Yereemii 42:1-22
42 Pʋwayɩ lɛ, sɔɔjanaa ñʋndɩnaa kpeekpe, nɛ Kareya pɩyalʋ Yohanaanɩ,+ Osayiya pɩyalʋ Yezaniya, nɛ samaɣ kpeekpe, kpaɣnɩ weyi pɩtɔyɩnaa yɔ nɛ piwolo weyi ɛkpaɖaa yɔ, powolo
2 nɛ peheyi nayʋ Yereemii se: «Ðitendi-ŋ, welisi tenduu mbʋ ɖitendiɣ se pana ɖa-pʋtɔdɩyɛ yɔ, nɛ ŋtɩmnɩ ñɛ-Ɛsɔ Yehowa ɖɔ-yɔɔ, mba payɩ pɩkazaa yɔ pɔ-yɔɔ, mbʋ pʋyɔɔ yɔ ɛyaa sakɩyɛ taa lɛ pazɩ yem pɩkazaa,+ ɛzɩ ŋnaʋ yɔ.
3 Ñɛ-Ɛsɔ Yehowa eheyi-ɖʋ nʋmɔʋ ŋgʋ kɩ-taa pɩwɛɛ se ɖɩɖɔ yɔ nɛ mbʋ pɩwɛɛ se ɖɩla yɔ.»
4 Nayʋ Yereemii cosi-wɛ se: «Manɩ tɔm ndʋ ɩyɔɔdaa yɔ, nɛ mantɩmɩɣnɩ mɩ-Ɛsɔ Yehowa ɛzɩ ɩpɔzʋʋ yɔ; nɛ tɔm ndʋ payɩ Yehowa cosuu-mɩ yɔ, mankaɣ-mɩ tʋ heyuu. Maakaɣ-mɩ mɛsʋʋ tɔm natʋyʋ.»
5 Pocosi Yereemii se: «Yehowa ɛkɛ aseɣɖe tʋ toovenim tʋ nɛ siɣsiɣ tʋ nɛ ɛhɔ ɖa-nɩŋgbaaŋ ye ɖɩɩlakɩ ɖeyi ɖeyi ɛzɩ ñɛ-Ɛsɔ Yehowa tɩŋnʋʋ ñɔ-yɔɔ nɛ ɛɖʋ-ɖʋ paɣtʋ yɔ.
6 Paa pɩtɩɩkɛ kɩbandʋ yaa kɩdɛkɛdɩtʋ yɔ, ɖɩkaɣ ñam ɖɛ-Ɛsɔ Yehowa nɔɔ taa tɔm, weyi ɛ-cɔlɔ ɖitiyiɣ-ŋ yɔ, se pɩsa nɛ pɩɖɔmnɩ-ɖʋ camɩyɛ mbʋ pʋyɔɔ yɔ ɖɩñaŋ ɖɛ-Ɛsɔ Yehowa nɔɔ taa tɔm.»
7 Nɛ kɩyakɩŋ 10 wayɩ lɛ, Yehowa tɔm talɩ Yereemii.
8 Peeɖe ɛya Kareya pɩyalʋ Yohanaanɩ nɛ sɔɔjanaa ñʋndɩnaa kpeekpe mba paawɛ ɛlɛ cɔlɔ yɔ nɛ samaɣ kpeekpe, kpaɣnɩ weyi pɩtɔyɩnaa yɔ nɛ piwolo weyi ɛkpaɖaa yɔ.+
9 Eheyi-wɛ se: «Tɔm tʋnɛ Izrayɛɛlɩ tɛ Ɛsɔ Yehowa yɔɔdʋʋ, weyi ɛ-cɔlɔ itiyi-m se mantanɩ ɛ-ɛsɩndaa tenduu mbʋ itendiɣ se ɛna mɩ-pʋtɔdɩyɛ yɔ:
10 “Ye toovenim taa itisaa nɛ ɩcaɣ ɛjaɖɛ ɖɩnɛ ɖɩ-taa yɔ, ɖɩnɛ ɛlɛ mankaɣ-mɩ maʋ nɛ maakaɣ-mɩ yɔkʋʋ, nɛ mankaɣ-mɩ sɔʋ nɛ maakaɣ-mɩ kpɛzʋʋ, mbʋ pʋyɔɔ yɔ mankaɣ kpiɖuu* asɛyʋʋ ŋgʋ mɔnkɔnɩ mɩ-yɔɔ yɔ kɩ-yɔɔ.+
11 Sɔɔndʋ ɛtaakpa-mɩ Babilɔɔnɩ wiyaʋ yɔɔ, weyi iseɣ sɔɔndʋ yɔ.”+
«“Sɔɔndʋ ɛtaakpa-mɩ ɛ-yɔɔ, mbʋ pʋyɔɔ yɔ mɛwɛ mɩ-cɔlɔ, se maya mɩ-ñʋʋ nɛ moholi-mɩ e-nesi tɛɛ; Yehowa yɔɔdʋʋna.
12 Nɛ mankaɣ naʋ mɩ-pʋtɔdɩyɛ,+ nɛ ɛkaɣ naʋ mɩ-pʋtɔdɩyɛ nɛ ɛpɩsɩnɩ-mɩ mɩ-maɣmaɣ mɩ-ɛjaɖɛ taa.
13 «“Ɛlɛ ye ɩyɔɔdaa se: ‘Aayɩ, ɖɩɩkaɣ caɣʋ ɛjaɖɛ ɖɩnɛ ɖɩ-taa!’ nɛ ɩɩñaŋ mɩ-Ɛsɔ Yehowa nɔɔ taa tɔm
14 nɛ ɩyɔɔdʋʋ se: ‘Aayɩ, ɛlɛ ɖɩkaɣ wobu Ejipiti ɛjaɖɛ taa,+ ɖenɖe ɖɩɩkaɣ naʋ you yaa ɖɩɩkaɣ nɩʋ nɔndɔʋ taŋ yaa ñɔɔsɩ* ɛɛkaɣ-ɖʋ kʋʋ yɔ; peeɖe ɖɩkaɣ caɣʋ’ yɔ,
15 ɖɩnɛ ɛlɛ ɩnɩɩ Yehowa tɔm, Oo mɩ mba pɩkazɩ Yuuda taa yɔ. Tɔm tʋnɛ yoyaa tɛ Yehowa, Izrayɛɛlɩ tɛ Ɛsɔ yɔɔdʋʋ: ‘Ye ɩtɛm mɩ-taa kpem se iwoki Ejipiti nɛ iwolo peeɖe se ɩcaɣ* yɔ,
16 ɖɩnɛ ɛlɛ laɣɖɛ nɖɩ ɖeyi ɖeyi iseɣaɣ sɔɔndʋ yɔ ɖɩkaɣ-mɩ hiɣu Ejipiti ɛjaɖɛ taa peeɖe, nɛ ñɔɔsɩ nzɩ ɖeyi ɖeyi iseɣaɣ sɔɔndʋ yɔ sɩkaɣ tɩŋʋʋ mɩ-wayɩ Ejipiti, nɛ peeɖe ɩkaɣ sɩbʋ.+
17 Nɛ ɛyaa mba payɩ pɛtɛm pa-taa se powoki Ejipiti nɛ pacaɣ peeɖe yɔ laɣɖɛ, ñɔɔsɩ nɛ kɩzɩkʋ* kaɣ-wɛ kʋʋ. Pa-taa nɔɔyʋ ɛɛkaɣ hiɣu ñʋʋ yabʋ yaa ɛɛkaɣ lɩʋ asɛyʋʋ ŋgʋ mankaɣ kɔnʋʋ pɔ-yɔɔ yɔ kɩ-taa.’”
18 «Mbʋ pʋyɔɔ yɔ tɔm tʋnɛ yoyaa tɛ Yehowa, Izrayɛɛlɩ tɛ Ɛsɔ yɔɔdʋʋ: “Ɛzɩ maapɩyʋʋ man-pana nɛ man-ɖɩwɩzɩyɛ Yeruzalɛm taa mba yɔɔ yɔ,+ mbʋ ɖɔɖɔ mankaɣ pɩyʋʋ man-ɖɩwɩzɩyɛ mɩ-yɔɔ ye iwobi Ejipiti yɔ, nɛ ɩkaɣ pɩsʋʋ mbʋ pɔlɔ pɩ-yɔɔ nɔɔ kɩdɛkɛdaɣ yɔ, sɔɔndʋ pʋyʋ, nɔɔ kɩdɛkɛdaɣ lɔʋ, nɛ fɛyɛ pʋyʋ,+ nɛ ɩɩkaɣ tasʋʋ naʋ lone ɖɩnɛ wiɖiyi.”
19 «Oo mɩ mba pɩkazɩ Yuuda taa yɔ, Yehowa heyi-mɩ se itaawolo Ejipiti. Pɩwɛɛ se ɩtɩlɩ camɩyɛ se manpaɣ-mɩ sɔnɔ
20 se mɩ-kɩdɛkɛdɩm kaɣ yebu nɛ ilesi mi-weziŋ.* Mbʋ pʋyɔɔ yɔ itiyi-m mɩ-Ɛsɔ Yehowa cɔlɔ se: “Tɩmnɩ ɖɛ-Ɛsɔ Yehowa ɖɔ-yɔɔ, nɛ ŋheyi-ɖʋ tɔm ndʋ payɩ ɖɛ-Ɛsɔ Yehowa yɔɔdʋʋ yɔ, nɛ ɖɩkaɣ tɩ-yɔɔ ɖɔm.”+
21 Nɛ meheyi-mɩ sɔnɔ, ɛlɛ ɩɩkaɣ ñam mɩ-Ɛsɔ Yehowa nɔɔ taa tɔm yaa ɩɩkaɣ ɖɔm tɔm ndʋ payɩ etiyi-m se meheyi-mɩ yɔ tɩ-yɔɔ.+
22 Pʋyɔɔ lɛ, ɩtɩlɩ camɩyɛ se laɣɖɛ, ñɔɔsɩ nɛ kɩzɩkʋ kaɣ-mɩ kʋʋ lone nɖɩ ɖɩ-taa mi-liu wɛɛ se iwolo nɛ ɩcaɣ yɔ ɖɩ-taa.»+
Pɩ-tɛɛ tɔm
^ Yaa «mankaɣ wɛʋ laŋwɛɛkɩyɛ taa.»
^ Piye piye, «kpɔnɔ ñɔɔsɩ.»
^ Yaa «se ɩcaɣ alɩwaatʋ natʋyʋ.»
^ Yaa «kʋdɔŋ.»
^ Yaa «mɩ-kalɩzasɩ.»
