Yozuwee 11:1-23
11 Hazɔɔrɩ wiyaʋ Yabiini ñɩtaa nɛ ɛnɩɩ-tʋ lɛ, etiyini tɔm Madɔɔnɩ wiyaʋ+ Yobaabɩ, nɛ Simirɔɔnɩ wiyaʋ, Akɩsaaf wiyaʋ,+
2 awiya wena aawɛ hayo kiŋ pʋŋ egeetiye taa yɔ, wena aawɛ Kinerɛtɩ hadɛ kiŋ kɛdɛɛnzɩ* taa yɔ, wena aawɛ Seefela nɛ Dɔɔr kajalanzɩ+ taa wɩsɩ ɖɩɖʋyɛ taa yɔ,
3 Kanaŋ ñɩma+ mba paawɛ wɩsɩ ɖɩlɩyɛ taa nɛ wɩsɩ ɖɩɖʋyɛ taa yɔ, Amoori mba,+ Hɛɛtɩ mba, Perizi mba, Yebuusi ñɩma mba paawɛ pʋŋ egeetiye taa yɔ nɛ Hivi ñɩma+ mba paawɛ Hɛrɩmɔɔnɩ Pʋʋ+ tɛɛ, Mizpaa egeetiye taa yɔ.
4 Nɛ pɔkɔɔ, pa nɛ pɔ-sɔɔjanaa kpeekpe, paaɖɔ siŋŋ ɛzɩ teŋgu nɔɔ kañɩŋa pee yɔ, paakpɛndɩnɩ kpaŋnaŋ nɛ you kɛɛkɛɛnaa sakɩyɛ kpem.
5 Awiya ana a-tɩŋa, aanɩnɩ ɖama se akatɩ, nɛ akɔɔ nɛ akpeɣli Merɔɔm lɩm nɔɔ se ayooni Izrayɛɛlɩ.
6 Ðɩnɛ ɛlɛ, Yehowa heyi Yozuwee se: «Taase-wɛ sɔɔndʋ,+ mbʋ pʋyɔɔ yɔ cee alɩwaatʋ tʋnɛ tɩ-taa mbʋ yɔ lɛ, manɖʋzʋʋ pa-tɩŋa Izrayɛɛlɩ mba nesi tɛɛ nɛ pakaɣ-wɛ kʋʋ. Pɩwɛɛ se ŋsɛtɩ pa-kpaŋnaŋ nɩŋgbanzɩ hola,+ nɛ ŋñaɣzɩ miŋ pɛ-kɛɛkɛɛnaa.»
7 Peeɖe Yozuwee nɛ you laɖaa kpeekpe potudi-wɛ Merɔɔm lɩm nɔɔ nɛ poyooni-wɛ.
8 Yehowa ɖʋzɩ-wɛ Izrayɛɛlɩ mba nesi tɛɛ+ nɛ pawabɩ-wɛ, nɛ paɖʋ pa-wayɩ nɛ powolo patalɩ ɖooo Siidɔɔ Sɔsɔʋ+ nɛ Misrefɔɔtɩ-Mayim+ nɛ Mizpee Fɛɛʋ taa wɩsɩ ɖɩlɩyɛ taa, nɛ pakʋ-wɛ nɛ pɩkɔɔ pɩsɩɩnɩ alɩwaatʋ ndʋ pɩtɩkazɩ nɔɔyʋ se ehiɣ ñʋʋ yabʋ yɔ.+
9 Nɛ Yozuwee labɩ-wɛ ɖeyi ɖeyi ɛzɩ Yehowa kaaheyuu-i yɔ; ɛsɛtɩ pa-kpaŋnaŋ nɩŋgbanzɩ hola nɛ ɛñaɣzɩ miŋ pɛ-kɛɛkɛɛnaa.+
10 Pɩtasɩ lɛ, Yozuwee pɩsaa nɛ ɛmʋ Hazɔɔrɩ tɛtʋ nɛ ɛkʋ ti-wiyaʋ nɛ laɣɖɛ,+ mbʋ pʋyɔɔ yɔ ɖooo lɛ, Hazɔɔrɩ kaakɛnɩ kewiyisi nzɩ sɩ-tɩŋa sɩ-ñʋʋ.
11 Pakʋ tɩ-taa ɛyaa* tɩŋa nɛ laɣɖɛ, paɖɩzɩ pa-tɩŋa.+ Mbʋ pifeziɣ yɔ pɩ-taa nabʋyʋ tɩkazɩ.+ Pʋwayɩ lɛ ɛñaɣzɩ miŋ Hazɔɔrɩ tɛtʋ.
12 Yozuwee mʋ awiya ana a-tɛtʋ kpeekpe nɛ ɛkʋ a-tɩŋa nɛ laɣɖɛ.+ Ɛɖɩzɩ pe-kpeekpe+ ɛzɩ Yehowa lɩmɖʋyʋ Moyizi kaaɖʋʋ paɣtʋ yɔ.
13 Ɛlɛ Izrayɛɛlɩ mba tɩñaɣzɩ miŋ tɛtʋ ndʋ tɩwɛ piyisi yɔɔ yɔ tɩ-taa natʋyʋ nɛ pɩtasɩnɩ Hazɔɔrɩ tɛtʋ; ti-ɖeke Yozuwee kaañaɣzɩ miŋ.
14 Izrayɛɛlɩ mba lazɩ tɛtʋ ndʋ ti-wondu tɩŋa nɛ kpɩna nɛ pasɩɩ pa-tɩ.+ Ɛlɛ pakʋ ɛyaa tɩŋa nɛ laɣɖɛ nɛ pɩkɔɔ pɩsɩɩnɩ alɩwaatʋ ndʋ paɖɩzɩ paa weyi yɔ.+ Patiyele nɔɔyʋ nɛ ɛ-ɛsa.+
15 Paɣtʋ ndʋ ɖeyi ɖeyi Yehowa kaaɖʋ ɛ-lɩmɖʋyʋ Moyizi yɔ, ndʋ Moyizi ɖʋ Yozuwee,+ nɛ mbʋ ɖɔɖɔ Yozuwee laba. Paɣtʋ ndʋ payɩ Yehowa kaaɖʋ Moyizi yɔ, pɩtɩkazɩ tɩ-taa natʋyʋ se Yozuwee tɩɖɔ tɩ-yɔɔ.+
16 Yozuwee mʋ tɛtʋ ndʋ tɩ-tɩŋa, pʋŋ egeetiye, Negɛɛbʋ+ tɩŋa, Gosɛɛnɩ ɛjaɖɛ kpeekpe, Seefela,+ Araabaa,+ nɛ Izrayɛɛlɩ pʋŋ egeetiye nɛ ɖɩ-tɛ Seefela,*
17 kpaɣnɩ Halaakɩ Pʋʋ ŋgʋ kɩkpaɣ Seyiri yɔ, nɛ piwolo pɩtalɩ ɖooo Baalɩ-Gaadɩ,+ Libaŋ Fɛɛʋ taa Hɛrɩmɔɔnɩ Pʋʋ+ tɛɛ, nɛ ɛkpa tɩ-awiya tɩŋa nɛ ɛkʋ a-kpeekpe.
18 Yozuwee kpaɣ alɩwaatʋ sakɩyɛ nɛ eyooni awiya ana a-tɩŋa.
19 Tɛtʋ natʋyʋ tiyele se tɩ nɛ Izrayɛɛlɩ mba pala laŋhɛzɩyɛ nɛ pɩtasɩnɩ Hivi ñɩma mba paawɛ Gabawɔɔ yɔ.+ Palabɩ you pʋcɔ nɛ pamʋ tɛtʋ lɛɛtʋ tɩŋa.+
20 Yehowa kaayebina nɛ tɩ-taa mba laŋa sʋʋ kpɩzɩŋ+ nɛ poyooni Izrayɛɛlɩ mba, se pɩsa nɛ ɛɖɩzɩ-wɛ nɛ ɛtaana pa-pʋtɔdɩyɛ paa ññɩɩ.+ Pɩɩwɛɛ se paɖɩzɩ-wɛ ɛzɩ Yehowa kaaɖʋʋ paɣtʋ Moyizi yɔ.+
21 Alɩwaatʋ ndʋ tɩ-taa Yozuwee ɖɩzɩ Anakɩ mba+ pʋŋ egeetiye taa, Ebrɔŋ taa, Debir taa, Anab nɛ Yuuda pʋŋ egeetiye kpeekpe taa nɛ Izrayɛɛlɩ pʋŋ egeetiye kpeekpe taa. Yozuwee kaaɖɩzɩ pa nɛ pɛ-tɛtʋ.+
22 Anakɩ tʋ nɔɔyʋ taakazɩ Izrayɛɛlɩ mba ɛjaɖɛ taa; Gaazaa,+ Gaatɩ+ nɛ Asɩdoodi+ taa ɖeke paakazaa.+
23 Mbʋ Yozuwee mʋ tɛtʋ kpeekpe ɛzɩ Yehowa kaalabʋ Moyizi tamaɣ yɔ;+ pʋwayɩ lɛ, Yozuwee cɛlɩ-tʋ Izrayɛɛlɩ mba se pɩkɛnɩ pa-ñɩm, se pɩsa nɛ patayɩ-tʋ pe-cejewe,+ paa nɖɩ nɛ ɖi-ɖeɖe. Nɛ ɛjaɖɛ hɛzɩnɩ you labʋ.+
