Yereemii 26:1-24
26 Yuuda wiyaʋ, Yoziyaasɩ pɩyalʋ Yehoyakim+ kewiyitu tɔɔʋ ɖɩbazɩyɛ taa lɛ, Yehowa tɔm tʋnɛ tɩtalɩ Yereemii:
2 «Tɔm tʋnɛ Yehowa yɔɔdʋʋ: “Sɩŋ Yehowa ɖɩɣa kadaɣ taa nɛ ŋyɔɔdɩ tɔm* Yuuda tɛtʋ ndɩ ndɩ taa ɛyaa mba payɩ peɖiɣni kɔm se pala Ɛsɔ sɛtʋ tʋmɩyɛ* Yehowa ɖɩɣa taa yɔ pɔ-yɔɔ. Heyi-wɛ tɔm ndʋ payɩ manɖʋʋ-ŋ paɣtʋ se ŋheyi-wɛ yɔ; taalɩzɩ tɩ-yɔɔ paa tɔm piye kʋɖʋmɖɩyɛ.
3 Pʋtɔma yɔ pakaɣ welisuu nɛ pa-taa paa weyi lɛ, ɛkaɣ yebu ɛ-nʋmɔʋ kɩdɛkɛdʋʋ, nɛ mankaɣ lɛɣzʋʋ ma-lɩmaɣza* asɛyʋʋ ŋgʋ manɖʋwa se mɔnkɔŋnɩ pɔ-yɔɔ pa-lakasɩ kɩdɛkɛdɩsɩ yɔɔ yɔ kɩ-yɔɔ.+
4 Heyi-wɛ se: ‘Tɔm tʋnɛ Yehowa yɔɔdʋʋ: “Ye iiwelisiɣni-m se ɩɖɔ paɣtʋ* ndʋ manɖʋ-mɩ yɔ tɩ-yɔɔ,
5 se iwelisi ma-lɩmɖʋyaa mba pɛkɛ nayaa yɔ pɔ-tɔm, mba mɛwɛɛ nɛ mentiyiɣ-wɛ mɩ-cɔlɔ nɛ mɛlɛlɩɣ tam sakɩyɛ* ɛlɛ itiwelisini-wɛ yɔ,+
6 ɖɩnɛ ɛlɛ mankaɣ yebu nɛ ɖɩɣa kanɛ kɛwɛɛ ɛzɩ Siiloo yɔ,+ nɛ mankaɣ yebu nɛ tɛtʋ tʋnɛ tɩkɛ tɛtʋ yɔɔ ajɛɛ kpeekpe nɔɔ kɩdɛkɛdaɣ lɔʋ pʋyʋ.”’”»+
7 Nɛ cɔjɔnaa nɛ nayaa nɛ samaɣ kpeekpe nɩɩ Yereemii wɛɛ nɛ ɛyɔɔdʋʋ tɔm ndʋ Yehowa ɖɩɣa taa.+
8 Nɛ Yereemii tɛm yɔɔdʋʋ tɔm ndʋ payɩ Yehowa kaaɖʋ-ɩ paɣtʋ se eheyi samaɣ kpeekpe yɔ lɛ, cɔjɔnaa nɛ nayaa nɛ samaɣ kpeekpe pakpa-ɩ nɛ pɔyɔɔdɩ se: «Paa ŋŋlabɩ ɛzɩma ŋkaɣ sɩbʋ.
9 Ɛbɛ yɔɔ ŋyɔɔdɩ natʋ tɔm Yehowa hɩɖɛ taa se: “Ðɩɣa kanɛ kakaɣ pɩsʋʋ ɛzɩ Siiloo yɔ, nɛ pakaɣ yɔkʋʋ tɛtʋ tʋnɛ nɛ nɔɔyʋ ɛɛkaɣ wɛʋ tɩ-taa”?» Nɛ samaɣ kpeekpe kpeɣli nɛ kɔcɔɔ Yereemii nɛ kata Yehowa ɖɩɣa taa.
10 Yuuda awumbiya nɩ tɔm ndʋ lɛ, palɩɩnɩ wiyaʋ ɖɩɣa taa nɛ pakpa Yehowa ɖɩɣa taa nɛ pacaɣ Yehowa nɔnɔɔ kɩfalaɣ taa.+
11 Cɔjɔnaa nɛ nayaa peheyi awumbiya nɛ samaɣ kpeekpe se: «Abalʋ ɛnɛ ɛmʋnɩ sɩm,+ mbʋ pʋyɔɔ yɔ ɛyɔɔdɩ natʋ tɔm se asɛyʋʋ kaɣ kɔm tɛtʋ tʋnɛ tɩ-yɔɔ, ɛzɩ ɩnɩʋ nɛ mɩ-maɣmaɣ mɩ-nɩŋgbaaŋ yɔ.»+
12 Peeɖe Yereemii heyi awumbiya kpeekpe nɛ samaɣ kpeekpe se: «Yehowa tiyini-m se mɔyɔɔdɩ natʋ tɔm ndʋ payɩ ɩnɩwa se asɛyʋʋ kaɣ kɔm ɖɩɣa kanɛ kɔ-yɔɔ nɛ tɛtʋ tʋnɛ tɩ-yɔɔ yɔ.+
13 Ye mbʋ lɛɛlɛɛyɔ lɛ, ɩñɔɔzɩ mɩ-nʋmɔŋ nɛ mɩ-lakasɩ nɛ ɩña mɩ-Ɛsɔ Yehowa nɔɔ, nɛ Yehowa kaɣ lɛɣzʋʋ ɛ-lɩmaɣza* asɛyʋʋ ŋgʋ ɛyɔɔdaa se ɛkɔŋnɩ mɩ-yɔɔ yɔ kɩ-yɔɔ.+
14 Ɛlɛ ma lɛ, mɛwɛ mi-nesi tɛɛ. Ɩlabɩ-m mbʋ payɩ ɩmaɣzɩɣ se pɩwɛ ɖeu nɛ pɩtʋʋzɩ mɩ-ɛsɩndaa yɔ.
15 Ɛlɛ ɩtɩlɩ camɩyɛ se ye ɩkʋ-m yɔ, ɩkaɣ kɔnʋʋ calɩm mbʋ pɩtɩwɛɛkɩ pʋyʋ yɔ mɩ-maɣmaɣ mɩ-yɔɔ nɛ tɛtʋ tʋnɛ tɩ-yɔɔ nɛ tɩ-taa mba yɔɔ, mbʋ pʋyɔɔ yɔ toovenim lɛ, Yehowa tiyini-m se mɔyɔɔdɩ tɔm tʋnɛ tɩ-tɩŋa nɛ ɩnɩɩ-tʋ.»
16 Nɛ awumbiya nɛ samaɣ kpeekpe peheyi cɔjɔnaa nɛ nayaa se: «Abalʋ ɛnɛ ɛtɩmʋnɩ sɩm, mbʋ pʋyɔɔ yɔ ɖɛ-Ɛsɔ Yehowa hɩɖɛ taa ɛyɔɔdɩnɩ-ɖʋ.»
17 Pɩtasɩ lɛ, ɛjaɖɛ taa ɛzʋtʋyaa nabɛyɛ kʋyaa nɛ papaɣzɩ heyuu samaɣ ŋga kaakpeɣlaa yɔ ke-kpeekpe se:
18 «Moresɛɛtɩ tʋ Mikee+ kaawɛɛ nɛ ɛyɔɔdʋʋ natʋ tɔm Yuuda wiyaʋ Ezekiyaasɩ+ alɩwaatʋ taa, nɛ eeheyi Yuuda samaɣ kpeekpe se: “Tɔm tʋnɛ yoyaa tɛ Yehowa yɔɔdʋʋ:
‘Pakaɣ hayʋʋ Siyɔŋ ɛzɩ hayɩm yɔ,Yeruzalɛm kaɣ pɩsʋʋ njɛyɛ tambaɣ huuye,+Nɛ Ðɩɣa pʋʋ* kaɣ pɩsʋʋ ɛzɩ lona kʋkʋya wena awɛ laʋ tɛɛ yɔ.’”*+
19 «Ɛzɩ Yuuda wiyaʋ Ezekiyaasɩ nɛ Yuuda kpeekpe pakʋ-ɩ yaa we? Ɛzɩ wiyaʋ tise Yehowa sɔɔndʋ nɛ etendi Yehowa se ɛna pa-pʋtɔdɩyɛ,* nɛ piyele nɛ Yehowa lɛɣzɩ ɛ-lɩmaɣza* asɛyʋʋ ŋgʋ ɛɛyɔɔdaa se ɛkɔŋnɩ pɔ-yɔɔ yɔ kɩ-yɔɔ yaa we?+ Ye mbʋ, ɖɩcaɣ kɔnʋʋ asɛyʋʋ sɔsɔʋ ɖa-maɣmaɣ ɖɔ-yɔɔ.*
20 «Nɛ abalʋ lɛlʋ ɖɔɖɔ kaawɛɛ nɛ ɛyɔɔdʋʋ natʋ tɔm Yehowa hɩɖɛ taa, ɛnʋ lɛ Kiriyatɩ-Yeyarim+ tʋ Semayaa pɩyalʋ Uriyaa; ɛyɔɔdɩ natʋ tɔm se asɛyʋʋ kaɣ kɔm tɛtʋ tʋnɛ tɩ-yɔɔ nɛ ɛjaɖɛ ɖɩnɛ ɖɩ-yɔɔ, nɛ ɛ-tɔm kaawɛ ɛzɩ Yereemii ñɩndʋ yɔ.
21 Wiyaʋ Yehoyakim+ nɛ ɛ-ɛyaa ɖoŋ tɩnaa kpeekpe nɛ ɛ-awumbiya kpeekpe panɩɩ ɛ-tɔm ndʋ, nɛ wiyaʋ ñɩnaɣ se ɛkʋ-ɩ.+ Uriyaa nɩ-tʋ lɛ, sɔɔndʋ kpa-ɩ kpaagbaa nɛ ese nɛ ɛɖɛɛ Ejipiti.
22 Peeɖe Wiyaʋ Yehoyakim tiyi Akɩbɔɔrɩ pɩyalʋ Ɛlɩnataanɩ+ nɛ ɛyaa lalaa Ejipiti.
23 Nɛ pakpaɣ Uriyaa nɛ Ejipiti nɛ pɔkɔnɩ-ɩ Wiyaʋ Yehoyakim cɔlɔ, nɛ ɛlɛ kʋ-ɩ nɛ laɣɖɛ+ nɛ ɛpɛɖɩ e-tomnaɣ pɩlaʋ taa ɖenɖe pepiŋ tɛtʋ taa ɛyaa yɔ.»
24 Ɛlɛ Safaanɩ+ pɩyalʋ Ahikam+ ɖʋ Yereemii nesi; piyeba nɛ patɩɖʋzɩ-ɩ samaɣ nesi tɛɛ se kakʋ-ɩ.+
Pɩ-tɛɛ tɔm
^ Yaa «nɛ ŋyɔɔdɩnɩ.»
^ Yaa «se poluŋ.»
^ Yaa «mankaɣ kpiɖuu.»
^ Yaa «wɩlɩtʋ.»
^ Piye piye, «mankʋyaɣ tanaŋ tɛɛ lɔŋ nɛ mentiyiɣ-wɛ.»
^ Yaa «kaɣ kpiɖuu.»
^ Yaa «ɛzɩ pʋʋ ŋgʋ kɩ-yɔɔ nɛ tɩŋ yɔ.»
^ Yaa «templo pʋʋ.»
^ Yaa «nɛ ɛñaɣ pana se ɛhɛzɩ Yehowa laŋɩyɛ.»
^ Yaa «kpiɖi.»
^ Yaa «ɖa-kalɩzasɩ yɔɔ.»
