Yereemii 49:1-39
49 Amooni mba+ yɔɔ lɛ, tɔm tʋnɛ Yehowa yɔɔdʋʋ:
«Ɛzɩ Izrayɛɛlɩ fɛyɩnɩ abalɩbiya na?
Ɛzɩ ɛfɛyɩnɩ weyi ɛkaɣ mʋʋ ɛ-ñɩm nɛ pɩpɩsɩ ɛ-pʋyʋ yɔ?
Ɛbɛ yɔɔ Malɩkam+ mʋ Gaadɩ nɛ kɩpɩsɩ ɛ-pʋyʋ?+
Nɛ ɛbɛ yɔɔ ɛ-samaɣ wɛ Izrayɛɛlɩ tɛtʋ ndɩ ndɩ taa?»
2 «“Pʋyɔɔ lɛ ɩna! Kɩyakɩŋ ɖiɣni kɔm,“Nɛ alɩwaatʋ ndʋ lɛ, mankaɣ yebu nɛ pama you kubuka* Amooni mba+ tɛ Raba+ yɔɔ,” Yehowa yɔɔdʋʋna.
Kɩkaɣ pɩsʋʋ piyaɣ ŋga kɔ-yɔɔ wɛ kpɛɖɛ yɔ,Nɛ pakaɣ ñaɣzʋʋ miŋ kɩ-tɛtʋ cikpetu ndɩ ndɩ.”*
“Nɛ Izrayɛɛlɩ kaɣ ɖaɣnʋʋ mʋʋ tɛtʋ ndʋ paamʋ ɛ-cɔlɔ yɔ nɛ tɩpɩsɩ ɛ-pʋyʋ,”+ Yehowa yɔɔdʋʋna.
3 “Wii, Oo Hɛsɩbɔɔnɩ, mbʋ pʋyɔɔ yɔ paɖɩzɩ Ayi!
Ɩma kubusi, Oo Raba tɛtʋ cikpetu ndɩ ndɩ.
Isuu fɔlɔtɔnaa.
Iwii nɛ iyoti pɛɛ kalakɩŋ* hɛkɩŋ taa,
Mbʋ pʋyɔɔ yɔ pakaɣ kɛzʋʋ Malɩkam tɛtʋ,Pɩkpɛndɩnɩ ɛ-cɔjɔnaa nɛ ɛ-awumbiya.+
4 Ɛbɛ yɔɔ ŋkʋndʋʋnɩ fɛɛŋ,*Ñɛ-kɛdɛɛŋa ŋga ka-taa lɩm kpeŋ yɔ, Oo ña pɛlɛ weyi ɛfɛyɩ siɣsiɣ yɔ,Weyi ɛtaɣ liu ɛ-ñɩm yɔNɛ weyi ɛyɔɔdʋʋ se: ‘Akaɣ kɔm ma-wayɩ?’ yɔ.”»
5 «“Na, menɖiɣni kɔnʋʋ sɔɔndʋ pʋyʋ ñɔ-yɔɔ,Pɩkaɣ lɩnʋʋ mba payɩ pɔcɔ-mɩ nɛ pata yɔ pɔ-cɔlɔ.
Pakaɣ-mɩ mɩzʋʋ hɔɔlɩŋ tɩŋa taa,Nɛ nɔɔyʋ ɛɛkaɣ kpeɣluu mba peseɣ yɔ,” Kɩbaɣlʋ Kɩlɩm, yoyaa tɛ Yehowa yɔɔdʋʋna.»
6 «“Ɛlɛ pʋwayɩ lɛ, mankaɣ kpeɣluu Amooni ñɩma mba pɛwɛ yomiye taa yɔ,” Yehowa yɔɔdʋʋna.»
7 Edom yɔɔ lɛ, tɔm tʋnɛ yoyaa tɛ Yehowa yɔɔdʋʋ:
«Ɛzɩ lɔŋsɩnɖɛ naɖɩyɛ tɩtasɩ wɛʋ Temaanɩ taa?+
Ɛzɩ lɔŋ tasʋʋ kɩbam tɛm mba pɛwɛnɩ tɔm taa nɩʋ lɛɣtʋ yɔ pɔ-cɔlɔ?
Ɛzɩ pɔ-lɔŋsɩnɖɛ ɖazaa?
8 Ise, ɩpɩsɩ!
Iwolo nɛ ɩcaɣ lona wena awɛ cukaŋ yɔ a-taa, Oo Dedaanɩ+ mba!
Mbʋ pʋyɔɔ yɔ mankaɣ asɛyʋʋ kɔnʋʋ Ezaawuu yɔɔAlɩwaatʋ talɩɣ se mɛnkɛzɩ ma-lɩmaɣza nɛ ɛ-yɔɔ lɛ.
9 Ye viiñi pee koyiyaa ɩkɔm ñɛ-tɛ,Paakazɩɣ viiñi pee naayɛ nɛ pa-wayɩ se pacazɩ yaa we?
Ye mɩlaa ɩkɔm ɖoo taa yɔ,Pakaɣ kɔnʋʋ asɛyʋʋ ɛzɩ pɔsɔɔlʋʋ yɔ.+
10 Ɛlɛ mankaɣ hɔzʋʋ Ezaawuu wondu nɛ piyebi-i ndaakpeɖe.
Mankaɣ kuluu lona wena a-taa ɛmɛlɩɣ yɔ a-yɔɔ,Se pɩsa nɛ ɛtaapɩzɩ nɛ ɛmɛlɩ.
Pakaɣ ɖɩzʋʋ e-piya nɛ e-koobiya nɛ ɛ-cɔlɔ mba tɩŋa,+Nɛ ɛɛkaɣ tasʋʋ wɛʋ.+
11 Yele ñe-piya nzɩ sɩfɛyɩnɩ caanaa yɔ,Nɛ mankaɣ yebu nɛ sɩwɛɛ wezuu,Nɛ ñe-lelaa kaɣ-m taʋ liu.»
12 Mbʋ pʋyɔɔ yɔ tɔm tʋnɛ Yehowa yɔɔdʋʋ: «Na! Ye mba patɩkʋ pɔ-tɔm se pɔñɔɔ kɔpʋ yɔ, pɩpɔzʋʋ se pɔñɔɔ-kʋ yɔ, ŋmaɣzɩɣ se pakaɣ-ŋ yebu nɛ paahɔŋ ña-nɩŋgbaŋʋʋ paa ññɩɩ yaa we? Paakaɣ-ŋ yebu nɛ patɩhɔ ña-nɩŋgbaŋʋʋ, mbʋ pʋyɔɔ yɔ pɩwɛɛ se ŋñɔɔ-kʋ.»+
13 «Mbʋ pʋyɔɔ yɔ monɖuuni ma-maɣmaɣ man-tɩ, se Bozɩraa kaɣ pɩsʋʋ sɔɔndʋ pʋyʋ,+ fɛyɛ pʋyʋ, tɛtʋ ndʋ pɔyɔkɩ-tʋ yɔ, nɛ nɔɔ kɩdɛkɛdaɣ lɔʋ; nɛ kɩ-tɛtʋ ndɩ ndɩ tɩŋa kaɣ pɩsʋʋ tamtam njaa,+ Yehowa yɔɔdʋʋna.»
14 Manɩ tɔm natʋyʋ, tɩlɩnɩ Yehowa cɔlɔ,Petiyi nɔɔyʋ ajɛɛ taa se ɛyɔɔdɩ se:
«Ikpeɣli ɖama nɛ ɩkɔɔ kɩ-wayɩ;Ɩñɔɔzɩ mɩ-tɩ nɛ ɩla you.»+
15 «Mbʋ pʋyɔɔ yɔ, na! Malaba nɛ ŋpɩsɩ mbʋ pɩtɩlɩɩ pʋyʋ yɔ ajɛɛ taa,Weyi penimi-i ɛyaa taa yɔ.+
16 Ɛzɩma ŋyeba nɛ ɛyaa seliɣ yɔ,Nɛ tɩ kpazʋʋ mbʋ pɩwɛ ña-laŋɩyɛ taa yɔ, pipeɣzi-ŋ,Oo ña weyi ŋcaɣ kaaŋ sɔsɔŋ pɔŋ taa yɔ,Nɛ ŋwɛɛ piyaɣ ŋga kakpaɖɩ kʋyʋʋ yɔ kɔ-yɔɔ yɔ.
Paa ŋɖʋ ña-ɖandʋ ɖooo hayo ɛzɩ kpeluu yɔ,Mankaɣ-ŋ tisuu nɛ peeɖe,» Yehowa yɔɔdʋʋna.
17 «Nɛ pɩwɛɛ se Edom ɛpɩsɩ sɔɔndʋ pʋyʋ.+ Paa weyi ɛtɩŋnɩ kɩ-cɔlɔ yɔ, ɛkaɣ cɔnʋʋ nɛ sɔɔndʋ kpa-ɩ nɛ ɛhʋlɩ kancʋʋlaɣ kɩ-asɛyɩŋ kpeekpe yɔɔ.
18 Ɛzɩ paayɔkʋʋ Sodom nɛ Gomɔɔrɩ nɛ pɔ-cɔlɔ tɛtʋ ndɩ ndɩ yɔ, mbʋ ɖɔɖɔ pɩkaɣ labʋ,»+ Yehowa yɔɔdʋʋna, «nɔɔyʋ ɛɛkaɣ wɛʋ peeɖe, nɛ nɔɔyʋ ɛɛkaɣ caɣʋ peeɖe.+
19 «Ɩna! Nɔɔyʋ kaɣ kpaʋ lona wena a-taa kpɩna tɔkɩ ñɩtʋ nɛ kaɖɛ naɖɩyɛ fɛyɩ a-taa yɔ a-wayɩ, pɩkaɣ wɛʋ ɛzɩ ɛzɩma mʋʋzʋʋ+ lɩɣnɩ hɔɖɩŋ sɔsɔŋ weyi ɩwɛ Yɔɔrdaŋ nɔɔ kpɛɛɛ yɔ ɩ-tɛɛ yɔ; ɛlɛ tuda lɛ, mankaɣ labʋ nɛ pese nɛ peyele pɛ-ɛjaɖɛ. Nɛ mankaɣ yebu nɛ weyi malɩzaa yɔ ɛkɛ ɖi-wiyaʋ. Mbʋ pʋyɔɔ yɔ, awɛ ɛzɩ ma yɔ? Nɛ akaɣ-m kaɖɩnʋʋ? Ninɖiɣyu weyi pɩzɩɣ nɛ ɛsɩŋ mɛ-ɛsɩndaa?+
20 Pʋyɔɔ lɛ, Oo ɛyaa mɩ, ɩnɩɩ lɩmaɣza wena* Yehowa kpaɣ Edom yɔɔ yɔ, nɛ lɩmaɣza wena ɛwɛnɩ Temaanɩ+ mba yɔɔ yɔ:
Pɩtʋʋ fɛyɩ se pakaɣ tuu ewiɖe taa kpɩna cikpena nɛ pɛɖɛna.
Pɔ-yɔɔ lɛ, ɛkaɣ yebu nɛ a-ɖɩjaɣyɛ pɩsɩ njɛyɛ.+
21 Pɔ-tɔlʋʋ tiluu yɔɔ lɛ, tɛtʋ ñamsaa.
Pamabɩ kubuka nakɛyɛ!
Panɩ pɩ-taŋ nɛ pɩtalɩ ɖooo Teŋgu Kɩsɛɛmʋʋ.+
22 Ɩna! Ɛzɩ kpeluu yɔ ɛkaɣ kpaʋ nɛ etii fɩɩɩ,+Nɛ ɛkaɣ posuu e-keŋ Bozɩraa yɔɔ.+
Kɩyakʋ ŋgʋ ki-wiye lɛ, Edom sɔdɩŋ laŋɩyɛKaɣ wɛʋ ɛzɩ halʋ weyi ɛcaɣ lʋlʋʋ yɔ ɛ-laŋɩyɛ yɔ.»
23 Damaasɩ+ yɔɔ tɔm:
«Fɛyɛ kpa Hamatɩ+ nɛ Arpaadɩ,Mbʋ pʋyɔɔ yɔ panɩ tɔm kɩdɛkɛdɩtʋ.
Sɔɔndʋ yeba nɛ pitibi-wɛ yɔɔɔ.
Kɔkɔɖɛ* wɛ teŋgu ŋgʋ kɩɩpɩzɩɣ nɛ kɩcaɣ ɖiɣ ɖiɣ yɔ kɩ-taa.
24 Damaasɩ lesi kɩ-abalɩtʋ.
Kɩha siɣye se kise, ɛlɛ sɔɔndʋ sɔsɔtʋ kpa-kʋ.
Siziŋ nɩʋ nɛ wɩzasɩ kɔm kɩ-yɔɔ,Ɛzɩ halʋ weyi eɖiɣni lʋlʋʋ yɔ.
25 Pɩlabɩ ɛzɩma nɛ patɩɖɛɛ nɛ peyele samtʋ tɛtʋ,Amɛya tɛtʋ?
26 Mbʋ pʋyɔɔ yɔ ki-evebiya kaɣ tɔlʋʋ kɩ-samaɣ kadasɩ taa,Nɛ sɔɔjanaa tɩŋa kaɣ sɩbʋ kɩyakʋ ŋgʋ ki-wiye,» yoyaa tɛ Yehowa yɔɔdʋʋna.
27 «Mankaɣ sɔbʋ Damaasɩ koloŋa miŋ,Nɛ ɩkaɣ ñaɣʋ Bɛɛnɩ-Hadaadɩ tilima ɖoŋ ñɩna.»+
28 Kedaarɩ+ nɛ Hazɔɔrɩ kewiyisi, nzɩ Babilɔɔnɩ wiyaʋ Nabukodonozɔɔrɩ* wabɩ-sɩ yɔ, tɔm tʋnɛ Yehowa yɔɔdʋʋ sɩ-yɔɔ:
«Ɩkʋyɩ, ɩkpa Kedaarɩ,Nɛ ɩɖɩzɩ Wɩsɩ Ðɩlɩyɛ pɩyalaa.
29 Pakaɣ kpaɣʋ pe-kizinzikiŋ nɛ pa-kpɩna,Pe-kizinzikiŋ pɩsaŋ nɛ pa-ñɩm kpeekpe.
Pakaɣ kpaɣʋ pa-aɖaaɖaanaa nɛ pɛɖɛna,Nɛ pakaɣ mabʋ kubusi nɛ peheyi-wɛ se: “Sɔɔndʋ wɛ paa le!”»
30 «Ise, ɩɖɛɛ ɖooo poliŋ!
Iwolo nɛ ɩcaɣ lona wena awɛ cukaŋ yɔ a-taa, Oo Hazɔɔrɩ mba,Mbʋ pʋyɔɔ yɔ Babilɔɔnɩ wiyaʋ Nabukodonozɔɔrɩ* labɩ you lɛɣtʋ natʋyʋ se ɛkɔɔ mɩ-wayɩ,Nɛ ɛlabɩ ɖʋtʋ natʋyʋ se eyooni-mɩ,» Yehowa yɔɔdʋʋna.
31 «Ɩkʋyɩ, ɩkpa ɛjaɖɛ nɖɩ ɖɩwɛ laŋhɛzɩyɛ taa yɔ ɖɩ-wayɩ,Nɖɩ ɖɩwɛ pɛɛyɛ taa yɔ!» Yehowa yɔɔdʋʋna.
«Ðɩfɛyɩnɩ pɔɔyɩŋ yaa ñɩɣtʋ ndʋ paɖɩkɩnɩ nɔnɔsɩ yɔ; pacaɣ pe-ɖeke kɩjaʋ yɔɔ.
32 Pa-aɖaaɖaanaa kaɣ pɩsʋʋ mbʋ palazaa yɔ,Nɛ pa-kpɩna sakɩyɛ pɩsɩ mbʋ pamʋ you taa yɔ.
Mba pahʋŋ pa-nakpaaŋ yɔɔ ñɔsɩ yɔ,+Mankaɣ-wɛ mɩzʋʋ paa helim mbʋ lɛ pɩ-nɔɔ taa,*Nɛ mankaɣ pɔ-yɔɔ kɔnʋʋ asɛyʋʋ nɛ hɔɔlɩŋ tɩŋa taa,» Yehowa yɔɔdʋʋna.
33 «Nɛ Hazɔɔrɩ kaɣ pɩsʋʋ tɛyɛ hasɩ ɖɩjaɣyɛ,Tamtam njɛyɛ.
Nɔɔyʋ ɛɛkaɣ wɛʋ peeɖe,Nɛ ɛyʋ nɔɔyʋ ɛɛkaɣ caɣʋ kɩ-taa.»
34 Elam+ yɔɔ tɔm ndʋ tɩlɩnɩ Yehowa cɔlɔ nɛ tɩtalɩ nayʋ Yereemii, Yuuda wiyaʋ Zedekiya+ kewiyitu tɔɔʋ ɖɩbazɩyɛ taa yɔ, ndʋ yɔ:
35 «Tɔm tʋnɛ yoyaa tɛ Yehowa yɔɔdʋʋ: “Ɩna, menɖiɣni pɛlʋʋ Elam+ tɔʋ, ɖenɖe po-ɖoŋ lɩɣna yɔ.*
36 Mankaɣ kɔnʋʋ Elam yɔɔ helim 4 mbʋ pɩlɩnɩ ɛsɔdaa kamasɩ 4 yɔɔ yɔ, nɛ mankaɣ-wɛ mɩzʋʋ helim mbʋ pɩtɩŋa pɩ-nɔsɩ taa. Ɛjaɖɛ naɖɩyɛ ɛɛkaɣ wɛʋ se Elam ñɩma mba pamɩzɩ-wɛ yɔ patiwolo ɖɩ-taa.”»
37 «Nɛ mankaɣ labʋ nɛ sɔɔndʋ kpa Elam mba po-koyindinaa ɛsɩndaa nɛ mba pañɩnɩɣ se palɩzɩ pe-wezuu yɔ* pɛ-ɛsɩndaa; nɛ mankaɣ kɔnʋʋ pɔ-yɔɔ asɛyʋʋ, man-pana sɔsɔna. Nɛ mankaɣ tiyuu laɣɖɛ pa-wayɩ pɩkɔɔ nɛ pɩsɩɩnɩ alɩwaatʋ ndʋ manɖɩzɩ-wɛ yɔ,» Yehowa yɔɔdʋʋna.
38 «Nɛ mankaɣ sɩʋ men-kewiyaɣ kpelaɣ Elam+ taa, nɛ mankaɣ ɖɩzʋʋ wiyaʋ nɛ awumbiya mba pɛwɛ peeɖe yɔ,» Yehowa yɔɔdʋʋna.
39 «Ɛlɛ kɩyakɩŋ ɖɩdɛnɖɛ alɩwaatʋ taa lɛ, mankaɣ kpeɣluu Elam ñɩma mba pɛwɛ yomiye taa yɔ,» Yehowa yɔɔdʋʋna.
Pɩ-tɛɛ tɔm
^ Pɩpɩzɩɣ pɩkɛ, «nɛ panɩɩ you kubuka taŋ.»
^ Yaa «kɩ-tɛtʋ cikpetu ndɩ ndɩ ndʋ tɩcɔ-kʋ nɛ tɩta yɔ.»
^ Yaa «heŋ kalakɩŋ.»
^ Yaa «kɛdɛɛnzɩ.»
^ Yaa «lɔŋ tasʋʋ mbʋ.»
^ Yaa «Nɩɣzɛ.»
^ Piye piye, «Nebukadɩrezaarɩ,» mbʋ pamaɣ ɛ-hɩɖɛ ɖɔɖɔ.
^ Piye piye, «Nebukadɩrezaarɩ,» mbʋ pamaɣ ɛ-hɩɖɛ ɖɔɖɔ.
^ Piye piye, «paa hɔɔlʋʋ ŋgʋ lɛ kɩ-taa.»
^ Piye piye, «po-ɖoŋ ɖɩbazɩyɛ.»
^ Yaa «mba pañɩnɩɣ pa-kalɩzaɣ yɔ.»
