Yereemii 43:1-13
43 Yereemii tɛm heyuu ɛyaa samaɣ kpeekpe tɔm ndʋ tɩlɩnɩ pɛ-Ɛsɔ Yehowa cɔlɔ yɔ tɩ-tɩŋa, tɔm ndʋ pɛ-Ɛsɔ Yehowa tiyi-i se eheyi-wɛ yɔ tɩ-tɩŋa tete lɛ,
2 Osayiya pɩyalʋ Azariya, Kareya pɩyalʋ Yohanaanɩ,+ nɛ abalaa tɩ kpazɩyaa kpeekpe, peheyi Yereemii se: «Tɔm ndʋ ŋwɛɛ nɛ ŋyɔɔdʋʋ yɔ tɩkɛ cɛtɩm. Ðɛ-Ɛsɔ Yehowa titiyi-ŋ se ŋyɔɔdɩ se: “Itaawolo Ejipiti se ɩcaɣ peeɖe.”
3 Ɛlɛ Neriya pɩyalʋ Baaruuki+ wɛna nɛ eseɣtiɣ-ŋ se ŋyɔɔdɩ mbʋ nɛ ŋɖʋzɩ-ɖʋ Kalɩdee mba nesi tɛɛ, nɛ pakʋ-ɖʋ yaa pakpaɣ-ɖʋ nɛ pɛkɛzɩ-ɖʋ tɛtʋ Babilɔɔnɩ.»+
4 Nɛ Kareya pɩyalʋ Yohanaanɩ nɛ sɔɔjanaa ñʋndɩnaa kpeekpe nɛ samaɣ kpeekpe tɩña tɔm ndʋ Yehowa heyi-wɛ se pacaɣ Yuuda ɛjaɖɛ taa yɔ.
5 Ɛlɛ, Kareya pɩyalʋ Yohanaanɩ nɛ sɔɔjanaa ñʋndɩnaa kpeekpe pakpaɣ Yuuda ñɩma mba payɩ pɩɩkazaa yɔ nɛ pɛkpɛndɩna, mba paalɩnɩ ajɛɛ wena a-taa payɩ paamɩzɩ-wɛ yɔ nɛ papɩsɩ nɛ pacaɣ Yuuda ɛjaɖɛ taa yɔ.+
6 Pakpaɣ abalaa, halaa, piya, wiyaʋ pɛlaa, nɛ mba payɩ* wiyaʋ yɔɔ kandɩyaa ñʋʋdʋ Nebuzaradaanɩ+ kaayebi Safaanɩ+ pɩyalʋ Ahikam+ pɩyalʋ Gedaliya+ cɔlɔ yɔ, pɩkpɛndɩnɩ nayʋ Yereemii nɛ Neriya pɩyalʋ Baaruuki.
7 Nɛ pɛɖɛɛ powolo Ejipiti ɛjaɖɛ taa, mbʋ pʋyɔɔ yɔ patɩña Yehowa nɔɔ taa tɔm, nɛ powolo patalɩ ɖooo Tapanɛɛsɩ.+
8 Peeɖe Yehowa tɔm talɩ Yereemii Tapanɛɛsɩ taa se:
9 «Kpaɣ kaaŋ sɔsɔŋ ñe-nesi taa, nɛ ŋmɛsɩ-ɩ somtu taa taɣ ŋga palabɩnɩ filikinaa yɔ ka-taa Farawɔɔ ɖɩɣa ŋga kɛwɛ Tapanɛɛsɩ yɔ kɔ-nɔnɔɔ taa, alɩwaatʋ ndʋ Yuuda mba ɖiɣni-ŋ cɔnʋʋ yɔ.
10 Pʋwayɩ lɛ, ŋheyi-wɛ se: “Tɔm tʋnɛ yoyaa tɛ Yehowa, Izrayɛɛlɩ tɛ Ɛsɔ yɔɔdʋʋ: ‘Ɩna, menɖiɣni tiyuu se payaa ma-lɩmɖʋyʋ Babilɔɔnɩ wiyaʋ Nabukodonozɔɔrɩ,*+ nɛ mankaɣ sɩʋ e-kewiyaɣ kpelaɣ kaaŋ ɛnɛ ɩ-ñʋʋ yɔɔ kpam, kaaŋ weyi mɛmɛsaa yɔ; nɛ ɛkaɣ posuu e-kewiyaɣ kizinziku ɩ-yɔɔ.+
11 Nɛ ɛkaɣ sʋʋ nɛ eyooni Ejipiti ɛjaɖɛ.+ Weyi ɛmʋnɩ kʋdɔŋ ŋgʋ kɩkɔŋnɩ sɩm yɔ, pɩkaɣ-ɩ tɛmnʋʋ nɛ kʋdɔŋ ŋgʋ kɩkɔŋnɩ sɩm yɔ; nɛ weyi ɛmʋnɩ yomiye taa wobu yɔ, pɩkaɣ-ɩ tɛmnʋʋ nɛ yomiye taa wobu; nɛ weyi ɛmʋnɩ laɣɖɛ yɔ, pɩkaɣ-ɩ tɛmnʋʋ nɛ laɣɖɛ.+
12 Nɛ mankaɣ sɔbʋ Ejipiti ɛsɔnaa ɖɩsɩ* miŋ,+ nɛ Babilɔɔnɩ wiyaʋ kaɣ-wɛ ñaɣzʋʋ miŋ nɛ ɛɖɛnɩ-wɛ yomiye taa. Ɛkaɣ huu ɛ-yɔɔ Ejipiti ɛjaɖɛ ɛzɩ ninɖiɣyu huu ɛ-yɔɔ e-wondu kususutu yɔ, nɛ ɛkaɣ lɩʋ peeɖe nɛ ɛɖɛɛnɩ laŋhɛzɩyɛ.*
13 Nɛ ɛkaɣ yɔkʋʋ Ejipiti ɛjaɖɛ taa Bɛtɩ-Semɛɛsɩ* tilima* hɔɔlasɩ hɔɔlasɩ, nɛ ɛkaɣ ñaɣzʋʋ Ejipiti ɛsɔnaa ɖɩsɩ* miŋ.’”»
Pɩ-tɛɛ tɔm
^ Yaa «nɛ kalɩzasɩ nzɩ payɩ.»
^ Piye piye, «Nebukadɩrezaarɩ,» mbʋ pamaɣ ɛ-hɩɖɛ ɖɔɖɔ.
^ Yaa «templonaa.»
^ Yaa «nɛ ɛɖɛɛ nɛ kɩdɛkɛdɩm nabʋyʋ ɛɛtalɩɣ-ɩ.»
^ Yaa «Wɩsɩ Ðɩɣa (Templo),» pʋ-tɔbʋʋ se Heliyopolisi.
^ Yaa «tɔzʋʋ tilima.»
^ Yaa «templonaa.»