Yereemii 1:1-19
1 Hilikiya weyi ɛɛkɛ cɔjɔnaa taa nɔɔyʋ Anatɔɔtɩ,+ Bɛnjamɛɛ ɛjaɖɛ taa yɔ, ɛ-pɩyalʋ Yereemii* tɔm kɔyɔ.
2 Yehowa tɔm talɩ-ɩ Amɔɔnɩ+ pɩyalʋ Yoziyaasɩ,+ weyi ɛkɛ Yuuda wiyaʋ yɔ ɛ-alɩwaatʋ taa, e-kewiyitu tɔɔʋ pɩnaɣ 13 ñɩŋga taa.
3 Tɩtalɩ-ɩ ɖɔɖɔ Yoziyaasɩ pɩyalʋ Yehoyakim,+ weyi ɛkɛ Yuuda wiyaʋ yɔ ɛ-alɩwaatʋ taa, pɩkɔɔ nɛ pɩtalɩ alɩwaatʋ ndʋ Yoziyaasɩ pɩyalʋ Zedekiya+ weyi ɛkɛ Yuuda wiyaʋ yɔ ɛ-pɩnaɣ 11 ñɩŋga tɛma yɔ, pɩkɔɔ nɛ pɩtalɩ alɩwaatʋ ndʋ pɛkɛzɩ Yeruzalɛm tɛtʋ fenaɣ 5 ñɩŋga taa yɔ.+
4 Yehowa tɔm talɩ-m se:
5 «Pʋcɔ nɛ mamaɣ-ŋ ño-ɖoo lotu taa lɛ, mɛntɛmɩ-ŋ sɩm,*+Nɛ pʋcɔ nɛ palʋlʋʋ-ŋ lɛ,* mɛntɛmɩ-ŋ pɩsʋʋ kiɖeɖeu.*+
Meyeba nɛ ŋkɛ ajɛɛ tɛ nayʋ.»
6 Ɛlɛ mɔyɔɔdɩ se: «Hayɩ, Kɩbaɣlʋ Kɩlɩm Yehowa!
Maasɩŋ yɔɔdʋʋ,+ mbʋ pʋyɔɔ yɔ mɛnkɛ abalɩbɩɣa* yem.»+
7 Peeɖe Yehowa heyi-m se:
«Taayɔɔdɩ se: “Mɛnkɛ abalɩbɩɣa yem.”
Mbʋ pʋyɔɔ yɔ pɩwɛɛ se ŋwolo mba payɩ pɔ-cɔlɔ mentiyiɣ-ŋ yɔ pɔ-cɔlɔ,Nɛ pɩwɛɛ se ŋyɔɔdɩ ndʋ payɩ manɖʋʋ-ŋ paɣtʋ se ŋyɔɔdɩ yɔ.+
8 Sɔɔndʋ ɛtaakpa-ŋ nɛ pɛ-wɛtʋ ndʋ tɩnaɣ ɛsa yɔɔ yem yɔ,+Mbʋ pʋyɔɔ yɔ “mɛwɛ ñɔ-cɔlɔ se maya ña-ñʋʋ,”+ Yehowa yɔɔdʋʋna.»
9 Nɛ Yehowa sezi e-nesi nɛ etukuni mɔ-nɔɔ.+ Nɛ Yehowa heyi-m se: «Manɖʋ mɔn-tɔm ñɔ-nɔɔ taa.+
10 Na, sɔnɔ maha-ŋ ɖoŋ ajɛɛ yɔɔ nɛ kewiyisi yɔɔ, se ŋkpɛzɩ nɛ ŋyɔkɩ, se ŋɖɩzɩ nɛ ŋtuzi nɛ ŋpɛɖɩ, se ŋma nɛ ŋsɔ.»+
11 Yehowa tɔm tasɩ-m talʋʋ se: «Yereemii, ɛbɛ ŋnaɣ?» Nɛ mɔyɔɔdɩ se: «Manaɣ amandɩ tɩʋ nakʋyʋ* piliŋa.»
12 Yehowa heyi-m se: «Ŋna camɩyɛ, mbʋ pʋyɔɔ yɔ mancaɣnɩ mɛ-ɛsa camɩyɛ pɩlɩɩnɩ mɔn-tɔm yɔɔ, se meyele nɛ tɩla.»
13 Yehowa tɔm talɩ-m nabʋlɛ ɖeɖe se: «Ɛbɛ ŋnaɣ?» Nɛ moncosi se: «Manaɣ ɖeɣa* nakɛyɛ keɖiɣni wasʋʋ,* nɛ kɔ-nɔɔ kpilaa kpaɣnɩ hayo kiŋ nɛ ŋtikini hadɛ kiŋ.»
14 Nɛ Yehowa heyi-m se:
«Asɛyʋʋ kaɣ yɔkʋʋ nɛ hayo kiŋNɛ kɩlɩɩ ɛjaɖɛ taa mba kpeekpe yɔɔ.+
15 Mbʋ pʋyɔɔ yɔ tɔm tʋnɛ Yehowa yɔɔdʋʋ: “Mɛwɛɛ nɛ mayaɣ hayo kiŋ kewiyisi hɔŋ tɩŋa,+Nɛ ɩkaɣ kɔm; paa wiyaʋ weyi lɛ ɛkaɣ pɔʋ e-kewiyaɣ kpelaɣYeruzalɛm nɔnɔsɩ taa,+Pɩmalɩnɩ ki-kolonzi kpɛɛɛNɛ pɩmalɩnɩ Yuuda tɛtʋ ndɩ ndɩ tɩŋa.+
16 Nɛ mahʋnɩ-wɛ tɔm nɛ mankpaɣ lɩmaɣza wena pa-kañatʋ lakasɩ kpeekpe yɔɔ yɔ, mankaɣ-wɛ heyuu a-tɔm,Mbʋ pʋyɔɔ yɔ pɔlɔ-m,+Nɛ palaɣ ɛsɔnaa lalaa nɛ kɩlaŋ ñɔsɩ kpaɣ+Nɛ poluŋuu pa-maɣmaɣ pe-nesi tɛɛ tʋma tɛɛ.”+
17 Ɛlɛ pɩwɛɛ se ŋñɔɔzɩ ña-tɩ nɛ ŋla mbʋ pɩpɔzʋʋ yɔ,*Nɛ pɩwɛɛ se ŋkʋyɩ nɛ ŋsɩŋ nɛ ŋheyi-wɛ tɔm ndʋ payɩ manɖʋ-ŋ paɣtʋ se ŋheyi-wɛ yɔ.
Taase-wɛ sɔɔndʋ,+Pɩtɩkɛ mbʋ yɔ manɖʋʋ-ŋ sɔɔndʋ pɛ-ɛsɩndaa.
18 Mbʋ pʋyɔɔ yɔ sɔnɔ manpɩsɩ-ŋ tɛtʋ ɖoŋ ñɩndʋ,Ñɩɣyʋʋ tilimiye, nɛ ñɩɣyʋʋ kɩsɛɛmʋʋ kolonzi se ŋkaɖɩnɩ ɛjaɖɛ kpeekpe,+Se ŋkaɖɩnɩ Yuuda awiya nɛ kɩ-awumbiya,Se ŋkaɖɩnɩ kɩ-cɔjɔnaa nɛ ɛjaɖɛ taa ɛyaa.+
19 Nɛ pɩtʋʋ fɛyɩ se pakaɣ-ŋ yonuu,Ɛlɛ paakaɣ-ŋ wabʋ,Mbʋ pʋyɔɔ yɔ “mɛwɛ ñɔ-cɔlɔ+ se maya ña-ñʋʋ,” Yehowa yɔɔdʋʋna.»
Pɩ-tɛɛ tɔm
^ Pʋ-tɔbʋʋ pɩzɩɣ pɩkɛ «Yehowa kpazɩɣ ɛyʋ.»
^ Yaa «lɩzʋʋ.»
^ Piye piye, «pʋcɔ nɛ ŋlɩɣnɩ lotu taa lɛ.»
^ Yaa «mɛntɛmɩ-ŋ lɩzʋʋ nɛ hɔɔlʋʋ.»
^ Yaa «evebu.»
^ Piye piye, «Manaɣ weyi ɛcaɣnɩ ɛ-ɛsa yɔ.»
^ Yaa «ɖeɣa ŋga kɔ-nɔɔ walaa yɔ.»
^ Piye piye, «ɖeɣa ŋga kɔ-yɔɔ pohosuu yɔ,» pʋ-tɔbʋʋ se pɛwɛɛ nɛ pɛfɛtɩɣ miŋ kɛ-tɛɛ.
^ Piye piye, «se ŋta ña-tɩnaɣ taa.»
