Yereemii 48:1-47
-
Mowaabʋ yɔɔ natʋ tɔm (1-47)
48 Mowaabʋ+ yɔɔ lɛ, tɔm tʋnɛ yoyaa tɛ Yehowa, Izrayɛɛlɩ tɛ Ɛsɔ yɔɔdʋʋ:
«Pɩtɔɔ Nebo,+ mbʋ pʋyɔɔ yɔ paɖɩzɩ-kʋ!
Paɖʋ Kiriyatayim+ fɛyɛ nɛ pamʋ-kʋ.
Paɖʋ fɛyɛ ɖɩjɔzɩyɛ* nɖɩ ɖɩ-taa kaɖɛ naɖɩyɛ ɛɛtalɩɣ ɛyʋ yɔ nɛ pɔyɔkɩ-ɖɩ.+
2 Paatasɩɣ sam Mowaabʋ.
Pɛkpɛyɩ kɩ-tɔlʋʋ tɔm Hɛsɩbɔɔnɩ+ taa se:
“Ɩkɔɔ, ɖɩɖɩzɩ-kʋ nɛ kɩtaatasɩ kɛʋ ɛjaɖɛ.”
Oo Madmɛɛnɩ, ña ɖɔɖɔ pɩwɛɛ se ŋsu tamɩyɛ,Mbʋ pʋyɔɔ yɔ laɣɖɛ wɛɛ nɛ ɖɩtɩŋɩɣ ña-wayɩ.
3 Panɩɣ kubuka nakɛyɛ taŋ Horonayim+ taa,Ðɩzʋʋ nɛ yɔkʋʋ sɔsɔm kubuka.
4 Pɔyɔkɩ Mowaabʋ.
Ki-piya makɩ kubusi.
5 Pɛwɛɛ pewiɣ nɛ pakpaɣ Luhit piyaɣ.
Nɛ nʋmɔʋ ŋgʋ kɩlɩnɩ Horonayim nɛ kitiki yɔ kɩ-taa, panɩɣ kʋñɔŋ kubusi taŋ, asɛyʋʋ yɔɔ.+
6 Ise, ɩya mi-weziŋ* ñʋʋ!
Pɩwɛɛ se ɩpɩsɩ ɛzɩ jenevriyee tɩʋ ŋgʋ kɩwɛ kañɩmbusuu taa yɔ.
7 Ŋtaɣ liu ña-tʋma nɛ ña-ñɩm; pʋyɔɔ lɛ,Ña ɖɔɖɔ pakaɣ-ŋ kpaʋ.
Nɛ pakaɣ Kemɔɔsɩ+ kɛzʋʋ tɛtʋ,Pɩkpɛndɩnɩ kɩ-cɔjɔnaa nɛ kɩ-awumbiya.
8 Ðɩzɩyʋ kaɣ sʋʋ paa tɛtʋ ndʋ lɛ tɩ-taa,Nɛ tɛtʋ natʋyʋ ɛɛkaɣ lɩʋ pɩ-taa.+
Fɛɛʋ* kaɣ ɖɩm,Nɛ tɛtʋ ndʋ tɩwɛ layɩɩ yɔ* pakaɣ-tʋ ɖɩzʋʋ, ɛzɩ Yehowa kaayɔɔdʋʋ yɔ.
9 Isiɣ habɩyɛ yɔɔ tilimiye Mowaabʋ,Mbʋ pʋyɔɔ yɔ alɩwaatʋ ndʋ kɩpɩsɩɣ njɛyɛ yɔ, kɩ-taa mba kaɣ seu,Nɛ kɩ-tɛtʋ ndɩ ndɩ kaɣ pɩsʋʋ sɔɔndʋ pʋyʋ,Nɛ nɔɔyʋ ɛɛkaɣ wɛʋ tɩ-taa.+
10 Pɔlɔ nɔɔ kɩdɛkɛdaɣ weyi ɛlakɩ Yehowa tʋmɩyɛ nɛ kaakendu yɔ ɛ-yɔɔ!
Pɔlɔ nɔɔ kɩdɛkɛdaɣ weyi ɛɖaŋɩɣ ɛ-laɣɖɛ se ɖɩtaakpɛdɩ calɩm yɔ ɛ-yɔɔ!
11 Mowaabʋ mba caɣ kaalɛyɩtʋ kpaɣnɩ pe-evebitu taa,Ɛzɩ vɛɛ ŋgʋ pasɩwa nɛ kɩ-tɛɛtʋ tii nɛ tɩcaɣ yɔ.
Patɩkpaɣ-wɛ nɛ ñanaɣ nakɛyɛ taa nɛ papɩyɩ-wɛ lɛɛka taa,Nɛ wiɖiyi patɩkɛzɩ-wɛ tɛtʋ.
Pʋyɔɔ ɛzɩma paawɛɛ alɩwaatʋ ndʋ paɖɩŋ-wɛ yɔ, pɩtɩlɛɣzɩ;Nɛ pɔ-sɔzɩŋ tɩlɛɣzɩ.
12 «“Pʋyɔɔ lɛ ɩna, kɩyakɩŋ ɖiɣni kɔm, nɛ alɩwaatʋ ndʋ lɛ, mankaɣ ɛyaa tiyuu nɛ pohuti-wɛ. Pakaɣ-wɛ hutuu nɛ pɩkazɩ pa-ñanzɩ kpɛɖɛ, nɛ pakaɣ yɔkʋʋ pa-ŋgbaŋ hɔɔlasɩ hɔɔlasɩ, Yehowa yɔɔdʋʋna.
13 Nɛ fɛyɛ kaɣ kpaʋ Mowaabʋ mba Kemɔɔsɩ yɔɔ, ɖɔɖɔ ɛzɩ fɛyɛ kpaʋ Izrayɛɛlɩ ɖɩɣa Betɛɛlɩ ŋgʋ pataɣaɣ liu yɔ kɩ-yɔɔ yɔ.+
14 Ɛbɛ yɔɔ ɩmabɩ mɩ-laŋa taa nɛ ɩyɔɔdʋʋ se: ‘Ðɩkɛ sɔdɩŋ ɖoŋ tɩnaa, ɖɩñɔɔzɩ ɖa-tɩ se ɖɩla you’?”+
15 “Paɖɩzɩ Mowaabʋ,Powobi kɩ-tɛtʋ ndɩ ndɩ wayɩ,+Pakʋ ki-evebiya mba pakpaɖɩ ɖeu yɔ,”+Wiyaʋ yɔɔdʋʋna, ɛnʋ weyi payaɣ-ɩ se yoyaa tɛ Yehowa yɔ.+
16 Pɩkazɩ pazɩ lɛ, asɛyʋʋ kaɣ kɔm Mowaabʋ mba yɔɔ,Nɛ pɔ-tɔlʋʋ ɖiɣni ñɔtʋʋ lɛɛ lɛɛ.+
17 Mba payɩ pɔcɔ-wɛ nɛ pata yɔ pakaɣ nɩʋ pe-siziŋ,Mba payɩ pasɩm pa-hɩɖɛ yɔ.
Iheyi-wɛ se: “Hayɩ, pɛpɛlɩ ɖaʋ ɖoŋ ñɩŋgʋ, keɖeɣa ɖaʋ!”
18 Lɩɩnɩ ña-samtʋ lone taa nɛ ŋtii,Nɛ ŋcaɣnɩ lɔkɔtʋ,* hayɩ Dibɔɔnɩ+ pɛlɛ ña,Mbʋ pʋyɔɔ yɔ Mowaabʋ ɖɩzɩyʋ kɔm ña-wayɩ,Nɛ ɛkaɣ yɔkʋʋ ño-lona ɖoŋ ñɩna.+
19 Arowɛɛrɩ+ taa tʋ, sɩŋ habɩyɛ nɔɔ nɛ ŋcɔna.
Pɔzɩ abalʋ weyi eɖiɣni seu yɔ nɛ halʋ weyi eɖiɣni seu se ɛtʋlɩ yɔ se: “Ɛbɛ laba?”
20 Paɖʋ Mowaabʋ fɛyɛ nɛ sɔɔndʋ sɔsɔtʋ kpa-kʋ.
Iwii nɛ ɩma kubusi.
Isusi Arɩnɔɔnɩ+ taa se paɖɩzɩ Mowaabʋ.
21 «Tɔm hʋʋ talɩ tɛtʋ ndʋ tɩwɛ layɩɩ yɔ* tɩ-yɔɔ,+ Holɔɔnɩ, Yahaz+ nɛ Mefaat+ pɔ-yɔɔ;
22 Dibɔɔnɩ,+ Nebo+ nɛ Bɛtɩ-Dibɩlatayim pɔ-yɔɔ;
23 Kiriyatayim,+ Bɛtɩ-Gamuuli nɛ Bɛtɩ-Meyɔɔnɩ+ pɔ-yɔɔ;
24 Keriyɔɔtɩ+ nɛ Bozɩraa pɔ-yɔɔ nɛ Mowaabʋ ɛjaɖɛ taa tɛtʋ ndɩ ndɩ yɔɔ, ndʋ tɩwɛ poliŋ taa nɛ pɩ-cɔlɔ yɔ.
25 “Pɛsɛtɩ Mowaabʋ ɖoŋ* nɛ pɛpɛɖɩ;Pɛpɛlɩ ɛ-nɩŋgbɛɛŋa,” Yehowa yɔɔdʋʋna.
26 “Iyele nɛ sʋlʋm kʋ-ɩ,+ mbʋ pʋyɔɔ yɔ ɛkpazɩ ɛ-tɩ Yehowa yɔɔ.+
Mowaabʋ pilimiɣ ɛ-tɔtʋ taa,Nɛ ɛkɛ hoŋa pʋyʋ.
27 Ɛzɩ Izrayɛɛlɩ taakɛ-ŋ hoŋa pʋyʋ?+
Ɛzɩ pana-ɩ mɩlaa hɛkʋ taa,Nɛ pʋyɔɔ lɛ, pɩwɛɛ se ŋseɣ-i ñʋʋ nɛ ŋyɔɔdɩ ɛ-yɔɔ tɔm kɩdɛkɛdɩtʋ na?
28 Ɩkʋyɩ tɛtʋ ndɩ ndɩ taa nɛ iwolo ɩcaɣ kaaʋ yɔɔ, Mowaabʋ mba mɩ,Nɛ ɩpɩsɩ ɛzɩ ehooye nɖɩ ɖɩɖʋʋ ɖandʋ kajalaŋa hʋyɩŋ taa yɔ.”»
29 «Ðɩnɩ Mowaabʋ agʋnda tɔm—ɛwɛnɩ tɩ kpazʋʋ pɩdɩɩfɛyɩ—Ɛ-cajayɛ, ɛ-agʋnda, ɛ-tɩ kpazʋʋ, nɛ ɛ-laŋɩyɛ tɛ tɩ kpazʋʋ.»+
30 «“Mansɩm ɛ-pana,Ɛlɛ ɛ-falaa tɔm ɛɛkaɣ nabʋyʋ wazʋʋ.
Paakaɣ nabʋyʋ labʋ,” Yehowa yɔɔdʋʋna.
31 “Pʋyɔɔ mankaɣ wiu Mowaabʋ yɔɔ,Mankaɣ mabʋ kubusi Mowaabʋ kpeekpe yɔɔNɛ momuzi Kiir-Herɛsɩ+ mba yɔɔ.
32 Ɛzɩma mewi Yazɛɛrɩ+ yɔɔ yɔ,Mankaɣ wiu ñɔ-yɔɔ nɛ pɩcɛzɩ mbʋ, Oo Sibima+ tɛ viiñi.
Ñe-pilinzi nzɩ siɖiɣni yɛzʋʋ yɔ sɩtɛzɩ teŋgu.
Sɩtalɩ teŋgu, sɩtalɩ Yazɛɛrɩ.
Ðɩzɩyʋ tibiÑo-soŋaɣ alɩwaatʋ taa tɩŋ pee yɔɔ nɛ viiñi pee wena ŋkoyaa yɔ a-yɔɔ.+
33 Amɛya nɛ laŋhʋlʋmɩyɛ patɩtasɩ wɛʋ tɩŋ pee hayɩm taaNɛ Mowaabʋ ɛjaɖɛ taa.+
Malaba nɛ vɛɛ ɛɛtasɩɣ lɩnʋʋ viiñi ɖɩfɛyɩyɛ taa nɛ pikpeŋ.
Nɔɔyʋ ɛɛkaɣ tasʋʋ fɛyʋʋ viiñi pee nɛ taa leleŋ kubusi.
Pakaɣ mabʋ kubusi, ɛlɛ pɩɩkaɣ kɛʋ taa leleŋ kubusi.”»+
34 «“Kubuka nakɛyɛ lɩnɩ Hɛsɩbɔɔnɩ+ nɛ katalɩ ɖooo Eleyale.+
Pamabɩ kubusi ɖoŋ nɛ pɩtalɩ ɖooo Yahaz,+Kpaɣnɩ Zowaarɩ nɛ piwolo Horonayim+ nɛ pɩtalɩ Eglat-Selisiya.
Halɩ Nimirim lɩm kaɣ sɔʋ.+
35 Mankaɣ ɖɩzʋʋ Mowaabʋ taaWeyi ɛkɔŋnɩ haɖɛ lone kʋkʋyɩyɛ yɔɔNɛ weyi ɛlaɣ ɛ-ɛsɔ kɩlaŋ yɔ,” Yehowa yɔɔdʋʋna.
36 “Pʋyɔɔ ma-laŋɩyɛ kaɣ wiu* Mowaabʋ yɔɔ ɛzɩ hɩlaɣ* yɔ,+Nɛ ma-laŋɩyɛ kaɣ wiu* Kiir-Herɛsɩ mba yɔɔ ɛzɩ hɩlaɣ* yɔ.
Mbʋ pʋyɔɔ yɔ ñɩm mbʋ ehiɣaa yɔ pɩkaɣ ɖɩm.
37 Mbʋ pʋyɔɔ yɔ pahʋm paa ñʋʋ ŋgʋ lɛ koloŋgolo,+Nɛ pɛsɛtɩ paa tandaʋ ŋgʋ.
Pɛhɛdɩ paa nesi nzɩ sɩ-yɔɔ,+Nɛ fɔlɔtɔ wɛ pa-tɩnzɩ taa!”»+
38 «“Mowaabʋ kuduyuŋ kpeekpe ñʋŋ taaNɛ kɩ-samaɣ kadasɩ tɩŋa taa,Nabʋyʋ fɛyɩ nɛ pɩtasɩnɩ wiluu.
Mbʋ pʋyɔɔ yɔ mɔyɔkɩ MowaabʋƐzɩ pɛʋ ŋgʋ pɔlɔ-kʋ yɔ,” Yehowa yɔɔdʋʋna.
39 “Ɩna ɛzɩma sɔɔndʋ kpa-kʋ pɩdɩɩfɛyɩ yɔ! Iwii!
Ɩna ɛzɩma fɛyɛ kpa Mowaabʋ nɛ kɩha siɣye yɔ!
Mowaabʋ pɩsɩ hoŋa pʋyʋ,Kɩpɩsɩ mbʋ pɩkpaɣ sɔɔndʋ mba payɩ pɔcɔ-kʋ nɛ pata yɔ.”»
40 «Mbʋ pʋyɔɔ yɔ tɔm tʋnɛ Yehowa yɔɔdʋʋ:
“Ɩna! Ɛzɩ kpeluu* tikuu fɩɩɩ yɔ,+Ɛkaɣ posuu e-keŋ Mowaabʋ yɔɔ.+
41 Pakaɣ mʋʋ tɛtʋ ndɩ ndɩ,Nɛ pakaɣ mʋʋ ki-lona ɖoŋ ñɩna.
Kɩyakʋ ŋgʋ ki-wiye lɛ, Mowaabʋ sɔdɩŋ laŋɩyɛKaɣ wɛʋ ɛzɩ halʋ weyi ɛcaɣ lʋlʋʋ yɔ ɛ-laŋɩyɛ yɔ.”»
42 «“Nɛ pakaɣ ɖɩzʋʋ Mowaabʋ nɛ ɛɛtasɩɣ kɛʋ samaɣ,+Mbʋ pʋyɔɔ yɔ Yehowa yɔɔ ɛkpazɩ ɛ-tɩ.+
43 Sɔɔndʋ sɔsɔtʋ nɛ pɔʋ nɛ kpaca pɛwɛ ñɛ-ɛsɩndaa,Oo Mowaabʋ tʋ,” Yehowa yɔɔdʋʋna.
44 “Weyi eseɣ sɔɔndʋ sɔsɔtʋ yɔ, ɛkaɣ tɔlʋʋ pɔʋ taa,Nɛ weyi ɛlɩɣnɩ pɔʋ taa yɔ, kpaca kaɣ-ɩ kpaʋ.”
“Mbʋ pʋyɔɔ yɔ mankaɣ kɔnʋʋ Mowaabʋ yɔɔ pa-nɩŋgbaaŋ hɔm pɩnaɣ,” Yehowa yɔɔdʋʋna.
45 “Mba peɖiɣni seu yɔ pasɩŋ Hɛsɩbɔɔnɩ kuzotuu taa, pɛfɛyɩnɩ ɖoŋ.
Mbʋ pʋyɔɔ yɔ miŋ kaɣ lɩnʋʋ Hɛsɩbɔɔnɩ taaNɛ miŋ nzʋlʋmɩyɛ ñalɩɩnɩ Sihɔɔnɩ+ hɛkʋ taa.
Ɩkaɣ ñaɣʋ Mowaabʋ kiɖeNɛ puuyaɣ pɩyalaa ñʋmbɔɔyaɣ.”+
46 “Pɩtɔɔ-ŋ, Oo Mowaabʋ!
Kemɔɔsɩ+ mba ɖɩma.
Mbʋ pʋyɔɔ yɔ pɛɖɛnɩ ña-pɩyalaa yomiye taa,Nɛ pɛkɛzɩ ñɛ-pɛlaa tɛtʋ.+
47 Ɛlɛ mankaɣ kpeɣluu Mowaabʋ yomaa kɩyakɩŋ ɖɩdɛnɖɛ alɩwaatʋ taa,” Yehowa yɔɔdʋʋna.
“Mowaabʋ yɔɔ tɔm hʋʋ tɔm tɩnaɣ yɔ.”»+
Pɩ-tɛɛ tɔm
^ Yaa «lone kʋkʋyɩyɛ.»
^ Yaa «mɩ-kalɩzasɩ.»
^ Yaa «Kɛdɛɛŋa.»
^ Yaa «piyaɣ ŋga ka-ñʋʋ taa wɛ landamm yɔ.»
^ Pɩpɩzɩɣ pɩkɛ, «Nɛ ŋcaɣ wɩlɩŋ tɛtʋ yɔɔ.»
^ Yaa «piyaɣ ŋga ka-ñʋʋ taa wɛ landamm yɔ.»
^ Piye piye, «hɩlʋʋ.»
^ Pʋ-tɔbʋʋ se hɩlaɣ ŋga pahʋlʋʋ ɖenɖe ɛyaa caɣ kʋñɔwiye ɛyʋ nɔɔyʋ sɩm yɔɔ yɔ.
^ Yaa «kaɣ labʋ kɔkɔɖɛ.»
^ Yaa «kaɣ labʋ kɔkɔɖɛ.»
^ Pʋ-tɔbʋʋ se hɩlaɣ ŋga pahʋlʋʋ ɖenɖe ɛyaa caɣ kʋñɔwiye ɛyʋ nɔɔyʋ sɩm yɔɔ yɔ.
^ Yaa «keziye.»
