Yereemii 46:1-28
46 Tɔm ndʋ tɩlɩnɩ Yehowa cɔlɔ nɛ tɩtalɩ nayʋ Yereemii nɛ titukuuni ajɛɛ yɔ ndʋ yɔ:+
2 Ejipiti yɔɔ lɛ,+ tɔm tʋnɛ ɛyɔɔdɩ Ejipiti wiyaʋ Farawɔɔ Neko+ sɔɔjanaa yɔɔ, weyi ɛɛwɛ Efraatɩ Pɔɔ cɔlɔ nɛ Babilɔɔnɩ wiyaʋ Nabukodonozɔɔrɩ* wabɩ-ɩ Karkemisi, Yuuda wiyaʋ, Yoziyaasɩ pɩyalʋ Yehoyakim+ pɩnaɣ 4 ñɩŋga taa yɔ:
3 «Ɩñɔɔzɩ mɩ-kpayɩŋ cikpeŋ* nɛ mɩ-kpayɩŋ sɔsɔŋ,Nɛ ɩɖɛɛ iwolo you taa.
4 Ɩñɔɔzɩ kpaŋnaŋ nɛ ɩcaɣ ɩ-yɔɔ, kpaŋnaŋ yɔɔ caɣyaa mɩ.
Ɩsɩŋ mi-lona taa nɛ ɩpa mi-hulasɩ nzɩ palabɩnɩ ñɩɣtʋ yɔ.
Ɩsɛyɩ kɩgbɛzɛmɩŋ nɛ isuu mi-tokonaa mba palabɩnɩ ñɩɣtʋ yɔ.
5 “Ɛbɛ yɔɔ manaɣ-wɛ pɛwɛ sɔɔndʋ taa mbʋ?
Pɛwɛɛ nɛ papɩsɩɣnɩ wayɩ, pɔtɔyɩtɩ pɔ-sɔdɩŋ.
Sɔɔndʋ kpa-wɛ nɛ pese, pɔ-sɔdɩŋ tikisini ɩ-wayɩ.
Sɔɔndʋ wɛ paa le,” Yehowa yɔɔdʋʋna.
6 “Mba pɛwɛ lɛɛ lɛɛ yɔ paapɩzɩɣ nɛ pese, nɛ sɔdɩŋ ɩɩpɩzɩɣ nɛ ise nɛ ɩtʋlɩ.
Hayo kiŋ, Efraatɩ Pɔɔ kidiiliŋ yɔɔ,Pituuli-wɛ nɛ pɔtɔlɩ.”+
7 Awɛɛ nɛ ɛkpaɣ mbʋ yɔ ɛzɩ Niili Pɔɔ yɔ,Ɛzɩ pɔsɩ nzɩ sɩ-lɩm hola wɛ ɖoŋ yɔ?
8 Ejipiti kpaɣ ɖeyi ɖeyi ɛzɩ Niili Pɔɔ yɔ,+Ɛzɩ pɔsɩ nzɩ sɩ-lɩm hola wɛ ɖoŋ yɔ,Nɛ kɩyɔɔdʋʋ se: “Mankaɣ kpaʋ nɛ mohuuzi tɛtʋ yɔɔ.
Mankaɣ ɖɩzʋʋ tɛtʋ ndʋ nɛ tɩ-taa mba.”
9 Ɩkpa, kpaŋnaŋ mɩ!
Ise ɛzɩ kpanzɩyaa yɔ, kɛɛkɛɛnaa mɩ!
Sɔdɩŋ ɩɖɛɛ,Kuusi mba nɛ Puti mba, mba palakɩnɩ tʋmɩyɛ kpayɩŋ yɔ,+Nɛ Ludim mba,+ mba palakɩnɩ tʋmɩyɛ tɔʋ nɛ pokotuu-kʋ ɖɔɖɔ yɔ.*+
10 «Kɩyakʋ ŋgʋ, Kɩbaɣlʋ Kɩlɩm, yoyaa tɛ Yehowa tɩnɩ-kʋ, kɩmɩyɛ kpaʋ kɩyakʋ ŋgʋ ki-wiye ɛkpaɣ e-koyindinaa kɩmɩyɛ yɔ. Nɛ laɣɖɛ kaɣ tɔɔʋ nɛ ɖɩhaɣ nɛ ɖɩñɔɔ pa-calɩm nɛ ɖɩñɩɣzɩ, mbʋ pʋyɔɔ yɔ Kɩbaɣlʋ Kɩlɩm, yoyaa tɛ Yehowa wɛnɩ kɩlaʋ nakʋyʋ se ɛlaɣ* hayo kiŋ ɛjaɖɛ taa Efraatɩ Pɔɔ cɔlɔ.+
11 Oo Ejipiti pɛlɛ weyi ɛtɩtɩlɩ abalʋ yɔ,Kpa Galaadɩ nɛ ŋkpaɣ balɩsam.+
Ŋlakɩ ña-tɩ kɔ sakɩyɛ yem falaa,Mbʋ pʋyɔɔ yɔ kɔyɛ naɖɩyɛ fɛyɩ se papɩzɩɣ nɛ palabɩ-ŋ.+
12 Ajɛɛ nɩ ñɛ-fɛyɛ tɔm,+Nɛ ño-kubusi su ɛjaɖɛ taa.
Mbʋ pʋyɔɔ yɔ sɔdʋʋ mɔtʋʋnɩ sɔdʋʋ,Nɛ pa-naalɛ pɛkpɛndɩɣ nɛ pɔtɔlɩ.»
13 Tɔm tʋnɛ Yehowa heyi nayʋ Yereemii pɩlɩɩnɩ ɛzɩma Babilɔɔnɩ wiyaʋ Nabukodonozɔɔrɩ* kɔŋ se ɛyɔkɩ Ejipiti ɛjaɖɛ yɔ pɩ-yɔɔ:+
14 «Ɩyɔɔdɩ-tʋ Ejipiti taa, isusi-tʋ Migɩdɔl+ taa.
Isusi-tʋ Nof* taa nɛ Tapanɛɛsɩ+ taa.
Ɩyɔɔdɩ se: “Ɩsɩŋ mi-lona taa nɛ ɩñɔɔzɩ mɩ-tɩ,Mbʋ pʋyɔɔ yɔ laɣɖɛ kaɣ tɔɔʋ nɛ pɩcɔɔ-mɩ nɛ pɩta.
15 Ɛbɛ yɔɔ pɩhazɩ mɩ-ɛyaa ɖoŋ tɩnaa nɛ pɩɖɛna?
Patɩpɩzɩ nɛ pasɩŋ po-lona taa,Mbʋ pʋyɔɔ yɔ Yehowa tuzi-wɛ nɛ ɛpɛɖɩ.
16 Pɩwɛɛ nɛ pituuluu pa-taa sakɩyɛ nɛ pɔtɔlʋʋ.
Pɛwɛɛ nɛ peheyiɣ ɖama se:
‘Laɣɖɛ nɖɩ ɖɩwɛ kañatʋ yɔ ɖɩ-yɔɔ lɛ,Kʋyɩ! Ðɩpɩsɩ ɖɛ-ɛyaa cɔlɔ nɛ ɖɛ-ɛjaɖɛ taa.’”
17 Posusi peeɖe se:
“Ejipiti wiyaʋ Farawɔɔ lakɩ kɔkɔɖɛ yem falaa,Eyebi waɖɛ* nɛ ɖɩɖɛɛ.”+
18 “Mañɩtʋʋ nɛ mɛwɛɛ wezuu yɔ,Ɛkaɣ* sʋʋ ɛzɩ Taabɔɔrɩ+ wɛʋ pʋŋ hɛkʋ taa yɔNɛ ɛzɩ Karmɛɛlɩ+ wɛʋ teŋgu nɔɔ yɔ,” Wiyaʋ yɔɔdʋʋna, ɛnʋ weyi payaɣ-ɩ se yoyaa tɛ Yehowa yɔ.
19 Ñɔɔzɩ ño-wondu nɛ ŋkɛɛ tɛtʋ,Oo ña pɛlɛ weyi ɛwɛ Ejipiti yɔ.
Mbʋ pʋyɔɔ yɔ Nof* kaɣ pɩsʋʋ sɔɔndʋ pʋyʋ;Pakaɣ-kʋ sɔbʋ miŋ* nɛ pɩɩkaɣ kazʋʋ nɔɔyʋ kɩ-taa.+
20 Ejipiti wɛ ɛzɩ nɔ halɩñɩnʋ weyi ɛtɩlʋlɩta nɛ ɛwɛ cɔnʋʋ yɔ,Ɛlɛ kɔjɔsɩ nzɩ sɩñasɩɣ yɔ sɩkaɣ lɩnʋʋ hayo kiŋ nɛ sɩkɔɔ kɩ-wayɩ.
21 Halɩ sɔɔjanaa mba kɩtɛɣaa nɛ pɛwɛɛ kɩ-hɛkʋ taa yɔ, pɛwɛ ɛzɩ newee wena aɖʋ num yɔ,Ɛlɛ mba ɖɔɖɔ paha siɣye nɛ pese.
Patɩpɩzɩ nɛ pasɩŋ po-lona taa,+Mbʋ pʋyɔɔ yɔ pa-asɛyʋʋ kɩyakʋ kɔm pɔ-yɔɔ,Pa-akɔnta pɔzʋʋ alɩwaatʋ talaa.”
22 “Panɩɣ kɩ-taŋ ɛzɩ ɖʋm tuuu lɩɩɩ lɩɩɩ nɛ eseɣ nɛ panɩɣ ɛ-taŋ yɔ,Mbʋ pʋyɔɔ yɔ pɔkɔŋ kɩ-wayɩ nɛ ɖoŋ, nɛ laɖa,Ɛzɩ ɛyaa mba peɖiɣni tim tɩŋ yɔ.*
23 Pakaɣ tim kɩ-laʋ, paa pɩwɛ ɛzɩ ɛyʋ ɛɛpɩzɩɣ nɛ ɛsʋʋ kɩ-tɛɛ yɔ.
Mbʋ pʋyɔɔ yɔ pɔɖɔwa nɛ pɩkpaɖɩ kudoloŋ, pɛfɛyɩ kalʋʋ,” Yehowa yɔɔdʋʋna.
24 Fɛyɛ kaɣ kpaʋ Ejipiti pɛlɛ.
Pakaɣ-ɩ ɖʋzʋʋ hayo kiŋ mba nesi tɛɛ.”+
25 «Yoyaa tɛ Yehowa, Izrayɛɛlɩ tɛ Ɛsɔ yɔɔdʋʋ se: “Lɛɛlɛɛyɔ lɛ, menɖiɣni kɛzʋʋ ma-lɩmaɣza nɛ No*+ tɛtʋ taa ɛsɔ weyi payaɣ se Amɔɔnɩ+ yɔ ɛ-yɔɔ, Farawɔɔ yɔɔ, Ejipiti yɔɔ, kɩ-ɛsɔnaa yɔɔ,+ nɛ kɩ-awiya yɔɔ; ɛɛɛ, Farawɔɔ nɛ mba payɩ pataɣ-ɩ liu yɔ pɔ-yɔɔ.”+
26 «“Nɛ mankaɣ-wɛ ɖʋzʋʋ mba pañɩnɩɣ se palɩzɩ pe-wezuu* yɔ pe-nesi tɛɛ, Babilɔɔnɩ wiyaʋ Nabukodonozɔɔrɩ*+ nɛ ɛ-lɩmɖʋyaa pe-nesi tɛɛ. Ɛlɛ pʋwayɩ lɛ, ɛyaa kaɣ tasʋʋ wɛʋ kɩ-taa ɛzɩ ɖooo lɛ yɔ,” Yehowa yɔɔdʋʋna.+
27 “Piyele nɛ ña yɔ, sɔɔndʋ ɛtaakpa-ŋ, ma-lɩmɖʋyʋ Yakɔɔb,Nɛ taaseli, Oo Izrayɛɛlɩ.+
Mbʋ pʋyɔɔ yɔ mankaɣ ña-ñʋʋ yabʋ nɛ ɖooo poliŋ taaNɛ maya ña-lʋlʋʋ taa mba* ñʋʋ ɛjaɖɛ nɖɩ ɖɩ-taa powoni-wɛ yomiye taa yɔ.+
Yakɔɔb kaɣ pɩsʋʋ nɛ ɛcaɣ ɖiɣ ɖiɣ nɛ ɛkaɣ wɛʋ kaalɛyɩtʋ.
Nɛ nɔɔyʋ ɛɛkaɣ-ɩ ɖʋʋ sɔɔndʋ.+
28 Pʋyɔɔ lɛ, sɔɔndʋ ɛtaakpa-ŋ, ma-lɩmɖʋyʋ Yakɔɔb, mbʋ pʋyɔɔ yɔ mɛwɛ ñɔ-cɔlɔ.
Mankaɣ ɖɩzʋʋ ajɛɛ kpeekpe wena a-taa mamɩzɩ-ŋ yɔ,+Ɛlɛ ña lɛ, maakaɣ-ŋ ɖɩzʋʋ.+
Mankaɣ-ŋ lɔŋ sɩɣzʋʋ* ɛzɩ pɩmʋnʋʋ ɖeyi ɖeyi yɔ,+Ɛlɛ maakaɣ yebu ña-nɩŋgbaŋʋʋ hɔm kpa,” Yehowa yɔɔdʋʋna.»
Pɩ-tɛɛ tɔm
^ Piye piye, «Nebukadɩrezaarɩ,» mbʋ pamaɣ ɛ-hɩɖɛ ɖɔɖɔ.
^ Ðoŋ ɖoŋ lɛ, tɔŋ tɔyaa ɖɔkaɣnɩ kpayɩŋ cikpeŋ.
^ Piye piye, «mba pɛfɛyɩɣ tɔʋ yɔ.»
^ Yaa «wɛnɩ kʋgʋʋ nakʋyʋ.»
^ Piye piye, «Nebukadɩrezaarɩ,» mbʋ pamaɣ ɛ-hɩɖɛ ɖɔɖɔ.
^ Yaa «Mɛmfiis.»
^ Piye piye, «alɩwaatʋ ndʋ paɖʋwa yɔ.»
^ Pʋ-tɔbʋʋ se weyi ɛkaɣ Ejipiti wabʋ yɔ.
^ Yaa «Mɛmfiis.»
^ Pɩpɩzɩɣ pɩkɛ, «Kɩkaɣ pɩsʋʋ tɛtʋ ndʋ peyebi-tʋ yɔ.»
^ Yaa «ɛyaa mba peɖiɣni kpeɣluu ɖasɩ yɔ.»
^ Pʋ-tɔbʋʋ se Tɛɛb.
^ Piye piye, «Nebukadɩrezaarɩ,» mbʋ pamaɣ ɛ-hɩɖɛ ɖɔɖɔ.
^ Yaa «mba pañɩnɩɣ pa-kalɩzaɣ yɔ.»
^ Piye piye, «ño-ɖomaɣ.»
^ Yaa «ñɔɔzʋʋ.»
