Yereemii 36:1-32
36 Yuuda wiyaʋ, Yoziyaasɩ pɩyalʋ Yehoyakim+ pɩnaɣ 4 ñɩŋga taa, tɔm tʋnɛ tɩlɩnɩ Yehowa cɔlɔ nɛ tɩtalɩ Yereemii:
2 «Kpaɣ takayaɣ kikpiyaɣ nɛ ŋma ka-taa tɔm ndʋ meheyi-ŋ Izrayɛɛlɩ nɛ Yuuda+ nɛ ajɛɛ kpeekpe yɔɔ yɔ,+ kpaɣnɩ kɩyakʋ kajalaɣ ñɩŋgʋ ŋgʋ mɔyɔɔdɩnɩ-ŋ Yoziyaasɩ alɩwaatʋ taa nɛ pɩkɔɔ pɩtalɩ sɔnɔ.+
3 Pʋtɔma Yuuda ɖɩɣa taa mba nɩɣ asɛyʋʋ ŋgʋ kɩ-tɩŋa manɖʋwa se mɔnkɔŋnɩ pɔ-yɔɔ yɔ kɩ-tɔm lɛ, papɩzɩɣ nɛ peyele pa-nʋmɔŋ kɩdɛkɛdɩŋ nɛ papɩsɩ, se pɩsa nɛ menkpeɣ-wɛ pa-kɩdɛkɛdɩm nɛ pa-kɩwɛɛkɩm.»+
4 Nɛ Yereemii yaa Neriya pɩyalʋ Baaruuki,+ nɛ Yereemii yɔɔdaɣ tɔm ndʋ payɩ Yehowa kaaheyi-i yɔ, nɛ Baaruuki maɣ-tʋ takayaɣ kikpiyaɣ taa.+
5 Nɛ Yereemii ɖʋ Baaruuki paɣtʋ se: «Pakpa-m nɛ pasɩɩ nɛ paɖaŋ mɔ-yɔɔ se mantaaɖɛɛ ɖoli nɛ maapɩzɩɣ se mansʋʋ Yehowa ɖɩɣa taa.
6 Pʋyɔɔ lɛ, ña pɩwɛɛ se ŋsʋʋ nɛ ŋkalɩnɩ nɔɔ kɩkʋyaɣ Yehowa tɔm ndʋ mɔyɔɔdaɣ nɛ ŋmaɣ-tʋ takayaɣ kikpiyaɣ taa yɔ. Kalɩ tɔm ndʋ Yehowa ɖɩɣa taa, nɔɔ hɔkʋʋ kɩyakʋ wiye nɛ ɛyaa mba pɛwɛ peeɖe yɔ panɩɩ, pɩkpɛndɩnɩ Yuuda ñɩma mba payɩ palɩnɩ pɛ-tɛtʋ ndɩ ndɩ taa nɛ pɔkɔɔ yɔ.
7 Pʋtɔma tenduu mbʋ petendiɣ se pana pa-pʋtɔdɩyɛ yɔ pɩkaɣ talʋʋ Yehowa cɔlɔ, nɛ paa weyi lɛ ɛkaɣ yebu ɛ-nʋmɔŋ kɩdɛkɛdɩŋ nɛ ɛpɩsɩ, mbʋ pʋyɔɔ yɔ pana nɛ hɔpɩsɩyɛ nɖɩ ɖɩ-tɔm Yehowa yɔɔdɩ samaɣ kanɛ kɔ-yɔɔ yɔ, ɖɩpaɣlaa.»
8 Nɛ Neriya pɩyalʋ Baaruuki la mbʋ payɩ nayʋ Yereemii kaaɖʋ-ɩ paɣtʋ se ɛla yɔ; ɛkalɩ Yehowa tɔm ndʋ tɩwɛ takayaɣ kikpiyaɣ* taa yɔ nɛ nɔɔ kɩkʋyaɣ Yehowa ɖɩɣa taa.+
9 Yuuda wiyaʋ, Yoziyaasɩ pɩyalʋ Yehoyakim+ pɩnaɣ 5 ñɩŋga taa, fenaɣ 9 ñɩŋga taa, Yeruzalɛm taa mba kpeekpe nɛ ɛyaa mba payɩ palɩnɩ Yuuda tɛtʋ ndɩ ndɩ taa nɛ pɔkɔɔ Yeruzalɛm yɔ posusi se pɔhɔkɩ nɔɔ Yehowa ɛsɩndaa.+
10 Nɛ Baaruuki kalɩ Yereemii tɔm ndʋ tɩwɛ takayaɣ kikpiyaɣ taa yɔ* nɛ nɔɔ kɩkʋyaɣ Yehowa ɖɩɣa taa, takayɩsɩ mayʋ* Safaanɩ+ pɩyalʋ Gemariya+ kuduyuu* tɛɛ, kadaɣ hayo ñɩŋga taa, Yehowa ɖɩɣa nɔnɔɔ kɩfalaɣ taa,+ nɛ samaɣ kpeekpe nɩɩ.
11 Safaanɩ pɩyalʋ Gemariya pɩyalʋ Mikayiya nɩ Yehowa tɔm ndʋ payɩ tɩwɛ takayaɣ kikpiyaɣ taa* yɔ lɛ,
12 etii wiyaʋ ɖɩɣa taa, nɛ ɛsʋʋ takayaɣ taa mayʋ kuduyuu tɛɛ. Awumbiya* tɩŋa kaacaɣ peeɖe: Takayaɣ taa mayʋ Eliisama,+ Semayaa pɩyalʋ Delayiya, Akɩbɔɔrɩ+ pɩyalʋ Ɛlɩnataanɩ,+ Safaanɩ pɩyalʋ Gemariya, Anaanɩya pɩyalʋ Zedekiya, nɛ awumbiya lalaa tɩŋa.
13 Mikayiya kɛdɩ-wɛ tɔm ndʋ payɩ ɛɛnɩ alɩwaatʋ ndʋ Baaruuki kalɩ takayaɣ kikpiyaɣ* taa tɔm nɛ samaɣ nɩɩ yɔ.
14 Peeɖe awumbiya kpeekpe tiyi Kuusii pɩyalʋ Selemiya pɩyalʋ Netaniya pɩyalʋ Yehudi Baaruuki cɔlɔ, se eheyi-i se: «Kpɛndɩnɩ takayaɣ kikpiyaɣ ŋga ŋkalaa nɛ samaɣ nɩɩ yɔ nɛ ŋkɔɔ.» Neriya pɩyalʋ Baaruuki kpaɣ takayaɣ kikpiyaɣ e-nesi tɛɛ nɛ ewolo pɔ-cɔlɔ.
15 Peheyi-i se: «Ðitendi-ŋ, caɣ nɛ ŋkalɩ-ɖʋ kɛ nɛ nɔɔ kɩkʋyaɣ.» Peeɖe Baaruuki kalɩ-wɛ kɛ.
16 Nɛ patɩɩnɩ tɔm ndʋ tɩ-tɩŋa lɛ, sɔɔndʋ kpa-wɛ siŋŋ nɛ pɔcɔnɩ ɖama, nɛ peheyi Baaruuki se: «Pɩwɛɛ kpem se ɖiheyi wiyaʋ tɔm tʋnɛ tɩ-tɩŋa.»
17 Nɛ pɔpɔzɩ Baaruuki se: «Ðitendi-ŋ, heyi-ɖʋ ɛzɩma ŋma tɔm ndʋ tɩ-tɩŋa yɔ. Yereemii yɔɔdɩna nɛ ŋma?»
18 Baaruuki cosi-wɛ se: «Ɛnʋ yɔɔdɩnɩ tɔm tʋnɛ tɩ-tɩŋa se mama-tʋ, nɛ mama-tʋ takayaɣ kikpiyaɣ* kanɛ ka-taa nɛ tɔlɩm.»
19 Nɛ awumbiya heyi Baaruuki se: «Ña nɛ Yereemii iwolo nɛ ɩmɛlɩ, nɛ itaayele nɛ nɔɔyʋ tɩlɩ ɖenɖe ɩwɛɛ yɔ.»+
20 Nɛ pɛɖɛɛ powolo wiyaʋ tɛ, kadaɣ taa, nɛ pasɩɩ takayaɣ kikpiyaɣ takayaɣ taa mayʋ Eliisama kuduyuu tɛɛ, nɛ peheyi wiyaʋ tɔm ndʋ payɩ paanɩwa yɔ.
21 Nɛ wiyaʋ tiyi Yehudi+ se ewolo nɛ ɛkɔnɩ takayaɣ kikpiyaɣ ŋga, nɛ ɛlɛ kpaɣ-kɛ takayaɣ taa mayʋ Eliisama kuduyuu tɛɛ nɛ ɛkɔna. Yehudi paɣzɩ-kɛ kalʋʋ wiyaʋ nɛ awumbiya mba payɩ pasɩŋ wiyaʋ cɔlɔ yɔ pɛ-ɛsɩndaa.
22 Wiyaʋ kaacaɣ nikaɣ alɩwaatʋ ɖɩɣa taa, fenaɣ 9 ñɩŋga taa,* miŋ nɩɩyɩ kaawɛɛ nɛ ɩmʋʋ mɩzaɣ ŋga ka-taa ehoyuu miŋ yɔ ka-taa ɛ-ɛsɩndaa.
23 Yehudi tɩɩtɛŋ kalʋʋ canzɩ tindima 3 yaa 4 lɛ, wiyaʋ sɛtaɣ hɔɔlʋʋ ŋgʋ nɛ takayaɣ taa mayʋ sɩɣa nɛ ɛpɛɖɩɣ-kʋ miŋ weyi ɩwɛɛ nɛ ɩmʋʋ mɩzaɣ ŋga ka-taa yɔ ɩ-taa, nɛ ɛwɛɛ nɛ ɛlakɩ mbʋ nɛ takayaɣ kikpiyaɣ tɩŋa kɔɔ nɛ kɛtɛ miŋ weyi ɩwɛ mɩzaɣ ŋga ka-taa yɔ ɩ-taa.
24 Nɛ sɔɔndʋ tɩkpa-wɛ paa ññɩɩ; wiyaʋ nɛ ɛ-lɩmɖʋyaa mba payɩ panɩ tɔm ndʋ tɩ-tɩŋa yɔ, pa-taa nɔɔyʋ tɩcɩyɩ e-tokonaa.
25 Paa Ɛlɩnataanɩ,+ Delayiya,+ nɛ Gemariya+ paatendi wiyaʋ se ɛtaañaɣzɩ takayaɣ kikpiyaɣ ŋga miŋ yɔ, etiwelisini-wɛ.
26 Pɩtasɩ lɛ, wiyaʋ ɖʋ paɣtʋ wiyaʋ pɩyalʋ* Yerameyɛɛlɩ, Azɩriyɛɛlɩ pɩyalʋ Seraya, nɛ Abɩdeyɛɛlɩ pɩyalʋ Selemiya se pakpa takayaɣ taa mayʋ Baaruuki nɛ nayʋ Yereemii, ɛlɛ Yehowa mɛsɩ-wɛ.+
27 Nɛ Yehowa tɔm tasɩ talʋʋ Yereemii alɩwaatʋ ndʋ wiyaʋ tɛm ñaɣzʋʋ takayaɣ kikpiyaɣ ŋga ka-taa kaawɛ tɔm ndʋ Yereemii yɔɔdaa nɛ Baaruuki ma yɔ,+ se:
28 «Kpaɣ takayaɣ kikpiyaɣ lɛɛka nɛ ŋma kɔ-yɔɔ tɔm kʋɖʋmtʋ ndʋ payɩ tɩɩwɛ takayaɣ kikpiyaɣ kajalaɣ ñɩŋga yɔɔ yɔ, ŋga Yuuda wiyaʋ Yehoyakim ñaɣzɩ-kɛ miŋ yɔ.+
29 Nɛ pɩwɛɛ se ŋyɔɔdɩ Yuuda wiyaʋ Yehoyakim yɔɔ tɔm tʋnɛ: “Tɔm tʋnɛ Yehowa yɔɔdʋʋ: ‘Ŋñaɣzɩ takayaɣ kikpiyaɣ kanɛ miŋ nɛ ŋyɔɔdɩ se: “Ɛbɛ yɔɔ ŋma kɔ-yɔɔ se: ‘Pɩtʋʋ fɛyɩ se Babilɔɔnɩ wiyaʋ kaɣ kɔm nɛ ɛɖɩzɩ ɛjaɖɛ ɖɩnɛ nɛ eyele nɛ ɛyaa nɛ kpɩna paatasɩɣ wɛʋ ɖɩ-taa’?”+
30 Pʋyɔɔ lɛ, tɔm tʋnɛ Yehowa yɔɔdʋʋ Yuuda wiyaʋ Yehoyakim yɔɔ: “Ɛɛkaɣ wɛnʋʋ nɔɔyʋ se ɛcaɣ Daviid kewiyaɣ kpelaɣ yɔɔ,+ nɛ pakaɣ e-tomnaɣ lem nɛ wɩsɩ ñaɣ-kɛ wɩsɩ taa nɛ ɖɔmbɛɛ tii kɔ-yɔɔ ɖoo taa.+
31 Mankaɣ pɔzʋʋ akɔnta ɛ nɛ ɛ-lʋlʋʋ taa mba* nɛ ɛ-lɩmɖʋyaa pa-kɩdɛkɛdɩm yɔɔ, nɛ mankaɣ kɔnʋʋ pɔ-yɔɔ nɛ Yeruzalɛm taa mba yɔɔ nɛ Yuuda mba yɔɔ asɛyʋʋ ŋgʋ maayɔɔdaa se mɔnkɔŋnɩ kɩ-tɩŋa pɔ-yɔɔ,+ ɛlɛ patiwelisi yɔ.”’”»+
32 Nɛ Yereemii kpaɣ takayaɣ kikpiyaɣ lɛɛka nɛ ɛcɛlɩ takayaɣ taa mayʋ Neriya pɩyalʋ Baaruuki,+ nɛ Yereemii yɔɔdaɣ lɛ, ɛlɛ maɣ kɔ-yɔɔ tɔm ndʋ payɩ tɩɩwɛ takayaɣ kikpiyaɣ* ŋga Yuuda wiyaʋ Yehoyakim kaañaɣzɩ miŋ yɔ kɔ-yɔɔ yɔ.+ Nɛ pɔsɔzɩ tɔm lɛɛtʋ sakɩyɛ ɛzɩ kajalaɣ ñɩndʋ yɔ.
Pɩ-tɛɛ tɔm
^ Yaa «tɩwɛ takayaɣ.»
^ Yaa «ndʋ tɩwɛ takayaɣ taa yɔ.»
^ Yaa «weyi ɛɖaɣnɩɣ tɔm maʋ yɔ.»
^ Yaa «ɖaŋ ŋgʋ kɩ-tɛɛ pɔtɔkɩ tɔɔnaɣ yɔ.»
^ Yaa «tɩwɛ takayaɣ taa.»
^ Yaa «Wiyaʋ ɖɩɣa taa kaɖɩsɩ.»
^ Yaa «kalɩ takayaɣ.»
^ Yaa «takayaɣ.»
^ Pɩkɛ kpaɣnɩ Kamɩŋ fenaɣ kpɩtaŋ 2 kɛdɛzaɣ ñɩŋ nɛ piwolo Saŋayɩŋ fenaɣ kpɩtaŋ 2 kajalaɣ ñɩŋ. Cɔnɩ Tɔm kɩsɔzɩtʋ B15.
^ Pʋtɔma, wiyaʋ ɖɩɣa taa tʋ nɔɔyʋ.
^ Piye piye, «e-ɖomaɣ.»
^ Yaa «takayaɣ.»
