Yereemii 41:1-18
41 Fenaɣ 7 ñɩŋga taa, Eliisama pɩyalʋ Netaniya pɩyalʋ Isimayɛɛlɩ,+ weyi ɛɛkɛ wiyaʋ liɖe* taa tʋ nɛ wiyaʋ ɛyaa sɔsaa taa nɔɔyʋ yɔ, ɛ nɛ abalaa 10 lalaa pɔkɔɔ Ahikam pɩyalʋ Gedaliya cɔlɔ Mizpaa.+ Pɛkpɛndaa nɛ pɔtɔkɩ tɔɔnaɣ Mizpaa lɛ,
2 Netaniya pɩyalʋ Isimayɛɛlɩ nɛ ɛyaa 10 mba paawɛ ɛ-cɔlɔ yɔ, pakʋyɩ nɛ pakʋ Safaanɩ pɩyalʋ Ahikam pɩyalʋ Gedaliya nɛ laɣɖɛ. Mbʋ ɛkʋ weyi Babilɔɔnɩ wiyaʋ kaalɩzaa nɛ ɛkɛ wiyaʋ ɛjaɖɛ taa yɔ.
3 Isimayɛɛlɩ kʋ ɖɔɖɔ Yuuda ñɩma mba payɩ paawɛ Gedaliya cɔlɔ Mizpaa yɔ, pɩkpɛndɩnɩ Kalɩdee mba sɔɔjanaa mba paawɛ peeɖe yɔ.
4 Pakʋ Gedaliya nɛ pɩtalɩ kɩyakʋ 2 ñɩŋgʋ wiye, alɩwaatʋ ndʋ nɔɔyʋ tɩtɩɩnɩtɩ-tʋ lɛ,
5 ɛyaa 80 lɩɩnɩ Sekɛɛm,+ Siiloo,+ nɛ Samaarii+ nɛ pɔkɔɔ. Paahʋm pa-tandaŋ, pacɩyɩ po-tokonaa, paahɛdɩ po-tomnasɩ,+ nɛ paaɖɔkɩ tɔɔnaɣ pee kɩlaŋ nɛ tɩlaaɖɩ kʋhʋlʋmʋʋ+ pe-nesi tɛɛ se pɔkɔnɩ Yehowa ɖɩɣa taa.
6 Peeɖe Netaniya pɩyalʋ Isimayɛɛlɩ lɩnɩ Mizpaa se ɛkatɩ wɛ, ɛɖɔŋaɣnɩ wiluu. Ɛkatɩ-wɛ lɛ, eheyi-wɛ se: «Ɩkɔɔ Ahikam pɩyalʋ Gedaliya cɔlɔ.»
7 Ɛlɛ pasʋ tɛtʋ taa lɛ, Netaniya pɩyalʋ Isimayɛɛlɩ nɛ ɛ-ɛyaa pakʋ-wɛ nɛ pɛpɛɖɩ-wɛ lɔkɔ* taa.
8 Ɛlɛ pa-taa ɛyaa 10 heyi Isimayɛɛlɩ se: «Taakʋ-ɖʋ, mbʋ pʋyɔɔ yɔ ɖɩmɛsɩ blee, orjɩ, num, nɛ tʋŋ num hayɩm taa.» Nɛ eyele pa nɛ po-koobiya nɛ ɛtɩkʋ-wɛ.
9 Nɛ Isimayɛɛlɩ pɛɖɩ ɛyaa mba ɛɛkʋwa yɔ po-tomnasɩ kpeekpe lɔkɔ sɔsɔʋ nakʋyʋ taa. Izrayɛɛlɩ wiyaʋ Baasa yɔɔ Wiyaʋ Aazaa kaahuyi-kʋ.+ Lɔkɔ ŋgʋ kɩ-taa Netaniya pɩyalʋ Isimayɛɛlɩ pɛɖɩ ɛyaa mba pakʋwa yɔ nɛ pisu.
10 Isimayɛɛlɩ kpa ɛyaa mba payɩ pɩɩkazɩ Mizpaa taa yɔ nɛ ɛpɩsɩ-wɛ yomaa,+ pɩkpɛndɩnɩ wiyaʋ pɛlaa nɛ ɛyaa mba payɩ pɩɩkazɩ Mizpaa taa yɔ, mba wiyaʋ yɔɔ kandɩyaa ñʋʋdʋ Nebuzaradaanɩ kaaɖʋzɩ-wɛ Ahikam pɩyalʋ Gedaliya+ nesi tɛɛ yɔ. Netaniya pɩyalʋ Isimayɛɛlɩ kpa-wɛ nɛ ɛpɩsɩ-wɛ yomaa nɛ ɛɖɛɛ se ɛtɛzɩ nɛ ewolo Amooni mba tɛ.+
11 Kareya pɩyalʋ Yohanaanɩ+ nɛ sɔɔjanaa ñʋndɩnaa kpeekpe mba paawɛ ɛ-cɔlɔ yɔ panɩ kɩdɛkɛdɩm mbʋ payɩ Netaniya pɩyalʋ Isimayɛɛlɩ kaalaba yɔ pɩ-tɔm lɛ,
12 pakpaɣ ɛyaa tɩŋa nɛ pɛɖɛɛ se poyooni Netaniya pɩyalʋ Isimayɛɛlɩ, nɛ palɩɩ ɛ-yɔɔ lɩm sɔsɔm* cɔlɔ Gabawɔɔ taa.
13 Ɛyaa mba payɩ paawɛ Isimayɛɛlɩ cɔlɔ yɔ pa-taa labɩ leleŋ alɩwaatʋ ndʋ pana Kareya pɩyalʋ Yohanaanɩ nɛ sɔɔjanaa ñʋndɩnaa kpeekpe mba paawɛ ɛ-cɔlɔ yɔ.
14 Peeɖe ɛyaa mba payɩ Isimayɛɛlɩ kaakpa Mizpaa+ taa nɛ ɛpɩsɩ-wɛ yomaa yɔ, paha siɣye nɛ pa nɛ Kareya pɩyalʋ Yohanaanɩ papɩsɩ.
15 Ɛlɛ Netaniya pɩyalʋ Isimayɛɛlɩ nɛ ɛ-yaa 8 pese nɛ Yohanaanɩ tɩpɩzɩ nɛ ɛkpa-wɛ, nɛ pɛɖɛɛ powolo Amooni mba tɛ.
16 Kareya pɩyalʋ Yohanaanɩ nɛ sɔɔjanaa ñʋndɩnaa kpeekpe mba paawɛ ɛ-cɔlɔ yɔ, pakpaɣ ɛyaa mba pɩɩkazɩ Mizpaa taa yɔ nɛ pɛkpɛndɩna, mba paaholi-wɛ Netaniya pɩyalʋ Isimayɛɛlɩ nesi tɛɛ alɩwaatʋ ndʋ ɛlɛ kaakʋ Ahikam pɩyalʋ Gedaliya+ yɔ. Pakpaɣ abalaa, sɔɔjanaa, halaa, piya, nɛ wiyaʋ ɖɩɣa taa kaɖɩsɩ Gabawɔɔ taa nɛ papɩsɩnɩ-wɛ.
17 Nɛ powolo nɛ pacaɣ Kimaamɩ ɖɩzʋyɛ taa Bɛtɩlɛhɛm+ cɔlɔ, mbʋ pʋyɔɔ yɔ pakpaɣ lɩmaɣzɩyɛ se powoki Ejipiti+
18 Kalɩdee mba yɔɔ. Peseɣaɣ-wɛ sɔɔndʋ, mbʋ pʋyɔɔ yɔ Netaniya pɩyalʋ Isimayɛɛlɩ kaakʋ Ahikam pɩyalʋ Gedaliya, weyi Babilɔɔnɩ wiyaʋ kaalɩzaa nɛ ɛkɛ wiyaʋ ɛjaɖɛ taa yɔ.+
Pɩ-tɛɛ tɔm
^ Piye piye, «kewiyaɣ ɖomaɣ.»
^ Pʋ-tɔbʋʋ se pɔʋ ŋgʋ pohuyaa nɛ paɖʋʋ lɩm kɩ-taa yɔ.
^ Pɩpɩzɩɣ pɩkɛ, «lɩŋgamʋʋ sɔsɔʋ.»
