Yozuwee 14:1-15
14 Tɛtʋ ndʋ Izrayɛɛlɩ mba mʋwa se tɩkɛ pe-ɖeɖe Kanaŋ ɛjaɖɛ taa yɔ, ndʋ cɔjɔ Eleyaazaarɩ nɛ Nuuni pɩyalʋ Yozuwee nɛ Izrayɛɛlɩ cejewe taa hɔŋ ñʋndɩnaa cɛlɩ-wɛ yɔ ndʋ yɔ.+
2 Pɔtɔ piye nɛ patayɩnɩ+ cejewe 9 nɛ hɔɔlʋʋ a-ɖeɖe, ɛzɩ Yehowa kaatɩŋnʋʋ Moyizi yɔɔ nɛ ɛɖʋ paɣtʋ yɔ.+
3 Moyizi kaacɛlɩ cejewe 2 nɛ hɔɔlʋʋ a-ɖeɖe Yɔɔrdaŋ hɔɔlʋʋ lɛɛkʋ* yɔɔ,+ ɛlɛ ɛtɩha Leevi mba tɛtʋ natʋyʋ cejewe lɛɛna hɛkʋ taa.+
4 Pakpaɣ Yosɛɛfʋ lʋlʋʋ taa mba se pɛkɛ cejewe 2,+ Manaasee nɛ Efrayim;+ nɛ patɩcɛlɩ Leevi mba tɛtʋ nɛ pɩtasɩnɩ tɛtʋ+ ndʋ paacɛlɩ-wɛ se pacaɣ tɩ-taa yɔ nɛ tɩ-hayɩm* se pɩkɛnɩ ɖenɖe pa-kpɩna nɛ po-wondu wɛɣ yɔ.+
5 Nɛ Izrayɛɛlɩ mba tayɩ tɛtʋ ɛzɩ Yehowa kaaɖʋʋ paɣtʋ Moyizi yɔ.
6 Pʋwayɩ lɛ, Yuuda abalaa wolo Yozuwee cɔlɔ Gilgaalɩ,+ nɛ Kenizi tʋ Yefunee pɩyalʋ Kalɛɛbɩ+ heyi-i se: «Ŋsɩm camɩyɛ tɔm ndʋ Yehowa heyi+ Ɛsɔ toovenim tʋ tɛ ɛyʋ Moyizi+ ma nɛ ŋ ɖɔ-yɔɔ Kadɛɛsɩ-Barneya+ yɔ.
7 Maawɛnɩ pɩnzɩ 40 alɩwaatʋ ndʋ Yehowa lɩmɖʋyʋ Moyizi kaatiyi-m se mankʋyɩ Kadɛɛsɩ-Barneya nɛ mowolo mɔncɔŋ tɛtʋ yɔ,+ nɛ manpɩsaa mɔnkɔɔ lɛ, mɛnkɛdɩ-ɩ ɖeyi ɖeyi mbʋ manawa yɔ.+
8 Mon-koobiya mba ma nɛ wɛ ɖɩɩkpawa yɔ, paa paayeba nɛ pitii samaɣ yɔɔɔ yɔ,* ma lɛ, mantɩŋ mɛ-Ɛsɔ Yehowa nɛ ma-laŋɩyɛ pilim.+
9 Moyizi ɖuu puwiye nɛ ɛyɔɔdɩ se: “Tɛtʋ ndʋ ŋɖɔm tɩ-yɔɔ yɔ tɩkaɣ pɩsʋʋ ña nɛ ña-pɩyalaa mi-ɖeɖe tam, mbʋ pʋyɔɔ yɔ ŋtɩŋ mɛ-Ɛsɔ Yehowa nɛ ña-laŋɩyɛ pilim.”+
10 Lɛɛlɛɛyɔ, ɛzɩ Yehowa kaalabʋ tamaɣ yɔ,+ eyeba nɛ mɛwɛɛ wezuu+ pɩnzɩ 45 sɩnɛ sɩ-taa, kpaɣnɩ alɩwaatʋ ndʋ Yehowa kaalabɩ tamaɣ ŋga Moyizi, alɩwaatʋ ndʋ Izrayɛɛlɩ ɖɔŋaɣ kañɩmbusuu taa yɔ;+ mɛwɛ wezuu halɩ nɛ sɔnɔ, nɛ mɛwɛnɩ pɩnzɩ 85.
11 Nɛ sɔnɔ, mɛwɛ ɖoŋ ɛzɩ maawɛʋ ɖoŋ kɩyakʋ ŋgʋ Moyizi kaatiyi-m yɔ. Mon-ɖoŋ wɛ lɛɛlɛɛyɔ ɛzɩ ɛɛwɛʋ alɩwaatʋ ndʋ yɔ, mɛwɛ ɖoŋ se mala you nɛ mala tʋma lɛɛna.
12 Pʋyɔɔ lɛ, cɛlɩ-m pʋŋ egeetiye nɖɩ Yehowa kaalabɩ-m ɖɩ-tamaɣ kɩyakʋ ŋgʋ yɔ. Ŋŋnɩ kɩyakʋ ŋgʋ se Anakɩ mba+ wɛ peeɖe nɛ pɛwɛnɩ tɛtʋ ɖoŋ ñɩndʋ* sɔsɔtʋ,+ paa mbʋ yɔ, paa pɩɩkpawa nɛ pitii yɔ,* Yehowa kaɣ wɛʋ mɔn-cɔlɔ,+ nɛ mankaɣ-wɛ ɖɔɔnʋʋ, ɛzɩ Yehowa kaalabʋ-m tamaɣ yɔ.»+
13 Peeɖe Yozuwee wazɩ Yefunee pɩyalʋ Kalɛɛbɩ nɛ ɛcɛlɩ-ɩ Ebrɔŋ se kɩpɩsɩ ɛ-ñɩm.+
14 Pʋyɔɔ Ebrɔŋ pɩsɩ Kenizi tʋ Yefunee pɩyalʋ Kalɛɛbɩ ñɩm halɩ nɛ sɔnɔ, mbʋ pʋyɔɔ yɔ ɛtɩŋ Izrayɛɛlɩ tɛ Ɛsɔ Yehowa nɛ ɛ-laŋɩyɛ pilim.+
15 Ðooo lɛ, payaɣaɣ Ebrɔŋ se Kiriyatɩ-Arba+ (Arba kaakɛnɩ Anakɩ mba taa abalʋ kɩlɩm). Nɛ ɛjaɖɛ hɛzɩnɩ you labʋ.+
Pɩ-tɛɛ tɔm
^ Pʋ-tɔbʋʋ se Yɔɔrdaŋ wɩsɩ ɖɩlɩyɛ hɔɔlʋʋ.
^ Yaa «ti-lona wena a-taa kpɩna tɔkɩ ñɩtʋ yɔ.»
^ Piye piye, «nɛ samaɣ laŋɩyɛ yoli yɔ.»
^ Yaa «pɩtʋʋ fɛyɩ.»
^ Cɔnɩ Tɔm pee sɔsɔna tɔbʋʋ lɩzʋʋ.
