Yereemii 6:1-30
6 Oo Bɛnjamɛɛ pɩyalaa, ɩcɔzɩ lone nɖɩ ɖiposini Yeruzalɛm yɔ ɖɩ-taa.
Ɩhʋlɩ nɔndɔʋ+ Tekowa+ taa;Ɩsɔ miŋ yʋsaɣ Bɛtɩ-Akerɛɛm yɔɔ!
Mbʋ pʋyɔɔ yɔ kʋñɔŋ lɩnɩ hayo kiŋ nɛ kɩkɔŋ, asɛyʋʋ sɔsɔʋ kpem.+
2 Siyɔŋ pɛlɛ nɩɣzɩnɩ halʋ weyi eɖewa nɛ ɛwɛɛ nɛkɛ nɛkɛ yɔ.+
3 Ninɖiɣyaa nɛ pa-kpɩna tindima pakaɣ kɔm.
Pakaɣ siɣu pe-kizinzikiŋ nɛ pɩcɔɔ-ɩ nɛ pɩta,+Paa weyi eɖiyiɣ kpɩna wena ɛcɔŋnɩ a-yɔɔ yɔ nɛ atɔkɩ ñɩtʋ.+
4 «Ɩñɔɔzɩ mɩ-tɩ* nɛ iyooni-i!
Ɩkʋyɩ nɛ ɖiyooni-i wɩsɩ siɣu alɩwaatʋ taa!»
«Pɩtɔɔ-ɖʋ, mbʋ pʋyɔɔ yɔ evemiye ɖiɣni tɛm,Mbʋ pʋyɔɔ yɔ hadɛ ɖiɣni lɛdʋʋ!»
5 «Ɩkʋyɩ nɛ ɖiyooni-i ɖoo taaNɛ ɖɩɖɩzɩ e-tilima ɖoŋ ñɩna.»+
6 Mbʋ pʋyɔɔ yɔ tɔm tʋnɛ yoyaa tɛ Yehowa yɔɔdʋʋ:
«Ɩsɛtɩ ɖasɩ nɛ isiɣ you wondu nɛ pɩcɔɔ Yeruzalɛm nɛ pɩta.+
Kɩkɛ tɛtʋ ndʋ pɩwɛɛ se pɔpɔzɩ-tʋ akɔnta yɔ;Nazɩm ɖeke wɛnɩ kɩ-taa.+
7 Ɛzɩ lɔkɔ* yekuu nɛ kɩ-lɩm niɣdiɣ tam yɔ,Mbʋ ɖɔɖɔ Yeruzalɛm yeki nɛ kɩ-kañatʋ lakasɩ niɣdiɣ tam.
Panɩ puuyaɣ lakasɩ nɛ ɖɩzʋʋ taŋ kɩ-taa;+Kʋdɔŋ nɛ asɛyʋʋ pɛwɛ mɛ-ɛsɩndaa tam.
8 Oo Yeruzalɛm, yele nɛ papaɣ-ŋ, pɩtɩkɛ mbʋ yɔ ŋkaɣ-m caɣʋ kiniŋ* nɛ mɔlɔ-ŋ;+Mankaɣ yebu nɛ ŋpɩsɩ njɛyɛ, ɛjaɖɛ nɖɩ ɖɩ-taa nɔɔyʋ fɛyɩ yɔ.»+
9 Tɔm tʋnɛ yoyaa tɛ Yehowa yɔɔdʋʋ:
«Pakaɣ cazʋʋ tete Izrayɛɛlɩ ɛyaa mba pɩkazaa yɔ ɛzɩ pacazʋʋ kɛdɛzaɣ pee viiñi tɩʋ yɔɔ yɔ.
Ðaɣnɩ ñe-nesi sezuu ɛzɩ weyi eɖiɣni koyuu pee viiñi tɩŋ yɔɔ yɔ.»
10 «Anɩ pɩwɛɛ se mɔyɔɔdɩna nɛ manpaɣ-ɩ?
Akaɣ welisuu?
Ɩna! Pa-nɩŋgbaaŋ ɖɩɣaa,* nɛ paapɩzɩɣ se pewelisi.+
Ɩna! Yehowa tɔm pɩsɩ mbʋ peniŋ yɔ;+Pa-taa ɛɛlakɩ-tʋ nɛ leleŋ paa ññɩɩ.
11 Pʋyɔɔ Yehowa pana su man-taa,Nɛ pɩnɩ-m nɛ a-ɖɔkʋʋ.»+
«Pɩyɩ-yɛ pɩɣa ŋga kɛwɛ habɩyɛ yɔɔ yɔ kɔ-yɔɔ,+Evebiya tindima wena akpeɣlaa yɔ a-yɔɔ.
Pakaɣ pa-tɩŋa kpaʋ, abalʋ nɛ pɩkpɛndɩnɩ ɛ-halʋ,Akpadɩyaa nɛ pɩkpɛndɩnɩ mba pakpadɩyɩ siŋŋ yɔ.*+
12 Pakaɣ pa-ɖɩsɩ kpaɣʋ nɛ pɛcɛlɩ lalaa,Pɩkpɛndɩnɩ pa-hayɩm nɛ pa-halaa.+
Mbʋ pʋyɔɔ yɔ mankaɣ sezuu me-nesi ɛjaɖɛ ɖɩnɛ ɖɩ-taa mba yɔɔ,» Yehowa yɔɔdʋʋna.
13 «Mbʋ pʋyɔɔ yɔ kpaɣnɩ weyi pɩtɔyɩnaa yɔ nɛ piwolo weyi ɛkpaɖaa yɔ, paa weyi ɛwɛɛ nɛ ɛñɩnɩɣ mulum kɛzɛɣa;+Kpaɣnɩ nayʋ nɛ piwolo cɔjɔ, paa weyi ɛwɛɛ nɛ ɛlakɩ mulum lakasɩ.+
14 Nɛ pañakɩ pana se pawaa ɖenɖe pɩpɛlɩ man-samaɣ yɔ* pɩ-yɔɔ pɩ-yɔɔ yem nɛ pɔtɔŋ se:
“Laŋhɛzɩyɛ wɛɛ! Laŋhɛzɩyɛ wɛɛ!”
Ŋgʋ laŋhɛzɩyɛ naɖɩyɛ fɛyɩ.+
15 Ɛzɩ fɛyɛ kpaɣ-wɛ nɛ lakasɩ kɩdɛkɛdɩsɩ nzɩ palaba yɔ?
Fɛyɛ ɛɛkpaɣ-wɛ paa ññɩɩ!
Halɩ paasɩŋ ɛzɩma fɛyɛ kpaɣ ɛyʋ yɔ!+
Pʋyɔɔ lɛ, pakaɣ tɔlʋʋ mba pɔtɔlaa yɔ pɛ-hɛkʋ taa.
Alɩwaatʋ ndʋ mɔnkɔŋnɩ nɩŋgbaŋʋʋ hɔm pɔ-yɔɔ yɔ, pɩkaɣ-wɛ tuuluu,» Yehowa yɔɔdʋʋna.
16 Tɔm tʋnɛ Yehowa yɔɔdʋʋ:
«Ɩsɩŋ habɛɛ ɖɩgbɛndɩyɛ taa nɛ ɩna.
Ɩpɔzɩ caanaʋ taa habɛɛ yɔɔ,Ɩpɔzɩ nɛ ɩna ɖenɖe nʋmɔʋ kɩbaŋʋ wɛɛ yɔ, nɛ ɩɖɔ kɩ-taa,+Nɛ ihiɣ mɩ-tɩ hɛzɩyɛ.»*
Ɛlɛ pɔyɔɔdʋʋ se: «Ðɩɩkaɣ ɖɔm kɩ-taa.»+
17 «Nɛ malɩzɩ feŋiyaa+ nɛ pɔyɔɔdɩ se:
“Ikemsi nɔndɔʋ hʋlʋʋ taŋ!”»+
Ɛlɛ pɔyɔɔdɩ se: «Ðɩɩkaɣ kemsuu.»+
18 «Pʋyɔɔ lɛ, mɩ ajɛɛ, iwelisi!
Nɛ ña samaɣ, tɩlɩMbʋ pɩkaɣ-wɛ talʋʋ yɔ.
19 Oo tɛtʋ, welisi!
Menɖiɣni kɔnʋʋ asɛyʋʋ samaɣ kanɛ kɔ-yɔɔ+Nɛ pɩkɛ mbʋ pa-maɣmaɣ paɖʋwa se palakɩ yɔ pɩ-kɛzɛɣa,Mbʋ pʋyɔɔ yɔ patiwelisi mɔn-tɔm paa ññɩɩNɛ pɔlɔ man-paɣtʋ.»*
20 «Ɛzɩ man-paa wɛnɩ tɩlaaɖɩ kʋhʋlʋmʋʋ ŋgʋ ŋkɔŋnɩ-m nɛ SeebaNɛ sɔzɩŋ kañɩŋgbayaɣ ŋga ŋkɔŋnɩ-m nɛ poliŋ ɛjaɖɛ taa yɔ?
Maamʋʋ mɩ-kɩlaŋ kɩñaɣzɩŋ,Nɛ mɩ-kɩlaŋ ɩɩkɛdɩɣnɩ-m.»+
21 Pʋyɔɔ lɛ, tɔm tʋnɛ Yehowa yɔɔdʋʋ:
«Ɩna, menɖiɣni sɩʋ mbʋ pituuluu yɔ samaɣ kanɛ kɛ-ɛsɩndaa,Nɛ pɩkaɣ-kɛ tuuluu,Pɩkpɛndɩɣ nɛ pituuli caanaa nɛ pa-pɩyalaa,Pɩ-cɔlɔ tʋ nɛ ɛ-taabalʋ,Nɛ pa-tɩŋa pakaɣ ɖɩm.»+
22 Tɔm tʋnɛ Yehowa yɔɔdʋʋ:
«Ɩna! Samaɣ nakɛyɛ lɩnɩ hayo kiŋ ɛjaɖɛ taa nɛ kɔkɔŋ,Nɛ ɛjaɖɛ sɔsɔɖɛ naɖɩyɛ kaɣ fem nɛ tɛtʋ hɔɔlɩŋ weyi ɩkɩlɩ posuu yɔ ɩ-taa.+
23 Pakaɣ ɖɔkʋʋ tɔʋ nɛ kɩgbɛzɛŋ tobi ñɩŋgʋ.
Pɛwɛ kañatʋ nɛ paakaɣ naʋ pʋtɔdɩyɛ.
Pɔ-nɔsɩ kaɣ tiluu ɛzɩ teŋgu yɔ,Nɛ pacakɩ kpaŋnaŋ yɔɔ.+
Pɔñɔɔzʋʋ pa-tɩ nɛ palɩɩ ɛzɩ you laɖʋ yɔ se poyooni-ŋ, Oo Siyɔŋ pɛlɛ.»
24 Ðɩnɩ pɩ-tɔm.
Ðe-nesi tibi yɔbɩ;+Ðɩwɛ siziŋ nɩʋ taa siŋŋ,Ðɩnɩɣ wɩzasɩ* nzɩ yɔ, sɩwɛ ɛzɩ halʋ weyi eɖiɣni lʋlʋʋ yɔ ɛ-wɩzasɩ yɔ.+
25 Ɩtaalɩɩ nɛ iwolo hayɩm taa,Nɛ ɩtaaɖɔ habɩyɛ yɔɔ,Mbʋ pʋyɔɔ yɔ koyindu wɛnɩ laɣɖɛ;Sɔɔndʋ wɛ paa le.
26 Oo man-samaɣ pɛlɛ,Suu fɔlɔtɔ+ nɛ ŋpilimi tɔlɩma taa.
Caɣ kʋñɔwiye ɛzɩ ɛyʋ weyi ɛ-pɩyalʋ ɛgbamɩyɛ sɩba yɔ, nɛ ŋwii siŋŋ,+Mbʋ pʋyɔɔ yɔ ɖɩzɩyʋ kaɣ kɔm ɖa-wayɩ tuda.+
27 «Manpɩsɩ-ŋ* weyi ɛtakɩɣ ñɩɣtʋ se ɛtɩlɩ tɩ-wɛtʋ yɔ man-samaɣ taa,Weyi ɛñɩnɩɣ tete yɔ;Pɩwɛɛ se ŋyʋsɩ pa-nʋmɔʋ nɛ ŋtazɩ kɩ-taa.
28 Pa-tɩŋa payɩ pɛkɛ ɛyaa mba pakpaɖɩ ñʋʋ taa ɖoŋ yɔ,+Pɔcɔʋ ɛzɩ kɔlɔmɔtʋ tɩnaa yɔ.+
Pɛwɛ ɛzɩ ñɩɣyʋʋ kɩsɛɛmʋʋ nɛ ñɩɣyʋʋ yɔ;Pa-tɩŋa pa-lakasɩ fɛyɩ ɖeu.
29 Miŋ ko fɛtɩyɩŋ.
Pʋlɔŋ ñɩɣyʋʋ ɖeke lɩɣnɩ miŋ taa.
Pɛwɛ yolusuu yɔɔ siŋŋ se palɩzɩ azuluma, ɛlɛ kpɛɖɛ;+Nɛ mba pɛkɛ kɩdɛkɛdaa yɔ, pɩtɩlɩzɩ-wɛ nɛ hɔɔlʋʋ.+
30 Pɩtʋʋ fɛyɩ se ɛyaa kaɣ-wɛ yaʋ se liidiye nɖɩ pɔlɔ-ɖɩ yɔ,Mbʋ pʋyɔɔ yɔ Yehowa lɔ-wɛ.»+
Pɩ-tɛɛ tɔm
^ Piye piye, «Ɩpɩsɩ mɩ-tɩ kiɖeɖema.»
^ Pʋ-tɔbʋʋ se pɔʋ ŋgʋ pohuyaa nɛ paɖʋʋ lɩm kɩ-taa yɔ.
^ Yaa «ŋkaɣ caɣʋ man-kalɩzaɣ kiniŋ.»
^ Piye piye, «Pa-nɩŋgbaŋʋʋ kɛ kɩdɩbɛlʋʋ.»
^ Piye piye, «mba pa-kɩyakɩŋ ɖɔwa yɔ.»
^ Yaa «pawaa man-samaɣ hɔɔlʋʋ ŋgʋ kɩyɔkaa yɔ.»
^ Yaa «ihiɣ mɩ-kalɩzasɩ hɛzɩyɛ.»
^ Yaa «ma-wɩlɩtʋ.»
^ Piye piye, «lʋlʋʋ wɩzasɩ.»
^ Pʋ-tɔbʋʋ se Yereemii.
