Yereemii 19:1-15
19 Tɔm tʋnɛ Yehowa yɔɔdaa: «Wolo nɛ ŋya cʋʋ peeɣa nakɛyɛ cʋʋ mayʋ cɔlɔ.+ Kpaɣ samaɣ taa ɛzʋtʋyaa nabɛyɛ nɛ cɔjɔnaa taa ɛzʋtʋyaa nabɛyɛ,
2 nɛ ŋlɩɩ ŋwolo Hinɔɔm Pɩyalʋ Fɛɛʋ taa,+ Cʋʋ Hɔɔlasɩ Nɔnɔɔ taa. Nɛ ŋsusi peeɖe tɔm ndʋ meheyiɣ-ŋ yɔ.
3 Ŋkaɣ yɔɔdʋʋ se: “Ɩnɩɩ Yehowa tɔm, mɩ Yuuda awiya nɛ Yeruzalɛm taa mba. Tɔm tʋnɛ yoyaa tɛ Yehowa, Izrayɛɛlɩ tɛ Ɛsɔ yɔɔdʋʋ:
«“‘Mancaɣ kɔnʋʋ asɛyʋʋ lone ɖɩnɛ ɖɩ-yɔɔ, nɛ weyi ɛnɩɣ pɩ-tɔm yɔ ɛ-nɩŋgbaaŋ taa kaɣ sɛʋ weŋŋ.
4 Mbʋ pʋyɔɔ yɔ pɔlɔ-m+ nɛ peyele nɛ ɛyaa ɩɩtasɩɣ sɩm lone ɖɩnɛ.+ Pɛwɛɛ nɛ palaɣ kɩlaŋ ɛsɔnaa lalaa ɖɩ-taa, ɛsɔnaa mba pa nɛ pɔ-cɔzɔnaa nɛ Yuuda awiya pataasɩm-wɛ yɔ, nɛ peyeba nɛ mba patɩɖɔɔ wɛɛ naayɛ yɔ pa-calɩm su lone ɖɩnɛ ɖɩ-taa.+
5 Pama Baalɩ lona kʋkʋya se pɩsa nɛ pañaɣzɩ pa-pɩyalaa miŋ se pɩkɛ kɩlaŋ kɩñaɣzɩŋ Baalɩ,+ pɩkɛ mbʋ mantaapɔzɩ-wɛ se pala yaa mantaayɔɔdɩ pɩ-tɔm yɔ, nɛ halɩ pɩtaatɩɩkpaʋ ma-laŋɩyɛ taa wiɖiyi.’”*+
6 «“‘Pʋyɔɔ lɛ, ɩna, kɩyakɩŋ ɖiɣni kɔm; nɛ paakaɣ tasʋʋ yaʋ lone ɖɩnɛ se Tofɛɛtɩ yaa Hinɔɔm Pɩyalʋ Fɛɛʋ ɛlɛ Kʋgʋʋ Fɛɛʋ,+ Yehowa yɔɔdʋʋna.
7 Mankaɣ wɛɛkʋʋ ɖʋtʋ ndɩ ndɩ ndʋ Yuuda nɛ Yeruzalɛm palaba yɔ lone ɖɩnɛ ɖɩ-taa, nɛ mankaɣ yebu nɛ po-koyindinaa kʋ-wɛ nɛ laɣɖɛ nɛ mankaɣ-wɛ ɖʋzʋʋ mba pañɩnɩɣ se palɩzɩ pe-wezuu yɔ* pe-nesi tɛɛ nɛ pakʋ-wɛ. Nɛ mankaɣ po-tomnasɩ cɛlʋʋ ɛsɔdaa sumasɩ nɛ tɛtʋ yɔɔ tɛtɛgbɩna se pɩkɛ pɔ-tɔɔnaɣ.+
8 Nɛ mankaɣ yebu nɛ tɛtʋ tʋnɛ tɩpɩsɩ sɔɔndʋ pʋyʋ nɛ mbʋ panaɣ-pʋ nɛ pahʋlʋʋ kancʋʋlaɣ yɔ. Weyi ɛtɩŋɩɣnɩ peeɖe yɔ, ɛkaɣ cɔnʋʋ nɛ sɔɔndʋ kpa-ɩ nɛ ɛhʋlɩ kancʋʋlaɣ kɩ-asɛyɩŋ kpeekpe yɔɔ.+
9 Nɛ mankaɣ yebu nɛ pɔtɔɔ pa-pɩyalaa nɛ pɛ-pɛlaa nandʋ, nɛ pa-taa paa weyi lɛ ɛkaɣ tɔɔʋ e-koobu nandʋ. Mbʋ pʋyɔɔ yɔ pakaɣ-wɛ ñɛyʋʋ nɛ pakaɣ wɛʋ laŋwɛɛkɩyɛ taa alɩwaatʋ ndʋ po-koyindinaa nɛ mba pañɩnɩɣ se palɩzɩ pe-wezuu yɔ* pɔcɔʋ-wɛ nɛ pata yɔ.’”+
10 «Pʋwayɩ lɛ, ŋyɔkɩ peeɣa ŋga ɛyaa mba ña nɛ wɛ iwoba yɔ pɛ-ɛsɩndaa,
11 nɛ ŋheyi-wɛ se: “Tɔm tʋnɛ yoyaa tɛ Yehowa yɔɔdʋʋ: ‘Mbʋ mankaɣ yɔkʋʋ samaɣ kanɛ nɛ tɛtʋ tʋnɛ, ɛzɩ ɛyʋ yɔkʋʋ cʋʋ mayʋ ñanaɣ nɛ paapɩzɩɣ kpa nɛ patasɩ-kɛ ñɔɔzʋʋ yɔ; nɛ pakaɣ pim sɩɖaa Tofɛɛtɩ taa nɛ pɩkɔɔ pɩsɩɩnɩ alɩwaatʋ ndʋ lone naɖɩyɛ tɩtasɩ kazʋʋ se pepim-wɛ yɔ.’”+
12 «“Mbʋ mankaɣ labʋ lone ɖɩnɛ nɛ ɖɩ-taa mba, se meyele nɛ tɛtʋ tʋnɛ tɩwɛɛ ɛzɩ Tofɛɛtɩ yɔ,” Yehowa yɔɔdʋʋna.
13 “Nɛ Yeruzalɛm ɖɩsɩ nɛ Yuuda awiya ɖɩsɩ kaɣ pɩsʋʋ mbʋ pɩfɛyɩ kele kele yɔ ɛzɩ lone ɖɩnɛ yɔ, Tofɛɛtɩ,+ ɛɛɛ, ɖɩsɩ nzɩ payɩ sɩ-ñʋŋ taa pala kɩlaŋ ɛsɔdaa yoyaa* kpeekpe yɔ+ nɛ ɖenɖe pelizi kilizasɩ ɛsɔnaa lalaa yɔ.”»+
14 Yereemii lɩnɩ Tofɛɛtɩ ɖenɖe Yehowa tiyi-i se ɛyɔɔdɩ natʋ tɔm yɔ nɛ ɛpɩsɩ lɛ, ɛsɩŋ Yehowa ɖɩɣa kadaɣ taa nɛ eheyi samaɣ kpeekpe se:
15 «Tɔm tʋnɛ yoyaa tɛ Yehowa, Izrayɛɛlɩ tɛ Ɛsɔ yɔɔdʋʋ: “Ɩna, menɖiɣni kɔnʋʋ tɛtʋ tʋnɛ tɩ-yɔɔ nɛ tɩ-tɛtʋ cikpetu ndɩ ndɩ kpeekpe yɔɔ asɛyʋʋ ŋgʋ mɔyɔɔdaa se mɔnkɔŋnɩ tɩ-yɔɔ yɔ kɩ-tɩŋa, mbʋ pʋyɔɔ yɔ palabɩ ñʋʋ taa ɖoŋ nɛ pekizi se paañaŋ mɔn-tɔm.”»*+
Pɩ-tɛɛ tɔm
^ Yaa «pɩtɩkɔɔ ma-maɣzɩm taa wiɖiyi.»
^ Yaa «mba pañɩnɩɣ pa-kalɩzaɣ yɔ.»
^ Yaa «mba pañɩnɩɣ pa-kalɩzaɣ yɔ.»
^ Ɛsɔdaa wondu tɔm pɔyɔɔdʋʋ.
^ Piye piye, «palaba nɛ po-pondone kpa ɖoŋ se pɩsa nɛ pataaña mɔn-tɔm.»
