Yereemii 20:1-18
20 Nɛ alɩwaatʋ ndʋ Yereemii yɔɔdaɣ natʋ tɔm tʋnɛ yɔ, cɔjɔ Pasuuri, Imɛɛrɩ pɩyalʋ, weyi ɛɛkɛ ɖɔɖɔ Yehowa ɖɩɣa yɔɔ cɔnɩyʋ sɔsɔ yɔ, ɛɛwɛɛ nɛ ewelisiɣ.
2 Peeɖe Pasuuri mabɩ nayʋ Yereemii nɛ ɛsʋzɩ-ɩ kpoŋgbolonaa pɔŋ* taa,+ mba paawɛ Bɛnjamɛɛ Nɔnɔɔ Hayo ñɩŋga taa yɔ, ŋga kaawɛ Yehowa ɖɩɣa taa yɔ.
3 Ɛlɛ Pasuuri lɩzɩ Yereemii kpoŋgbolonaa pɔŋ taa tɛʋ kifemuu lɛ, Yereemii heyi-i se:
«Yehowa ya-ŋ hɩɖɛ se Sɔɔndʋ Paa Le,+ pɩtɩkɛ Pasuuri.
4 Mbʋ pʋyɔɔ yɔ tɔm tʋnɛ Yehowa yɔɔdʋʋ: “Mankaɣ yebu nɛ ŋpɩsɩ sɔɔndʋ pʋyʋ ña-maɣmaɣ nɛ ña-taabalaa kpeekpe ɛsɩndaa, nɛ po-koyindinaa kaɣ-wɛ kʋʋ nɛ laɣɖɛ ñɛ-ɛsɩndaa;+ nɛ mankaɣ ɖʋzʋʋ Yuuda kpeekpe Babilɔɔnɩ wiyaʋ nesi tɛɛ, nɛ ɛkaɣ-wɛ kɛzʋʋ tɛtʋ Babilɔɔnɩ nɛ ɛkʋ-wɛ nɛ laɣɖɛ.+
5 Nɛ mankaɣ ɖʋzʋʋ tɛtʋ tʋnɛ tɩ-ñɩm kpeekpe, mbʋ payɩ tɩwɛna yɔ, ti-wondu ndʋ payɩ tɩmʋ ñɩm yɔ, nɛ Yuuda awiya ñɩm kpeekpe po-koyindinaa nesi tɛɛ.+ Nɛ pakaɣ-pʋ lazʋʋ nɛ pamʋ-pʋ nɛ ɖoŋ nɛ pakpaɣ-pʋ nɛ powoni Babilɔɔnɩ.+
6 Nɛ ña Pasuuri, nɛ mba payɩ pɛwɛ ña-ɖɩɣa taa yɔ, ɩkaɣ wobu yomiye taa. Ŋkaɣ wobu Babilɔɔnɩ nɛ ŋsɩ peeɖe, nɛ pakaɣ-ŋ pim peeɖe, ña nɛ ña-taabalaa, mbʋ pʋyɔɔ yɔ ŋheyi-wɛ natʋ tɔm ndʋ tɩkɛ cɛtɩm yɔ.”»+
7 Ŋpeɣzi-m, hayɩ Yehowa, nɛ pipeɣzi-m.
Ŋwɩlaa se ŋkpaɖɩ-m ɖoŋ, nɛ ŋwabɩ-m.+
Manpɩsɩ woŋa pʋyʋ evemiye kpeekpe;Paa anɩ ewoŋuu-m.+
8 Mbʋ pʋyɔɔ yɔ alɩwaatʋ ndʋ payɩ mɔyɔɔdʋʋ yɔ, pɩwɛɛ se mama kubuka nɛ monsusi se:
«Puuyaɣ lakasɩ nɛ ɖɩzʋʋ!»
Yehowa tɔm yɔɔ patʋʋ-m nɛ pɔyɔɔdʋʋ mɔ-yɔɔ tɔm kɩdɛkɛdɩtʋ evemiye kpeekpe.+
9 Pʋyɔɔ mɔyɔɔdaa se: «Maatasɩɣ ɛ-tɔm yɔɔdʋʋ,Nɛ maatasɩɣ yɔɔdʋʋ ɛ-hɩɖɛ taa.»+
Ɛlɛ ma-laŋɩyɛ taa lɛ, ɛ-tɔm pɩsɩ ɛzɩ miŋ weyi iɖiɣni mʋʋ nɛ paɖɩɣ ɩ-yɔɔ mɔ-mɔɔ taa yɔ,Nɛ pɩɩnɩ-m nɛ tɔm ndʋ tɩ-sɩʋ man-taa;Pɩtaatasɩɣ sam se mɔnɖɔkɩ man-tɩ.+
10 Mbʋ pʋyɔɔ yɔ manɩ tɔm kɩdɛkɛdɩtʋ sakɩyɛ ndʋ ɛyaa yɔɔdaɣ yɔ;Sɔɔndʋ sɔsɔtʋ cɔ-m nɛ tɩta.+
«Ikuli ɛ-yɔɔ; iyele nɛ ɖikuli ɛ-yɔɔ!»
Weyi eheyiɣ-m se mɛwɛɛ laŋhɛzɩyɛ taa yɔ ɛɖaŋ mɔn-tɔlʋʋ kpam:+
«Pʋtɔma yɔ pɩkaɣ-ɩ yiɣduu kɩmɛlɛndʋ yiɣduu,Nɛ ɖɩpɩzɩ nɛ ɖɩwabɩ-ɩ nɛ ɖɩkpa-ɩ kɩmɩyɛ.»
11 Ɛlɛ Yehowa kaawɛ mɔn-cɔlɔ ɛzɩ you laɖʋ weyi ɛcaɣ sɔɔndʋ yɔ.+
Pʋyɔɔ mba panazɩɣ-m yɔ pɩkaɣ-wɛ tuuluu nɛ paakaɣ wabʋ.+
Fɛyɛ sɔsɔɖɛ kaɣ-wɛ kpaʋ, mbʋ pʋyɔɔ yɔ pɩɩkaɣ-wɛ ɖenuu.
Pɛ-fɛyɛ kaɣ wɛʋ tam tam nɛ paakaɣ ɖɩ-yɔɔ sɔʋ.+
12 Ɛlɛ ña lɛ, hayɩ yoyaa tɛ Yehowa, ŋtazɩɣ ɛyʋ siɣsiɣ tʋ taa;Ŋnaɣ lɩmaɣza cukaŋ ñɩna taa* nɛ laŋɩyɛ taa.+
Yele nɛ mana ɛzɩma ŋkpaɣ-wɛ kɩmɩyɛ yɔ,+Mbʋ pʋyɔɔ yɔ ñe-nesi tɛɛ manɖʋzɩ mɔn-tɔm se ŋhʋʋ-tʋ.+
13 Itee hendu Yehowa! Ɩsa Yehowa!
Mbʋ pʋyɔɔ yɔ ɛlɩzɩ kʋñɔndʋ* ɛyaa kɩdɛkɛdaa nesi tɛɛ.
14 Piyo kɩyakʋ ŋgʋ palʋlɩ-m yɔ!
Pataawazɩ kɩyakʋ ŋgʋ mon-ɖoo lʋlɩ-m yɔ!+
15 Piyo weyi ɛkɔnɩ man-caa tɔm kɩbandʋ yɔ, weyi eheyi-i se:
«Palʋlɩ-ŋ pɩɣa, abalɩbɩɣa!»
Nɛ piyele nɛ ɛ-taa la leleŋ siŋŋ yɔ.
16 Tɛtɛ nɛ ɛyʋ ɛnʋ ɛpɩsɩ ɛzɩ tɛtʋ ndɩ ndɩ ndʋ Yehowa yɔkɩ-tʋ nɛ etikpiɖi yɔ.
Tɛtɛ nɛ ɛyʋ ɛnʋ ɛnɩɩ kubuka nakɛyɛ taŋ tanaŋ tɛɛ nɛ you kubuka taŋ wɩsɩ siɣu alɩwaatʋ taa.
17 Pɩlabɩ ɛzɩma nɛ ɛtɩkʋ-m lotu taa,Nɛ mon-ɖoo pɩsɩ man-pɩlaʋNɛ hoɣa wɛɛ e-lotu taa tam?+
18 Ɛbɛ yɔɔ pɩwɛɛ se malɩɩ lotu taaNɛ mana kʋñɔŋ nɛ siziŋ nɩʋ,Nɛ mɛntɛzɩ man-kɩyakɩŋ fɛyɛ taa?+
Pɩ-tɛɛ tɔm
^ Cɔnɩ Tɔm pee sɔsɔna tɔbʋʋ lɩzʋʋ.
^ Piye piye, «Ŋnaɣ kataŋgayɩsɩ.»
^ Yaa «kʋñɔndʋ kalɩzaɣ.»