Yereemii 39:1-18
39 Yuuda wiyaʋ Zedekiya pɩnaɣ 9 ñɩŋga taa, fenaɣ 10 ñɩŋga taa, Babilɔɔnɩ wiyaʋ Nabukodonozɔɔrɩ* nɛ ɛ-sɔɔjanaa kpeekpe powobi Yeruzalɛm, nɛ pɛñɛyɩ-kʋ.+
2 Zedekiya pɩnaɣ 11 ñɩŋga taa, fenaɣ 4 ñɩŋga taa, fenaɣ ŋga ka-kɩyakʋ 9 ñɩŋgʋ wiye, patʋlɩ tɛtʋ koloŋa pɔʋ.+
3 Nɛ Babilɔɔnɩ wiyaʋ awumbiya kpeekpe sʋʋ nɛ pacaɣ Hɛkʋ taa Nɔnɔɔ taa;+ mba yɔ: Nɛrɩgaalɩ-Sarezɛɛrɩ weyi ɛkɛ Samɩgar yɔ, Nebo-Sarɩsekim weyi ɛkɛ Rabɩsariisi yɔ,* Nɛrɩgaalɩ-Sarezɛɛrɩ weyi ɛkɛ Rabɩmaagɩ* yɔ, nɛ Babilɔɔnɩ wiyaʋ awumbiya mba pɩkazaa yɔ pa-tɩŋa.
4 Yuuda wiyaʋ Zedekiya nɛ sɔɔjanaa tɩŋa na-wɛ lɛ pese,+ patɩŋnɩ wiyaʋ kaɖaɣ taa nɛ palɩɩ tɛtʋ taa nɛ ɖoo, patɩŋnɩ nɔnɔɔ ŋga kɛwɛ kolonzi 2 hɛkʋ taa yɔ, nɛ pakpaɣ Araba nʋmɔʋ nɛ pɛɖɛɛ.+
5 Ɛlɛ Kalɩdee mba sɔɔjanaa ɖʋ pa-wayɩ, nɛ pehiɣ Zedekiya Yeriikoo kañɩmbusuu kɛdɛɛnzɩ taa.+ Pakpa-ɩ nɛ pakpanɩ-ɩ Babilɔɔnɩ wiyaʋ Nabukodonozɔɔrɩ* cɔlɔ Ribla,+ Hamatɩ+ ɛjaɖɛ taa nɛ ɛhʋʋnɩ-ɩ tɔm peeɖe.
6 Babilɔɔnɩ wiyaʋ yele nɛ pakʋ Zedekiya pɩyalaa ɛlɛ ɛsɩndaa Ribla peeɖe, nɛ Babilɔɔnɩ wiyaʋ yele nɛ pakʋ ɖɔɖɔ Yuuda ñɩma mba payɩ pa-hɩla sɛwa yɔ.+
7 Pʋwayɩ lɛ, ɛyʋlʋsɩ Zedekiya ɛsa, pʋbʋ wayɩ lɛ ɛhɔkɩ-ɩ ñɩɣyʋʋ kɩsɛɛmʋʋ kpasɩ se ewoni-i Babilɔɔnɩ.+
8 Nɛ Kalɩdee mba ñaɣzɩ wiyaʋ ɖɩɣa nɛ ɛyaa lalaa ɖɩsɩ miŋ+ nɛ pɔyɔkɩ Yeruzalɛm kolonzi.+
9 Wiyaʋ yɔɔ kandɩyaa ñʋʋdʋ Nebuzaradaanɩ+ kpaɣ ɛyaa mba pɩɩkazɩ tɛtʋ taa yɔ, mba pesewa nɛ powolo ɛ-cɔlɔ yɔ, nɛ mba payɩ pɩɩkazaa yɔ nɛ ɛkɛzɩ-wɛ tɛtʋ Babilɔɔnɩ.
10 Ɛlɛ wiyaʋ yɔɔ kandɩyaa ñʋʋdʋ Nebuzaradaanɩ kazɩ ɛyaa mba kʋñɔndʋtʋ kɩlɩnaa yɔ pa-taa nabɛyɛ Yuuda ɛjaɖɛ taa, mba pɛfɛyɩnɩ nabʋyʋ paa ññɩɩ yɔ. Kɩyakʋ ŋgʋ ki-wiye, ɛcɛlɩ-wɛ viiñi* nɛ hayɩm se pahayɩ-pʋ.*+
11 Nɛ Babilɔɔnɩ wiyaʋ Nabukodonozɔɔrɩ* ɖʋ paɣtʋ tʋnɛ wiyaʋ yɔɔ kandɩyaa ñʋʋdʋ Nebuzaradaanɩ pɩlɩɩnɩ Yereemii yɔɔ se:
12 «Kpaɣ-ɩ nɛ ŋcɔnɩ ɛ-yɔɔ; taalabɩ-ɩ kɩdɛkɛdɩm nabʋyʋ, ha-ɩ mbʋ payɩ ɛpɔzʋʋ-ŋ yɔ.»+
13 Nɛ wiyaʋ yɔɔ kandɩyaa ñʋʋdʋ Nebuzaradaanɩ, Nebusazɩbaanɩ weyi ɛkɛ Rabɩsariisi* yɔ, Nɛrɩgaalɩ-Sarezɛɛrɩ weyi ɛkɛ Rabɩmaagɩ* yɔ, nɛ Babilɔɔnɩ wiyaʋ tɛ ɛyaa sɔsaa tɩŋa tiyi ɛyaa
14 nɛ pakpaɣ Yereemii Feŋiyaa Kadaɣ taa+ nɛ paɖʋzɩ-ɩ Safaanɩ+ pɩyalʋ Ahikam+ pɩyalʋ Gedaliya+ nesi tɛɛ se ɛlɛ ewoni-i ɛ-ɖɩɣa taa. Mbʋ Yereemii wɛ ɛyaa samaɣ taa.
15 Alɩwaatʋ ndʋ paakpa Yereemii nɛ pasɩɩ-ɩ Feŋiyaa Kadaɣ+ taa nɛ paɖaŋ ɛ-yɔɔ se ɛtaaɖɛɛ ɖoli yɔ, Yehowa tɔm kaatalɩ-ɩ se:
16 «Wolo nɛ ŋheyi Etiyoopii tʋ Ebɛɛdɩ-Melɛɛkɩ+ se: “Tɔm tʋnɛ yoyaa tɛ Yehowa, Izrayɛɛlɩ tɛ Ɛsɔ yɔɔdʋʋ: ‘Na! Menɖiɣni yebu se tɔm ndʋ maayɔɔdaa se mɔnkɔŋnɩ tɛtʋ tʋnɛ tɩ-yɔɔ asɛyʋʋ nɛ maakɔŋnɩ kɩbandʋ yɔ tɩla, nɛ kɩyakʋ ŋgʋ ki-wiye lɛ ŋkaɣ naʋ ɛzɩma tɩlakɩ yɔ.’”
17 «“Ɛlɛ mankaɣ ña-ñʋʋ yabʋ kɩyakʋ ŋgʋ ki-wiye, nɛ paakaɣ-ŋ ɖʋzʋʋ ɛyaa mba ŋseɣ sɔɔndʋ yɔ pe-nesi tɛɛ,” Yehowa yɔɔdʋʋna.
18 «“Mbʋ pʋyɔɔ yɔ pɩtʋʋ fɛyɩ se mankaɣ yebu nɛ ŋhiɣ ñʋʋ yabʋ, nɛ paakaɣ-ŋ kʋʋ nɛ laɣɖɛ. Ñe-wezuu* kaɣ-ŋ kɛʋ kɩhɛyʋʋ,*+ mbʋ pʋyɔɔ yɔ ŋta-m liu,”+ Yehowa yɔɔdʋʋna.»
Pɩ-tɛɛ tɔm
^ Piye piye, «Nebukadɩrezaarɩ,» mbʋ pamaɣ ɛ-hɩɖɛ ɖɔɖɔ.
^ Ye paɖaɣnɩ cɔlʋʋ Ebree tɔm yɔ pɩkɛɣnɩ «Nɛrɩgaalɩ-Sarezɛɛrɩ, Samɩgar-Nebo, Sarɩsekim, Rabɩsariisi.»
^ Yaa «maajiki laɖaa ñʋʋdʋ (mba patɩyɩɣnɩ tɩɩnzɩ yɔ pa-ñʋʋdʋ).»
^ Piye piye, «Nebukadɩrezaarɩ,» mbʋ pamaɣ ɛ-hɩɖɛ ɖɔɖɔ.
^ Yaa «viiñi hayɩm.»
^ Pɩpɩzɩɣ pɩkɛ, «nɛ ɛɖʋ-wɛ kɩjɛyʋʋ tʋma.»
^ Piye piye, «Nebukadɩrezaarɩ,» mbʋ pamaɣ ɛ-hɩɖɛ ɖɔɖɔ.
^ Yaa «wiyaʋ ɖɩɣa taa kaɖɩsɩ ñʋʋdʋ.»
^ Yaa «maajiki laɖaa ñʋʋdʋ (mba patɩyɩɣnɩ tɩɩnzɩ yɔ pa-ñʋʋdʋ).»
^ Yaa «Ña-kalɩzaɣ.»
^ Piye piye, «mbʋ ŋmʋ you taa yɔ.» Yaa «Ŋkaɣ ñe-wezuu ñʋʋ yabʋ.»
