɣ yɔ, kɩwɛ kubusi mabʋ yɔɔ, nɛ kubusi nzɩ kʋnɖaa makɩ se paya pa-ñʋʋ yɔ, sɩtalɩ yoyaa tɛ Yehowa* nɩŋgbaaŋ taa.+
5 Ɩcaɣ leleŋ nɩʋ wezuu nɛ wezuu ŋgʋ kiɖeni mi-ɖeke yɔ tɛtʋ yɔɔ. Ɩlaba nɛ mɩ-laŋa ɖʋ num kʋgʋʋ kɩyakʋ wiye.+
6 Ɩkʋ ɛyʋ siɣsiɣ tʋ tɔm, nɛ ɩtɛ ɩkʋ-ɩ. Ɛzɩ ɛɛkaɖɩɣnɩ-mɩ?
7 Pʋyɔɔ lɛ, koobiya, ɩwɛɛ suuɖu nɛ pɩkɔɔ pɩtalɩ Kɩbaɣlʋ wɛʋ alɩwaatʋ taa.+ Ɩna! Haɖʋ wɛɣ nɛ ɛɖaŋɩɣ tataa pee wena awɛ wazaɣ yɔ, nɛ ɛɖʋʋ suuɖu nɛ pɩkɔɔ pɩtalɩ alɩwaatʋ ndʋ kajalaɣ tɛʋ nɛ wayɩ wayɩ tɛʋ panɩɣ yɔ.+
8 Mɩ ɖɔɖɔ ɩɖʋ suuɖu;+ ɩla nɛ mɩ-laŋa ka camɩyɛ, mbʋ pʋyɔɔ yɔ Kɩbaɣlʋ wɛʋ alɩwaatʋ ñɔtaa.+
9 Koobiya, itaamidini ɖama, se pɩsa nɛ pataahʋʋnɩ-mɩ tɔm.+ Ɩna! Tɔm Hʋyʋ sɩŋ nɔnɔsɩ taa.
10 Koobiya, tɩ ɖɔkʋʋ kʋñɔŋ taa nɛ suuɖu ɖʋʋ+ hɔɔlʋʋ taa lɛ, iyele nɛ nayaa mba pɔyɔɔdɩ tɔm Yehowa* hɩɖɛ taa yɔ,+ pɛkɛnɩ-mɩ kɩɖaʋ.+
11 Ɩna! Ðɩkpakɩɣ mba pɔɖɔkɩ pa-laŋa yɔ+ se pɛkɛ koboyaɣ tɩnaa.* Ɩnɩ Yɔɔb laŋɩyɛ ɖɔkʋʋ tɔm+ nɛ ɩna mbʋ Yehowa* yeba nɛ pɩtɛmnɩ-ɩ yɔ,+ nɛ iɖiɣzinaa se Yehowa* wɛnɩ sɔɔlɩm sɔsɔm nɛ ɛkɛ pʋtɔdɩyɛ nayʋ.+
12 Kɔzɩ kɔzɩ lɛ, mon-koobiya, iyele ɖuuu; paa pɩtɩɩkɛ ɛsɔdaa yaa tɛtʋ yaa pʋyʋ lɛlʋ yɔ, itaaɖuuni pɩ-taa nabʋyʋ. Ɛlɛ iyele nɛ mɩ-tɛ «Ɛɛɛ» kɛ ɛɛɛ nɛ mɩ-tɛ «Aayɩ» kɛ aayɩ,+ se pɩsa nɛ ɩtaamʋnɩ tɔm hʋʋ.
13 Mɩ-taa nɔɔyʋ tɔkɩ kʋñɔŋ na? Ɛwɛɛ adɩma yɔɔ.+ Nɔɔyʋ wɛ taa leleŋ taa? Ɛma keɣsi.+
14 Pɩwɩɣ mɩ-taa nɔɔyʋ? Ɛyaa ɛgbɛyɛ taa ɛzʋtʋyaa ɛ-cɔlɔ,+ nɛ patɩmɩ ɛ-yɔɔ, nɛ pataa-ɩ num+ Yehowa* hɩɖɛ taa.
15 Nɛ tisuu adɩma kaɣ yebu nɛ kʋdɔndʋ* yɔɔ cɛ, nɛ Yehowa* kaɣ-ɩ kʋsʋʋ. Pɩtasɩ lɛ, ye ɛlabɩ kɩwɛɛkɩm yɔ, pakaɣ-ɩ pʋ kpeɣu.
16 Pʋyɔɔ lɛ, iheyi ɖama mɩ-kɩwɛɛkɩm kaɣlaa+ nɛ ɩtɩmɩ ɖama yɔɔ nɛ mɩ-yɔɔ cɛ. Ɛyʋ siɣsiɣ tʋ adɩma* wɛnɩ ɖoŋ siŋŋ.*+
17 Eliya kaakɛ ɛyʋ ɛzɩ ɖa yɔ, paa mbʋ yɔ alɩwaatʋ ndʋ ɛtɩmaa siŋŋ se tɛʋ ɛtaanɩɩ yɔ, tɛʋ tɩnɩɩ ɛjaɖɛ taa pɩnzɩ naadozo nɛ fenasɩ loɖo.+
18 Nɛ ɛtasɩ tɩmʋʋ, nɛ tɛʋ nɩɩ nɛ tɛtʋ lʋlɩ pee.+
19 Mon-koobiya, ye pipeɣzi mɩ-taa nɔɔyʋ nɛ eposini toovenim nɛ lɛlʋ pɩsɩnɩ-ɩ yɔ,
20 ɩtɩlɩ se weyi ɛlɩzɩɣ kɩwɛɛkɩm laɖʋ ɛ-nʋmɔʋ kilebuu taa yɔ,+ ɛkaɣ yabʋ kɩwɛɛkɩm laɖʋ ɛnʋ ɛ-ñʋʋ* sɩm taa nɛ ɛkaɣ huuzuu kɩwɛɛkɩm sakɩyɛ yɔɔ.+
Pɩ-tɛɛ tɔm
^ Grɛɛkɩ taa lɛ, pɩkɛ fiidiviŋ weyi ɩtɔkɩ wondu yɔ.
^ Cɔnɩ Tɔm kɩsɔzɩtʋ A5.
^ Cɔnɩ Tɔm kɩsɔzɩtʋ A5.
^ Cɔnɩ Tɔm kɩsɔzɩtʋ A5.
^ Cɔnɩ Tɔm kɩsɔzɩtʋ A5.
^ Yaa «pɛkɛ mba pawazɩ-wɛ yɔ.»
^ Cɔnɩ Tɔm kɩsɔzɩtʋ A5.
^ Cɔnɩ Tɔm kɩsɔzɩtʋ A5.
^ Pɩpɩzɩɣ pɩkɛ, «weyi pɩnɩ-ɩ yɔ.»
^ Yaa «tenduu.»
^ Piye piye, «wɛnɩ ɖoŋ sɔsɔŋ alɩwaatʋ ndʋ pɩlakɩ tʋmɩyɛ yɔ.»
^ Yaa «ɛ-kalɩzaɣ ñʋʋ.»
