Yereemii 7:1-34
7 Tɔm ndʋ tɩlɩnɩ Yehowa cɔlɔ nɛ tɩtalɩ Yereemii yɔ, ndʋ yɔ:
2 «Sɩŋ Yehowa ɖɩɣa nɔnɔɔ taa nɛ ŋsusi tɔm tʋnɛ peeɖe: “Mɩ Yuuda mba tɩŋa, mɩ mba ɩsʋʋnɩ nɔnɔsɩ sɩnɛ se iluŋ Yehowa tɛɛ yɔ, ɩnɩɩ Yehowa tɔm.
3 Tɔm tʋnɛ yoyaa tɛ Yehowa, Izrayɛɛlɩ tɛ Ɛsɔ yɔɔdʋʋ: ‘Ɩñɔɔzɩ mɩ-ɖɔnɛ nɛ mɩ-lakasɩ, nɛ mankaɣ-mɩ haʋ waɖɛ se iwolo pɩ-yɔɔ nɛ ɩcaɣ lone ɖɩnɛ ɖɩ-taa.+
4 Ɩtaaɖʋ mi-lidaʋ cɛtɩm tɔm yɔɔ nɛ ɩtɔŋ se: “Yehowa templo yɔ,* Yehowa templo, Yehowa templo!”+
5 Mbʋ pʋyɔɔ yɔ ye toovenim taa ɩñɔɔzɩ mɩ-ɖɔnɛ nɛ mɩ-lakasɩ yɔ; ye toovenim taa ɩñɔnɩ siɣsiɣ wɛtʋ alɩwaatʋ ndʋ tɔm kɔŋ ɛyʋ nɛ e-koobu pɛ-hɛkʋ taa yɔ;+
6 ye ɩɩnazɩɣ agɔma, solisi* nɛ lelaa yɔ;+ ye ɩɩkpɛdɩɣ calɩm ɖulum lone ɖɩnɛ ɖɩ-taa yɔ; nɛ ye ɩɩtɩŋɩɣ ɛsɔnaa lalaa se pɩkɔnɩ mɩ-maɣmaɣ kaɖɛ yɔ;+
7 ɖɩnɛ ɛlɛ mankaɣ-mɩ haʋ waɖɛ se iwolo pɩ-yɔɔ nɛ ɩcaɣ lone ɖɩnɛ ɖɩ-taa, ɛjaɖɛ nɖɩ maha mɩ-cɔzɔnaa se pɩkɛ pa-pʋyʋ tam* yɔ ɖɩ-taa.’”»
8 «Ɛlɛ ɩwɛɛ nɛ ɩɖʋʋ mi-lidaʋ cɛtɩm tɔm yɔɔ;+ pɩɩkaɣ-mɩ kɔnʋʋ kɛzɛɣa nakɛyɛ paa ññɩɩ.
9 Ɛzɩ ɩpɩzɩɣ nɛ ɩmɩlɩɣ,+ ɩkʋʋ ɛyaa, ɩlakɩ acɛyɛ, iɖuki cɛtɩm ɖuutu,+ ɩlaɣ kɩlaŋ Baalɩ,*+ nɛ ɩtɩŋɩɣ ɛsɔnaa mba ɩtaatɩlɩ-wɛ yɔ pa-wayɩ,
10 nɛ pʋwayɩ lɛ ɩkɔŋ nɛ ɩsɩŋɩɣ mɛ-ɛsɩndaa ɖɩɣa kanɛ ka-taa, ŋga kɔ-yɔɔ ma-hɩɖɛ wɛɛ yɔ nɛ ɩyɔɔdʋʋ se: “Pakaɣ ɖa-ñʋʋ yabʋ,” ŋgʋ iɖiɣni labʋ lakasɩ kɩdɛkɛdɩsɩ sɩnɛ si-kpeekpe?
11 Ɛzɩ ɖɩɣa kanɛ, ŋga kɔ-yɔɔ ma-hɩɖɛ wɛɛ yɔ, kapɩsɩ mɩlaa sɔsaa ɖɩjaɣyɛ mɩ-ɛsɩndaa?+ Ɩna, ma-maɣmaɣ mana mbʋ iɖiɣni labʋ yɔ,» Yehowa yɔɔdʋʋna.
12 «“Ɛlɛ, lɛɛlɛɛyɔ iwolo mo-lone nɖɩ ɖɩɩwɛ Siiloo yɔ ɖɩ-taa,+ ɖenɖe mancalɩ yebu nɛ ma-hɩɖɛ wɛɛ yɔ,+ nɛ ɩna mbʋ malabɩ-ɖɩ man-samaɣ Izrayɛɛlɩ lakasɩ kɩdɛkɛdɩsɩ yɔɔ yɔ.+
13 Ɛlɛ iwobi pɩ-yɔɔ nɛ ɩlakɩ lakasɩ sɩnɛ sɩ-tɩŋa; nɛ paa mɔyɔɔdɩnɩ-mɩ nɛ mɛlɛlɩ tam sakɩyɛ yɔ,* itiwelisi.+ Mowobi pɩ-yɔɔ nɛ mayaɣ-mɩ, ɛlɛ iticosi,+ Yehowa yɔɔdʋʋna.
14 Pʋyɔɔ lɛ, ɛzɩ malabʋ Siiloo yɔ,+ mbʋ mankaɣ labʋ ɖɩɣa ŋga kɔ-yɔɔ ma-hɩɖɛ wɛɛ yɔ,+ ŋga kɔ-yɔɔ ɩɖʋʋ mi-lidaʋ yɔ,+ nɛ lone ɖɩnɛ, nɖɩ maha mɩ nɛ mɩ-cɔzɔnaa yɔ.
15 Mankaɣ-mɩ ɖɔɔnʋʋ mɛ-ɛsɩndaa, ɛzɩ maaɖɔɔnʋʋ mi-koobiya kpeekpe, Efrayim lʋlʋʋ taa mba kpeekpe yɔ.”+
16 «Piyele nɛ ña yɔ, taatɩmɩ samaɣ kanɛ kɔ-yɔɔ. Taama kubuka nɛ ŋya-m yaa taala adɩma naayɛ yaa taatendi-m pɔ-yɔɔ,+ mbʋ pʋyɔɔ yɔ maakaɣ-ŋ welisinuu.+
17 Ŋŋnaɣ mbʋ peɖiɣni labʋ Yuuda tɛtʋ ndɩ ndɩ taa nɛ Yeruzalɛm habɛɛ yɔɔ yɔ?
18 Piya ɖiɣni kpeɣluu ɖasɩ, caanaa ɖiɣni ɖʋʋ miŋ, nɛ halaa ñeɖiɣni nuutuu mʋlʋm se pala Ɛsɔdaa Abiɖe*+ kɩlaŋ kakayɩsɩ, nɛ peɖiɣni lizuu kilizasɩ ɛsɔnaa lalaa se paɖʋ-m ɖɩwɩzɩyɛ.+
19 “Ɛlɛ ma paɖʋʋ wɩzasɩ* na? Ɛzɩ pɩtɩkɛ pa-tɩ paɖʋʋ wɩzasɩ, se pɩkɛ pa-maɣmaɣ pɛ-fɛyɛ na?”+ Yehowa yɔɔdʋʋna.
20 Pʋyɔɔ lɛ, tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Ɩna! Mankaɣ pɩyʋʋ man-pana nɛ man-ɖɩwɩzɩyɛ lone ɖɩnɛ ɖɩ-yɔɔ,+ ɛyʋ yɔɔ nɛ kpɩnɛ yɔɔ, hayɩm taa tɩŋ yɔɔ nɛ tataa pee yɔɔ; akaɣ mʋʋ miŋ nɛ paakaɣ-yɛ hɛzʋʋ.”+
21 «Tɔm tʋnɛ yoyaa tɛ Yehowa, Izrayɛɛlɩ tɛ Ɛsɔ yɔɔdʋʋ: “Iwolo, ɩkpaɣ mɩ-kɩlaŋ kɩñaɣzɩŋ nɛ ɩsɔzɩ mɩ-kɩlaŋ lɛɛŋ yɔɔ, nɛ mɩ-maɣmaɣ ɩtɔɔ ɩ-nandʋ.+
22 Mbʋ pʋyɔɔ yɔ, kɩyakʋ ŋgʋ malɩzɩ mɩ-cɔzɔnaa Ejipiti ɛjaɖɛ taa yɔ, mantɩyɔɔdɩnɩ-wɛ yaa mantɩɖʋ-wɛ paɣtʋ kɩlaŋ kɩñaɣzɩŋ nɛ kɩlaŋ lɛɛŋ yɔɔ.+
23 Ɛlɛ manɖʋ-wɛ paɣtʋ tʋnɛ: ‘Ɩña mɔ-nɔɔ taa tɔm, nɛ mankaɣ pɩsʋʋ mɩ-Ɛsɔ, nɛ ɩkaɣ pɩsʋʋ man-samaɣ.+ Pɩwɛɛ se ɩɖɔ nʋmɔʋ ŋgʋ manɖʋʋ-mɩ paɣtʋ se ɩɖɔ kɩ-taa yɔ kɩ-taa ɖeyi ɖeyi, se pɩsa nɛ piɖeni-mɩ.’”+
24 Ɛlɛ patiwelisi nɛ patɩkʋ nɩŋgbaŋʋʋ;+ ɛlɛ pɔɖɔm mbʋ pa-maɣmaɣ paɖʋwa se palakɩ yɔ pɩ-yɔɔ,* palabɩ ñʋʋ taa ɖoŋ nɛ patɩŋɩɣ pa-laŋɩyɛ kɩdɛkɛdɩyɛ,+ nɛ ɖenɖe ɛzɩ paaɖɛnɩ ɛsɩndaa lɛ, papɩsɩɣnɩ wayɩ,
25 kpaɣnɩ kɩyakʋ ŋgʋ mɩ-cɔzɔnaa lɩ Ejipiti ɛjaɖɛ taa yɔ nɛ pɩkɔɔ pɩtalɩ sɔnɔ kɩyakʋ kʋnɛ.+ Pʋyɔɔ mɛwɛɛ nɛ mentiyiɣ ma-lɩmɖʋyaa mba payɩ pɛkɛ nayaa yɔ mɩ-cɔlɔ, mentiyiɣ-wɛ paa ɖooye, mentiyiɣ-wɛ nɛ mɛlɛlɩɣ tam sakɩyɛ.*+
26 Ɛlɛ pekizi se paawelisiɣni-m, nɛ patɩkʋ nɩŋgbaŋʋʋ.+ Ɛlɛ palabɩ ñʋʋ taa ɖoŋ,* nɛ pala lakasɩ kɩdɛkɛdɩsɩ nɛ pɩkpaɖɩ pɔ-cɔzɔnaa!
27 «Ŋkaɣ-wɛ heyuu tɔm tʋnɛ tɩ-tɩŋa,+ ɛlɛ paakaɣ-ŋ welisinuu; ŋkaɣ-wɛ yaʋ, ɛlɛ paakaɣ-ŋ cosuu.
28 Nɛ ŋkaɣ-wɛ heyuu se: “Ɛjaɖɛ nɖɩ ɖitiwelisi ɖɩ-Ɛsɔ Yehowa nɔɔ nɛ ɖikizi se ɖɩɩmʋʋ lɔŋ sɩɣzʋʋ yɔ nɖɩ yɔ. Siɣsiɣ wɛtʋ mʋwaa nɛ halɩ paatɩɩyɔɔdʋʋ tɩ-tɔm pɛ-hɛkʋ taa.”*+
29 «Hʋ ñɔ-ñɔsɩ kɩɖaɣlɩsɩ* nɛ ŋlɔ-sɩ, nɛ ŋtee kʋñɔwiye hendu piyisi nzɩ sɩ-yɔɔ wɛ kpɛɖɛ yɔ sɩ-yɔɔ, mbʋ pʋyɔɔ yɔ Yehowa lɔ kpaɖʋʋ kʋnɛ, ŋgʋ kɩɖʋ-ɩ ɖɩwɩzɩyɛ yɔ, nɛ ɛkaɣ-kʋ yebu.
30 “Mbʋ pʋyɔɔ yɔ Yuuda samaɣ labɩ mbʋ pɩfɛyɩ ɖeu mɛ-ɛsɩndaa yɔ. Pasɩ pa-sɩʋ kpelisi nzɩ sɩwɛ kiniŋ yɔ ɖɩɣa ŋga kɔ-yɔɔ wɛ ma-hɩɖɛ yɔ ka-taa, se pɩsa nɛ pepisi-kɛ,+ Yehowa yɔɔdʋʋna.
31 Pama lona kʋkʋya Tofɛɛtɩ ŋgʋ kɩwɛ Hinɔɔm Pɩyalʋ Fɛɛʋ* taa+ yɔ kɩ-taa, se pɩsa nɛ pañaɣzɩ pa-pɩyalaa nɛ pɛ-pɛlaa miŋ,+ pɩkɛ mbʋ mantaapɔzɩ-wɛ se pala yɔ, nɛ halɩ pɩtaatɩɩkpaʋ ma-laŋɩyɛ taa wiɖiyi.”*+
32 «“Pʋyɔɔ lɛ, ɩna, kɩyakɩŋ ɖiɣni kɔm; nɛ paakaɣ-kʋ tasʋʋ yaʋ se Tofɛɛtɩ yaa Hinɔɔm Pɩyalʋ Fɛɛʋ* ɛlɛ Kʋgʋʋ Fɛɛʋ. Pakaɣ pim sɩɖaa Tofɛɛtɩ taa pɩkɔɔ nɛ pɩtalɩ alɩwaatʋ ndʋ pɩtɩtasɩ kazʋʋ lone naɖɩyɛ yɔ,+ Yehowa yɔɔdʋʋna.
33 Nɛ samaɣ kanɛ kɛ-ɛyaa mba pasɩba yɔ po-tomnasɩ kaɣ pɩsʋʋ ɛsɔdaa sumasɩ nɛ tɛtʋ yɔɔ kpɩna tɔɔnaɣ, nɛ nɔɔyʋ ɛɛkaɣ wɛʋ se ɛɖʋ-yɛ sɔɔndʋ nɛ ɛɖɔɔnɩ-yɛ.+
34 Mankaɣ yebu nɛ amɛya taŋ nɛ taa leleŋ taŋ sɩɩ tɩnaɣ, mankaɣ yebu nɛ walʋ nɔɔ nɛ asɛyʋ kɩfalʋ nɔɔ pasɩɩ tɩnaɣ+ Yuuda tɛtʋ ndɩ ndɩ taa nɛ Yeruzalɛm habɛɛ yɔɔ, mbʋ pʋyɔɔ yɔ ɛjaɖɛ kaɣ pɩsʋʋ njɛyɛ.”»+
Pɩ-tɛɛ tɔm
^ Piye piye, «Pɛkɛnɩ Yehowa templo.» Templo kuduyuŋ kpeekpe tɔm pɔyɔɔdʋʋ.
^ Yaa «piya nzɩ sɩfɛyɩnɩ caanaa yɔ.»
^ Yaa «kpaɣnɩ tam tam nɛ piwolo tam tam.»
^ Yaa «ɩlaɣ kɩlaŋ Baalɩ nɛ kɩlaŋ ñɔsɩ kpaɣ.»
^ Piye piye, «paa mankʋyaɣ tanaŋ tɛɛ lɔŋ nɛ mɔyɔɔdʋʋnɩ-mɩ yɔ.»
^ Pɩkɛ hɩɖɛ kɩsɛsɛyɛ nɖɩ payaɣaɣnɩ ɛsɔ halɩñɩnʋ weyi Izrayɛɛlɩ mba tisuu yebiyaa sɛɣaɣ yɔ; pʋtɔma pɩkɛɣnɩ lʋlʋʋ tɛ ɛsɔ.
^ Yaa «paɖʋʋ ɖɩwɩzɩyɛ; pacaɣ tɔm.»
^ Yaa «pɔɖɔm pa-maɣmaɣ pɔ-lɔŋ tasʋʋ yɔɔ.»
^ Piye piye, «mankʋyaɣ tanaŋ tɛɛ lɔŋ nɛ mentiyiɣ-wɛ.»
^ Piye piye, «Ɛlɛ palaba nɛ po-pondone kpa ɖoŋ.»
^ Piye piye, «nɛ pɛsɛtɩ-tʋ pɔ-nɔɔ taa.»
^ Yaa «Hʋ ñɔsɩ nzɩ ŋhawa yɔ.»
^ Cɔnɩ Tɔm pee sɔsɔna tɔbʋʋ lɩzʋʋ «Gehena.»
^ Yaa «pɩtɩkɔɔ ma-maɣzɩm taa wiɖiyi.»
^ Cɔnɩ Tɔm pee sɔsɔna tɔbʋʋ lɩzʋʋ «Gehena.»
