Yereemii 51:1-64
51 Tɔm tʋnɛ Yehowa yɔɔdʋʋ:
«Ɩna, mɔnkɔŋnɩ helim mbʋ pɩkɔŋnɩ asɛyʋʋ yɔBabilɔɔnɩ+ nɛ Lɛɛb-Kamayi* taa mba yɔɔ.
2 Mankaɣ tiyuu falɩyaa Babilɔɔnɩ,Nɛ pakaɣ-kʋ falʋʋ nɛ peyele kɩ-ɛjaɖɛ kpɛɖɛ;Pakaɣ kɔm kɩ-wayɩ nɛ hɔɔlɩŋ tɩŋa taa asɛyʋʋ kɩyakʋ wiye.+
3 Weyi ɛkɛ tɔʋ tɔyʋ yɔ etaakoti* ɛ-tɔʋ.
Nɛ weyi esu ñɩɣyʋʋ toko yɔ ɛtaakʋyɩ nɛ ɛsɩŋ.
Ɩtaana ki-evebiya pʋtɔdɩyɛ.+
Ɩɖɩzɩ kɩ-sɔɔjanaa tɩŋa.
4 Nɛ pakaɣ-wɛ kʋʋ Kalɩdee mba ɛjaɖɛ taa,Pakaɣ-wɛ sɔbʋ nɛ pasɩ kɩ-habɛɛ yɔɔ.+
5 Mbʋ pʋyɔɔ yɔ yoyaa tɛ Yehowa tiyele Izrayɛɛlɩ nɛ Yuuda. Patɩpɩsɩ ɛzɩ lelaa yɔ.+
Ɛlɛ Izrayɛɛlɩ tɛ Kiɖeɖeu ɛsɩndaa lɛ, kɩwɛɛkɩm su pɛ-ɛjaɖɛ* taa.
6 Ise Babilɔɔnɩ taa nɛ ɩlɩɩ,Nɛ ise nɛ ɩya mi-wezuu* ñʋʋ.+
Kɩ-kɩwɛɛkɩm etaayele nɛ ɩsɩ.Mbʋ pʋyɔɔ yɔ pɩkɛ Yehowa kɩmɩyɛ kpaʋ alɩwaatʋ.
Ɛwɛɛ nɛ ɛhɛyɩɣ-kʋ mbʋ kɩlaba yɔ pɩ-yɔɔ.+
7 Babilɔɔnɩ kaakɛ sika kɔpʋ Yehowa nesi taa;Kiyeba nɛ sʋlʋm kʋ tɛtʋ kpeekpe.
Ajɛɛ ñɔ kɩ-tɛ vɛɛ;+Pʋyɔɔ ajɛɛ sʋ kpaaŋ.+
8 Babilɔɔnɩ tɔlɩ tuda nɛ kɩyɔkɩ.+
Iwii kɩ-yɔɔ!+
Kɩ-wɩzasɩ yɔɔ lɛ, iwolo nɛ ɩkɔnɩ balɩsam; pʋtɔma yɔ kɩ-yɔɔ cɛkɩ.»
9 «Ðɩñaɣ pana se ɖɩwaa Babilɔɔnɩ, ɛlɛ paapɩzɩɣ nɛ pawaa-kʋ.
Iyele-kʋ nɛ ɖɩɖɛɛ, paa weyi lɛ ɛpɩsɩ ɛ-maɣmaɣ ɛ-ɛjaɖɛ taa.+
Mbʋ pʋyɔɔ yɔ kɩ-tɔm hʋʋ talɩ ɛsɔdaa;Pɩkʋyaa ɛzɩ ɛsɔmɩndʋ yɔ.+
10 Yehowa hʋ ɖɔ-tɔm siɣsiɣ.+
Ɩkɔɔ, ɖɩkɛdɩ ɖɛ-Ɛsɔ Yehowa tʋma tɔm Siyɔŋ taa.»+
11 «Ɩsɛyɩ tɔʋ ñɩma;+ ɩkpaɣ kpayɩŋ weyi ɩwɛ kulukulu yɔ.*
Yehowa seɣti Medii mba awiya se powolo you,*+Mbʋ pʋyɔɔ yɔ ɛlabɩ lɩmaɣzɩyɛ se ɛkɔŋnɩ asɛyʋʋ Babilɔɔnɩ yɔɔ.
Mbʋ pʋyɔɔ yɔ pɩkɛnɩ Yehowa kɩmɩyɛ kpaʋ, e-templo yɔɔ kɩmɩyɛ kpaʋ.
12 Ɩkpazɩ yʋsaɣ*+ nɛ iyooni Babilɔɔnɩ kolonzi.
Ɩcɛyɩsɩ kandɩyʋʋ ɖʋtʋ, ɩsɩɩ feŋiyaa po-lona taa.
Ɩñɔɔzɩ mba papabɩɣ se potudi koyindu yɔ.
Mbʋ pʋyɔɔ yɔ Yehowa labɩnɩ you lɛɣtʋ ndʋ,Nɛ ɛkaɣ labʋ tɔm ndʋ ɛyɔɔdɩ Babilɔɔnɩ mba yɔɔ yɔ tɩ-yɔɔ.»+
13 «Oo, ña halʋ weyi ŋcaɣ lɩm sakɩyɛ yɔɔ,+Nɛ ŋwɛɛnɩ ñɩm sakɩyɛ yɔ,+Ñɛ-tɛm talaa, ñɛ-kɛzɛɣa ñɩnʋʋ talɩ pɩ-kamaɣ yɔɔ.+
14 Yoyaa tɛ Yehowa ɖuuni ɛ-tɩ* se:
“Mankaɣ yebu nɛ ɛyaa su ñɛ-tɛ, pakaɣ ɖɔʋ ɛzɩ kudoloŋ yɔ,Nɛ pakaɣ kou wabɩtʋ kogoye ñɔ-yɔɔ.”+
15 Ɛnʋ kpaɣnɩ e-ɖoŋ nɛ ɛlabɩnɩ tɛtʋ,Ɛnʋ kpaɣnɩ ɛ-lɔŋsɩnɖɛ nɛ ɛñɔɔzɩnɩ tɛtʋ* nɛ tɩka camɩyɛ+Nɛ ɛlabɩnɩ tʋmɩyɛ ɛ-tɔm taa nɩʋ lɛɣtʋ nɛ eposi ɛsɔdaa.+
16 Alɩwaatʋ ndʋ eyeki nɛ panɩɩ ɛ-nɔɔ yɔ,Lɩm mbʋ pɩwɛ ɛsɔdaa yɔ pisidiɣ yem yem,Nɛ ɛlakɩ nɛ mɩndʋ* kʋyʋʋnɩ tɛtʋ kamasɩ yɔɔ nɛ tɩkpaɣ.
Ɛlakɩ nɛ pɩñɩlɩsɩɣ alɩwaatʋ ndʋ tɛʋ nɩɣ yɔ,*Nɛ ɛlɩzɩɣ helim nɛ e-wondu ɖɩzɩyɛ taa.+
17 Paa ɛyʋ weyi ɛ-lakasɩ wɩlɩɣ se ɛɛmaɣzɩɣ ɛ-ñʋʋ taa nɛ ɛfɛyɩnɩ sɩmtʋ.
Paa ñɩɣtʋ wondu luɖu weyi lɛ, fɛyɛ kaɣ-ɩ kpaʋ sɩʋ kpeliɣa ŋga eluba yɔ kɔ-yɔɔ;+Mbʋ pʋyɔɔ yɔ ɛ-ñɩɣtʋ sɩʋ kpeliɣa* kɛ cɛtɩm,Nɛ fezuu* nakʋyʋ fɛyɩ sɩʋ kpelisi nzɩ sɩ-taa.+
18 Sɩkɛ cɛtɩm,*+ tʋmɩyɛ nɖɩ pohoŋuu-ɖɩ yɔ.
Sɩ-akɔnta pɔzʋʋ kɩyakʋ talɩɣ lɛ, sɩkaɣ mʋʋʋ.
19 Weyi ɛkɛ Yakɔɔb Pʋyʋ yɔ ɛfɛyɩ ɛzɩ wondu ndʋ yɔ,Mbʋ pʋyɔɔ yɔ Ɛnʋ kɛnɩ weyi ɛlabɩ pɩtɩŋa payɩ yɔ,Halɩ pɩkpɛndɩnɩ mba pɛkɛ ɛ-ñɩm+ yɔ pa-ɖaʋ.
Payaɣ-ɩ se yoyaa tɛ Yehowa.»+
20 «Ŋkɛ-m you pɔɖɩyɛ, wonuu ŋgʋ palakɩnɩ you yɔ,Mbʋ pʋyɔɔ yɔ ña mankaɣ kpaɣʋ nɛ mɔntɔyɩtɩnɩ ajɛɛ.
Ña mankaɣ kpaɣʋ nɛ manɖɩzɩnɩ kewiyisi.
21 Ña mankaɣ kpaɣʋ nɛ mɔntɔyɩtɩnɩ kpaŋnʋ nɛ ɛ-yɔɔ caɣyʋ.
Ña mankaɣ kpaɣʋ nɛ mɔntɔyɩtɩnɩ you kɛɛkɛɛ nɛ weyi ɛsaɣ-kʋ yɔ.
22 Ña mankaɣ kpaɣʋ nɛ mɔntɔyɩtɩnɩ abalʋ nɛ halʋ.
Ña mankaɣ kpaɣʋ nɛ mɔntɔyɩtɩnɩ akpadɩyʋ nɛ abalɩbɩɣa.
Ña mankaɣ kpaɣʋ nɛ mɔntɔyɩtɩnɩ evebu nɛ pɛlɛ.
23 Ña mankaɣ kpaɣʋ nɛ mɔntɔyɩtɩnɩ ninɖiɣyu nɛ ɛ-kpɩna.
Ña mankaɣ kpaɣʋ nɛ mɔntɔyɩtɩnɩ haɖʋ nɛ kpɩna wena ɛhayɩɣna yɔ.
Ña mankaɣ kpaɣʋ nɛ mɔntɔyɩtɩnɩ komina ñʋndɩnaa nɛ kaɖɩsɩ.
24 Nɛ mankaɣ hɛyʋʋ Babilɔɔnɩ nɛ Kalɩdee mba tɩŋaKɩdɛkɛdɩm mbʋ payɩ palabɩ Siyɔŋ taa mɩ-ɛsɩndaa yɔ pɩ-yɔɔ,»+ Yehowa yɔɔdʋʋna.
25 «Na, mankʋyʋʋ ñɔ-yɔɔ,+ Oo ña weyi ŋkɛ pʋʋ ŋgʋ kɩkɔŋnɩ asɛyʋʋ yɔ,Ña weyi ŋɖɩzɩɣ tɛtʋ kpeekpe yɔ.+
Mankaɣ sezuu me-nesi ñɔ-yɔɔ nɛ menpilisi-ŋ nɛ kaaŋ yɔɔNɛ meyele nɛ ŋpɩsɩ pʋʋ ŋgʋ kɩñaɣ miŋ yɔ,» Yehowa yɔɔdʋʋna.
26 «Ɛyaa ɩɩkaɣ kpaɣʋ kɔna taa pɩyɛ yaa tigiɖe pɩyɛ ñɛ-tɛ,Mbʋ pʋyɔɔ yɔ ŋkaɣ pɩsʋʋ njɛyɛ tam,»+ Yehowa yɔɔdʋʋna.
27 «Ɩkpazɩ yʋsaɣ* ɛjaɖɛ taa.+
Ɩhʋlɩ nɔndɔʋ ajɛɛ taa.
Ɩlɩzɩ ajɛɛ* nɛ akɔɔ kɩ-wayɩ.
Ɩyaa Arara,+ Minii nɛ Asɩkenaazɩ kewiyisi nɛ sɩkɔɔ kɩ-wayɩ.+Ɩlɩzɩ weyi ɛmʋʋ sɔɔjanaa kɩfama yɔ nɛ ɛkʋyɩ kɩ-yɔɔ.
Iyele nɛ kpaŋnaŋ kpa ɛzɩ kudoloŋ wadʋʋ yɔ.
28 Ɩlɩzɩ ajɛɛ* nɛ akɔɔ kɩ-wayɩ,Medii awiya,+ ki-komina ñʋndɩnaa nɛ kɩ-kaɖɩsɩ tɩŋaNɛ ajɛɛ wena a-yɔɔ payɩ pɔtɔkɩ kewiyitu yɔ.
29 Nɛ tɛtʋ kaɣ ñamsʋʋ nɛ tiseli,Mbʋ pʋyɔɔ yɔ lɩmaɣza wena Yehowa kpaɣ Babilɔɔnɩ yɔɔ yɔ akaɣ labʋ
Nɛ eyele nɛ Babilɔɔnɩ ɛjaɖɛ pɩsɩ sɔɔndʋ pʋyʋ, nɛ nɔɔyʋ ɛɛkaɣ wɛʋ ɖɩ-taa.+
30 Babilɔɔnɩ sɔdɩŋ yebi you labʋ.
Pacaɣ po-lona ɖoŋ ñɩna taa.
Po-ɖoŋ tɛma.+
Papɩsɩ ɛzɩ halaa yɔ.+
Pañaɣzɩ kɩ-ɖɩsɩ miŋ.
Pɛpɛlɩ ñɩɣtʋ ndʋ paɖɩkɩnɩ kɩ-nɔnɔsɩ yɔ.+
31 Takayɩsɩ tayɩyʋ* seɣ nɛ ɛkatɩɣ takayɩsɩ tayɩyʋ lɛlʋ,Nɛ weyi petiyaa yɔ eseɣ nɛ ɛkatɩɣ lɛlʋ weyi petiyaa yɔ,Se powolo nɛ peheyi Babilɔɔnɩ wiyaʋ se pamʋ ɛ-tɛtʋ hɔɔlɩŋ tɩŋa taa,+
32 Se pamʋ pɔsɩ ɖɩdɛzɩyɛ,+Pañaɣzɩ papiruusi mɛlɛnaa miŋ,Nɛ sɔɔndʋ kpa sɔɔjanaa pɩdɩɩfɛyɩ.»
33 Mbʋ pʋyɔɔ yɔ tɔm tʋnɛ yoyaa tɛ Yehowa, Izrayɛɛlɩ tɛ Ɛsɔ yɔɔdʋʋ:
«Babilɔɔnɩ pɛlɛ wɛ ɛzɩ tɔɔnaɣ ɖɩmaɖɛ yɔ.
Alɩwaatʋ talaa se pɛfɛyɩ-ɩ camɩyɛ.
Piileɖiɣ lɛ, ɛ-kʋmtʋ alɩwaatʋ talɩɣ.»
34 «Babilɔɔnɩ wiyaʋ Nabukodonozɔɔrɩ* tɔɔ-m;+Eyeba nɛ pisidi-m.
Eyeba nɛ manpɩsɩ ɛzɩ ñanaɣ ŋga kɛwɛ kpɛɖɛ yɔ.
Elibi-m ɛzɩ ɖʋm sɔsɔ likuu nabʋyʋ yɔ;+Elibi mo-wondu kɩbandʋ nɛ pisu e-lotu taa.
Ekpizi-m caɣ caɣ.
35 “Puuyaɣ lakasɩ nzɩ palabɩ-m nɛ nzɩ palabɩ mon-tomnaɣ yɔ, sɩkɔɔ Babilɔɔnɩ yɔɔ!” Siyɔŋ taa tʋ yɔɔdʋʋna.+
“Nɛ man-calɩm ɛkɔɔ Kalɩdee mba yɔɔ!” Yeruzalɛm yɔɔdʋʋna.»
36 Pʋyɔɔ lɛ, tɔm tʋnɛ Yehowa yɔɔdʋʋ:
«Na, menɖiɣni hʋʋ ñɔ-tɔm,+Nɛ mankaɣ kpaʋ kɩmɩyɛ ñɔ-yɔɔ.+
Mankaɣ yebu nɛ ki-teŋgu nɛ kɩ-lɔkɔnaa taa lɩm sɔɔ.+
37 Nɛ Babilɔɔnɩ kaɣ pɩsʋʋ pɛɛ huwa,+Tɛyɛ hasɩ ɖɩjaɣyɛ,+Sɔɔndʋ pʋyʋ nɛ mbʋ panaɣ-pʋ nɛ pahʋlʋʋ kancʋʋlaɣ yɔ,Nɔɔyʋ ɛɛkaɣ wɛʋ kɩ-taa.+
38 Pa-tɩŋa pakaɣ kpɛndʋʋ nɛ pamʋdɩ ɛzɩ mʋʋzɩŋ yɔ.*
Pakaɣ mʋdʋʋ ɛzɩ mʋʋzɩŋ piya yɔ.»
39 «Pɩkʋyʋʋnɩ-wɛ lɛ, mankaɣ-wɛ labʋ kazandʋ nɛ meyele nɛ sʋlʋm kʋ-wɛ,Se pɩsa nɛ pɛmɛyɩ amɛya;+Ðɩnɛ ɛlɛ pakaɣ ɖou tamtam ɖom,Nɛ paakaɣ fem nɛ ɖom mbʋ pɩ-yɔɔ,»+ Yehowa yɔɔdʋʋna.
40 «Mankaɣ-wɛ tinuu ɖɩgʋyɛ taa ɛzɩ heɣsi yɔ,Ɛzɩ ɛyaŋ nɛ pʋŋ yɔ.»
41 «Oo, ɩna ɛzɩma pamʋ Seesaakɩ* yɔ,+Ɩna ɛzɩma pamʋ tɛtʋ kpeekpe Samtʋ yɔ!+
Ɩna ɛzɩma Babilɔɔnɩ pɩsɩ sɔɔndʋ pʋyʋ ajɛɛ hɛkʋ taa yɔ!
42 Teŋgu kpawa nɛ kɩwadɩ Babilɔɔnɩ yɔɔ.
Kɩ-lɩm hola sakɩyɛ huuzi kɩ-yɔɔ.
43 Kɩ-tɛtʋ ndɩ ndɩ pɩsɩ sɔɔndʋ pʋyʋ, ɛjaɖɛ nɖɩ ɖɩ-taa lɩm fɛyɩ yɔ nɛ kañɩmbusuu.
Ɛjaɖɛ nɖɩ ɖɩ-taa nɔɔyʋ ɛɛkaɣ wɛʋ yɔ, nɛ ɖenɖe ɛyʋ nɔɔyʋ ɛɛkaɣ tɩŋnʋʋ yɔ.+
44 Mankaɣ kɛzʋʋ ma-lɩmaɣza nɛ Bɛɛlɩ+ yɔɔ Babilɔɔnɩ taa,Nɛ mankaɣ lɩzʋʋ ɛ-nɔɔ taa mbʋ eliba yɔ.+
Ajɛɛ ɩɩkaɣ tasʋʋ lɔtʋʋ nɛ awoki ɛ-cɔlɔ.
Nɛ Babilɔɔnɩ koloŋa kaɣ tɔlʋʋ.+
45 Ɩlɩɩ kɩ-taa, man-samaɣ!+
Ɩya mi-weziŋ* ñʋʋ+ nɛ Yehowa pana sɔsɔna ɛtaakɔɔ mɩ-yɔɔ!+
46 Mɩ-laŋa ɩtaalɩɩ yaa sɔɔndʋ ɛtaakpa-mɩ nɛ tɔm ndʋ pakaɣ nɩʋ ɛjaɖɛ taa yɔ.
Ɩkaɣ nɩʋ tɔm ndʋ pɩnaɣ kʋyʋmaɣ taa,Nɛ pɩnaɣ ŋga katɩŋɩɣ-kɛ yɔ ka-taa, ɩkaɣ nɩʋ tɔm lɛɛtʋ,Nɛ tɛtʋ yɔɔ lɛ puuyaɣ lakasɩ kaɣ wɛʋ, nɛ awiya kaɣ kʋyʋʋ ɖama yɔɔ.
47 Pʋyɔɔ lɛ ɩna! Kɩyakɩŋ ɖiɣni kɔmNɛ alɩwaatʋ ndʋ lɛ, mankaɣ kɛzʋʋ ma-lɩmaɣza nɛ Babilɔɔnɩ sɩʋ kpelisi yɔɔ.
Fɛyɛ kaɣ kpaʋ kɩ-ɛjaɖɛ kpeekpe,Nɛ kɩ-ɛyaa mba pakʋʋ yɔ, pakaɣ tɔlʋʋ kɩ-hɛkʋ taa.+
48 Ɛsɔdaa nɛ tɛtʋ nɛ mbʋ payɩ pɩwɛ pa-taa yɔPakaɣ mabʋ kubusi nɛ taa leleŋ Babilɔɔnɩ yɔɔ,+Mbʋ pʋyɔɔ yɔ kɩ-ɖɩzɩyaa kaɣ lɩnʋʋ hayo kiŋ nɛ pɔkɔɔ kɩ-wayɩ,»+ Yehowa yɔɔdʋʋna.
49 «Pɩtɩkɛ Izrayɛɛlɩ ɛyaa ɖeke Babilɔɔnɩ kʋwa,+Ɛlɛ tɛtʋ kpeekpe yɔɔ ɛyaa mba pakʋwa yɔ Babilɔɔnɩ taa ɖɔɖɔ pɔtɔlaa.
50 Mɩ mba ɩlɩɣ laɣɖɛ nesi tɛɛ yɔ, ɩwɛɛ ɖɛʋ yɔɔ, ɩtaasɩŋ!+
Ɩtɔzʋʋ Yehowa yɔɔ ɖooo poliŋ taa,Nɛ ɩmaɣzɩ Yeruzalɛm yɔɔ.»+
51 «Fɛyɛ kpa-ɖʋ, mbʋ pʋyɔɔ yɔ ɖɩnɩ tɔm ndʋ tɩkɛnɩ-ɖʋ tʋtʋ yɔ.
Fɛyɛ huuzi ɖɛ-ɛsɩndaa,Mbʋ pʋyɔɔ yɔ agbaaɣdaa mba* kɔm Yehowa ɖɩɣa taa lona kiɖeɖena wayɩ.»+
52 «Pʋyɔɔ lɛ ɩna! Kɩyakɩŋ ɖiɣni kɔm,Nɛ alɩwaatʋ ndʋ lɛ, mankaɣ kɛzʋʋ ma-lɩmaɣza nɛ kɩ-sɩʋ kpelisi yɔɔ,Nɛ kɩ-ɛjaɖɛ kpeekpe taa lɛ, mba pamʋ heŋ yɔ pakaɣ mɔlʋʋ;»+ Yehowa yɔɔdʋʋna.
53 «Paa Babilɔɔnɩ ɛkpa ɛsɔdaa,+Paa kɩcɛyɩsɩ ki-lona ɖoŋ ñɩna wena akʋyaa pɩdɩɩfɛyɩ yɔ,Kɩ-ɖɩzɩyaa kaɣ lɩnʋʋ mɔn-cɔlɔ,»+ Yehowa yɔɔdʋʋna.
54 «Iwelisi! Pamakɩ kubuka nakɛyɛ Babilɔɔnɩ taa,+Asɛyʋʋ sɔsɔʋ nakʋyʋ kɔkɔɖɛ wɛɛ nɛ ɖɩlɩɣnɩ Kalɩdee mba ɛjaɖɛ taa,+
55 Mbʋ pʋyɔɔ yɔ Yehowa wɛɛ nɛ ɛɖɩzɩɣ Babilɔɔnɩ,Ɛkaɣ yebu nɛ kɩ-nɔɔ ɖoŋ ñɩŋga su ɖiɣ ɖiɣ,Nɛ pa-lɩm hola kaɣ tiluu ɛzɩ lɩm sakɩyɛ yɔ.
Pakaɣ nɩʋ pɔ-nɔɔ taŋ.
56 Mbʋ pʋyɔɔ yɔ ɖɩzɩyʋ kaɣ kɔm Babilɔɔnɩ wayɩ;+Pakaɣ kpaʋ kɩ-sɔdɩŋ,+Pakaɣ pʋʋtʋʋ pɔ-tɔŋ,Mbʋ pʋyɔɔ yɔ Yehowa kɛ Ɛsɔ weyi ɛhɔŋ nɩŋgbaŋʋʋ ɛzɩ pɩmʋnʋʋ yɔ.+
Pɩtʋʋ fɛyɩ se ɛkaɣ kpaʋ kɩmɩyɛ.+
57 Mankaɣ yebu nɛ sʋlʋm kʋ kɩ-awumbiya nɛ kɩ-lɔŋsɩnɖaa,+Ki-komina ñʋndɩnaa nɛ kɩ-kaɖɩsɩ nɛ kɩ-sɔdɩŋ,Nɛ pakaɣ ɖou tamtam ɖom,Nɛ paakaɣ fem nɛ ɖom mbʋ pɩ-yɔɔ,»+ Wiyaʋ yɔɔdʋʋna, ɛnʋ weyi payaɣ-ɩ se yoyaa tɛ Yehowa yɔ.
58 Tɔm tʋnɛ yoyaa tɛ Yehowa yɔɔdʋʋ:
«Paa Babilɔɔnɩ koloŋa ɛwalaa yɔ, pakaɣ-kɛ yɔkʋʋ caɣ caɣ,+Nɛ paa kɩ-nɔnɔsɩ ɩkʋyaa yɔ, pakaɣ-sɩ miŋ ñaɣzʋʋ.
Ɛyaa samasɩ kaɣ ñaɣʋ pana falaa;Ajɛɛ kaɣ a-ñʋŋ yɔkʋʋ falaa yem, ɛlɛ miŋ yem akaɣ calʋʋ.»+
59 Tɔm tʋnɛ nayʋ Yereemii yɔɔdaa se ɛɖʋnɩ paɣtʋ Maseyiya pɩyalʋ Neriya+ pɩyalʋ Seraya alɩwaatʋ ndʋ ɛ nɛ Yuuda wiyaʋ Zedekiya powobi Babilɔɔnɩ e-kewiyitu tɔɔʋ pɩnaɣ 4 ñɩŋga taa yɔ; Seraya kaakɛ wiyaʋ wondu yɔɔ cɔnɩyʋ.
60 Yereemii ma asɛyʋʋ ŋgʋ kɩkaɣ kɔm Babilɔɔnɩ yɔɔ yɔ kɩ-tɩŋa kɩ-tɔm takayaɣ kʋɖʋmaɣ taa, tɔm ndʋ payɩ pama Babilɔɔnɩ yɔɔ yɔ.
61 Pɩtasɩ lɛ, Yereemii heyi Seraya se: «Ŋtalɩɣ Babilɔɔnɩ nɛ ŋna-kʋ lɛ, pɩwɛɛ se ŋkalɩnɩ nɔɔ kɩkʋyaɣ tɔm tʋnɛ tɩ-tɩŋa.
62 Pʋwayɩ lɛ, ŋyɔɔdɩ se: “Oo Yehowa, ŋyɔɔdɩ lone ɖɩnɛ ɖɩ-tɔm se pakaɣ-ɖɩ yɔkʋʋ nɛ nɔɔyʋ ɛɛkaɣ tasʋʋ wɛʋ ɖɩ-taa, ɛyʋ yaa kpɩnɛ, nɛ ɖɩkaɣ pɩsʋʋ njɛyɛ tam.”+
63 Nɛ ŋtɛŋ takayaɣ kanɛ kalʋʋ lɛ, ŋhɔkɩ-kɛ nɛ pɩyɛ naɖɩyɛ nɛ ŋpɛɖɩ-kɛ Efraatɩ pɔɔ hɛkʋ taa.
64 Nɛ ŋyɔɔdɩ se: “Ɛzʋnɔ Babilɔɔnɩ kaɣ tibu lɩm tɛɛ nɛ kɩɩtasɩɣ kʋyʋʋ wiɖiyi,+ asɛyʋʋ ŋgʋ menɖiɣni kɔnʋʋ kɩ-yɔɔ yɔ kɩ-yɔɔ, nɛ pɩkaɣ-wɛ nɩʋ.”»+
Yereemii tɔm tɩnaɣ yɔ.
Pɩ-tɛɛ tɔm
^ Pɩtɩla, mbʋ pamaɣaɣ Kalɩdee se ɛyaa tɩŋa ɩtaatɩlɩ se kɩ-tɔm pɔyɔɔdʋʋ.
^ Piye piye, «ɛtaafɛyɩ.»
^ Pʋ-tɔbʋʋ se Kalɩdee mba ɛjaɖɛ.
^ Yaa «mɩ-kalɩzaɣ.»
^ Pɩpɩzɩɣ pɩkɛ, «ɩɖʋ tɔʋ ñɩma kɔɔkasɩ taa nɛ pisu.»
^ Piye piye, «seɣti Medii mba awiya fezuu.»
^ Yaa «yʋsaɣ sizika.»
^ Yaa «ɛ-kalɩzaɣ.»
^ Yaa «tɛtʋ ndʋ tɩlʋlʋʋ yɔ.»
^ Yaa «hohou.»
^ Pɩpɩzɩɣ pɩkɛ, «Ɛtʋlʋʋ nɔnɔsɩ tɛʋ.»
^ Yaa «ɛ-sɩʋ kpeliɣa ŋga poyolisi ñɩɣtʋ nɛ polubina yɔ.»
^ Yaa «helim mbʋ ɛyʋ feziɣ yɔ.»
^ Yaa «mbʋ pɩɩwazɩɣ pʋyʋ yɔ.»
^ Yaa «yʋsaɣ sizika.»
^ Piye piye, «Ɩla nɛ ajɛɛ pɩsɩ kiɖeɖena.»
^ Piye piye, «Ɩla nɛ ajɛɛ pɩsɩ kiɖeɖena.»
^ Pʋ-tɔbʋʋ se weyi patɩŋɩɣnɩ ɛ-yɔɔ nɛ petiyiɣni takayɩsɩ yɔ.
^ Piye piye, «Nebukadɩrezaarɩ,» mbʋ pamaɣ ɛ-hɩɖɛ ɖɔɖɔ.
^ Yaa «mʋʋzɩŋ weyi ɩwɛnɩ kpɛm i-pondona yɔɔ yɔ.» Mʋʋzɩŋ weyi ɩ nɛ i-ɖoŋ nɛ ɩtɩkpadɩyɩ yɔ ɩ-tɔm pɔyɔɔdʋʋ.
^ Pɩtɩla, mbʋ pamaɣaɣ Babɛɛlɩ (Babilɔɔnɩ) se ɛyaa tɩŋa ɩtaatɩlɩ se kɩ-tɔm pɔyɔɔdʋʋ.
^ Yaa «mɩ-kalɩzasɩ.»
^ Yaa «agɔma.»
