Yereemii 4:1-31
4 Yehowa yɔɔdʋʋ se: «Oo Izrayɛɛlɩ, pɩsɩ.
Ye ŋtisiɣ se ŋpɩsɩ mɔn-cɔlɔNɛ ye ŋkʋsɩ ña-sɩʋ kpelisi nzɩ sɩwɛ kiniŋ yɔ mɛ-ɛsɩndaa yɔ,Ðɩnɛ ɛlɛ ŋŋkaɣ kɛʋ yotiyu.+
2 Nɛ ye ŋɖuwaa se:
“Yehowa ñɩtʋʋ nɛ ɛwɛɛ wezuu yɔ!” nɛ ye ŋlabɩ mbʋ nɛ toovenim, tɔm hʋʋ siɣsiɣ, nɛ siɣsiɣ wɛtʋ yɔ,Ðɩnɛ ɛlɛ pɩkaɣ tɩŋnʋʋ ɛ-yɔɔ nɛ ajɛɛ hiɣ wazaɣ,Nɛ ɛnʋ akaɣ kʋndɩnʋʋ.»+
3 Mbʋ pʋyɔɔ yɔ tɔm tʋnɛ Yehowa heyiɣ Yuuda mba nɛ Yeruzalɛm:
«Ɩhayɩ mɩ-tɩ tɛtʋ kɩbandʋ,Nɛ ɩtaawɛɛ nɛ iɖuu sɔɔ taa.+
4 Ɩpɛlɩ mɩ-tɩ ɛzɩ Yehowa sɔɔlʋʋ yɔ,Nɛ ɛzɩ pɛlɩtʋ lɩzʋʋ azuluma tomnaɣ yɔɔ yɔ, pɩwɛɛ se ɩlɩzɩ azuluma mɩ-laŋa taa,+Mɩ, Yuuda mba nɛ Yeruzalɛm taa mba,Nɛ pɩtaala nɛ man-pana mʋ ɛzɩ miŋ yɔNɛ añakɩ nɛ nɔɔyʋ fɛyɩ se ɛɖɩzɩ-yɛ,Mɩ-lakasɩ kɩdɛkɛdɩsɩ yɔɔ.»+
5 Ɩyɔɔdɩ-tʋ Yuuda taa, nɛ isusi-tʋ Yeruzalɛm taa.
Ikoo nɛ ɩhʋlɩ nɔndɔʋ ɛjaɖɛ tɩŋa taa.+
Ɩma kubuka ɖoŋ nɛ ɩyɔɔdɩ se: «Ikpeɣli ɖama,Nɛ ɖise nɛ ɖiwolo tɛtʋ ɖoŋ ñɩndʋ ndɩ ndɩ taa.+
6 Ɩkpazɩ yʋsaɣ* nɛ Siyɔŋ yɔɔ kiŋ.
Ɩñɩnɩ ɖɩjɔzɩyɛ, nɛ ɩtaasɩŋ,»Mbʋ pʋyɔɔ yɔ menɖiɣni kɔnʋʋ asɛyʋʋ nɛ hayo kiŋ,+ yɔkʋʋ sɔsɔm.
7 Ɛyɔkaa nɛ ɛlɩɩ ɛzɩ mʋʋzʋʋ yɔkʋʋnɩ kɩ-hɔɖʋʋ tɛɛ nɛ kɩlɩɣ yɔ;+Ajɛɛ ɖɩzɩyʋ kʋyaa.+
Ɛlɩnɩ e-lone taa se ɛla nɛ ñɛ-ɛjaɖɛ pɩsɩ sɔɔndʋ pʋyʋ.
Ñɛ-tɛtʋ ndɩ ndɩ kaɣ pɩsʋʋ njaa, nɛ nɔɔyʋ ɛɛkaɣ wɛʋ tɩ-taa.+
8 Pʋyɔɔ lɛ, isuu fɔlɔtɔnaa,+Ɩcaɣ kʋñɔwiye* nɛ iwii,Mbʋ pʋyɔɔ yɔ Yehowa pana sɔsɔna tɩɖɛɛ ɖɔ-yɔɔ.
9 Yehowa yɔɔdʋʋ se: «Kɩyakʋ ŋgʋ ki-wiye, wiyaʋ laŋɩyɛ* kaɣ lɩʋ,+Awumbiya laŋa* ɖɔɖɔ kaɣ lɩʋ;Sɔɔndʋ kaɣ kpaʋ cɔjɔnaa, nɛ pɩkaɣ ɖɩɣzʋʋ nayaa.»+
10 Peeɖe mɔyɔɔdaa se: «Hayɩ, Kɩbaɣlʋ Kɩlɩm Yehowa! Toovenim taa, ŋcɛtɩ samaɣ kanɛ+ nɛ Yeruzalɛm caɣ caɣ, nɛ ŋtɔ se: “Ɩkaɣ hiɣu laŋhɛzɩyɛ,”+ ŋgʋ laɣɖɛ wɛ ɖe-liu tɛɛ.»*
11 Alɩwaatʋ ndʋ tɩ-taa lɛ, pakaɣ heyuu samaɣ kanɛ nɛ Yeruzalɛm se:
«Helim miŋ ñɩmbʋ mbʋ pɩlɩnɩ kañɩmbusuu taa piyisi nzɩ sɩ-yɔɔ wɛ kpɛɖɛ yɔ sɩ-yɔɔ yɔ,Pɩkaɣ mabʋ man-samaɣ pɛlɛ* yɔɔ;Pɩɩkɔŋ se pɩfalɩ yaa pɩñalɩ.
12 Helim mbʋ pɩmakɩnɩ pi-ɖoŋ kpeekpe yɔ pɩlɩɣnɩ lona ana a-taa alɩwaatʋ ndʋ manɖʋʋ-pʋ paɣtʋ yɔ.
Lɛɛlɛɛyɔ lɛ, mankaɣ-wɛ tɔm hʋnʋʋ.
13 Ɩna! Ɛkaɣ kɔm ɛzɩ ɛsɔmɩndʋ ndʋ tɩ-taa nɛ tɛʋ yɔ,Nɛ ɛ-kɛɛkɛɛnaa wɛ ɛzɩ helim sɔsɔm yɔ.+
Ɛ-kpaŋnaŋ seɣ lɛɛ lɛɛ nɛ pɩkpaɖɩ kpeliŋ.*+
Pɩtɔɔ-ɖʋ, mbʋ pʋyɔɔ yɔ pɔkɔnɩ asɛyʋʋ ɖɔ-yɔɔ!
14 Oo Yeruzalɛm, ñalɩ ña-laŋɩyɛ taa kañatʋ lakasɩ nɛ ɖɩwɛɛ kele kele, nɛ pɩsa nɛ paya ña-ñʋʋ.+
Ŋwɛɣ nɛ ŋmaɣzɩɣ lɩmaɣza kɩdɛkɛda nɛ pɩkɔɔ nɛ pɩsɩɩnɩ ɖooye?
15 Mbʋ pʋyɔɔ yɔ nɔɔ nakɛyɛ susuu tɔm nɛ ɖooo Daanɩ,+Nɛ kosusuu asɛyʋʋ tɔm nɛ ɖooo Efrayim pʋŋ taa.
16 Ɩkɛdɩ-tʋ, ɛɛɛ, ɩkɛdɩ-tʋ ajɛɛ;Isusi-tʋ Yeruzalɛm.»
«Sɔɔjanaa mba pɛkɛ ɖaŋɩyaa yɔ* palɩnɩ ɖooo poliŋ ɛjaɖɛ taa nɛ pɔkɔŋ,Nɛ pakaɣ kou ɖoŋ Yuuda tɛtʋ ndɩ ndɩ yɔɔ.
17 Pɔkɔŋ kɩ-wayɩ hɔɔlɩŋ kpeekpe taa ɛzɩ hayɩm yɔɔ ɖaŋɩyaa yɔ,+Mbʋ pʋyɔɔ yɔ kɩkaɖɩnɩ-m,»+ Yehowa yɔɔdʋʋna.
18 «Pakaɣ-ŋ hɛyʋʋ ña-maɣmaɣ ña-nʋmɔŋ nɛ ña-lakasɩ yɔɔ.+
Asɛyʋʋ ŋgʋ kɩkɔŋ ñɔ-yɔɔ yɔ, kɩwɛ siziŋ siŋŋ!
Mbʋ pʋyɔɔ yɔ kɩtalɩɣ ɖooo ña-laŋɩyɛ taa!»
19 Hayɩ, manɩɣ wɩzasɩ siŋŋ,* manɩɣ wɩzasɩ siŋŋ!
Manɩɣ siziŋ sɔsɔŋ ɖooo ma-laŋɩyɛ taa.*
Ma-laŋɩyɛ maɣ man-taa.
Maapɩzɩɣ nɛ monsu,Mbʋ pʋyɔɔ yɔ manɩ* nɔndɔʋ taŋ,Manɩ you kubuka taŋ.*+
20 Pɛkɛdɩɣ se asɛyɩŋ lakɩ nɛ ɩtɩŋɩɣ ɖama wayɩ,Mbʋ pʋyɔɔ yɔ paɖɩzɩ ɛjaɖɛ kpeekpe.
Paɖɩzɩ ma-maɣmaɣ men-kizinzikiŋ tuda,Men-kizinzikiŋ pɩsaŋ, alɩwaatʋ kʋɖʋmtʋ taa.+
21 Mankaɣ wɛʋ nɛ manaɣ yʋsaɣ* nɛ pɩsɩɩnɩ ɖooye?
Mankaɣ wɛʋ nɛ manɩɣ nɔndɔʋ taŋ nɛ pɩsɩɩnɩ ɖooye?+
22 «Mbʋ pʋyɔɔ yɔ mɛ-ɛyaa kɛ kɩmɛlɛmɩŋ;+Pa-paa fɛyɩnɩ-m.
Pɛkɛ piya* kɩmɛlɛmɩŋ, pɛfɛyɩnɩ tɔm taa nɩʋ lɛɣtʋ.
Ye pɩkɛ kɩdɛkɛdɩm labʋ yɔ, pɛwɛ lɛɣtʋ* pɩdɩɩfɛyɩ;Ɛlɛ paasɩŋ ɛzɩma pala kɩbandʋ yɔ.»
23 Mɔncɔnɩ ɛjaɖɛ lɛ, mana se ɖɩwɛ kpɛɖɛ nɛ ɖɩpɩsɩ njɛyɛ.+
Mɔncɔnɩ ɛsɔdaa, nɛ ɛsɔdaa ñalɩmɩyɛ tɩtasɩ wɛʋ.+
24 Mɔncɔnɩ pʋŋ lɛ, mana se ɩwɛɛ nɛ ɩñamsɩɣ,Nɛ piyisi wɛɛ nɛ siseliɣ.+
25 Mɔncɔnaa lɛ, ɛyʋ nɔɔyʋ fɛyɩ,Nɛ ɛsɔdaa sumasɩ tɩŋa sewa.+
26 Mɔncɔnaa lɛ, tɩŋ pee hayɩm kaapɩsɩ kañɩmbusuu,Nɛ paayɔkɩ pɩ-tɛtʋ ndɩ ndɩ tɩŋa.+
Yehowa yɔɔ pɩlabɩ mbʋ,Ɛ-pana sɔsɔna yɔɔ.
27 Mbʋ pʋyɔɔ yɔ tɔm tʋnɛ Yehowa yɔɔdʋʋ: «Ɛjaɖɛ nɖɩ ɖɩ-tɩŋa ɖɩkaɣ pɩsʋʋ njɛyɛ,+Ɛlɛ maakaɣ-ɖɩ ɖɩzʋʋ caɣ caɣ.
28 Pʋyɔɔ lɛ, ɛjaɖɛ kaɣ caɣʋ kʋñɔwiye,+Nɛ ɛsɔdaa kaɣ yuu cɩkpɛndʋʋ.+
Mbʋ pʋyɔɔ yɔ mbʋ mɔyɔɔdaa, lɩmaɣza ana mankpaɣaa,Nɛ maakaɣ lɛɣzʋʋ ma-lɩmaɣza,* nɛ maakaɣ pɩsʋʋ nɛ wayɩ ɖɔɖɔ.+
29 Alɩwaatʋ ndʋ panɩɣ kpaŋnaŋ yɔɔ caɣyaa nɛ tɔŋ tɔyaa kɔkɔɖɛ taŋ yɔ,Tɛtʋ kpeekpe seɣ.+
Pasʋʋ hɔtʋ tɛɛ,Nɛ pakpaɣ kaaŋ yɔɔ.+
Peyeki tɛtʋ ndɩ ndɩ tɩŋa kpɛɖɛ,Nɛ nɔɔyʋ fɛyɩ tɩ-taa.»
30 Lɛɛlɛɛyɔ pɔyɔkɩ-ŋ yɔ, ɛbɛ ŋkaɣ labʋ?
Ŋtiisuu wondu kɩsɛɛmtʋ cɩɩɩ,Ŋcanaɣ ña-tɩ nɛ sika ajana wondu,Nɛ ŋɖʋʋ ñɛ-ɛsa ciyaʋ kɩkpɛdʋʋ se pɩna-yɛ camɩyɛ.
Ɛlɛ falaa yem ŋcanɩ ña-tɩ,+Mbʋ pʋyɔɔ yɔ, mba paawɛnɩ kʋzʋʋ kɔɖɛyɩ ñɔ-yɔɔ yɔ pɔlɔ-ŋ;Lɛɛlɛɛyɔ pɛwɛɛ nɛ pañɩnɩɣ se palɩzɩ ñe-wezuu.*+
31 Mbʋ pʋyɔɔ yɔ manɩ nɔɔ nakɛyɛ taŋ, kɛwɛ ɛzɩ halʋ weyi pɩwɩɣ-ɩ yɔ ɛ-nɔɔ yɔ,Manɩ siziŋ nɩʋ taŋ, pɩwɛ ɛzɩ halʋ weyi eɖiɣni lʋlʋʋ ɛ-kajalaɣ pɩɣa yɔ e-siziŋ nɩʋ yɔ,Siyɔŋ pɛlɛ weyi ɛwɛɛ nɛ efeziɣ kaɖɛ nɛ kaɖɛ yɔ, ɛ-nɔɔ taŋ.
Eposi ɛ-nandasɩ+ nɛ ɛtɔŋ se:
«Pɩtɔɔ-m, mbʋ pʋyɔɔ yɔ ɛyaa kʋyaa yeba nɛ pɩnɩ-m!»*
Pɩ-tɛɛ tɔm
^ Yaa «yʋsaɣ sizika.»
^ Yaa «Ɩma mɩ-laŋa taa.»
^ Yaa «abalɩtʋ.»
^ Yaa «abalɩtʋ.»
^ Yaa «ŋgʋ laɣɖɛ talɩ ɖa-kalɩzaɣ.»
^ Pɔyɔɔdɩ ɛjaɖɛ tɔm ɛzɩ ɛyʋ yɔ, pʋtɔma yɔ palabɩ mbʋ se palɩzɩ pʋtɔdɩyɛ naʋ yaa lalaa siziŋ nɩʋ nɛ pawɩlɩ.
^ Yaa «keziyewaa.»
^ Piye piye, «Feŋiyaa,» pʋ-tɔbʋʋ se mba pefeŋiɣ tɛtʋ yɔɔ se patɩlɩ alɩwaatʋ ndʋ pɩwɛɛ se palabɩ-tʋ nɛ you yɔ.
^ Piye piye, «Hayɩ, man-taa lotu.»
^ Piye piye, «ma-laŋɩyɛ kolonzi taa.»
^ Yaa «man-kalɩzaɣ nɩ.»
^ Pɩpɩzɩɣ pɩkɛ, «mba powobi lalaa yonuu yɔ, po-kubusi taŋ.»
^ Yaa «yʋsaɣ sizika.»
^ Yaa «pɩyalaa.»
^ Yaa «lɔŋ.»
^ Yaa «maakaɣ kpiɖuu.»
^ Yaa «pañɩnɩɣ ña-kalɩzaɣ.»
^ Yaa «pɩnɩɩ man-kalɩzaɣ.»