Yereemii 33:1-26
33 Yehowa tɔm talɩ Yereemii nabʋlɛ ɖeɖe, alɩwaatʋ ndʋ ɛwɛ Feŋiyaa Kadaɣ+ taa mbʋ nɛ paɖaŋ ɛ-yɔɔ se ɛtaaɖɛɛ ɖoli yɔ se:
2 «Tɔm tʋnɛ Yehowa, tɛtʋ Laɖʋ yɔɔdʋʋ, Yehowa weyi ɛma-tʋ nɛ eyele nɛ tɩka camɩyɛ yɔ; payaɣ-ɩ se Yehowa:
3 “Ya-m nɛ mankaɣ-ŋ cosuu nɛ mɛnkɛdɩ-ŋ faaa tɔm sɔsɔtʋ nɛ tɔm ndʋ paapɩzɩɣ nɛ panɩɩ tɩ-tɔbʋʋ yɔ, ndʋ ŋtɩsɩm-tʋ yɔ.”»+
4 «Mbʋ pʋyɔɔ yɔ tɔm tʋnɛ Izrayɛɛlɩ tɛ Ɛsɔ Yehowa yɔɔdʋʋ tɛtʋ tʋnɛ tɩ-ɖɩsɩ nɛ Yuuda awiya ɖɩsɩ yɔɔ, nzɩ potuzaa nɛ pɛpɛɖɩ, you wondu ndʋ pesiɣaa nɛ pɩcɔɔ tɛtʋ nɛ pɩta yɔ tɩ-yɔɔ nɛ laɣɖɛ yɔɔ,+
5 nɛ mba peɖiɣni kɔm se poyooni Kalɩdee mba yɔ pɔ-yɔɔ, mba peyeki se ɛyaa mba mankʋ-wɛ nɛ pana nɛ ɖɩwɩzɩyɛ yɔ posu lona anɛ a-taa yɔ, mba pa-lakasɩ kɩdɛkɛdɩsɩ yeba se mɛmɛsɩ mɛ-ɛsɩndaa nɛ tɛtʋ tʋnɛ tɩtaana-m yɔ:
6 “Na! Meyeki nɛ ɛyaa yɔɔ cɛ nɛ pɛwɛɛ alaafɩya,+ nɛ mankaɣ-wɛ labʋ kɔyɛ nɛ maha-wɛ* laŋhɛzɩyɛ sakɩyɛ nɛ toovenim tɔm sakɩyɛ.+
7 Nɛ mankaɣ pɩsɩnʋʋ Yuuda yomaa nɛ Izrayɛɛlɩ yomaa,+ nɛ mankaɣ-wɛ maʋ ɛzɩ maalabʋ kiɖe tɛɛ yɔ.+
8 Nɛ mankaɣ ñalʋʋ kɩwɛɛkɩm mbʋ payɩ palabɩ-m nɛ pɔɖɔɔ wɛɛ yɔ, nɛ pɛwɛɛ kele kele,+ nɛ mankaɣ-wɛ kpeɣu kɩwɛɛkɩm nɛ kɩdɛkɛdɩm mbʋ payɩ palabɩ-m nɛ pɔɖɔɔ wɛɛ yɔ.+
9 Nɛ tɛtʋ ndʋ tɩ-hɩɖɛ kaɣ yebu nɛ mɛwɛɛ amɛya taa, nɛ tɩkaɣ-m kɔnʋʋ samtʋ nɛ kajʋka tɛtʋ yɔɔ ajɛɛ wena akaɣ nɩʋ kɩbandʋ lakasɩ nzɩ payɩ malabɩ-wɛ yɔ sɩ-tɔm yɔ a-ɛsɩndaa.+ Nɛ akaɣ wɛʋ sɔɔndʋ taa nɛ akaɣ seluu+ kɩbandʋ lakasɩ kpeekpe nɛ laŋhɛzɩyɛ nɖɩ mankaɣ-tʋ haʋ yɔ pɩ-yɔɔ.”»+
10 «Tɔm tʋnɛ Yehowa yɔɔdʋʋ: “Lone ɖɩnɛ ɖɩ-taa, nɖɩ ɩkaɣ yɔɔdʋʋ se ɖɩkɛ ɛjaɖɛ nɖɩ peyebi-ɖɩ nɛ ɛyʋ nɛ kpɩnɛ pɛfɛyɩ ɖɩ-taa yɔ, Yuuda tɛtʋ ndɩ ndɩ taa nɛ Yeruzalɛm habɛɛ wena awɛ kpɛɖɛ, nɛ ɛyʋ yaa kpɩnɛ fɛyɩ a-yɔɔ yɔ, pakaɣ tasʋʋ nɩʋ
11 amɛya taŋ nɛ taa leleŋ taŋ,+ walʋ nɔɔ nɛ asɛyʋ kɩfalʋ nɔɔ, mba pɔyɔɔdʋʋ se: ‘Ɩsɛɛ yoyaa tɛ Yehowa se ɛlabaɣ lɛ, mbʋ pʋyɔɔ yɔ Yehowa wɛ ɖeu;+ ɛ-sɔɔlɩm siɣsiɣ ñɩmbʋ wɛ tam!’+ yɔ pɔ-nɔɔ.”
«“Pakaɣ wonuu ɛsɩmɩyɛ kɩlaŋ Yehowa ɖɩɣa taa,+ mbʋ pʋyɔɔ yɔ mankaɣ pɩsɩnʋʋ ɛjaɖɛ ɖɩnɛ ɖɩ-taa ñɩma mba pɛwɛ yomiye taa yɔ, nɛ pɩwɛɛ ɛzɩ pɩɩwɛʋ kiɖe tɛɛ yɔ,” Yehowa yɔɔdʋʋna.»
12 «Tɔm tʋnɛ yoyaa tɛ Yehowa yɔɔdʋʋ: “Lona wena a-taa kpɩna tɔkɩ ñɩtʋ yɔ akaɣ tasʋʋ wɛʋ ɛjaɖɛ ɖɩnɛ ɖɩ-taa, nɖɩ peyebi-ɖɩ nɛ ɛyʋ nɛ kpɩnɛ pɛfɛyɩ ɖɩ-taa yɔ, nɛ ɖɩ-tɛtʋ ndɩ ndɩ tɩŋa taa, se ninɖiɣyaa iwoni pa-kpɩna nɛ ahɛzɩ peeɖe.”+
13 «“Pʋŋ egeetiye tɛtʋ ndɩ ndɩ taa, tɛtʋ ndɩ ndɩ ndʋ tɩwɛ pɩ-tɛɛ ɛjaɖɛ taa yɔ tɩ-taa, hadɛ kiŋ tɛtʋ ndɩ ndɩ taa, Bɛnjamɛɛ ɛjaɖɛ taa, ageeta wena acɔ Yeruzalɛm nɛ ata yɔ a-taa,+ nɛ Yuuda tɛtʋ ndɩ ndɩ taa,+ pɩkaɣ labʋ se ninɖiɣyaa kaɣ tasʋʋ kalʋʋ pe-heŋ,”* Yehowa yɔɔdʋʋna.»
14 «“Ɩna! Kɩyakɩŋ ɖiɣni kɔm, nɛ alɩwaatʋ ndʋ lɛ, mankaɣ yebu nɛ lidaʋ tɔm kɩbandʋ ndʋ mɔyɔɔdɩ Izrayɛɛlɩ ɖɩɣa yɔɔ nɛ Yuuda ɖɩɣa yɔɔ yɔ tɩla,”+ Yehowa yɔɔdʋʋna.
15 “Kɩyakɩŋ ɛnɩ ɩ-taa nɛ alɩwaatʋ ndʋ tɩ-taa lɛ, mankaɣ yebu nɛ Daviid lʋlʋʋ taa tʋ* siɣsiɣ tʋ nɔɔyʋ lɩɩ,+ nɛ ɛkaɣ kɔnʋʋ tɔm hʋʋ siɣsiɣ nɛ siɣsiɣ wɛtʋ ɛjaɖɛ taa.+
16 Kɩyakɩŋ ɛnɩ ɩ-taa lɛ, Yuuda kaɣ hiɣu ñʋʋ yabʋ,+ nɛ Yeruzalɛm kaɣ wɛʋ pɛɛyɛ taa.+ Nɛ hɩɖɛ ɖɩnɛ pakaɣ-ɩ yaʋ: Yehowa kɛnɩ ɖe-siɣsiɣ wɛtʋ.”»+
17 «Mbʋ pʋyɔɔ yɔ, tɔm tʋnɛ Yehowa yɔɔdʋʋ: “Paa pɩɩla ɛzɩma yɔ Daviid lʋlʋʋ taa tʋ nɔɔyʋ kaɣ wɛʋ se ɛcaɣ Izrayɛɛlɩ ɖɩɣa kewiyaɣ kpelaɣ yɔɔ,+
18 nɛ pɩɩkaɣ ɖɔɖɔ labʋ kpa se ɛyʋ nɔɔyʋ fɛyɩ cɔjɔnaa Leevi mba lʋlʋʋ taa se ɛsɩŋ mɛ-ɛsɩndaa nɛ ɛlaa kɩlaŋ kɩñaɣzɩŋ, tɔɔnaɣ pee kɩlaŋ, nɛ kɩlaŋ lɛɛŋ.”»
19 Nɛ Yehowa tɔm tasɩ talʋʋ Yereemii se:
20 «Tɔm tʋnɛ Yehowa yɔɔdʋʋ: “Ye ɩɩpɩzaɣ se ɩcɛ ɛgbɛyɛ nɖɩ manɖʋ evemiye yɔɔ nɛ ɛgbɛyɛ nɖɩ manɖʋ ɖoo yɔɔ, se pɩɖɩɣ nʋmɔʋ evemiye nɛ ɖoo se pataakɔɔ pa-alɩwaatʋ yɔɔ yɔ,+
21 pi-ɖeke pɩpɩzaɣna se piyele nɛ ɛgbɛyɛ nɖɩ manɖʋnɩ ma-lɩmɖʋyʋ Daviid yɔ ɖɩcɛ,+ nɛ piyele se ɛtaawɛɛnɩ abalɩbɩɣa nɛ kacaɣ e-kewiyaɣ kpelaɣ yɔɔ nɛ kɔtɔɔ kewiyitu,+ nɛ pɩla mbʋ ɖɔɖɔ ɛgbɛyɛ nɖɩ manɖʋnɩ cɔjɔnaa Leevi mba, mba pɛkɛ ma-lɩmɖʋyaa yɔ.+
22 Paapɩzɩɣ nɛ pakalɩ ɛsɔdaa yoyaa* ñʋʋ nɛ paapɩzɩɣ nɛ pamaɣzɩ teŋgu nɔɔ kañɩŋa, mbʋ ɖɔɖɔ mankaɣ yebu nɛ ma-lɩmɖʋyʋ Daviid nɛ Leevi ñɩma mba pɛwɛɛ nɛ paɖʋʋ-m lɩm yɔ pa-lʋlʋʋ taa mba* huu.”»
23 Nɛ Yehowa tɔm tasɩ talʋʋ Yereemii se:
24 «Ŋtɩnɩɩ tɔm ndʋ samaɣ kanɛ kɛwɛɛ nɛ kɔyɔɔdʋʋ se: “Yehowa kaɣ lɔʋ hɔŋ 2 weyi ɛlɩzaa yɔ”? Nɛ pɛwɛɛ nɛ palɩzɩɣ kaañamtʋ lakasɩ nɛ pawɩlɩɣ ma-maɣmaɣ man-samaɣ, nɛ paatasɩɣ-kɛ cɔnʋʋ se kɛkɛ ɛjaɖɛ.
25 «Tɔm tʋnɛ Yehowa yɔɔdʋʋ: “Ɛzɩ mañɩtʋʋ nɛ manɖʋ mɛ-ɛgbɛyɛ evemiye yɔɔ nɛ ɖoo yɔɔ nɛ pɩka camɩyɛ,+ nɛ manɖʋ ɛsɔdaa nɛ tɛtʋ paɣtʋ* ndɩ ndɩ nɛ pɩka camɩyɛ yɔ,+
26 mbʋ ɖɔɖɔ maakaɣ lɔʋ Yakɔɔb nɛ ma-lɩmɖʋyʋ Daviid pa-lʋlʋʋ taa mba* kpa, nɛ maakaɣ yebu lɩzʋʋ awiya ɛ-lʋlʋʋ taa mba* taa se pɔtɔɔ kewiyitu Abraham, Izaakɩ, nɛ Yakɔɔb pa-lʋlʋʋ taa mba* yɔɔ. Mbʋ pʋyɔɔ yɔ mankaɣ kpeɣluu pɛ-ɛyaa mba pɛwɛ yomiye taa yɔ nɛ manpɩsɩnɩ-wɛ+ nɛ mana pa-pʋtɔdɩyɛ.”»+
Pɩ-tɛɛ tɔm
^ Yaa «monkuli nɛ mawɩlɩ-wɛ.»
^ Yaa «se heŋ kaɣ ɖaɣnʋʋ tɩŋʋʋ weyi ɛkalɩɣ-ɩ yɔ e-nesi tɛɛ.»
^ Yaa «Daviid ñɩm tɔɔyʋ.» Piye piye, «ɛyazɩyɛ.»
^ Yaa «ɛsɔdaa tɩɩnzɩ.»
^ Piye piye, «po-ɖomaɣ.»
^ Yaa «kpalɩtʋ.»
^ Piye piye, «po-ɖomaɣ.»
^ Piye piye, «e-ɖomaɣ.»
^ Piye piye, «po-ɖomaɣ.»