Yereemii 28:1-17
-
Yereemii nɛ cɛtɩm nayʋ Anaanɩya (1-17)
28 Pɩnaɣ kʋɖʋmaɣ ŋga ka-taa, Yuuda wiyaʋ Zedekiya+ kewiyitu tɔɔʋ ɖɩbazɩyɛ taa, pɩnaɣ 4 ñɩŋga taa, fenaɣ 5 ñɩŋga taa, Azuurɩ pɩyalʋ nayʋ Anaanɩya weyi ɛlɩnɩ Gabawɔɔ yɔ,+ eheyi-m Yehowa ɖɩɣa taa, cɔjɔnaa nɛ samaɣ kpeekpe ɛsɩndaa se:
2 «Tɔm tʋnɛ yoyaa tɛ Yehowa, Izrayɛɛlɩ tɛ Ɛsɔ yɔɔdʋʋ: “Mankaɣ pɛlʋʋ Babilɔɔnɩ wiyaʋ sʋʋtʋ ɖaʋ.+
3 Pɩnzɩ* 2 taa lɛ, mankaɣ pɩsɩnʋʋ lone ɖɩnɛ ɖɩ-taa Yehowa ɖɩɣa taa wondu ndʋ payɩ Babilɔɔnɩ wiyaʋ Nabukodonozɔɔrɩ kpaɣ lone ɖɩnɛ ɖɩ-taa nɛ ewoni Babilɔɔnɩ yɔ.”»+
4 «“Nɛ mankaɣ pɩsɩnʋʋ lone ɖɩnɛ ɖɩ-taa Yuuda wiyaʋ, Yehoyakim+ pɩyalʋ Yekoniya,+ nɛ Yuuda ñɩma mba payɩ pɛkɛzɩ-wɛ tɛtʋ Babilɔɔnɩ yɔ,”+ mbʋ pʋyɔɔ yɔ mankaɣ pɛlʋʋ Babilɔɔnɩ wiyaʋ sʋʋtʋ ɖaʋ,” Yehowa yɔɔdʋʋna.»
5 Peeɖe nayʋ Yereemii yɔɔdɩnɩ nayʋ Anaanɩya; ɛyɔɔdɩnɩ-ɩ cɔjɔnaa nɛ samaɣ ŋga kaasɩŋ Yehowa ɖɩɣa taa yɔ ke-kpeekpe kɛ-ɛsɩndaa.
6 Nayʋ Yereemii yɔɔdɩ se: «Amɛn!* Yehowa ɛla mbʋ! Yehowa eyele nɛ natʋ tɔm ndʋ ŋyɔɔdaa yɔ tɩla nɛ ɛkpaɣ Yehowa ɖɩɣa taa wondu ndʋ tɩwɛ Babilɔɔnɩ yɔ nɛ mba payɩ pɛkɛzɩ-wɛ tɛtʋ Babilɔɔnɩ yɔ nɛ ɛpɩsɩnɩ lone ɖɩnɛ ɖɩ-taa!
7 Ɛlɛ mentendi-ŋ, welisi tɔm tʋnɛ, ndʋ menɖiɣni yɔɔdʋʋ ña-nɩŋgbaaŋ taa nɛ samaɣ kpeekpe nɩŋgbaaŋ taa yɔ.
8 Pɩlakɩ alɩwaatʋ sakɩyɛ yɔ, nayaa mba paawɛɛ pʋcɔ nɛ pɩtalɩɣnɩ-m yɔ nɛ mba paawɛɛ pʋcɔ nɛ pɩtalɩɣnɩ-ŋ yɔ, pɔyɔɔdaɣ natʋ tɔm ajɛɛ sakɩyɛ nɛ kewiyisi sɔsɔsɩ yɔɔ. Pɔyɔɔdaɣ yoŋ tɔm, asɛyɩŋ tɔm nɛ kɩzɩkʋ* tɔm.
9 Ye nayʋ nɔɔyʋ ɛyɔɔdɩ laŋhɛzɩyɛ tɔm nɛ ɛ-tɔm ndʋ tɩla yɔ, ɖɩnɛ ɛlɛ pɩkaɣ naʋ se toovenim taa lɛ, Yehowa tiyini nayʋ ɛnʋ.»
10 Peeɖe nayʋ Anaanɩya kʋsɩ sʋʋtʋ ɖaʋ ŋgʋ kɩɩwɛ nayʋ Yereemii pondone yɔɔ yɔ nɛ ɛpɛlɩ-kʋ.+
11 Nɛ Anaanɩya yɔɔdɩ samaɣ kpeekpe ɛsɩndaa se: «Tɔm tʋnɛ Yehowa yɔɔdʋʋ: “Mbʋ ɖɔɖɔ mankaɣ pɛlʋʋ Babilɔɔnɩ wiyaʋ Nabukodonozɔɔrɩ sʋʋtʋ ɖaʋ ŋgʋ kɩwɛ ajɛɛ tɩŋa pondone yɔɔ yɔ pʋcɔ nɛ pɩnzɩ 2 tɛ.”»+ Nɛ nayʋ Yereemii kpaɣ ɛ-nʋmɔʋ nɛ ɛɖɛɛ.
12 Nayʋ Anaanɩya pɛlɩ sʋʋtʋ ɖaʋ ŋgʋ kɩɩwɛ nayʋ Yereemii pondone yɔɔ yɔ nɛ pɩtɛ lɛ, Yehowa tɔm tʋnɛ tɩtalɩ Yereemii:
13 «Wolo nɛ ŋheyi Anaanɩya se: “Tɔm tʋnɛ Yehowa yɔɔdʋʋ: ‘Ŋpɛlɩ sʋʋtʋ ɖaŋ weyi pakpaɣ tɩʋ nɛ palabɩna yɔ,+ ɛlɛ i-lone taa lɛ, ŋkaɣ labʋ ñɩɣtʋ sʋʋtʋ ɖaŋ.’
14 Mbʋ pʋyɔɔ yɔ tɔm tʋnɛ yoyaa tɛ Yehowa, Izrayɛɛlɩ tɛ Ɛsɔ yɔɔdʋʋ: ‘Mankaɣ tɩnʋʋ ñɩɣtʋ sʋʋtʋ ɖaʋ ajɛɛ anɛ a-tɩŋa a-pondone yɔɔ, se aɖʋ lɩm Babilɔɔnɩ wiyaʋ Nabukodonozɔɔrɩ, nɛ paa aalabɩ ɛzɩma yɔ, akaɣ-ɩ lɩm ɖʋʋ.+ Halɩ mankaɣ-ɩ haʋ tɛtɛgbɩna wena awɛ ñɩtʋ taa yɔ.’”»+
15 Nɛ nayʋ Yereemii heyi nayʋ Anaanɩya+ se: «Oo Anaanɩya, mentendi-ŋ, welisi! Yehowa titiyi-ŋ, ɛlɛ ŋyeba nɛ samaɣ kanɛ kataa liu cɛtɩm tɔm.+
16 Pʋyɔɔ lɛ, tɔm tʋnɛ Yehowa yɔɔdʋʋ: “Na! Mankʋsʋʋ-ŋ tɛtʋ yɔɔ. Ŋkaɣ sɩbʋ pɩnaɣ kanɛ, mbʋ pʋyɔɔ yɔ ŋseɣti samaɣ nɛ kakaɖɩnɩ Yehowa.”»+
17 Nɛ nayʋ Anaanɩya sɩ pɩnaɣ ŋga ka-taa, fenaɣ 7 ñɩŋga taa.
