Yereemii 15:1-21
15 Nɛ Yehowa heyi-m se: «Paa Moyizi nɛ Samɩyɛɛlɩ paasɩŋ mɛ-ɛsɩndaa yɔ,+ maakaɣ naʋ samaɣ kanɛ ka-pʋtɔdɩyɛ.* Ðɔɔnɩ-wɛ mɛ-ɛsɩndaa. Yele nɛ pɛɖɛɛ.
2 Nɛ ye pɔpɔzɩ-ŋ se: “Le pɩwɛɛ se ɖiwolo?” yɔ, pɩwɛɛ se ŋheyi-wɛ se: “Tɔm tʋnɛ Yehowa yɔɔdʋʋ:
‘Weyi ɛmʋnɩ kʋdɔŋ ŋgʋ kɩkɔŋnɩ sɩm yɔ, pɩwɛɛ se pɩtɛmnɩ-ɩ nɛ kʋdɔŋ ŋgʋ kɩkɔŋnɩ sɩm yɔ!
Weyi ɛmʋnɩ laɣɖɛ yɔ, pɩwɛɛ se pɩtɛmnɩ-ɩ nɛ laɣɖɛ!+
Weyi ɛmʋnɩ ñɔɔsɩ yɔ, pɩwɛɛ se pɩtɛmnɩ-ɩ nɛ ñɔɔsɩ!
Nɛ weyi ɛmʋnɩ yomiye taa wobu yɔ, pɩwɛɛ se pɩtɛmnɩ-ɩ nɛ yomiye taa wobu!’”+
3 «“Nɛ mankaɣ-wɛ tiyinuu asɛyɩŋ 4:*+ laɣɖɛ se ɖɩkʋ, hasɩ se situu nɛ sɩɖɛna, nɛ ɛsɔdaa sumasɩ nɛ tɛtʋ yɔɔ tɛtɛgbɩna se pɔtɔɔ nɛ paɖɩzɩ,+ Yehowa yɔɔdʋʋna.
4 Nɛ mankaɣ yebu nɛ pɛkɛ sɔɔndʋ pʋyʋ tɛtʋ yɔɔ kewiyisi kpeekpe,+ Ezekiyaasɩ pɩyalʋ Manaasee yɔɔ, Yuuda wiyaʋ, mbʋ ɛlabɩ Yeruzalɛm taa yɔ pʋyɔɔ.+
5 Akaɣ naʋ ña-pʋtɔdɩyɛ, Oo Yeruzalɛm?
Akaɣ nɩʋ ñe-siziŋ?
Nɛ akaɣ sɩŋʋʋ se ɛpɔzɩ ña-alaafɩya yɔɔ?”
6 “Ŋɖɛwa nɛ ŋyebi-m,” Yehowa yɔɔdʋʋna.+
“Ŋwobi pɩ-yɔɔ nɛ ŋhaɣ-m siɣye.*+
Pʋyɔɔ lɛ mankaɣ sezuu me-nesi ñɔ-yɔɔ nɛ manɖɩzɩ-ŋ.+
Pɩnɩ-m nɛ ña-pʋtɔdɩyɛ naʋ.*
7 Nɛ mankaɣ-wɛ falʋʋ nɛ pɛɛlɩ kela ñɩŋgʋ ɛjaɖɛ nɔnɔsɩ taa.
Mankaɣ yebu nɛ papɩsɩ mba pɛfɛyɩnɩ piya yɔ.+
Mankaɣ ɖɩzʋʋ man-samaɣ,Mbʋ pʋyɔɔ yɔ pekizaa se paayeki pa-nʋmɔŋ nɛ papɩsɩ.+
8 Pe-lelaa kaɣ ɖɔʋ mɛ-ɛsɩndaa nɛ pɩkpaɖɩ teŋgunaa nɔsɩ yɔɔ kañɩŋa.
Mankaɣ yebu nɛ ɖɩzɩyʋ nɔɔyʋ kɔɔ pa-wayɩ wɩsɩ siɣu alɩwaatʋ taa, ɖoonaa nɛ evebiya pa-wayɩ.
Mankaɣ kɔnʋʋ ñam ñam lakasɩ nɛ sɔɔndʋ sɔsɔtʋ pɔ-yɔɔ tuda.
9 Halʋ weyi ɛlʋlɩ piya 7 yɔ efiɣnaa;Efeziɣ* kaɖɛ nɛ kaɖɛ.
Ɛ-wɩsɩ ɖʋ alɩwaatʋ ndʋ evemiye tɩtɛmta yɔ,Nɛ pɩkɔnɩ fɛyɛ nɛ pʋtɔdɩyɛ wɛtʋ.”*
“Nɛ pa-taa mba pɩkazɩ pazɩ yɔ,Mankaɣ-wɛ kpaɣʋ nɛ mɛncɛlɩ po-koyindinaa laɣɖɛ,” Yehowa yɔɔdʋʋna.»+
10 Hayɩ mon-ɖoo, pɩtɔɔ-m, mbʋ pʋyɔɔ yɔ ŋlʋlɩ-m,+Mɛnkɛ ɛyʋ weyi ɛjaɖɛ kpeekpe caɣ-ɩ tɔm nɛ ɖiyouni-i yɔ.
Mantɩkɩndɩ nɔɔyʋ nabʋyʋ nɛ nɔɔyʋ tɩkɩndɩ-m nabʋyʋ ɖɔɖɔ;Ɛlɛ pa-tɩŋa pɔlɔʋ nɔɔ kɩdɛkɛdaɣ mɔ-yɔɔ.
11 Yehowa yɔɔdaa se: «Pɩtʋʋ fɛyɩ se mankaɣ-ŋ sɩnʋʋ;*Mankaɣ lʋbʋ ñɔ-yɔɔ asɛyʋʋ alɩwaatʋ taa,Alɩwaatʋ ndʋ ŋwɛ kʋñɔŋ taa koyindu yɔɔ yɔ.
12 Ɛzɩ nɔɔyʋ pɩzɩɣ nɛ ɛpɛlɩ ñɩɣyʋʋ hɔɔlasɩ hɔɔlasɩ na?
Ɛpɩzɩɣ nɛ ɛpɛlɩ ñɩɣyʋʋ ŋgʋ kɩlɩnɩ hayo kiŋ yɔ, nɛ ñɩɣyʋʋ kɩsɛɛmʋʋ na?
13 Mankaɣ yebu nɛ palazɩ mbʋ ŋwɛna yɔ nɛ ña-ñɩm,+Paakaɣ hɛyʋʋ pɩ-yɔɔ nabʋyʋ, ɛlɛ ña-kɩwɛɛkɩm mbʋ payɩ ŋlabɩ ña-ageeta kpeekpe taa yɔ pʋyɔɔ pakaɣ-ŋ labʋ mbʋ.
14 Mankaɣ-pʋ cɛlʋʋ ño-koyindinaaSe powoni-pʋ ɛjaɖɛ nɖɩ ŋŋsɩŋ yɔ ɖɩ-taa.+
Mbʋ pʋyɔɔ yɔ man-pana sɔbɩ miŋ nɩɩyɩ,Nɛ iɖiɣni mʋʋ se ɩñaɣ-mɩ.»+
15 Ŋsɩm mbʋ pɩ-taa mɛwɛɛ yɔ, Oo Yehowa,Tɔzɩ mɔ-yɔɔ nɛ ŋkɛzɩ ña-lɩmaɣza nɛ mɔ-yɔɔ.
Kpa kɩmɩyɛ mba panazɩɣ-m yɔ.+
Ŋwɛ hɛɛɛ pana kɔʋ taa, pʋyɔɔ lɛ taayele nɛ mɛntɛŋɩlɩ.*
Tɩlɩ se ñɔ-yɔɔ mɔntɔkɩ fɛyɛ ɖɩnɛ.+
16 Malɩ ñɔ-tɔm yɔɔ, nɛ mɔntɔɔ-tʋ;+Nɛ ñɔ-tɔm pɩsɩ amɛya nɛ taa leleŋ pʋyʋ ma-laŋɩyɛ taa,Mbʋ pʋyɔɔ yɔ paya-m nɛ ña-hɩɖɛ, hayɩ yoyaa tɛ Ɛsɔ Yehowa.
17 Ma nɛ kazandʋ kadadayaɣ laɖaa ɖɩɩcakɩ se ɖɩnɩɩ leleŋ.+
Ñe-nesi wɛ mɔ-yɔɔ, pʋyɔɔ mancakɩ men-ɖeke;Mbʋ pʋyɔɔ yɔ ŋyeba nɛ ña-pana* su man-taa.+
18 Ɛbɛ yɔɔ ma-wɩzasɩ wɛ tam nɛ me-heŋ ɩɩwaɣ?
Ɩɩcaɣ waʋ.
Ɛzɩ ŋkaɣ pɩsʋʋ mɛ-ɛsɩndaa ɛzɩ cɛtɩm lɩm hiɖeNɖɩ paapɩzɩɣ nɛ pataa-ɖɩ liu yɔ?
19 Pʋyɔɔ lɛ, tɔm tʋnɛ Yehowa yɔɔdʋʋ:
«Ye ŋpɩsaa yɔ, ɖɩnɛ ɛlɛ mankaɣ-ŋ ɖaɣnʋʋ kʋsʋʋ,Nɛ ŋkaɣ sɩŋʋʋ mɛ-ɛsɩndaa.
Ye ŋlɩzɩɣ mbʋ pɩmʋ ñɩm yɔ nɛ hɔɔlʋʋ nɛ pɩkazɩɣ mbʋ pɩɩwazɩɣ pʋyʋ yɔ,Ŋkaɣ pɩsʋʋ ɛzɩ ma-maɣmaɣ mɔ-nɔɔ yɔ.*
Pɩkaɣ pɔzʋʋ se papɩsɩ ñɔ-cɔlɔ,
Ɛlɛ ña lɛ, ŋŋkaɣ pɩsʋʋ pɔ-cɔlɔ.»
20 «Menɖiɣni yebu se ŋpɩsɩ ñɩɣyʋʋ kɩsɛɛmʋʋ koloŋa samaɣ kanɛ kɛ-ɛsɩndaa.+
Pɩtʋʋ fɛyɩ se pakaɣ-ŋ yonuu,Ɛlɛ paakaɣ-ŋ wabʋ,+Mbʋ pʋyɔɔ yɔ mɛwɛ ñɔ-cɔlɔ, se maya ña-ñʋʋ nɛ moholi-ŋ,» Yehowa yɔɔdʋʋna.
21 «Nɛ mankaɣ-ŋ holuu kañatʋ tɩnaa nesi tɛɛNɛ maya ña-ñʋʋ mba paanaɣ lalaa pʋtɔdɩyɛ yɔ, pe-nesi tɛɛ.»
Pɩ-tɛɛ tɔm
^ Yaa «man-kalɩzaɣ ɛɛkaɣ wobinuu samaɣ kanɛ kɔ-yɔɔ.»
^ Pɩpɩzɩɣ pɩkɛ, «tɔm hʋʋ tindima 4.» Piye piye, «hɔŋ 4.»
^ Pɩpɩzɩɣ pɩkɛ, «Ŋwobi pɩ-yɔɔ nɛ ŋɖɔŋ kiŋgiɖe.»
^ Yaa «Pɩnɩ-m nɛ kpiɖuu.»
^ Pɩpɩzɩɣ pɩkɛ, «Nɛ fɛyɛ kpa-sɩ nɛ sɩwɛɛ pʋtɔdɩyɛ.»
^ Yaa «Ɛ-kalɩzaɣ feziɣ.»
^ Yaa «mankaɣ-ŋ lɩm ɖʋʋ se piɖeni-ŋ.»
^ Piye piye, «taakpaɣ-m nɛ ŋɖɛna.»
^ Yaa «ña-pana tɔm.»
^ Yaa «Ŋkaɣ pɩsʋʋ mɔn-tɔm ɖɔkɩyʋ.»
