Yozuwee 17:1-18
17 Pʋwayɩ lɛ, pɔtɔ piye+ nɛ pɛcɛlɩ Manaasee+ cejewiye ɖi-ɖeɖe, mbʋ pʋyɔɔ yɔ ɛɛkɛ Yosɛɛfʋ kajalaɣ pɩɣa.+ Makiir+ weyi ɛɛkɛ Manaasee kajalaɣ pɩɣa nɛ Galaadɩ caa yɔ, ɛɛkɛ you laɖʋ, pʋyɔɔ ɛmʋ Galaadɩ nɛ Basaanɩ.+
2 Nɛ pɔtɔ piye nɛ pɛcɛlɩ Manaasee lʋlʋʋ taa ñɩma mba pɩkazaa yɔ pe-ɖeɖe, paa hɔʋ ŋgʋ lɛ kɩ nɛ ki-ɖeɖe: Abi-Ezɛɛrɩ+ pɩyalaa, Helɛɛkɩ pɩyalaa, Asɩriyɛɛlɩ pɩyalaa, Sekɛɛm pɩyalaa, Hefɛɛrɩ pɩyalaa, nɛ Semida pɩyalaa. Yosɛɛfʋ pɩyalʋ Manaasee lʋlʋʋ taa abalaa lɛ, pa nɛ pɔ-hɔŋ.+
3 Ɛlɛ Selofehaadɩ,+ Hefɛɛrɩ pɩyalʋ, Galaadɩ pɩyalʋ, Makiir pɩyalʋ, Manaasee pɩyalʋ, taawɛɛnɩ abalɩbiya, halɩbiya ɖeke ɛɛwɛna; ɛ-pɛlaa hɩla yɔ: Maala, Noowa, Hogɩla, Milka nɛ Tiriza.
4 Pʋyɔɔ pɔkɔm cɔjɔ Eleyaazaarɩ,+ Nuuni pɩyalʋ Yozuwee nɛ ñʋndɩnaa pɔ-cɔlɔ nɛ peheyi-wɛ se: «Yehowa kaaɖʋnɩ paɣtʋ Moyizi se ɛcɛlɩ-ɖʋ ñɩm nabʋyʋ ɖo-koobiya hɛkʋ taa.»+ Pʋyɔɔ ɛcɛlɩ-wɛ ñɩm nabʋyʋ pa-caa koobiya hɛkʋ taa, ɛzɩ Yehowa kaaɖʋʋ paɣtʋ yɔ.+
5 Patasɩ cɛlʋʋ kotonzi 10 Manaasee nɛ pɩtasɩnɩ Galaadɩ nɛ Basaanɩ egeetiye nɖɩ ɖɩɩwɛ Yɔɔrdaŋ hɔɔlʋʋ lɛɛkʋ* yɔɔ yɔ,+
6 mbʋ pʋyɔɔ yɔ Manaasee pɛlaa mʋ pa-ñɩm, nɛ pɩtasɩnɩ ɛ-pɩyalaa, nɛ Galaadɩ egeetiye pɩsɩ Manaasee lʋlʋʋ taa ñɩma mba pɩkazaa yɔ pa-ñɩm.
7 Manaasee kamaɣ kaapaɣzɩnɩ Asɛɛrɩ nɛ piwolo Mikmetatɩ,+ ŋgʋ kɩha ɛsa nɛ Sekɛɛm+ yɔ, nɛ kamaɣ ɖɛɛnɩ hadɛ kiŋ hɔɔlʋʋ taa* Ɛn-Tapuwa mba egeetiye taa.
8 Tapuwa+ egeetiye kaapɩsɩ Manaasee ñɩm, ɛlɛ Tapuwa tɛtʋ ndʋ tɩwɛ Manaasee kamaɣ yɔɔ yɔ tʋtʋ ñaapɩsɩ Efrayim lʋlʋʋ taa mba ñɩm.
9 Nɛ kamaɣ tii nɛ kowolo Kana Lemeɣa cɔlɔ, lemeɣa hadɛ kiŋ hɔɔlʋʋ taa. Efrayim tɛtʋ natʋyʋ kaawɛ Manaasee tɛtʋ taa,+ nɛ Manaasee kamaɣ kaawɛ lemeɣa hayo kiŋ nɛ kowolo kasɩɩnɩ teŋgu.+
10 Efrayim kaatɩnɩ hadɛ kiŋ hɔɔlʋʋ, nɛ Manaasee kaatɩnɩ hayo kiŋ hɔɔlʋʋ, nɛ teŋgu kaakɛnɩ ɛ-kamaɣ,+ nɛ hayo kiŋ lɛ, Manaasee egeetiye kaatalɩ* Asɛɛrɩ, nɛ wɩsɩ ɖɩlɩyɛ taa kiŋ lɛ, ɖɩɩtalɩ Isakaarɩ.
11 Isakaarɩ nɛ Asɛɛrɩ pa-ageeta taa lɛ, paacɛlɩ Manaasee Bɛtɩ-Seyanɩ nɛ tɛtʋ ndʋ tɩɩcɔ-kʋ nɛ tɩta yɔ, Ibleyam+ nɛ tɛtʋ ndʋ tɩɩcɔ-kʋ nɛ tɩta yɔ, Dɔɔr+ mba nɛ tɛtʋ ndʋ tɩɩcɔ-kʋ nɛ tɩta yɔ, Ɛn-Dɔɔr+ mba nɛ tɛtʋ ndʋ tɩɩcɔ-kʋ nɛ tɩta yɔ, Taanakɩ+ mba nɛ tɛtʋ ndʋ tɩɩcɔ-kʋ nɛ tɩta yɔ, Megido mba nɛ tɛtʋ ndʋ tɩɩcɔ-kʋ nɛ tɩta yɔ, piyisi ageeta 3.
12 Ɛlɛ Manaasee lʋlʋʋ taa mba taapɩzɩ nɛ pamʋ tɛtʋ ndʋ; Kanaŋ mba kaatɛm pa-taa se pacakɩ tɛtʋ ndʋ tɩ-taa.+
13 Izrayɛɛlɩ mba kɔm nɛ pakpa ɖoŋ lɛ, pakpa Kanaŋ mba nɛ ɖoŋ nɛ palakɩ tʋma,+ ɛlɛ patɩɖɔɔnɩ-wɛ caɣ caɣ.+
14 Yosɛɛfʋ lʋlʋʋ taa mba pɔzɩ Yozuwee se: «Ɛbɛ yɔɔ ŋcɛlɩ-ɖʋ* kotoŋa kʋɖʋmaɣ koŋ+ se pɩkɛnɩ ɖa-ñɩm? Ðɩkɛ samaɣ ŋga kɔɖɔwa yɔ, mbʋ pʋyɔɔ yɔ Yehowa wazɩ-ɖʋ halɩ nɛ sɔnɔ.»+
15 Yozuwee cosi-wɛ se: «Ye ɩkɛ samaɣ ŋga kɔɖɔ kpem mbʋ yɔ, ɩkpa laʋ tɛɛ Perizi mba+ nɛ Refayim mba+ ɛjaɖɛ taa nɛ iti laʋ nɛ ɩcaɣ peeɖe, ɛzɩma Efrayim pʋŋ egeetiye+ tɩɖɔɔ-mɩ yɔ pʋyɔɔ.»
16 Ðɩnɛ ɛlɛ, Yosɛɛfʋ lʋlʋʋ taa mba yɔɔdɩ se: «Pʋŋ egeetiye tɩɖɔɔ-ɖʋ, nɛ Kanaŋ ñɩma mba payɩ pɛwɛ fɛɛʋ egeetiye taa yɔ pɛwɛnɩ ñɩɣtʋ you kɛɛkɛɛnaa,*+ mba pɛwɛ Bɛtɩ-Seyanɩ+ nɛ tɛtʋ ndʋ tɩcɔ-kʋ nɛ tɩta yɔ tɩ-taa yɔ, nɛ pɩkpɛndɩnɩ mba pɛwɛ Yizreyɛɛlɩ Fɛɛʋ taa yɔ.»+
17 Nɛ Yozuwee heyi Yosɛɛfʋ ɖɩɣa, Efrayim nɛ Manaasee se: «Ɩkɛ samaɣ ŋga kɔɖɔwa yɔ, nɛ ɩwɛ ɖoŋ siŋŋ. Ɩɩkaɣ mʋʋ kotoŋa kʋɖʋmaɣ ɖeke,+
18 ɛlɛ pʋŋ egeetiye kaɣ kɛʋ mɩ-ñɩm ɖɔɖɔ.+ Paa ɖɩkɛ laʋ yɔ, ɩkaɣ-kʋ tim nɛ kɩkaɣ kɛʋ mi-egeetiye kamaɣ. Mbʋ pʋyɔɔ yɔ ɩkaɣ Kanaŋ mba ɖɔɔnʋʋ, paa pɛwɛ ɖoŋ nɛ pɛwɛɛnɩ ñɩɣtʋ you kɛɛkɛɛnaa yɔ.»*+
Pɩ-tɛɛ tɔm
^ Pʋ-tɔbʋʋ se Yɔɔrdaŋ wɩsɩ ɖɩlɩyɛ hɔɔlʋʋ.
^ Piye piye, «nɩwaŋ yɔɔ.»
^ Yaa «nɛ hayo kiŋ lɛ, Manaasee samaɣ kaatalɩ.» Piye piye, «nɛ hayo kiŋ lɛ, paatalɩ.»
^ Piye piye, «ŋcɛlɩ-m.»
^ Yaa «pɛwɛnɩ you kɛɛkɛɛnaa mba pɔ-pɔbɔla yɔɔ wɛ ñɩɣtʋ sɩsɩ kɩɖaɣlɩsɩ yɔ.»
^ Yaa «pɛwɛɛnɩ you kɛɛkɛɛnaa mba pɔ-pɔbɔla yɔɔ wɛ ñɩɣtʋ sɩsɩ kɩɖaɣlɩsɩ yɔ.»
