Yereemii 37:1-21
37 Nɛ Wiyaʋ Zedekiya,+ Yoziyaasɩ pɩyalʋ, paɣzɩ kewiyitu tɔɔʋ Yehoyakim pɩyalʋ Koniya*+ lone taa, mbʋ pʋyɔɔ yɔ Babilɔɔnɩ wiyaʋ Nabukodonozɔɔrɩ* kaasɩ-ɩ wiyaʋ Yuuda ɛjaɖɛ taa.+
2 Ɛlɛ ɛ nɛ ɛ-lɩmɖʋyaa nɛ ɛjaɖɛ taa mba patiwelisi tɔm ndʋ Yehowa kaatɩŋnɩ nayʋ Yereemii yɔɔ nɛ ɛyɔɔdɩ yɔ.
3 Nɛ Wiyaʋ Zedekiya tiyi Selemiya pɩyalʋ Yehukaalɩ+ nɛ cɔjɔ Maaseyiya pɩyalʋ Sofonii+ nayʋ Yereemii cɔlɔ se peheyi-i se: «Ðitendi-ŋ, tɩmnɩ ɖɛ-Ɛsɔ Yehowa ɖɔ-yɔɔ.»
4 Yereemii sʋwaɣ nɛ ɛlɩɣ yem faaa samaɣ taa, mbʋ pʋyɔɔ yɔ pataatɩɩɖʋtɩ-ɩ salaka.+
5 Alɩwaatʋ ndʋ lɛ, Farawɔɔ sɔɔjanaa kaakʋyɩ Ejipiti nɛ pɔkɔŋ,+ nɛ Kalɩdee ñɩma mba paawɛɛ nɛ pɛñɛyɩɣ Yeruzalɛm yɔ panɩɩ tɔm ndʋ. Peeɖe peyebi Yeruzalɛm nɛ pɛɖɛɛ.+
6 Nɛ Yehowa tɔm talɩ nayʋ Yereemii se:
7 «Tɔm tʋnɛ Izrayɛɛlɩ tɛ Ɛsɔ Yehowa yɔɔdʋʋ: “Tɔm tʋnɛ pɩwɛɛ se iheyi Yuuda wiyaʋ weyi etiyi-mɩ mɔn-cɔlɔ se ɩpɔzɩ nɛ ɩtɩlɩ ma-lɩmaɣza yɔ: ‘Na! Farawɔɔ sɔɔjanaa mba peɖiɣni kɔm se pasɩnɩ-mɩ yɔ, pakaɣ pɩsʋʋ pɛ-ɛjaɖɛ taa, Ejipiti.+
8 Nɛ Kalɩdee mba kaɣ pɩsʋʋ nɛ poyooni tɛtʋ tʋnɛ nɛ pamʋ-tʋ nɛ pañaɣzɩ-tʋ miŋ.’+
9 Tɔm tʋnɛ Yehowa yɔɔdʋʋ: ‘Itaapeɣzi mɩ-tɩ* nɛ ɩtɔŋ se: “Pɩtʋʋ fɛyɩ se Kalɩdee mba kaɣ-ɖʋ yebu nɛ pɛɖɛɛ,” mbʋ pʋyɔɔ yɔ paakaɣ ɖɛʋ.
10 Paa ɩɩkʋ Kalɩdee mba sɔɔjanaa mba pɛwɛɛ nɛ poyouni-mɩ yɔ pe-kpeekpe nɛ pɩkazɩ pɛ-ɛyaa mba pamʋ heŋ yɔ pe-ɖeke yɔ, pakaɣ kʋyɩnʋʋ pe-kizinzikiŋ tɛɛ mbʋ nɛ pañaɣzɩ tɛtʋ tʋnɛ miŋ.’”»+
11 Farawɔɔ sɔɔjanaa yɔɔ lɛ, Kalɩdee mba sɔɔjanaa yebi Yeruzalɛm nɛ pɛɖɛɛ lɛ,+
12 Yereemii lɩɩ Yeruzalɛm se ewolo Bɛnjamɛɛ ɛjaɖɛ taa+ nɛ ɛmʋ e-ɖeɖe ɛ-samaɣ taa.
13 Ɛlɛ ɛtalɩ Bɛnjamɛɛ Nɔnɔɔ taa lɛ, ɖaŋɩyaa ñʋʋdʋ, weyi payaɣ se Iriya, Selemiya pɩyalʋ Anaanɩya pɩyalʋ yɔ, ɛkpa nayʋ Yereemii nɛ ɛyɔɔdɩ se: «Ŋwɛɛ nɛ ŋseɣ se ŋɖɛɛ Kalɩdee mba cɔlɔ!»
14 Ɛlɛ Yereemii yɔɔdɩ se: «Pɩtɩkɛ toovenim! Maaseɣ se mɛnɖɛɛ Kalɩdee mba cɔlɔ.» Ɛlɛ etiwelisini-i. Nɛ Iriya kpa Yereemii nɛ ewoni-i awumbiya cɔlɔ.
15 Awumbiya taa wɩɩnɩ Yereemii siŋŋ,+ nɛ pamabɩ-ɩ nɛ paɖʋ-ɩ salaka*+ takayaɣ taa mayʋ Yehonataanɩ ɖɩɣa ŋga paapɩsɩ-kɛ salaka yɔ ka-taa.
16 Paɖʋ Yereemii tɛtɛɛ salaka* taa, salaka kuduyuŋ cikpeŋ tɛɛ, nɛ ɛcaɣ peeɖe kɩyakɩŋ sakɩyɛ.
17 Pʋwayɩ lɛ, Wiyaʋ Zedekiya tiyi nɛ payaa-ɩ, nɛ wiyaʋ pɔzɩ-ɩ tɔm ɛ-ɖɩɣa* taa mɛsaɣ tɛɛ.+ Ɛpɔzɩ-ɩ se: «Yehowa yɔɔdɩ tɔm natʋyʋ yaa we?» Yereemii cosi se: «Ɛɛɛ, ɛyɔɔdɩ tɔm natʋyʋ!» nɛ ewolo pɩ-yɔɔ se: «Pakaɣ-ŋ ɖʋzʋʋ Babilɔɔnɩ wiyaʋ nesi tɛɛ!»+
18 Yereemii tasɩ heyuu Wiyaʋ Zedekiya se: «Kɩwɛɛkɩm mbʋ malabɩ ña nɛ ña-lɩmɖʋyaa nɛ samaɣ kanɛ, nɛ piyele nɛ ɩɖʋ-m salaka?
19 Lɛɛlɛɛyɔ lɛ, le mɩ-nayaa mba peheyi-mɩ natʋ tɔm se: “Babilɔɔnɩ wiyaʋ ɛɛkaɣ kɔm mɩ-wayɩ nɛ ɛjaɖɛ ɖɩnɛ ɖɩ-wayɩ” yɔ pɛwɛɛ?+
20 Lɛɛlɛɛyɔ lɛ, mentendi-ŋ welisi, Oo man-kɩbaɣlʋ wiyaʋ. Mentendi-ŋ, welisi tenduu mbʋ mentendiɣ-ŋ se ŋna man-pʋtɔdɩyɛ yɔ. Taapɩsɩnɩ-m takayaɣ taa mayʋ Yehonataanɩ ɖɩɣa taa,+ pɩtɩkɛ mbʋ yɔ mankaɣ sɩbʋ peeɖe.»+
21 Peeɖe Wiyaʋ Zedekiya ɖʋ paɣtʋ se paɖʋ Yereemii salaka taa Feŋiyaa Kadaɣ+ taa, nɛ pahaɣaɣ-ɩ kpɔnɔ kulukulu ñɩŋgʋ paa evemiye nɖɩ, nɛ pɩkɔɔ pɩsɩɩnɩ alɩwaatʋ ndʋ tɛtʋ taa kpɔnɔnaa tɩŋa tɛma yɔ;+ palɩɣaɣnɩ-kʋ nɛ kpɔnɔ laɖaa habɩyɛ yɔɔ.+ Nɛ Yereemii wɛɛ Feŋiyaa Kadaɣ taa.
Pɩ-tɛɛ tɔm
^ Ɛnʋ payaɣ ɖɔɖɔ se Yehoyakin nɛ Yekoniya.
^ Piye piye, «Nebukadɩrezaarɩ,» mbʋ pamaɣ ɛ-hɩɖɛ ɖɔɖɔ.
^ Yaa «mɩ-kalɩzasɩ.»
^ Piye piye, «paɖʋ-ɩ kpasɩ tɛ ɖɩɣa taa.»
^ Piye piye, «lɔkɔ ɖɩɣa.»
^ Yaa «ɛ-awiya ɖɩɣa.»
