Yereemii 27:1-22
27 Yuuda wiyaʋ, Yoziyaasɩ pɩyalʋ Yehoyakim kewiyitu tɔɔʋ ɖɩbazɩyɛ taa lɛ, tɔm tʋnɛ tɩlɩnɩ Yehowa cɔlɔ nɛ tɩtalɩ Yereemii:
2 «Tɔm tʋnɛ Yehowa heyi-m: “La ña-tɩ kɩtamɩŋ nɛ sʋʋtʋ ɖaŋ, nɛ ŋtɩnɩ-ɩ ño-pondone yɔɔ.
3 Pʋwayɩ lɛ, ŋɖʋzɩ-ɩ ɛyaa mba petiyi-wɛ nɛ pɔkɔɔ Yeruzalɛm Yuuda wiyaʋ Zedekiya cɔlɔ yɔ pe-nesi tɛɛ, nɛ powoni-i Edom wiyaʋ,+ Mowaabʋ wiyaʋ,+ Amooni mba wiyaʋ,+ Tiirɩ wiyaʋ+ nɛ Siidɔɔ wiyaʋ.+
4 Heyi-wɛ se peheyi pa-ñʋndɩnaa paɣtʋ tʋnɛ:
«“‘Tɔm tʋnɛ yoyaa tɛ Yehowa, Izrayɛɛlɩ tɛ Ɛsɔ yɔɔdʋʋ; tɔm tʋnɛ pɩwɛɛ se iheyi mɩ-ñʋndɩnaa:
5 “Ma, matɩŋnɩ mon-ɖoŋ sɔsɔŋ yɔɔ nɛ me-nesi nzɩ mensezaa yɔ sɩ-yɔɔ nɛ mala tɛtʋ, ɛyaa, nɛ tɛtɛgbɩna wena awɛ tɛtʋ yɔɔ yɔ; nɛ maha-tʋ weyi ɛ-tɔm kɛdɩnɩ-m yɔ.*+
6 Nɛ lɛɛlɛɛyɔ lɛ, manɖʋzɩ ajɛɛ anɛ a-tɩŋa ma-lɩmɖʋyʋ Babilɔɔnɩ wiyaʋ Nabukodonozɔɔrɩ+ nesi tɛɛ; halɩ maha-ɩ ɖɔɖɔ tɛtɛgbɩna wena awɛ ñɩtʋ taa yɔ se aɖʋ-ɩ lɩm.
7 Ajɛɛ kpeekpe kaɣ-ɩ ɖʋʋ lɩm, ɛ-maɣmaɣ nɛ ɛ-pɩyalʋ nɛ ɛ-sayɩ pɩkɔɔ nɛ pɩsɩɩnɩ alɩwaatʋ ndʋ ɛ-maɣmaɣ ɛ-ɛjaɖɛ alɩwaatʋ talɩɣ yɔ,+ alɩwaatʋ ndʋ ajɛɛ sakɩyɛ nɛ awiya sɔsɔna kaɣ-ɩ pɩsʋʋ a-yom yɔ.”+
8 «“‘“Ye ɛjaɖɛ naɖɩyɛ yaa kewiyaɣ nakɛyɛ ekizaa se kaaɖʋʋ lɩm Babilɔɔnɩ wiyaʋ Nabukodonozɔɔrɩ nɛ kekizi se kaasʋzʋʋ ko-pondone Babilɔɔnɩ wiyaʋ sʋʋtʋ ɖaʋ tɛɛ yɔ, mankaɣ ɛjaɖɛ nɖɩ ɖɩ-nɩŋgbaŋʋʋ hɔm nɛ laɣɖɛ,+ ñɔɔsɩ, nɛ kɩzɩkʋ,* pɩkɔɔ nɛ pɩsɩɩnɩ alɩwaatʋ ndʋ mantɩŋnɩ e-nesi yɔɔ nɛ manɖɩzɩ-wɛ yɔ,” Yehowa yɔɔdʋʋna.
9 «“‘“Pʋyɔɔ lɛ, itaawelisini mɩ-nayaa, mɩ-tɩyaa, mi-ɖoziyaa, mɩ-maajiki laɖaa, nɛ mɩ-alɩfaanaa, mba pɛwɛɛ nɛ peheyiɣ-mɩ se: ‘Ɩɩkaɣ ɖʋʋ lɩm Babilɔɔnɩ wiyaʋ’ yɔ.
10 Mbʋ pʋyɔɔ yɔ pɛwɛɛ nɛ peheyiɣ-mɩ natʋ tɔm ndʋ tɩkɛ cɛtɩm yɔ, se pɩsa nɛ pakpaɣ-mɩ nɛ poposi-mɩ nɛ mɩ-ɛjaɖɛ nɛ mamɩzɩ-mɩ nɛ ɩmʋʋ.
11 «“‘“Ɛlɛ ɛjaɖɛ nɖɩ ɖɩsʋzʋʋ ɖi-pondone Babilɔɔnɩ wiyaʋ sʋʋtʋ ɖaʋ tɛɛ nɛ ɖɩɖʋ-ɩ lɩm yɔ, mankaɣ-ɖɩ haʋ nʋmɔʋ se ɖɩcaɣ* ɖɩ-tɛtʋ yɔɔ, se ɖɩhayɩ-tʋ nɛ ɖɩcaɣ tɩ-yɔɔ,”’” Yehowa yɔɔdʋʋna.»
12 Meheyi ɖɔɖɔ tɔm kʋɖʋmtʋ ndʋ Yuuda wiyaʋ Zedekiya+ se: «Ɩsʋzɩ mi-pondona Babilɔɔnɩ wiyaʋ sʋʋtʋ ɖaʋ tɛɛ nɛ ɩɖʋ ɛ nɛ ɛ-samaɣ lɩm, nɛ ɩkaɣ wobu pɩ-yɔɔ nɛ ɩwɛɛ wezuu.+
13 Ɛbɛ yɔɔ pɩwɛɛ se laɣɖɛ,+ ñɔɔsɩ+ nɛ kɩzɩkʋ+ ɩkʋ ña nɛ ña-samaɣ? Toovenim taa lɛ, ɛzɩ Yehowa kaayɔɔdʋʋ yɔ, mbʋ pɩkaɣ talʋʋ ɛjaɖɛ nɖɩ ɖɩɩkaɣ ɖʋʋ lɩm Babilɔɔnɩ wiyaʋ yɔ.
14 Nayaa mba pɛwɛɛ nɛ peheyiɣ-mɩ se: “Ɩɩkaɣ ɖʋʋ lɩm Babilɔɔnɩ wiyaʋ”+ yɔ, itaawelisi pɔ-tɔm, mbʋ pʋyɔɔ yɔ pɛwɛɛ nɛ peheyiɣ-mɩ natʋ tɔm ndʋ tɩkɛ cɛtɩm yɔ.+
15 «“Mbʋ pʋyɔɔ yɔ mantitiyi-wɛ, ɛlɛ pɛwɛɛ nɛ pɔyɔɔdʋʋ natʋ tɔm ndʋ tɩkɛ cɛtɩm yɔ ma-hɩɖɛ taa, nɛ mbʋ pɩkaɣ lɩʋ pɩ-taa yɔ lɛ se mankaɣ-mɩ mɩzʋʋ nɛ ɩkaɣ mʋʋʋ, mɩ nɛ nayaa mba pɛwɛɛ nɛ peheyiɣ-mɩ natʋ tɔm yɔ,”+ Yehowa yɔɔdʋʋna.»
16 Piyele nɛ cɔjɔnaa nɛ samaɣ kanɛ ke-kpeekpe lɛ, meheyi-wɛ se: «Tɔm tʋnɛ Yehowa yɔɔdʋʋ: “Itaawelisi natʋ tɔm ndʋ mɩ-nayaa wɛɛ nɛ peheyiɣ-mɩ se: ‘Ɩna! Piileɖiɣ lɛ, pakaɣ kpaɣʋ Yehowa ɖɩɣa taa wondu nɛ Babilɔɔnɩ nɛ papɩsɩna!’+ yɔ, mbʋ pʋyɔɔ yɔ pɛwɛɛ nɛ peheyiɣ-mɩ natʋ tɔm ndʋ tɩkɛ cɛtɩm yɔ.+
17 Itaawelisini-wɛ. Ɩɖʋ Babilɔɔnɩ wiyaʋ lɩm, ɖɩnɛ ɛlɛ ɩkaɣ wɛʋ wezuu.+ Ɛbɛ yɔɔ pɩwɛɛ se tɛtʋ tʋnɛ tɩpɩsɩ njɛyɛ?
18 Ɛlɛ ye pɛkɛ nayaa nɛ ye Yehowa tɔm ɛwɛ pɔ-cɔlɔ yɔ, mentendi-wɛ, petendi yoyaa tɛ Yehowa se wondu ndʋ pɩkazɩ Yehowa ɖɩɣa taa, Yuuda wiyaʋ ɖɩɣa taa, nɛ Yeruzalɛm yɔ pataakpaɣ-tʋ nɛ powoni Babilɔɔnɩ.”
19 «Mbʋ pʋyɔɔ yɔ tɔm tʋnɛ yoyaa tɛ Yehowa yɔɔdʋʋ tilima,+ Teŋgu,*+ kɛɛkɛɛnaa,+ nɛ wondu ndʋ tɩkazɩ tɛtʋ tʋnɛ tɩ-taa yɔ tɩ-yɔɔ,
20 mbʋ payɩ Babilɔɔnɩ wiyaʋ Nabukodonozɔɔrɩ tɩkpaɣ alɩwaatʋ ndʋ ɛkpaɣ Yuuda wiyaʋ, Yehoyakim pɩyalʋ Yekoniya, Yeruzalɛm taa nɛ ɛkɛzɩ-ɩ tɛtʋ Babilɔɔnɩ yɔ, pɩkpɛndɩnɩ Yuuda nɛ Yeruzalɛm ñɩma mba payɩ pa-hɩla sɛwa yɔ;+
21 ɛɛɛ, tɔm tʋnɛ yoyaa tɛ Yehowa, Izrayɛɛlɩ tɛ Ɛsɔ yɔɔdʋʋ wondu ndʋ pɩkazɩ Yehowa ɖɩɣa taa, Yuuda wiyaʋ ɖɩɣa taa, nɛ Yeruzalɛm yɔ tɩ-yɔɔ:
22 “‘Pakaɣ-tʋ wonuu Babilɔɔnɩ,+ nɛ tɩkaɣ wɛʋ peeɖe pɩkɔɔ nɛ pɩtalɩ kɩyakʋ ŋgʋ manpɩsɩɣnɩ ma-lɩmaɣza nɛ tɩ-yɔɔ yɔ. Ðɩnɛ ɛlɛ mankaɣ-tʋ pɩsɩnʋʋ nɛ manɖaɣnɩ-tʋ sɩʋ lone ɖɩnɛ ɖɩ-taa,’”+ Yehowa yɔɔdʋʋna.»
Pɩ-tɛɛ tɔm
^ Piye piye, «weyi pɩtʋʋzɩ mɛ-ɛsɩndaa yɔ.»
^ Yaa «kʋdɔŋ.»
^ Piye piye, «ɖɩhɛzɩ.»
^ Pʋ-tɔbʋʋ se ñɩɣyʋʋ kɩsɛɛmʋʋ Teŋgu ŋgʋ kɩwɛ templo taa yɔ.
