Yereemii 24:1-10
-
Fiigi pee kɩbana nɛ fiigi pee kɩdɛkɛda (1-10)
24 Nɛ Yehowa wɩlɩ-m fiigi pee ɖɔkɩŋ 2, pasɩ-ɩ Yehowa templo ɛsɩndaa; alɩwaatʋ ndʋ lɛ, Babilɔɔnɩ wiyaʋ Nabukodonozɔɔrɩ* kaatɛm kpaɣʋ Yehoyakim+ pɩyalʋ Yekoniya,*+ Yuuda wiyaʋ, pɩkpɛndɩnɩ Yuuda awumbiya, nesi tɛɛ tʋmlaɖaa, nɛ ñɩɣtʋ wondu luɖaa* nɛ ɛkɛzɩ-wɛ tɛtʋ; ɛɛkpaɣ-wɛ nɛ Yeruzalɛm nɛ ewoni Babilɔɔnɩ.+
2 Ðɔkʋ kʋɖʋmʋʋ taa fiigi pee kaawɛ ɖeu pɩdɩɩfɛyɩ, ɛzɩ fiigi pee kajalaɣ ñɩna yɔ; ɛlɛ ɖɔkʋ lɛɛkʋ taa fiigi pee kaawɛɛkɩ pɩdɩɩfɛyɩ, aawɛɛkɩ siŋŋ nɛ paapɩzɩɣ nɛ pɔtɔɔ-yɛ.
3 Nɛ Yehowa pɔzɩ-m se: «Yereemii, ɛbɛ ŋnaɣ?» Nɛ moncosi se: «Fiigi pee; fiigi pee kɩbana wɛ ɖeu pɩdɩɩfɛyɩ, ɛlɛ fiigi pee kɩdɛkɛda wɛɛkɩ pɩdɩɩfɛyɩ, awɛɛkɩ siŋŋ nɛ paapɩzɩɣ nɛ pɔtɔɔ-yɛ.»+
4 Nɛ Yehowa tɔm talɩ-m se:
5 «Tɔm tʋnɛ Izrayɛɛlɩ tɛ Ɛsɔ Yehowa yɔɔdʋʋ: “Ɛzɩ fiigi pee kɩbana anɛ yɔ, mbʋ ɖɔɖɔ mankaɣ cɔnʋʋ Yuuda ñɩma mba mɛnkɛzɩ-wɛ tɛtʋ yɔ se malabɩ-wɛ kɩbandʋ, mba mankʋsɩ-wɛ lone ɖɩnɛ ɖɩ-taa nɛ mɛnɖɛnɩ-wɛ Kalɩdee mba ɛjaɖɛ taa yɔ.
6 Mɛ-ɛsɩyɛ kaɣ pɔ-yɔɔ wɛʋ se malabɩ-wɛ kɩbandʋ, nɛ mankaɣ yebu nɛ papɩsɩ ɛjaɖɛ ɖɩnɛ ɖɩ-taa.+ Mankaɣ-wɛ maʋ, nɛ maakaɣ-wɛ yɔkʋʋ; mankaɣ-wɛ sɔʋ, nɛ maakaɣ-wɛ kpɛzʋʋ.+
7 Nɛ mankaɣ-wɛ haʋ laŋɩyɛ se pasɩmɩ-m se mɛkɛnɩ Yehowa.+ Pakaɣ pɩsʋʋ man-samaɣ nɛ mankaɣ pɩsʋʋ pɛ-Ɛsɔ,+ mbʋ pʋyɔɔ yɔ pakaɣ pɩsʋʋ mɔn-cɔlɔ nɛ pa-laŋɩyɛ pilim.+
8 «“Ɛlɛ fiigi pee kɩdɛkɛda wena awɛɛkɩ pɩdɩɩfɛyɩ nɛ paapɩzɩɣ se pɔtɔɔ-yɛ yɔ a-tɔm lɛ,+ tɔm tʋnɛ Yehowa yɔɔdʋʋ: ‘Mbʋ ɖɔɖɔ mankaɣ cɔnʋʋ Yuuda wiyaʋ Zedekiya,+ ɛ-awumbiya, Yeruzalɛm ñɩma mba pɩkazaa nɛ pɛwɛɛ ɛjaɖɛ ɖɩnɛ ɖɩ-taa, nɛ mba pɛwɛ Ejipiti ɛjaɖɛ taa yɔ.+
9 Mankaɣ yebu nɛ pɛkɛ sɔɔndʋ pʋyʋ nɛ asɛyʋʋ pʋyʋ tɛtʋ yɔɔ kewiyisi kpeekpe,+ pɛkɛ fɛyɛ pʋyʋ, eduuye, hoŋa pʋyʋ nɛ nɔɔ kɩdɛkɛdaɣ lɔʋ pʋyʋ+ lona wena a-taa payɩ mamɩzɩɣ-wɛ yɔ.+
10 Nɛ mankaɣ-wɛ tiyinuu laɣɖɛ,+ ñɔɔsɩ, nɛ kɩzɩkʋ*+ nɛ pɩkɔɔ pɩtalɩ alɩwaatʋ ndʋ pamʋʋ ɛjaɖɛ nɖɩ mɛncɛlɩ pa nɛ pɔ-cɔzɔnaa yɔ ɖɩ-taa yɔ.’”»
Pɩ-tɛɛ tɔm
^ Piye piye, «Nebukadɩrezaarɩ,» mbʋ pamaɣ ɛ-hɩɖɛ ɖɔɖɔ.
^ Ɛnʋ paya ɖɔɖɔ se Yehoyakin nɛ Koniya.
^ Pɩpɩzɩɣ pɩkɛ, «yɔɔ kandɩyʋʋ kolonzi mayaa.»
^ Yaa «kʋdɔŋ.»