Yereemii 23:1-40
23 «Pɩtɔɔ ninɖiɣyaa mba peɖiɣni ɖɩzʋʋ nɛ pamɩzɩɣ heŋ weyi ɩwɛ ma-ñɩtʋ ɖɩdɔɔyɛ taa yɔ!» Yehowa yɔɔdʋʋna.+
2 Pʋyɔɔ lɛ, tɔm tʋnɛ Izrayɛɛlɩ tɛ Ɛsɔ Yehowa yɔɔdʋʋ ninɖiɣyaa mba pɛwɛɛ nɛ peɖiyiɣ ɛ-samaɣ yɔ pɔ-yɔɔ: «Ɩmɩzɩ me-heŋ; ɩwɛɛ nɛ ɩtayɩɣ ɩ-taa, nɛ ɩtɩkɛzɩ mɩ-lɩmaɣza nɛ ɩ-yɔɔ.»+
«Pʋyɔɔ lɛ, mankaɣ ma-lɩmaɣza kɛzʋʋ nɛ mɩ-yɔɔ mɩ-lakasɩ kɩdɛkɛdɩsɩ yɔɔ,» Yehowa yɔɔdʋʋna.
3 «Nɛ mankaɣ kpeɣluu me-heŋ weyi ɩkazaa nɛ ɩwɛɛ ajɛɛ wena a-taa payɩ maamɩzɩ-ɩ yɔ,+ nɛ mankaɣ-ɩ pɩsɩnʋʋ ɩ-ñɩtʋ ɖɩdɔɔyɛ taa,+ nɛ ɩkaɣ lʋlʋʋ nɛ ɩɖɔɔ sakɩyɛ.+
4 Nɛ mankaɣ lɩzʋʋ ninɖiɣyaa mba pakaɣ-ɩ ɖiyuu ɛzɩ pɩpɔzʋʋ yɔ.+ Sɔɔndʋ ɛɛkaɣ-ɩ tasʋʋ kpaʋ nɛ ɩɩtasɩɣ seluu, nɛ ɩ-taa nɔɔyʋ ɛɛkaɣ lebu,» Yehowa yɔɔdʋʋna.
5 «Ɩna! Kɩyakɩŋ ɖiɣni kɔm,» Yehowa yɔɔdʋʋna, «nɛ alɩwaatʋ ndʋ lɛ mankaɣ lɩzʋʋ Daviid lʋlʋʋ taa tʋ* siɣsiɣ tʋ nɔɔyʋ.+ Nɛ wiyaʋ nɔɔyʋ kaɣ kewiyitu tɔɔʋ+ nɛ ɛwɛɛnɩ lɛɣtʋ nɛ ɛñɔɔnɩ tɔm hʋʋ siɣsiɣ nɛ siɣsiɣ wɛtʋ ɛjaɖɛ taa.+
6 Ɛ-alɩwaatʋ taa lɛ, Yuuda kaɣ hiɣu ñʋʋ yabʋ,+ nɛ Izrayɛɛlɩ kaɣ wɛʋ pɛɛyɛ taa.+ Nɛ hɩɖɛ ɖɩnɛ pakaɣ-ɩ yaʋ: Yehowa Kɛnɩ Ðe-Siɣsiɣ Wɛtʋ.»+
7 «Ɛlɛ, kɩyakɩŋ ɖiɣni kɔm, nɛ alɩwaatʋ ndʋ lɛ paakaɣ tasʋʋ yɔɔdʋʋ se: “Yehowa ñɩtʋʋ nɛ ɛwɛɛ wezuu yɔ, ɛnʋ weyi ɛlɩzɩ Izrayɛɛlɩ samaɣ Ejipiti ɛjaɖɛ taa yɔ!”+ Yehowa yɔɔdʋʋna.
8 Ɛlɛ pakaɣ yɔɔdʋʋ se: “Yehowa ñɩtʋʋ nɛ ɛwɛɛ wezuu yɔ, ɛnʋ weyi ɛlɩzɩ Izrayɛɛlɩ ɖɩɣa lʋlʋʋ taa mba hayo kiŋ ɛjaɖɛ taa nɛ ajɛɛ kpeekpe wena a-taa ɛɛmɩzɩ-wɛ* yɔ nɛ ɛpɩsɩnɩ-wɛ yɔ,” nɛ pakaɣ caɣʋ pa-maɣmaɣ pɛ-ɛjaɖɛ taa.»+
9 Nayaa yɔɔ tɔm yɔ:
Ma-laŋɩyɛ wɛɛkɩ man-taa.
Mɔ-mɔɔ tɩŋa ɖiɣni seluu.
Mɛwɛ ɛzɩ ɛyʋ weyi sʋlʋm kʋʋ-ɩ yɔ,Nɛ ɛzɩ ɛyʋ weyi vɛɛ wɛnɩ ɖoŋ ɛ-yɔɔ yɔ,Yehowa yɔɔ nɛ ɛ-tɔm kiɖeɖetu yɔɔ.
10 Mbʋ pʋyɔɔ yɔ acɛyɛ laɖaa su ɛjaɖɛ taa;+Nɔɔ kɩdɛkɛdaɣ ŋga pɔlɔ ɛjaɖɛ yɔɔ yɔ, keyeba nɛ ɖɩcaɣ kʋñɔwiye+Nɛ kañɩmbusuu taa lona wena a-taa kpɩna tɔkɩ ñɩtʋ yɔ awɩlɩ.+
Pa-nʋmɔʋ kɛ kɩdɛkɛdʋʋ, nɛ paalakɩnɩ po-ɖoŋ tʋmɩyɛ camɩyɛ.
11 «Nayʋ nɛ cɔjɔ pa-tɩŋa pepisi pa-tɩ.*+
Halɩ ma-maɣmaɣ man-ɖɩɣa taa, mana pa-kañatʋ lakasɩ,»+ Yehowa yɔɔdʋʋna.
12 «Pʋyɔɔ lɛ, pa-nʋmɔʋ taa kaɣ wɛʋ sotu nɛ kɩkaɣ yuu cɩkpɛndʋʋ;+Pakaɣ-wɛ tuzuu nɛ pɔtɔlɩ.
Mbʋ pʋyɔɔ yɔ mankaɣ asɛyʋʋ kɔnʋʋ pɔ-yɔɔAkɔnta pɔzʋʋ pɩnaɣ taa,» Yehowa yɔɔdʋʋna.
13 «Nɛ mana Samaarii+ nayaa yɔɔ mbʋ pɩwɛ kiniŋ yɔ.
Baalɩ seɣtiɣni natʋ tɔm ndʋ pɔyɔɔdʋʋ yɔ,Nɛ pelesiɣ man-samaɣ Izrayɛɛlɩ.
14 Nɛ mana Yeruzalɛm nayaa yɔɔ kʋzɔɔtʋ lakasɩ ndɩ ndɩ.
Palakɩ acɛyɛ+ nɛ pɔɖɔŋ cɛtɩm taa;+Pakpazɩɣ ɖoŋ ɛyaa kɩdɛkɛdaa;*Nɛ paahaɣ siɣye pa-kañatʋ lakasɩ.
Mɛ-ɛsɩndaa lɛ, pa-tɩŋa pɛwɛ ɛzɩ Sodom yɔ,+Nɛ kɩ-taa mba wɛ ɛzɩ Gomɔɔrɩ yɔ.»+
15 Pʋyɔɔ lɛ, tɔm tʋnɛ yoyaa tɛ Yehowa yɔɔdʋʋ nayaa yɔɔ:
«Ɩna, mankaɣ labʋ nɛ pɔtɔɔ ñandʋ*Nɛ mankaɣ-wɛ haʋ lɩm mbʋ pɩ-taa nɛ sɔtʋ yɔ se pɔñɔɔ.+
Mbʋ pʋyɔɔ yɔ tisuu yebu lɩnɩ Yeruzalɛm nayaa cɔlɔ nɛ pɩyɛlɩ ɛjaɖɛ kpeekpe taa.»
16 Tɔm tʋnɛ yoyaa tɛ Yehowa yɔɔdʋʋ:
«Nayaa mba pɛwɛɛ nɛ peheyiɣ-mɩ natʋ tɔm yɔ, itaawelisi tɔm ndʋ pɔyɔɔdʋʋ yɔ.+
Pɛwɛɛ nɛ pepeɣziɣ-mɩ.*
Natʋ ndʋ pɔyɔɔdʋʋ yɔ, tɩlɩnɩ pa-maɣmaɣ pa-laŋɩyɛ taa,+Ɛlɛ tɩtɩlɩɩnɩ Yehowa nɔɔ taa.+
17 Pɛwɛɛ nɛ peheyiɣ mba paañaŋɩ-m yɔ nɛ pɛlɛlɩɣ tam sakɩyɛ se:
“Yehowa yɔɔdaa se: ‘Ɩkaɣ wɛʋ laŋhɛzɩyɛ taa.’”+
Nɛ peheyiɣ mba payɩ patɩŋɩɣ pa-maɣmaɣ pa-laŋɩyɛ kpɩzɩŋ ñɩnɖɛ yɔ se:
“Asɛyʋʋ nakʋyʋ ɛɛkaɣ-mɩ talʋʋ.”+
18 Mbʋ pʋyɔɔ yɔ asɩŋ Yehowa taabalaa kɩbama hɛkʋ taaSe ɛna nɛ ɛnɩɩ ɛ-tɔm?
Akemsi ɛ-tɔm nɛ ɛnɩɩ-tʋ?
19 Ɩna! Yehowa helim sɔsɔm kaɣ lɩʋ nɛ pana;Ɛzɩ tɛʋ ŋgʋ kɩnɩɣnɩ helim sɔsɔm yɔ, pɩkaɣ tibu kañatʋ tɩnaa ñʋŋ taa.+
20 Yehowa pana ɛɛkaɣ hɛʋPɩkɔɔ nɛ pɩtalɩ alɩwaatʋ ndʋ ɛlabɩ mbʋ payɩ ɛɖʋ ɛ-laŋɩyɛ taa yɔ nɛ ɛtɛm-pʋ yɔ.
Kɩyakɩŋ ɖɩdɛnɖɛ alɩwaatʋ taa lɛ, ɩkaɣ pʋ-tɔbʋʋ nɩʋ kpayɩ kpayɩ.
21 Mantitiyi nayaa, ɛlɛ pese.
Mantɩyɔɔdɩnɩ-wɛ, ɛlɛ pɔyɔɔdɩ natʋ tɔm.+
22 Ɛlɛ ye paasɩŋ man-taabalaa kɩbama hɛkʋ taa yɔ,Paayeba nɛ man-samaɣ nɩɩ mɔn-tɔmNɛ paalaba nɛ keyele ka-nʋmɔʋ kɩdɛkɛdʋʋ nɛ ka-lakasɩ kɩdɛkɛdɩsɩ.»+
23 «Ɛzɩ pɩ-cɔlɔ ɖeke mɛnkɛ Ɛsɔ, nɛ mantɩkɛ ɖɔɖɔ Ɛsɔ poliŋ taa?» Yehowa yɔɔdʋʋna.
24 «Ɛzɩ ɛyʋ nɔɔyʋ pɩzɩɣ nɛ ɛmɛlɩ mɛsaɣ tɛɛ lone naɖɩyɛ taa, nɛ maapɩzɩɣ nɛ mana-ɩ peeɖe na?»+ Yehowa yɔɔdʋʋna.
«Ɛzɩ mantisu ɛsɔdaa nɛ tɛtʋ yɔɔ?»+ Yehowa yɔɔdʋʋna.
25 «Nayaa mba pɔyɔɔdʋʋ cɛtɩm tɔm ma-hɩɖɛ taa yɔ manɩ pɛwɛɛ nɛ pɔyɔɔdʋʋ se: “Monɖozi ɖoziye naɖɩyɛ! Monɖozi ɖoziye naɖɩyɛ!”+
26 Pɩwɛɣ mbʋ nayaa laŋa taa nɛ pɔyɔɔdʋʋ cɛtɩm natʋ tɔm nɛ pɩkɔɔ pɩsɩɩnɩ ɖooye? Pɛkɛ nayaa mba pɔyɔɔdʋʋ cɛtɩm tɔm ndʋ tɩlɩnɩ pa-maɣmaɣ pa-laŋa taa yɔ.+
27 Pañɩnɩɣ se patɩŋnɩ ɖoza wena pɛkɛdɩɣ ɖama yɔ a-yɔɔ nɛ peyele nɛ man-samaɣ sɔɔ ma-hɩɖɛ yɔɔ, ɛzɩ pa-caanaa kaasɔʋ ma-hɩɖɛ yɔɔ Baalɩ yɔɔ yɔ.+
28 Nayʋ weyi eɖozi ɖoziye yɔ ɛkɛdɩ ɖoziye nɖɩ, ɛlɛ weyi ɛwɛnɩ mɔn-tɔm yɔ pɩwɛɛ se ɛyɔɔdɩ-tʋ nɛ toovenim.»
«Lɔtʋ nɛ tɔɔnaɣ pee paka we?» Yehowa yɔɔdʋʋna.
29 «Mɔn-tɔm fɛyɩ ɛzɩ miŋ yɔ,+ nɛ ɛzɩ hama ŋgʋ polukina yɔ, ŋgʋ kɩyɔkʋʋ kaaʋ yɔ?»+ Yehowa yɔɔdʋʋna.
30 «Pʋyɔɔ lɛ, ɩna, mankʋyʋʋ nayaa yɔɔ, mba pamɩlɩɣ mɔn-tɔm ɖama cɔlɔ yɔ,»+ Yehowa yɔɔdʋʋna.
31 «Ɩna, mankʋyʋʋ nayaa yɔɔ, mba palakɩnɩ tʋmɩyɛ pa-nzʋlʋmɩyɛ nɛ pɔyɔɔdʋʋ se: “Ɛyɔɔdʋʋ se!” yɔ,»+ Yehowa yɔɔdʋʋna.
32 «Ɩna, mankʋyʋʋ nayaa mba poɖozuu cɛtɩm ɖoza yɔ pɔ-yɔɔ, mba pɛkɛdɩɣ-yɛ nɛ pelesiɣ man-samaɣ pɛ-cɛtɩm nɛ pa-agʋnda yɔɔ yɔ,»+ Yehowa yɔɔdʋʋna.
«Ɛlɛ mantitiyi-wɛ yaa mantɩɖʋ-wɛ paɣtʋ. Pʋyɔɔ lɛ paakaɣ wazʋʋ nabʋyʋ samaɣ kanɛ paa ññɩɩ,»+ Yehowa yɔɔdʋʋna.
33 «Nɛ alɩwaatʋ ndʋ samaɣ kanɛ yaa nayʋ nɔɔyʋ yaa cɔjɔ nɔɔyʋ pɔzʋʋ-ŋ se: “Ɛbɛ Yehowa sʋʋtʋ* kɛnaa?” lɛ, pɩwɛɛ se ŋcosi-wɛ se: “‘Mɩ mɩkɛnɩ sʋʋtʋ ndʋ! Nɛ mankaɣ-mɩ lɔʋ,’+ Yehowa yɔɔdʋʋna.”
34 Piyele nɛ nayʋ yaa cɔjɔ yaa samaɣ taa tʋ weyi ɛyɔɔdʋʋ se: “Yehowa sʋʋtʋ* kɔyɔ!” yɔ, mankaɣ kɛzʋʋ ma-lɩmaɣza nɛ ɛyʋ ɛnʋ nɛ ɛ-ɖɩɣa taa mba yɔɔ.
35 Tɔm tʋnɛ mɩ-taa paa weyi wɛɛ nɛ ɛpɔzʋʋ ɛ-taabalʋ nɛ e-koobu: “Suwe Yehowa cosaa? Nɛ suwe Yehowa yɔɔdaa?”
36 Ɛlɛ pɩtɩpɔzɩ se ɩtasɩ yɔɔdʋʋ Yehowa sʋʋtʋ* tɔm, mbʋ pʋyɔɔ yɔ mɩ-taa paa weyi lɛ, ɛ-maɣmaɣ ɛ-tɔm kɛnɩ sʋʋtʋ,* nɛ ɩlɛɣzɩ Ɛsɔ ɛsadʋ, yoyaa tɛ Yehowa, ɖɛ-Ɛsɔ tɔm.
37 «Tɔm tʋnɛ ŋkaɣ heyuu nayʋ: “Suwe Yehowa cosi-ŋ? Nɛ suwe Yehowa yɔɔdaa?
38 Nɛ ye ɩwɛɛ nɛ ɩyɔɔdʋʋ se: ‘Yehowa sʋʋtʋ!’* yɔ, tɔm tʋnɛ Yehowa yɔɔdʋʋ: ‘Ɩwɛɛ nɛ ɩyɔɔdʋʋ se: “Tɔm tʋnɛ tɩkɛ Yehowa sʋʋtʋ,”* ŋgʋ mɛntɛm-mɩ heyuu se: “Pɩtɩpɔzɩ se ɩyɔɔdɩ se: ‘Yehowa sʋʋtʋ!;’”* pʋyɔɔ lɛ,
39 ɩna! Mankaɣ-mɩ kʋsʋʋ mɛ-ɛsɩndaa nɛ mɔlɔ-mɩ, mɩ nɛ tɛtʋ ndʋ maacɛlɩ mɩ nɛ mɩ-cɔzɔnaa yɔ.
40 Nɛ mankaɣ kɔnʋʋ mɩ-yɔɔ tamtam fɛyɛ nɛ tamtam pʋtɔdɩyɛ wɛtʋ, ndʋ tɩ-yɔɔ paakaɣ sɔʋ yɔ.’”»+
Pɩ-tɛɛ tɔm
^ Yaa «Daviid ñɩm tɔɔyʋ.» Piye piye, «ɛyazɩyɛ.»
^ Yaa «maamɩzɩ-wɛ.»
^ Yaa «pɛkɛ tisuu yebiyaa.»
^ Piye piye, «Pakpazɩɣ ɛyaa kɩdɛkɛdaa nesi ɖoŋ.»
^ Pʋ-tɔbʋʋ se tɩʋ ŋgʋ kɩwɛ ñaŋ yɔ.
^ Yaa «Peyeki nɛ lidaʋ ŋgʋ kɩkɛ falaa yɔ kisu mɩ-taa.»
^ Yaa «tɔm yuŋ ñɩndʋ.» Ebree tɔm piye nɖɩ pɛɖɛzaa yɔ, ɖɩ-tɔbʋʋ nɩʋ wɛ nabʋlɛ taa: «tɔm yuŋ ñɩndʋ ndʋ tɩlɩnɩ Ɛsɔ cɔlɔ yɔ» yaa «mbʋ pɩwɛ yuŋ yɔ.»
^ Yaa «tɔm yuŋ ñɩndʋ.»
^ Yaa «tɔm yuŋ ñɩndʋ.»
^ Yaa «tɔm yuŋ ñɩndʋ.»
^ Yaa «tɔm yuŋ ñɩndʋ.»
^ Yaa «tɔm yuŋ ñɩndʋ.»
^ Yaa «tɔm yuŋ ñɩndʋ.»
