Yereemii 14:1-22
14 Tɔm ndʋ tɩlɩnɩ Yehowa cɔlɔ nɛ tɩtalɩ Yereemii pɩlɩɩnɩ wɩlɩŋ yɔɔ yɔ, ndʋ yɔ:+
2 Yuuda wɛ kʋñɔwiye taa,+ nɛ kɩ-nɔnɔsɩ caɣ kʋñɔŋ.*
Sɩyɔlʋʋ tataa, sɩwɛ ɛsɩñɩŋɩyɛ taa,Nɛ kubuka nakɛyɛ kpaɣnɩ Yeruzalɛm taa.
3 Nɛ pa-ñʋndɩnaa tiyiɣ pa-lɩmɖʋyaa* se pañɩnɩ lɩm.
Powoki lɩm hila* cɔlɔ nɛ paanaɣ lɩm.
Papɩsɩɣnɩ pa-ñanzɩ kpɛɖɛ.
Fɛyɛ kpa-wɛ nɛ pitibi-wɛ yɔɔɔ,Nɛ pohuuzuu pa-ñʋŋ yɔɔ.
4 Tɛtʋ ya pɛŋla,Mbʋ pʋyɔɔ yɔ tɛʋ ɛɛnɩɣ ɛjaɖɛ taa;+ pʋyɔɔ lɛ,Haɖaa wɛ nɩɣzɛ taa nɛ pohuuzi pa-ñʋŋ yɔɔ.
5 Halɩ nam ɖɛɣ nɛ eyeki ɛ-pɩɣa ŋga ɛlʋlaa pitileɖi yɔ lakʋ taaMbʋ pʋyɔɔ yɔ ñɩtʋ fɛyɩ.
6 Tɛyɛ kpaŋasɩ sɩŋɩɣ piyisi nzɩ sɩ-yɔɔ wɛ kpɛɖɛ yɔ sɩ-yɔɔ.
Sifeziɣ helim faka faka ɛzɩ tɛyɛ hasɩ yɔ;Sɩ-ɛsa piyiɣ mbʋ pʋyɔɔ yɔ ñɩtʋ fɛyɩ.+
7 Paa ɖa-maɣmaɣ ɖa-kɩwɛɛkɩm ɛwɩlɩɣ se ɖɩɖɔ wɛɛ yɔ,Hayɩ Yehowa, ña-hɩɖɛ yɔɔ lɛ, la nabʋyʋ.+
Mbʋ pʋyɔɔ yɔ ɖa-lakasɩ nzɩ sɩfɛyɩ siɣsiɣ yɔ sɩɖɔwa,+Nɛ ña ɖɩyʋsɩnaa.
8 Hayɩ Izrayɛɛlɩ lidaʋ, ɛ-Ñʋʋ Yaɖʋ+ kʋñɔŋ alɩwaatʋ taa,Ɛbɛ yɔɔ ŋwɛ ɛzɩ ɛgɔm yɔ ɛjaɖɛ taa,Ɛbɛ yɔɔ ŋwɛ ɛzɩ nʋmɔɖɔnʋ weyi ɖoo taa hɩnʋʋ ɖeke yɔɔ ɛsɩŋɩɣ yɔ?
9 Ɛbɛ yɔɔ ŋwɛ ɛzɩ abalʋ weyi pɩɖɩɣzɩ-ɩ siŋŋ yɔ?
Ɛbɛ yɔɔ ŋwɛ ɛzɩ abalʋ ɖoŋ tʋ weyi ɛɛpɩzɩɣ ñʋʋ yabʋ yɔ?
Mbʋ pʋyɔɔ yɔ ŋwɛ ɖɛ-hɛkʋ taa, hayɩ Yehowa,+Nɛ payaɣ-ɖʋ nɛ ña-hɩɖɛ.+
Taalɔ-ɖʋ.
10 Tɔm tʋnɛ Yehowa yɔɔdʋʋ samaɣ kanɛ kɔ-yɔɔ: «Pɔsɔɔlɩ yotuu;+ patɩkpa pa-nɩŋgbanzɩ.+ Pʋyɔɔ Yehowa taa ɛɛlakɩ-wɛ nɛ leleŋ.+ Lɛɛlɛɛyɔ ɛkaɣ tɔzʋʋ pa-kɩdɛkɛdɩm yɔɔ nɛ ɛpɔzɩ-wɛ pa-kɩwɛɛkɩm akɔnta.»+
11 Nɛ Yehowa heyi-m se: «Taatɩmɩ nɛ ŋpɔzɩ se kɩbandʋ ɛkɔɔ samaɣ kanɛ kɔ-yɔɔ.+
12 Alɩwaatʋ ndʋ pɔhɔkʋʋ nɔɔ yɔ, maawelisiɣ pe-tenduu,+ nɛ palaɣ kɩlaŋ kɩñaɣzɩŋ nɛ tɔɔnaɣ pee kɩlaŋ lɛ, pɩɩkɛdɩɣnɩ-m,+ mbʋ pʋyɔɔ yɔ mankaɣ tɩŋnʋʋ laɣɖɛ yɔɔ, ñɔɔsɩ yɔɔ, nɛ ɛyaa kɩzɩkʋ* yɔɔ nɛ manɖɩzɩ-wɛ.»+
13 Peeɖe mɔyɔɔdaa se: «Hayɩ, Kɩbaɣlʋ Kɩlɩm Yehowa! Na, nayaa wɛɛ nɛ peheyiɣ-wɛ se: “Ɩɩkaɣ naʋ laɣɖɛ, nɛ ñɔɔsɩ ɛɛkaɣ mɩ-yɔɔ kɔm, ɛlɛ mankaɣ-mɩ haʋ laŋhɛzɩyɛ siŋŋ lone ɖɩnɛ ɖɩ-taa.”»+
14 Nɛ Yehowa heyi-m se: «Nayaa ɖiɣni yɔɔdʋʋ cɛtɩm natʋ tɔm ma-hɩɖɛ taa.+ Mantitiyi-wɛ, mantɩɖʋ-wɛ paɣtʋ nɛ mantɩyɔɔdɩnɩ-wɛ.+ Natʋ tɔm ndʋ pɛwɛɛ nɛ posusuu-mɩ yɔ, ndʋ lɛ cɛtɩm natʋ nɛ tɩyɩtʋ lakasɩ nzɩ sɩfɛyɩ wazaɣ nakɛyɛ yɔ nɛ pa-maɣmaɣ pa-ajitu tɔm ndʋ poluba yɔ.*+
15 Pʋyɔɔ lɛ, tɔm tʋnɛ Yehowa yɔɔdʋʋ nayaa mba pɛwɛɛ nɛ pɔyɔɔdʋʋ natʋ tɔm ma-hɩɖɛ taa yɔ pɔ-yɔɔ, mba mantitiyi-wɛ ɛlɛ pɔyɔɔdʋʋ se laɣɖɛ naɖɩyɛ ɛɛkaɣ kɔm yaa ñɔɔsɩ nasɩyɩ ɛɛkaɣ lɩʋ ɛjaɖɛ ɖɩnɛ ɖɩ-taa yɔ: “Nayaa mba, pakaɣ-wɛ kʋʋ nɛ laɣɖɛ nɛ ñɔɔsɩ kaɣ-wɛ kʋʋ nɛ pasɩ.+
16 Nɛ ɛyaa mba nayaa mba pɛwɛɛ nɛ posusuu-wɛ natʋ tɔm ndʋ yɔ, ñɔɔsɩ nɛ laɣɖɛ yɔɔ lɛ, pakaɣ-wɛ lɔʋ Yeruzalɛm habɛɛ yɔɔ, nɛ nɔɔyʋ ɛɛkaɣ wɛʋ se epim-wɛ+—pa-maɣmaɣ, pa-halaa, pa-pɩyalaa, yaa pɛ-pɛlaa—mbʋ pʋyɔɔ yɔ mankaɣ pɔ-yɔɔ pɩyʋʋ asɛyʋʋ ŋgʋ kɩmʋnɩ-wɛ yɔ.”+
17 «Pɩwɛɛ se ŋheyi-wɛ tɔm tʋnɛ:
“Ɛsɩtɛɣlɩm ekpe mɛ-ɛsɩndaa ɖoo nɛ wɩsɩ, pɩtaasɩŋ,+Mbʋ pʋyɔɔ yɔ man-samaɣ pɛlɛ weyi ɛtɩtɩlɩ abalʋ yɔ pɔyɔkɩ-ɩ nɛ papʋʋtɩ-ɩ caɣ caɣ,+Nɛ paɖʋ-ɩ heŋ siŋŋ.
18 Ye malɩwa nɛ mowolo ñɩtʋ taa nɛ mɔncɔna yɔ,Manaɣ mba pakʋ-wɛ nɛ laɣɖɛ yɔ!+
Nɛ ye mansʋ tɛtʋ taa yɔ,Manaɣ kʋdɔmɩŋ weyi ñɔɔsɩ kɔnaa yɔ!+
Mbʋ pʋyɔɔ yɔ nayʋ nɛ cɔjɔ pɔcɔ ɛjaɖɛ nɖɩ paasɩŋ-ɖɩ yɔ ɖɩ-taa.”»+
19 Ɛzɩ ŋlɔ Yuuda caɣ caɣ, yaa Siyɔŋ lɩ-ŋ sɔŋ?*+
Ɛbɛ yɔɔ ŋmabɩ-ɖʋ, nɛ pɩɩtasɩɣ sam se pawaa-ɖʋ?+
Ðɩɩwɛɛ nɛ ɖɩɖaŋɩɣ se laŋhɛzɩyɛ ɛkɔɔ, ɛlɛ pʋyʋ kɩbanʋ nɔɔyʋ tɩkɔɔ,Ðɩɩwɛɛ nɛ ɖɩɖaŋɩɣ se waʋ alɩwaatʋ ɛtalɩ, ɛlɛ sɔɔndʋ sɔsɔtʋ wɛna!+
20 Hayɩ Yehowa, ɖɩsɩm ɖa-kañatʋ lakasɩ,Nɛ ɖɔ-cɔzɔnaa kɩdɛkɛdɩm,Mbʋ pʋyɔɔ yɔ ɖɩyʋsɩnɩ-ŋ.+
21 Ña-hɩɖɛ yɔɔ lɛ, taalɔ-ɖʋ;+Taani ñe-kewiyaɣ kpelaɣ sɔsɔɔ.
Tɔzɩ ɛgbɛyɛ nɖɩ ŋɖʋnɩ-ɖʋ yɔ ɖɩ-yɔɔ, nɛ taacɛbɩ-ɖɩ.+
22 Ɛzɩ ajɛɛ sɩɩnaa mba pɛfɛyɩ wazaɣ nakɛyɛ yɔ papɩzɩɣ pala nɛ tɛʋ nɩɩ?
Yaa ɛsɔdaa pɩzɩɣ nɛ kɩla kɩ-maɣmaɣ nɛ tɛŋ sɔsɔŋ nɩɩ?
Ɛzɩ pɩtɩkɛ ñe-ɖeke koŋ ñapɩzɩɣna nɛ ŋla mbʋ, hayɩ Yehowa ɖɛ-Ɛsɔ?+
Nɛ ɖɩtaɣ-ŋ liu,Mbʋ pʋyɔɔ yɔ ñe-ɖeke koŋ ñalabɩnɩ pɩtɩŋa payɩ mbʋ yɔ.
Pɩ-tɛɛ tɔm
^ Yaa «kɩ-nɔnɔsɩ cadaa.»
^ Yaa «pe-cikpema.»
^ Yaa «lɔɔŋ; pɔŋ weyi pohuyaa nɛ paɖʋʋ lɩm ɩ-taa yɔ.»
^ Yaa «kʋdɔŋ.»
^ Piye piye, «pa-maɣmaɣ pa-laŋa tɛ cɛtɩm.»
^ Yaa «lɩ ña-kalɩzaɣ sɔŋ?»
