Yereemii 34:1-22
34 Tɔm ndʋ tɩlɩnɩ Yehowa cɔlɔ nɛ tɩtalɩ Yereemii, alɩwaatʋ ndʋ Babilɔɔnɩ wiyaʋ Nabukodonozɔɔrɩ* nɛ ɛ-sɔɔjanaa kpeekpe nɛ tɛtʋ yɔɔ kewiyisi kpeekpe nzɩ sɩ-yɔɔ ɛtɔkɩ kewiyitu yɔ nɛ ɛyaa samasɩ kpeekpe kaawɛɛ nɛ poyouni Yeruzalɛm nɛ kɩ-tɛtʋ ndɩ ndɩ tɩŋa yɔ, ndʋ yɔ:+
2 «Tɔm tʋnɛ Izrayɛɛlɩ tɛ Ɛsɔ Yehowa yɔɔdʋʋ: “Wolo nɛ ŋyɔɔdɩnɩ Yuuda wiyaʋ Zedekiya+ nɛ ŋheyi-i se: ‘Tɔm tʋnɛ Yehowa yɔɔdʋʋ: “Na, menɖiɣni ɖʋzʋʋ tɛtʋ tʋnɛ Babilɔɔnɩ wiyaʋ nesi tɛɛ, nɛ ɛkaɣ-tʋ ñaɣzʋʋ miŋ.+
3 Nɛ ŋŋkaɣ lɩʋ e-nesi tɛɛ, mbʋ pʋyɔɔ yɔ paa pɩɩkpawa nɛ pitii yɔ pakaɣ-ŋ kpaʋ nɛ paɖʋzɩ e-nesi tɛɛ.+ Nɛ ŋkaɣ naʋ Babilɔɔnɩ wiyaʋ ɛsɩndaa, nɛ ɛkaɣ ña-maɣmaɣ yɔɔdɩnʋʋ, nɛ ŋkaɣ wobu Babilɔɔnɩ.”+
4 Ɛlɛ, nɩɩ Yehowa tɔm, Oo Yuuda wiyaʋ Zedekiya: “Tɔm tʋnɛ Yehowa yɔɔdʋʋ ñɔ-yɔɔ: ‘Paakaɣ-ŋ kʋʋ nɛ laɣɖɛ.
5 Ŋkaɣ sɩbʋ laŋhɛzɩyɛ taa;+ nɛ alɩwaatʋ ndʋ pepiŋi-ŋ yɔ, pakaɣ labʋ tɩlaaɖɩ sɔbʋ sɔnzɩ ɛzɩ paalabʋ ña-caanaa, awiya wena aawɛɛ pʋcɔ nɛ pɩtalɩɣnɩ-ŋ yɔ, nɛ pakaɣ caɣʋ kʋñɔwiye ñɔ-yɔɔ nɛ pɔyɔɔdʋʋ se: “Hayɩ, kɩbaɣlʋ!” mbʋ pʋyɔɔ yɔ “mɔyɔɔdɩnɩ tɔm ndʋ,” Yehowa yɔɔdʋʋna.’”’”»
6 Nɛ nayʋ Yereemii heyi Yuuda wiyaʋ Zedekiya tɔm ndʋ tɩ-tɩŋa Yeruzalɛm taa,
7 alɩwaatʋ ndʋ Babilɔɔnɩ wiyaʋ sɔɔjanaa kaawɛɛ nɛ poyouni Yeruzalɛm nɛ Yuuda tɛtʋ ndɩ ndɩ ndʋ pɩɩkazaa yɔ tɩ-tɩŋa yɔ,+ Lakisi+ nɛ Azeka;+ mbʋ pʋyɔɔ yɔ ti-ɖeke tɩɩkɛnɩ tɛtʋ ɖoŋ ñɩndʋ ndʋ pɩɩkazɩ Yuuda tɛtʋ ndɩ ndɩ taa yɔ.
8 Tɔm lɩnɩ Yehowa cɔlɔ nɛ tɩtalɩ Yereemii; pɩɩkɛ alɩwaatʋ ndʋ Wiyaʋ Zedekiya tɛm ɖʋʋ ɛgbɛyɛ nɛ Yeruzalɛm samaɣ kpeekpe se esusi-kɛ tɩ-yɔɔ wɛʋ tɔm yɔ,+
9 se pɩwɛɛ se paa weyi lɛ eyele e-yomaa mba pɛkɛ Ebree mba yɔ nɛ pɛwɛɛ pa-tɩ yɔɔ, abalɩñɩma nɛ halɩñɩma, se pɩsa nɛ nɔɔyʋ ɛtaasɩɩ ɛ-cɔlɔ e-koobu Yuuda tʋ se ɛkɛ e-yom.
10 Peeɖe awumbiya nɛ samaɣ kpeekpe ñam tɔm ndʋ. Patɩŋnɩ ɛgbɛyɛ ɖʋʋ mbʋ pɩ-yɔɔ nɛ panɩɩnɩ ɖama se pɩwɛɛ se paa weyi lɛ eyele e-yomaa abalɩñɩma nɛ halɩñɩma nɛ ɛtaatasɩ-wɛ sɩʋ se pɛkɛ e-yomaa. Nɛ paña nɛ peyele-wɛ nɛ pɛɖɛɛ.
11 Ɛlɛ pʋwayɩ lɛ, paɖaɣnɩ pɩsɩnʋʋ yomaa abalɩñɩma nɛ halɩñɩma mba paayebi-wɛ nɛ pɛɖɛɛ yɔ, nɛ paɖaɣnɩ-wɛ ɖʋʋ yomiye taa nɛ ɖoŋ.
12 Peeɖe Yehowa yɔɔdɩnɩ Yereemii; Yehowa heyi-i se:
13 «Tɔm tʋnɛ Izrayɛɛlɩ tɛ Ɛsɔ Yehowa yɔɔdʋʋ: “Manɖʋnɩ mɩ-cɔzɔnaa ɛgbɛyɛ+ kɩyakʋ ŋgʋ malɩzɩ-wɛ nɛ Ejipiti ɛjaɖɛ taa, yomiye ɖɩɣa taa yɔ,+ meheyi-wɛ se:
14 ‘Pɩnzɩ 7 tɛŋ lɛ, pɩwɛɛ se mɩ-taa paa weyi lɛ eyele e-koobu Ebree tʋ weyi pɛpɛdɩnɩ-ɩ nɛ ɛlabɩ-ɩ tʋmɩyɛ pɩnzɩ 6 yɔ; pɩwɛɛ se eyebi-i nɛ ɛwɛɛ ɛ-tɩ yɔɔ.’+ Ɛlɛ mɩ-cɔzɔnaa tiwelisi nɛ patɩkʋmɩ-m nɩŋgbaŋʋʋ.
15 Nɛ pitileɖi yɔ* mɩ-maɣmaɣ ɩlɛɣzaa nɛ ɩla mbʋ pɩtʋʋzɩ mɛ-ɛsɩndaa yɔ nɛ isusi tɩ-yɔɔ wɛʋ tɔm mi-koobiya, nɛ ɩɖʋ ɛgbɛyɛ mɛ-ɛsɩndaa, ɖɩɣa ŋga kɔ-yɔɔ ma-hɩɖɛ wɛɛ yɔ ka-taa.
16 Ɛlɛ pʋwayɩ lɛ, ɩɖaɣnɩ lɛɣzʋʋ nɛ ipisi ma-hɩɖɛ,+ mbʋ pʋyɔɔ yɔ ɩɖaɣnɩ pɩsɩnʋʋ mi-yomaa abalɩñɩma nɛ halɩñɩma mba iiyebi-wɛ nɛ pɛwɛɛ pa-tɩ yɔɔ ɛzɩ paba kaasɔɔlʋʋ yɔ,* nɛ ɩɖaɣnɩ-wɛ ɖʋʋ yomiye taa nɛ ɖoŋ.”
17 «Pʋyɔɔ lɛ, tɔm tʋnɛ Yehowa yɔɔdʋʋ: “Ɩtɩñamɩ-m alɩwaatʋ ndʋ paa weyi lɛ esusi tɩ-yɔɔ wɛʋ tɔm e-koobu nɛ ɛ-taabalʋ yɔ.+ Pʋyɔɔ lɛɛlɛɛyɔ lɛ, mankaɣ-mɩ haʋ tɩ-yɔɔ wɛʋ alɩwaatʋ ndʋ laɣɖɛ, ñɔɔsɩ, nɛ kɩzɩkʋ* kʋʋ-mɩ yɔ,+ nɛ mankaɣ yebu nɛ ɩkɛ sɔɔndʋ pʋyʋ tɛtʋ yɔɔ kewiyisi kpeekpe,”+ Yehowa yɔɔdʋʋna.
18 “Nɛ pʋnɛ pɩkaɣnɩ talʋʋ ɛyaa mba pamanɩ mɛ-ɛgbɛyɛ yɔɔ mbʋ pʋyɔɔ yɔ patɩɖɔ ɛgbɛyɛ nɖɩ paɖʋ mɛ-ɛsɩndaa yɔ ɖɩ-tɔm yɔɔ, alɩwaatʋ ndʋ patayɩ neɣye nabʋlɛ taa nɛ patɩŋ ɖɩ-hɔɔlɩŋ ɛnɩ ɩ-naalɛ ɩ-hɛkʋ taa yɔ,+
19 pʋ-tɔbʋʋ se, Yuuda awumbiya, Yeruzalɛm awumbiya, wiyaʋ ɖɩɣa taa kaɖɩsɩ, cɔjɔnaa, nɛ ɛjaɖɛ taa ɛyaa kpeekpe mba patɩŋ neɣye nɖɩ ɖɩ-hɔɔlɩŋ ɛnɩ ɩ-naalɛ ɩ-hɛkʋ taa yɔ:
20 Mankaɣ-wɛ ɖʋzʋʋ po-koyindinaa nɛ mba pɛwɛɛ nɛ pañɩnɩɣ se palɩzɩ pe-weziŋ yɔ* pe-nesi tɛɛ, nɛ po-tomnasɩ kaɣ pɩsʋʋ ɛsɔdaa sumasɩ nɛ tɛtʋ yɔɔ tɛtɛgbɩna tɔɔnaɣ.+
21 Nɛ mankaɣ ɖʋzʋʋ Yuuda wiyaʋ Zedekiya nɛ ɛ-awumbiya po-koyindinaa nesi tɛɛ nɛ mba pɛwɛɛ nɛ pañɩnɩɣ se palɩzɩ pe-weziŋ yɔ* pe-nesi tɛɛ nɛ Babilɔɔnɩ wiyaʋ sɔɔjanaa nesi tɛɛ,+ mba peɖiɣni lɩʋ mɩ-tɛ se peyebi-mɩ yonuu yɔ.”+
22 «“Ɩna, mankaɣ ɖʋʋ paɣtʋ nɛ mankaɣ-wɛ pɩsɩnʋʋ tɛtʋ tʋnɛ tɩ-taa, nɛ pakaɣ-tʋ yonuu nɛ pamʋ-tʋ nɛ pɔsɔbɩ-tʋ miŋ;+ nɛ mankaɣ yebu nɛ Yuuda tɛtʋ ndɩ ndɩ pɩsɩ tɛtʋ ndʋ peyebi-tʋ yɔ, nɛ nɔɔyʋ ɛɛkaɣ wɛʋ tɩ-taa,”+ Yehowa yɔɔdʋʋna.»
Pɩ-tɛɛ tɔm
^ Piye piye, «Nebukadɩrezaarɩ,» mbʋ pamaɣ ɛ-hɩɖɛ ɖɔɖɔ.
^ Piye piye, «Nɛ sɔnɔ.»
^ Yaa «ɛzɩ paba kalɩzaɣ kaasɔɔlʋʋ yɔ.»
^ Yaa «kʋdɔŋ.»
^ Yaa «pañɩnɩɣ pa-kalɩzasɩ yɔ.»
^ Yaa «pañɩnɩɣ pa-kalɩzasɩ yɔ.»
