Yereemii 50:1-46
50 Tɔm ndʋ Yehowa tɩŋnɩ nayʋ Yereemii yɔɔ nɛ ɛyɔɔdɩ Babilɔɔnɩ yɔɔ,+ Kalɩdee mba ɛjaɖɛ yɔɔ yɔ, ndʋ yɔ:
2 «Ɩyɔɔdɩ-tʋ ajɛɛ taa, nɛ isusi-tʋ.
Ɩkpazɩ yʋsaɣ* nɛ isusi-tʋ.
Ɩtaamɛsɩ natʋyʋ!
Ɩyɔɔdɩ se: “Pamʋ Babilɔɔnɩ.+
Paɖʋ Bɛɛlɩ fɛyɛ.+
Sɔɔndʋ sɔsɔtʋ kpa Merodaakɩ.
Paɖʋ kɩ-sɩʋ kpelisi fɛyɛ.
Sɔɔndʋ sɔsɔtʋ kpa kɩ-sɩʋ kpelisi nzɩ sɩwɛ kiniŋ yɔ.”*
3 Mbʋ pʋyɔɔ yɔ ɛjaɖɛ naɖɩyɛ lɩnɩ hayo kiŋ nɛ ɖɩkɔɔ kɩ-wayɩ.+
Ðiyeba nɛ kɩ-ɛjaɖɛ pɩsɩ sɔɔndʋ pʋyʋ;Nɔɔyʋ fɛyɩ kɩ-taa.
Ɛyʋ nɛ kpɩnɛ pesewa.
Pɛɖɛwa.»
4 «Kɩyakɩŋ ɛnɩ ɩ-taa nɛ alɩwaatʋ ndʋ tɩ-taa lɛ, Izrayɛɛlɩ mba nɛ Yuuda mba pakaɣ kpɛndʋʋ nɛ pɔkɔɔ.+ Pakaɣ ɖɔm nɛ wiluu,+ nɛ pakaɣ kpɛndʋʋ nɛ pañɩnɩ pɛ-Ɛsɔ Yehowa,+ Yehowa yɔɔdʋʋna.
5 Pakaɣ pɔzʋʋ Siyɔŋ nʋmɔʋ yɔɔ, nɛ papa ɛsa nɛ hɔɔlʋʋ ŋgʋ kɩ-taa+ nɛ pɔyɔɔdʋʋ se: “Ɩkɔɔ nɛ ɖa nɛ Yehowa ɖɩɖʋ tamtam ɛgbɛyɛ nɖɩ ɖɩ-yɔɔ paakaɣ sɔʋ yɔ.”+
6 Man-samaɣ pɩsɩ heŋ weyi ileba yɔ i-ewiɖe.+ Ɩ-maɣmaɣ i-ninɖiɣyaa yebina nɛ ile.+ Powoni-i pʋŋ yɔɔ, nɛ ɩwɛɛ nɛ iyotuu pʋŋ nɛ piyisi yɔɔ. Ɩsɔ ɩ-ɖɩhɛzɩyɛ lone yɔɔ.
7 Mba payɩ palɩ ɩ-yɔɔ yɔ pɔtɔɔ-ɩ,+ nɛ i-koyindinaa yɔɔdaa se: “Ðɩtɩɖɔɔ wɛɛ naayɛ, mbʋ pʋyɔɔ yɔ, payʋsɩnɩ Yehowa; payʋsɩnɩ siɣsiɣ wɛtʋ ɖɩjaɣyɛ nɛ pɔ-cɔzɔnaa lidaʋ, Yehowa.”»
8 «Ɩlɩɩ Babilɔɔnɩ taa nɛ ise,Ɩlɩɩ Kalɩdee mba ɛjaɖɛ taa,+Nɛ ɩwɛɛ ɛzɩ ewiɖe taa kpɩna wena aɖɛɣ nɔɔ yɔ.
9 Mbʋ pʋyɔɔ yɔ, ɩna, menɖiɣni kʋsʋʋ ajɛɛ sɔsɔna tindimiye naɖɩyɛ nɛ hayo kiŋ hɔɔlʋʋ taaSe ɖiwolo Babilɔɔnɩ wayɩ.+
Ðɩkaɣ ñɔɔzʋʋ ɖɩ-tɩ nɛ ɖiwolo kɩ-wayɩ se ɖiyooni-kʋ;Ðɩkaɣ-kʋ wabʋ nɛ ɖɩmʋ-kʋ nɛ hɔɔlʋʋ ŋgʋ kɩ-yɔɔ.
Ðɩ-tɔʋ ñɩma wɛ ɛzɩ you laɖʋ tɔʋ ñɩmaWena ayeki se lʋlɩyaa ɩtaatasɩ wɛnʋʋ piya yɔ;+Aapɩsɩɣ kpɛɖɛ.
10 Kalɩdee kaɣ pɩsʋʋ mbʋ palazaa yɔ.+
Mba payɩ palazɩɣ kɩ-taa wondu yɔ pakaɣ ñɩɣzʋʋ siŋŋ,»+ Yehowa yɔɔdʋʋna.
11 «Mbʋ pʋyɔɔ yɔ ɩwɛ laŋhʋlʋmɩyɛ taa,+ ɩwɛ amɛya taaAlɩwaatʋ ndʋ ɩwɛɛ nɛ ɩmɩlɩɣ ma-maɣmaɣ ma-ñɩm yɔ.+
Mbʋ pʋyɔɔ yɔ, ɩwɛɛ nɛ ɩmakɩ mɩ-nɩŋgbanzɩ nɛ tɛtʋ ɛzɩ nɔ halɩñɩnʋ* weyi ɛwɛ ñɩtʋ taa yɔ,Nɛ ɩwɛɛ nɛ iwiɣ ɛzɩ kpaŋnaŋ abalɩñɩŋ yɔ.
12 Paɖʋ mi-ɖoo fɛyɛ.+
Ɛnʋ weyi ɛlʋlɩ-mɩ yɔ pitibi-i yɔɔɔ.
Ɩna! Ɛkɛ ajɛɛ taa weyi pɩtɔyɩnɩ-ɩ yɔ,Kañɩmbusuu ŋgʋ kɩ-taa lɩm fɛyɩ yɔ nɛ lone nɖɩ ɖɩwɛ kpɛɖɛ yɔ.+
13 Yehowa pana yɔɔ lɛ, ɛyaa ɩɩkaɣ wɛʋ Babilɔɔnɩ taa;+Kɩkaɣ pɩsʋʋ njɛyɛ kpem.+
Weyi ɛtɩŋɩɣnɩ Babilɔɔnɩ cɔlɔ yɔ, ɛkaɣ cɔnʋʋ nɛ sɔɔndʋ kpa-ɩNɛ ɛhʋlɩ kancʋʋlaɣ kɩ-asɛyɩŋ kpeekpe yɔɔ.+
14 Ɩñɔɔzɩ mɩ-tɩ nɛ ɩkɔɔ Babilɔɔnɩ wayɩ nɛ iyooni-kʋ hɔɔlɩŋ tɩŋa taa,
Mɩ mba payɩ ikotuu* tɔʋ yɔ.
Ɩyaɣ-kʋ, ɩtaakazɩ ñɩmɩyɛ naɖɩyɛ,+Mbʋ pʋyɔɔ yɔ Yehowa kɩlabɩ kɩwɛɛkɩm.+
15 Ɩma kɩ-yɔɔ you kubuka hɔɔlɩŋ tɩŋa taa.
Kɩcɛlɩ kɩ-tɩ.*
Ki-tilima tɔlaa, potuzi ki-kolonzi nɛ pɛpɛɖɩ,+Mbʋ pʋyɔɔ yɔ Yehowa kpaɣnɩ kɩmɩyɛ.+
Ɩkpa-kʋ kɩmɩyɛ.
Ɩlabɩ-kʋ ɛzɩ kɩlabʋ yɔ.+
16 Ɩɖɩzɩ ɖomaɣ ɖuyu Babilɔɔnɩ taaNɛ weyi ɛlakɩnɩ tʋmɩyɛ loozo kʋmtʋ alɩwaatʋ taa yɔ.+
Laɣɖɛ nɖɩ ɖɩwɛ kañatʋ yɔ ɖɩ-yɔɔ lɛ, paa weyi ɛkaɣ pɩsʋʋ ɛ-maɣmaɣ ɛ-samaɣ cɔlɔ,Paa weyi ɛkaɣ seu nɛ ewolo ɛ-maɣmaɣ ɛ-ɛjaɖɛ taa.+
17 «Izrayɛɛlɩ mba kɛ heŋ weyi ɩmɩzaa yɔ.+ Mʋʋzɩŋ mɩzɩ-ɩ.+ Kajalaɣ lɛ, Asiirii wiyaʋ tɔɔnɩ-ɩ;+ pʋwayɩ lɛ Babilɔɔnɩ wiyaʋ Nabukodonozɔɔrɩ* salɩ ɩ-mɔɔ.+
18 Pʋyɔɔ lɛ, tɔm tʋnɛ yoyaa tɛ Yehowa, Izrayɛɛlɩ tɛ Ɛsɔ yɔɔdʋʋ: “Ɩna, mankaɣ labʋ Babilɔɔnɩ wiyaʋ nɛ ɛ-ɛjaɖɛ ɛzɩ malabʋ Asiirii wiyaʋ yɔ.+
19 Nɛ mankaɣ pɩsɩnʋʋ Izrayɛɛlɩ ɛ-ñɩtʋ ɖɩdɔɔyɛ taa,+ nɛ ɛkaɣ tɔɔʋ ñɩtʋ Karmɛɛlɩ yɔɔ nɛ Basaanɩ+ yɔɔ, nɛ ɛkaɣ* tɔɔʋ Efrayim+ nɛ Galaadɩ+ pʋŋ yɔɔ nɛ ɛhaɣ.”»
20 «Kɩyakɩŋ ɛnɩ ɩ-taa nɛ alɩwaatʋ ndʋ tɩ-taa lɛ,Pakaɣ ñɩnʋʋ Izrayɛɛlɩ kɩwɛɛkɩm,Ɛlɛ paakaɣ naʋ nabʋyʋ,Nɛ paakaɣ naʋ Yuuda kɩwɛɛkɩm,Mbʋ pʋyɔɔ yɔ mankaɣ kpeɣu mba mankazɩ-wɛ yɔ,»+ Yehowa yɔɔdʋʋna.
21 «Kpa Meratayim ɛjaɖɛ wayɩ nɛ Pekod+ mba wayɩ.
Pʋʋtɩ-wɛ nɛ ŋɖɩzɩ-wɛ caɣ caɣ,La mbʋ payɩ manɖʋ-ŋ paɣtʋ se ŋla yɔ, Yehowa yɔɔdʋʋna.
22 Panɩɣ you taŋ ɛjaɖɛ taa,Asɛyʋʋ sɔsɔʋ.
23 Ɩna ɛzɩma pɛpɛlɩ tɛtʋ kpeekpe yɔɔ hama nɛ pɔyɔkɩ-kʋ yɔ!+
Ɩna ɛzɩma Babilɔɔnɩ pɩsɩ sɔɔndʋ pʋyʋ ajɛɛ taa yɔ!+
24 Oo Babilɔɔnɩ, mañɩbɩ-ŋ kpaca nɛ kɩkpa-ŋ,Nɛ ŋtaatɩlɩ.
Pehiɣ-ŋ nɛ pakpa-ŋ,+Mbʋ pʋyɔɔ yɔ Yehowa ŋkaɖɩnaa.
25 Yehowa kuli e-wondu ɖɩzɩyɛ yɔɔ,Nɛ ɛlɩzɩɣ ɛ-pana tɛ you wondu.+
Mbʋ pʋyɔɔ yɔ Kɩbaɣlʋ Kɩlɩm, yoyaa tɛ Yehowa wɛnɩ tʋmɩyɛ naɖɩyɛKalɩdee mba ɛjaɖɛ taa.
26 Ɩkʋyɩnɩ poliŋ lona taa nɛ ɩkɔɔ Babilɔɔnɩ wayɩ.+
Ikuli ki-kpoŋ yɔɔ.+
Ikpeɣli-kʋ ɛzɩ pekpeɣluu tɔɔnaɣ pee huwa yɔ.
Ɩɖɩzɩ-kʋ caɣ caɣ.+
Pɩtaakazɩ-kʋ nɔɔyʋ.
27 Ɩpʋʋtɩ kɩ-naŋ* abalɩñɩŋ kpeekpe;+Itini-i kpɩna ɖɩgʋyɛ taa.
Pɩtɔɔ-wɛ, mbʋ pʋyɔɔ yɔ pa-kɩyakʋ talaa,Pa-akɔnta pɔzʋʋ alɩwaatʋ talaa!
28 Panɩɣ mba peɖiɣni seu yɔ pa-taŋ,Mba palɩnɩ Babilɔɔnɩ ɛjaɖɛ taa nɛ peseɣ,Se posusi Siyɔŋ taa ɖɛ-Ɛsɔ Yehowa kɩmɩyɛ kpaʋ tɔm,E-templo kɩmɩyɛ kpaʋ tɔm yɔ.+
29 Ɩyaa tɔŋ tɔyaa nɛ pɔkɔɔ Babilɔɔnɩ wayɩ,Mba payɩ pokotuu* tɔʋ yɔ.+
Ɩcɔɔ-kʋ nɛ ɩta; itaayele nɛ nɔɔyʋ se.
Ɩhɛyɩ-kʋ ɛzɩ kɩ-lakasɩ pɔzʋʋ yɔ.+
Ɩlabɩ-kʋ ɛzɩ kɩlabʋ yɔ.+
Mbʋ pʋyɔɔ yɔ kɩkpazɩ kɩ-tɩ Yehowa yɔɔ.
Izrayɛɛlɩ tɛ Kiɖeɖeu yɔɔ.+
30 Pʋyɔɔ lɛ, ki-evebiya kaɣ tɔlʋʋ kɩ-samaɣ kadasɩ taa,+Nɛ kɩ-sɔɔjanaa tɩŋa kaɣ sɩbʋ* kɩyakʋ ŋgʋ ki-wiye,» Yehowa yɔɔdʋʋna.
31 «Na, mankʋyʋʋ ñɔ-yɔɔ,+ Oo ña weyi ŋkaɖɩɣnɩ-m yɔ,+Mbʋ pʋyɔɔ yɔ pɩtʋʋ fɛyɩ se ña-kɩyakʋ kaɣ kɔm, alɩwaatʋ ndʋ tɩ-taa mankaɣ-ŋ pɔzʋʋ akɔnta yɔ; Kɩbaɣlʋ Kɩlɩm, yoyaa tɛ Yehowa yɔɔdʋʋna.
32 Oo ña weyi ŋkaɖɩɣnɩ-m yɔ, pɩkaɣ-ŋ tuuluu nɛ ŋtɔlɩ,Nɛ nɔɔyʋ ɛɛkaɣ wɛʋ se ɛkʋsɩ-ŋ.+
Nɛ mankaɣ sɔbʋ ñɛ-tɛtʋ ndɩ ndɩ miŋ,Nɛ ɩkaɣ ñaɣʋ mbʋ payɩ pɩcɔ-ŋ nɛ pɩta yɔ.»
33 Tɔm tʋnɛ yoyaa tɛ Yehowa yɔɔdʋʋ:
«Panazɩ Izrayɛɛlɩ mba nɛ Yuuda mba,Nɛ mba payɩ pakpaɣ-wɛ nɛ pɛɖɛnɩ yomiye taa yɔ pɔɖɔkɩ-wɛ cɩŋ cɩŋ.+
Pekizaa se paayeki-wɛ nɛ pɛɖɛɛ.+
34 Ɛlɛ Weyi ɛɖaɣnɩ-wɛ yabʋ yɔ, ɛwɛ ɖoŋ.+
Payaɣ-ɩ se yoyaa tɛ Yehowa.+
Pɩtʋʋ fɛyɩ se ɛkaɣ hʋʋ pɔ-tɔm,+Pɩsa nɛ eyele nɛ hɛzɩyɛ wɛɛ ɛjaɖɛ taa+Nɛ ɛkɔnɩ ñam ñam lakasɩ Babilɔɔnɩ mba hɛkʋ taa.»+
35 «Laɣɖɛ kaɣ kɔm Kalɩdee mba wayɩ,Ðɩkaɣ kɔm Babilɔɔnɩ taa mba wayɩ, kɩ-awumbiya wayɩ, nɛ kɩ-lɔŋsɩnɖaa wayɩ,+ Yehowa yɔɔdʋʋna.
36 Laɣɖɛ kaɣ kɔm falaa tɔm yɔɔdɩyaa* wayɩ, nɛ pakaɣ labʋ kɩmɛlɛndʋ lakasɩ.
Laɣɖɛ kaɣ kɔm kɩ-sɔdɩŋ wayɩ, nɛ sɔɔndʋ sɔsɔtʋ kaɣ-wɛ kpaʋ.+
37 Laɣɖɛ kaɣ kɔm pa-kpaŋnaŋ nɛ po-you kɛɛkɛɛnaa wayɩ,Nɛ ɖɩkaɣ kɔm ajɛɛ ndɩ ndɩ taa ñɩma mba pesidi pɛ-hɛkʋ taa yɔ pa-wayɩ,Nɛ pakaɣ pɩsʋʋ ɛzɩ halaa yɔ.+
Laɣɖɛ kaɣ kɔm kɩ-ñɩm ɖɩzɩyɛ wayɩ, nɛ pakaɣ lazʋʋ pa-ñɩm.+
38 Asɛyʋʋ kaɣ talʋʋ kɩ-lɩm, nɛ pɩkaɣ sɔʋ.+
Mbʋ pʋyɔɔ yɔ pɩkɛ sɩʋ kpelisi ɛjaɖɛ,+Nɛ pa-natʋ ndʋ tɩcaɣ sɔɔndʋ yɔ tɩ-yɔɔ lɛ, pɛwɛɛ nɛ palakɩ ɛzɩ mba pasʋ kpaaŋ yɔ.
39 Pʋyɔɔ lɛ, kañɩmbusuu taa kpɩna nɛ kpɩna wena awiɣ ɖoŋ yɔ akaɣ wɛʋ peeɖe,Nɛ taataanaa kaɣ wɛʋ kɩ-taa.+
Nɔɔyʋ ɛɛkaɣ tasʋʋ wɛʋ kɩ-taa wiɖiyi,Nɛ kɩɩkaɣ kɛʋ ɖɔɖɔ lone nɖɩ ɖɩ-taa ɛyʋ cakɩ yɔ kpaɖɩŋ kpeekpe taa.»+
40 «Ɛzɩ Ɛsɔ kaayɔkʋʋ Sodom nɛ Gomɔɔrɩ+ nɛ pɔ-cɔlɔ tɛtʋ ndɩ ndɩ yɔ,+ mbʋ ɖɔɖɔ pɩkaɣ labʋ, nɔɔyʋ ɛɛkaɣ wɛʋ peeɖe, nɛ nɔɔyʋ ɛɛkaɣ caɣʋ peeɖe,+ Yehowa yɔɔdʋʋna.
41 Ɩna! Samaɣ nakɛyɛ lɩnɩ hayo kiŋ nɛ kɔkɔŋ;Ɛjaɖɛ sɔsɔɖɛ naɖɩyɛ nɛ awiya sɔsɔna+ pakaɣ kpaʋ ɖoŋNɛ palɩɩnɩ tɛtʋ hɔɔlɩŋ weyi ɩkɩlɩ posuu yɔ ɩ-taa nɛ pɔkɔɔ.+
42 Pɔɖɔkɩ tɔŋ nɛ kɩgbɛzɛmɩŋ.*+
Pɛwɛ kañatʋ nɛ paakaɣ naʋ pʋtɔdɩyɛ.+
Panɩɣ pa-taŋ ɛzɩ teŋgu tiluu yɔ,+Alɩwaatʋ ndʋ pacakɩ pa-kpaŋnaŋ yɔɔ yɔ.
Ɛzɩ ɛyʋ kʋɖʋm yɔ, pakaɣ pa-tɩ ñɔɔzʋʋ nɛ papɩlɩ nɛ pɔkɔɔ ña-wayɩ se poyooni-ŋ, Oo Babilɔɔnɩ pɛlɛ.+
43 Babilɔɔnɩ wiyaʋ nɩ pɔ-yɔɔ tɔm,+Nɛ e-nesi tii yɔɔɔ.+
Wɩzasɩ talɩ-ɩ,Wɩzasɩ nzɩ, sɩwɛ ɛzɩ halʋ weyi eɖiɣni lʋlʋʋ yɔ ɛ-wɩzasɩ.
44 «Ɩna! Nɔɔyʋ kaɣ kpaʋ lona wena a-taa kpɩna tɔkɩ ñɩtʋ nɛ kaɖɛ naɖɩyɛ fɛyɩ a-taa yɔ a-wayɩ, pɩkaɣ wɛʋ ɛzɩ ɛzɩma mʋʋzʋʋ lɩɣnɩ hɔɖɩŋ sɔsɔŋ weyi ɩwɛ Yɔɔrdaŋ nɔɔ kpɛɛɛ yɔ ɩ-tɛɛ yɔ; ɛlɛ tuda lɛ, mankaɣ labʋ nɛ pese nɛ peyele pɛ-ɛjaɖɛ. Nɛ mankaɣ yebu nɛ weyi malɩzaa yɔ ɛkɛ ɖi-wiyaʋ.+ Mbʋ pʋyɔɔ yɔ, awɛ ɛzɩ ma yɔ? Nɛ akaɣ-m kaɖɩnʋʋ? Ninɖiɣyu weyi pɩzɩɣ nɛ ɛsɩŋ mɛ-ɛsɩndaa?+
45 Pʋyɔɔ lɛ, Oo ɛyaa mɩ, ɩnɩɩ lɩmaɣza wena* Yehowa kpaɣ Babilɔɔnɩ yɔɔ yɔ,+ nɛ lɩmaɣza wena ɛwɛnɩ Kalɩdee mba yɔɔ yɔ.
Pɩtʋʋ fɛyɩ se pakaɣ tuu ewiɖe taa kpɩna cikpena nɛ pɛɖɛna.
Pɔ-yɔɔ lɛ, ɛkaɣ yebu nɛ a-ɖɩjaɣyɛ pɩsɩ njɛyɛ.+
46 Babilɔɔnɩ mʋʋ kɔkɔɖɛ kaɣ yebu nɛ tɛtʋ ñamsɩ.
Nɛ pakaɣ nɩʋ kubuka nakɛyɛ taŋ ajɛɛ taa.»+
Pɩ-tɛɛ tɔm
^ Yaa «yʋsaɣ sizika.»
^ Ebree tɔm piye nɖɩ palabɩnɩ tʋmɩyɛ yɔ, pɩtɩla yɔ nɔɔ kʋɖʋmaɣ nakɛyɛ wɛ ɖɩ nɛ Ebree tɔm piye naɖɩyɛ, nɖɩ pɛɖɛzɩɣ se «pɩndʋ» yɔ pɛ-hɛkʋ taa, nɛ palakɩnɩ-ɖɩ tʋmɩyɛ se peni nabʋyʋ.
^ Nɔ halɩñɩnʋ weyi ɛtɩlʋlɩta yɔ.
^ Piye piye, «ɩfɛyɩɣ.»
^ Piye piye, «Kɩcɛlɩ ki-nesi.»
^ Piye piye, «Nebukadɩrezaarɩ,» mbʋ pamaɣ ɛ-hɩɖɛ ɖɔɖɔ.
^ Yaa «ɛ-kalɩzaɣ kaɣ.»
^ Naŋ weyi ɩ nɛ i-ɖoŋ nɛ ɩtɩkpadɩyɩ yɔ ɩ-tɔm pɔyɔɔdʋʋ.
^ Piye piye, «pɛfɛyɩɣ.»
^ Piye piye, «Nɛ pakaɣ yebu nɛ kɩ-sɔɔjanaa tɩŋa su ɖiɣ ɖiɣ.»
^ Yaa «cɛtɩm nayaa.»
^ Yaa «kɩgbɛzɛmɩŋ weyi ɩtɩɖaɣlɩ yɔ.»
^ Yaa «lɔŋ tasʋʋ mbʋ.»