Yereemii 17:1-27
17 «Pama Yuuda kɩwɛɛkɩm nɛ ñɩɣyʋʋ kɩmamaʋ.
Pakpaɣ diyaamaa* ŋgʋ kɩ-nɔɔ taa wɛ cʋlʋ cʋlʋ yɔ nɛ pamanɩ-pʋ* pa-laŋɩyɛ pɩtaahalaŋa yɔɔ,Nɛ pa-altaarunaa hɩŋ yɔɔ,
2 Alɩwaatʋ ndʋ pa-pɩyalaa tɔzʋʋ pa-altaarunaa nɛ pe-sizikasɩ kiɖeɖesi* yɔɔ+
Tɩʋ ŋgʋ kɩwɛ hatʋ camɩyɛ yɔ kɩ-cɔlɔ, piyisi kʋkʋyɩsɩ yɔɔ yɔ,+
3 Pʋŋ weyi ɩwɛ lona wena aposini tɛtʋ yɔ a-taa yɔ.
Mankaɣ yebu nɛ palazɩ mbʋ ŋwɛna yɔ, ña-ñɩm kpeekpe;+Ɛɛɛ, mankaɣ yebu nɛ palazɩ ño-lona kʋkʋya, kɩwɛɛkɩm mbʋ ŋlabɩ ña-ageeta kpeekpe taa yɔ pɩ-yɔɔ.+
4 Ña-maɣmaɣ ñɔ-sɔɔlɩm ŋkaɣ cɛlɩnʋʋ ñɩm mbʋ maha-ŋ yɔ.+
Nɛ mankaɣ yebu nɛ ŋɖʋ lɩm ño-koyindinaa ɛjaɖɛ nɖɩ ŋŋsɩŋ yɔ ɖɩ-taa,+Mbʋ pʋyɔɔ yɔ ikulusi man-pana ɛzɩ pɔsɔkʋʋ miŋ yɔ.*+
Miŋ ɛnɩ ɩkaɣ wɛʋ nɛ ɩmʋʋ tam.»
5 Tɔm tʋnɛ Yehowa yɔɔdʋʋ:
«Pɔlɔ nɔɔ kɩdɛkɛdaɣ ɛyʋ* weyi ɛtaɣ ɛyaa yem liu yɔ ɛ-yɔɔ,+Weyi ɛtaɣ liu ɛyʋ ɖoŋ yɔ,*+Nɛ weyi ɛ-laŋɩyɛ haɣ siɣye Yehowa yɔ.
6 Ɛkaɣ pɩsʋʋ ɛzɩ tɩʋ ŋgʋ kɩwɛ ki-ɖeke kañɩmbusuu taa yɔ.
Ɛɛkaɣ naʋ alɩwaatʋ ndʋ kɩbandʋ kɔŋ yɔ,Ɛlɛ ɛkaɣ caɣʋ wɩlɩŋ lona taa kañɩmbusuu taa,Ðɔm tɛtʋ ndʋ tɩ-taa ɛyʋ nɔɔyʋ ɛɛpɩzɩɣ nɛ ɛcaɣ yɔ.
7 Pawazɩ ɛyʋ* weyi ɛtaɣ Yehowa liu,Weyi ɛɖʋʋ e-lidaʋ Yehowa yɔɔ yɔ.+
8 Ɛkaɣ wɛʋ ɛzɩ tɩʋ ŋgʋ pɔsɔ-kʋ lɩm nɔɔ yɔ,Ŋgʋ ki-lila yɛzɩɣ nɛ atalɩɣ pɔɔ taa yɔ.
Ɛɛkaɣ nɩʋ soŋaɣ taŋ soŋaɣ alɩwaatʋ taa,Ɛlɛ ɛ-hatʋ kaɣ nɛɣdʋʋ paa ɛzɩmtaa.+
Nɛ wɩlɩŋ pɩnaɣ taa lɛ, ɛɛkaɣ wɛʋ nɩɣzɛ taa,Nɛ ɛɛkaɣ ɖɔɖɔ yebu pee lʋlʋʋ.
9 Laŋɩyɛ kɛ cɛtɩyʋ* nɛ pɩkpaɖɩ pɩtɩŋa nɛ ɖɩ-tɔm wɛ kaɖɛ.*+
Apɩzɩɣ nɛ ɛtɩlɩ-ɖɩ?
10 Ma, Yehowa, mantazɩɣ laŋɩyɛ taa,+Mantazɩɣ lɩmaɣza cukaŋ ñɩna taa,*Se maha paa weyi mbʋ pɩmʋnɩ ɛ-nʋmɔŋ yɔ,Mbʋ pɩmʋnɩ pee wena ɛ-tʋma lʋlaa yɔ.+
11 Ɛzɩ leɣa ŋga kekpeɣliɣ yala wena katɩɖʋ yɔ,Mbʋ ɛyʋ weyi ɛtɩŋɩɣnɩ mulum yɔɔ* nɛ ɛwɛɣnɩ ñɩm yɔ ɛwɛɛ.+
Ñɩm mbʋ, pɩkaɣ ɖɛʋ nɛ piyebi-i e-wezuu hɛkʋ taa,Nɛ mbʋ pɩtɛŋna yɔ lɛ se pɩkaɣ naʋ kpayɩ kpayɩ se ɛkɛ kɩmɛlɛŋ.»
12 Kewiyaɣ kpelaɣ sɔsɔɔ, ŋga pakpazɩ-kɛ ɛsɔdaa kpaɣnɩ ɖooo kiɖe tɛɛ yɔ,Ŋga kɛnɩ ɖo-kooka kiɖeɖeɣa lone.+
13 Hayɩ Yehowa, Izrayɛɛlɩ lidaʋ,Mba payɩ peyeki-ŋ yɔ, fɛyɛ kaɣ-wɛ kpaʋ.
Mba peyeki-ŋ* nɛ pɛkɛɣnɩ hɔɔlʋʋ yɔ,* pakaɣ pa-hɩla maʋ mʋzʋʋ taa,+Mbʋ pʋyɔɔ yɔ pɔlɔ Yehowa, weyi ɛkɛ wezuu lɩm hiɖe yɔ.+
14 La nɛ mɔ-yɔɔ cɛ, hayɩ Yehowa, nɛ mɔ-yɔɔ kaɣ cɛbʋ.
Ya ma-ñʋʋ, nɛ mankaɣ hiɣu ñʋʋ yabʋ,+Mbʋ pʋyɔɔ yɔ ñɛkɛnɩ weyi mansaŋ yɔ.
15 Na! Nabɛyɛ wɛɛ nɛ peheyiɣ-m se:
«Le Yehowa tɔm wɛɛ?+
Ðitendi-ŋ, tɩkɔɔ!»
16 Ɛlɛ ma lɛ, mantiyele ña-wayɩ tɩŋʋʋ nɛ mense se maatasɩɣ kɛʋ ninɖiɣyu,Nɛ me-liu taawɛɛ ɖɔɖɔ asɛyʋʋ kɩyakʋ.
Ŋsɩm camɩyɛ tɔm ndʋ payɩ mo-ndomee yɔɔdaa yɔ;Pɩtɩŋa payɩ, ñɛ-ɛsɩndaa pɩlaba!
17 Taakɛ mbʋ pɩɖʋʋ-m sɔɔndʋ siŋŋ yɔ.
Ñɛkɛnɩ man-ɖɩjɔzɩyɛ asɛyʋʋ kɩyakʋ wiye.
18 Yele nɛ fɛyɛ kpa mba panazɩɣ-m yɔ,+Ɛlɛ ma lɛ, taayele nɛ fɛyɛ kpa-m.
Yele nɛ sɔɔndʋ sɔsɔtʋ kpa-wɛ,Ɛlɛ ma lɛ, taayele nɛ sɔɔndʋ sɔsɔtʋ kpa-m.
Kɔnɩ pɔ-yɔɔ asɛyʋʋ kɩyakʋ,+Nɛ ŋpʋʋtɩ-wɛ nɛ ŋɖɩzɩ-wɛ caɣ caɣ.*
19 Tɔm tʋnɛ Yehowa heyi-m: «Wolo nɛ ŋsɩŋ samaɣ pɩyalaa nɔnɔɔ ŋga Yuuda awiya tɩŋɩɣna nɛ pasʋʋ nɛ palɩɣ yɔ ka-taa, nɛ Yeruzalɛm nɔnɔsɩ tɩŋa taa.+
20 Pɩwɛɛ se ŋheyi-wɛ se: “Iwelisi Yehowa tɔm, mɩ Yuuda awiya, mɩ Yuuda mba tɩŋa, nɛ mɩ Yeruzalɛm taa mba tɩŋa, mɩ mba ɩsʋʋnɩ nɔnɔsɩ sɩnɛ yɔ.
21 Tɔm tʋnɛ Yehowa yɔɔdʋʋ: ‘Ɩcɔnɩ mɩ-tɩ yɔɔ* camɩyɛ, nɛ ɩtaasɩɣlɩ sʋʋtʋ natʋyʋ Sabaatɩ kɩyakʋ wiye yaa ɩtaatɩŋnɩ Yeruzalɛm nɔnɔsɩ nɛ ɩsʋnɩ-tʋ.+
22 Pɩtɩpɔzɩ se ɩkpaɣ sʋʋtʋ natʋyʋ nɛ mɩ-ɖɩsɩ taa Sabaatɩ kɩyakʋ wiye nɛ ɩlɩna; nɛ pɩtɩpɔzɩ se ɩla tʋmɩyɛ naɖɩyɛ kaaʋ.+ Iyele nɛ Sabaatɩ kɩyakʋ kɛ kiɖeɖeu tam, ɛzɩ maaɖʋʋ paɣtʋ mɩ-cɔzɔnaa yɔ.+
23 Ɛlɛ patiwelisi nɛ patɩkʋ nɩŋgbaŋʋʋ; nɛ pala ñʋʋ taa ɖoŋ nɛ pekizi* se paañaŋ yaa paamʋʋ lɔŋ sɩɣzʋʋ.’”+
24 «“‘Ɛlɛ ye ɩñamɩ-m ɖeyi ɖeyi nɛ ɩɩkpakɩɣ sʋʋtʋ natʋyʋ nɛ ɩtɩŋɩɣnɩ tɛtʋ tʋnɛ tɩ-nɔnɔsɩ nɛ ɩsʋʋnɩ-tʋ Sabaatɩ kɩyakʋ wiye, nɛ iyele nɛ Sabaatɩ kɩyakʋ kɛ kiɖeɖeu tam mbʋ pʋyɔɔ yɔ ɩɩlakɩ tʋmɩyɛ naɖɩyɛ ki-wiye yɔ,+ Yehowa yɔɔdʋʋna,
25 ɖɩnɛ ɛlɛ awiya nɛ awumbiya mba pacakɩ Daviid kewiyaɣ kpelaɣ yɔɔ yɔ,+ pakaɣ ɖɔɖɔ tɩŋnʋʋ tɛtʋ tʋnɛ tɩ-nɔnɔsɩ nɛ pasʋʋ, pakaɣ caɣʋ kɛɛkɛɛnaa taa nɛ kpaŋnaŋ yɔɔ, pa nɛ pa-awumbiya, Yuuda mba nɛ Yeruzalɛm taa mba;+ nɛ tɛtʋ tʋnɛ, ɛyaa kaɣ wɛʋ tɩ-taa tam.
26 Nɛ ɛyaa kaɣ lɩnʋʋ Yuuda tɛtʋ ndɩ ndɩ taa, lona wena acɔ Yeruzalɛm nɛ ata yɔ a-taa, Bɛnjamɛɛ ɛjaɖɛ taa,+ pɩ-tɛɛ ɛjaɖɛ taa,+ pʋŋ egeetiye taa, nɛ Negɛɛbʋ* nɛ pɔkɔɔ; pɔkɔŋnɩ kɩlaŋ kɩñaɣzɩŋ,+ kɩlaŋ,+ tɔɔnaɣ pee kɩlaŋ,+ tɩlaaɖɩ kʋhʋlʋmʋʋ, nɛ ɛsɩmɩyɛ kɩlaŋ Yehowa ɖɩɣa taa.+
27 «“‘Ɛlɛ ye ɩɩñaŋɩ-m nɛ iiyeki se Sabaatɩ kɩyakʋ ɛkɛ kiɖeɖeu tam nɛ ɩsɩɣlɩɣ sʋʋtʋ nɛ ɩtɩŋɩɣnɩ Yeruzalɛm nɔnɔsɩ nɛ ɩsʋʋnɩ-tʋ Sabaatɩ kɩyakʋ wiye yɔ, mankaɣ sɔbʋ kɩ-nɔnɔsɩ miŋ, nɛ pɩtʋʋ fɛyɩ se ɩkaɣ ñaɣʋ Yeruzalɛm tilima ɖoŋ ñɩna+ nɛ paakaɣ miŋ ɛnɩ ɖɩzʋʋ.’”»+
Pɩ-tɛɛ tɔm
^ Ñɩɣlɩm pɩyɛ naɖɩyɛ payaɣ mbʋ.
^ Yaa «pamanɩ-pʋ ɛzɩ pamaɣʋ tɔm tambɔŋ yɔɔ yɔ.»
^ Cɔnɩ Tɔm pee sɔsɔna tɔbʋʋ lɩzʋʋ.
^ Pɩpɩzɩɣ pɩkɛ, «Mbʋ pʋyɔɔ yɔ ɩwɛ ɛzɩ miŋ weyi iɖiɣni mʋʋ man-pana taa yɔ.»
^ Yaa «Weyi ɛkpakɩɣ tomnaɣ se pɩkɛ ɛ-nɩŋgbɛɛŋa yɔ.»
^ Yaa «ɛyʋ ɖoŋ tʋ.»
^ Yaa «ɛyʋ ɖoŋ tʋ.»
^ Yaa «agutaaku tʋ.»
^ Yaa «nɛ paapɩzɩɣ nɛ pawaa-ɖɩ.»
^ Piye piye, «Mantazɩɣ kataŋgayɩsɩ taa.»
^ Yaa «ɛtɩŋɩɣnɩ mbʋ pɩfɛyɩ siɣsiɣ yɔ pɩ-yɔɔ.»
^ Yaa «Mba papɩsɩɣ tisuu yebiyaa nɛ peyeki-ŋ yɔ.»
^ Piye piye, «Mba peyeki-m,» pɩkɛɣnɩ Yehowa peyeki.
^ Yaa «ŋɖɩzɩ-wɛ tam nabʋlɛ taa.»
^ Yaa «mɩ-kalɩzasɩ yɔɔ.»
^ Piye piye, «nɛ pala nɛ po-pondone kpa ɖoŋ.»
^ Yaa «hadɛ kiŋ.»
