Yozuwee 18:1-28
18 Nɛ Izrayɛɛlɩ mba samaɣ kpeekpe kpeɣli Siiloo,+ nɛ pesiɣ kediɣzaɣ kizinziku peeɖe,+ mbʋ pʋyɔɔ yɔ ɛjaɖɛ tɛm wɛʋ pe-nesi tɛɛ.+
2 Ɛlɛ pɩɩkazɩ Izrayɛɛlɩ mba cejewe 7 nɛ ataatɩɩmʋtɩ a-ɖeɖe.
3 Pʋyɔɔ Yozuwee pɔzɩ Izrayɛɛlɩ mba se: «Ɩwɛɣ nɛ ɩlakɩ ninika nɛ iiwoki se ɩmʋ ɛjaɖɛ nɖɩ mɩ-cɔzɔnaa tɛ Ɛsɔ Yehowa cɛlɩ-mɩ yɔ nɛ pɩkɔɔ pɩsɩɩnɩ ɖooye?+
4 Ɩlɩzɩ-m abalaa 3 paa cejewiye nɖɩ lɛ ɖɩ-taa nɛ mentiyi-wɛ; pakaɣ wobu nɛ pɔcɔɔ ɛjaɖɛ taa nɛ palɩzɩ-ɖɩ takayaɣ taa ɛzɩ pɩpɔzʋʋ se paa cejewiye nɖɩ lɛ ɖɩmʋ yɔ. Pʋwayɩ lɛ, paapɩsɩ nɛ pɔkɔɔ mɔn-cɔlɔ.
5 Pɩwɛɛ se patayɩ-ɖɩ ɖama hɔɔlɩŋ 7 taa.+ Yuuda kaɣ wɛʋ e-egeetiye taa, hadɛ kiŋ,+ nɛ Yosɛɛfʋ ɖɩɣa kaɣ wɛʋ ke-egeetiye taa, hayo kiŋ.+
6 Ɛlɛ mɩ lɛ, ɩlɩzɩ ɛjaɖɛ takayaɣ taa nɛ ɩtayɩ-ɖɩ hɔɔlɩŋ 7 taa, nɛ ɩkɔnɩ mɔn-cɔlɔ cɩnɛ, nɛ mankaɣ-mɩ tɔʋ piye+ cɩnɛ, ɖɛ-Ɛsɔ Yehowa ɛsɩndaa.
7 Ɛlɛ Leevi mba fɛyɩnɩ ɖeɖe mɩ-hɛkʋ taa,+ mbʋ pʋyɔɔ yɔ Yehowa cɔjɔtʋ tʋmɩyɛ kɛnɩnɩ pa-ñɩm;+ Gaadɩ, Rubɛɛnɩ nɛ Manaasee cejewiye hɔɔlʋʋ+ ñɛtɛm mʋʋ pa-ñɩm Yɔɔrdaŋ wɩsɩ ɖɩlɩyɛ hɔɔlʋʋ taa, ñɩm mbʋ Yehowa lɩmɖʋyʋ Moyizi kaacɛlɩ-wɛ yɔ.»
8 Nɛ abalaa mba pɔñɔɔzɩ pa-tɩ se pɛɖɛɣ, nɛ Yozuwee ɖʋ paɣtʋ mba pɩɩwɛɛ se palɩzɩ ɛjaɖɛ takayaɣ taa yɔ se: «Iwolo nɛ ɩcɔɔ ɛjaɖɛ taa nɛ ɩlɩzɩ-ɖɩ takayaɣ taa nɛ ɩpɩsɩ ɩkɔɔ mɔn-cɔlɔ, nɛ mankaɣ-mɩ tɔʋ piye Siiloo cɩnɛ Yehowa ɛsɩndaa.»+
9 Peeɖe abalaa mba pɛɖɛwa nɛ pɔcɔɔ ɛjaɖɛ nɛ palɩzɩ paa ɖɩ-tɛtʋ ndʋ lɛ takayaɣ taa, patayɩ-ɖɩ hɔɔlɩŋ 7 taa. Pʋwayɩ lɛ, papɩsɩ Yozuwee cɔlɔ ɖigbeɣliye* taa Siiloo.
10 Nɛ Yozuwee tɔ-wɛ piye Siiloo, Yehowa ɛsɩndaa.+ Yozuwee tayɩ tɛtʋ Izrayɛɛlɩ mba peeɖe, paa cejewiye nɖɩ lɛ, ɖɩ nɛ ɖi-ɖeɖe.+
11 Nɛ piye tɔlɩ Bɛnjamɛɛ cejewiye yɔɔ nɛ pɛcɛlɩ-ɖɩ ɖi-ɖeɖe, paa hɔʋ ŋgʋ lɛ, kɩ nɛ ki-ɖeɖe, nɛ egeetiye nɖɩ pɔtɔ piye nɛ pɛcɛlɩ-wɛ yɔ, ɖɩɩwɛ Yuuda samaɣ+ nɛ Yosɛɛfʋ samaɣ+ pɛ-hɛkʋ taa.
12 Hayo kiŋ hɔɔlʋʋ taa lɛ, pa-kamaɣ kaapaɣzɩnɩ Yɔɔrdaŋ, nɛ kɛɖɛɛ kakpa Yeriikoo+ kajalaŋa cɔlɔ hayo kiŋ nɛ kɛɖɛɛ kakpa pʋʋ yɔɔ wɩsɩ ɖɩɖʋyɛ taa kiŋ, nɛ katalɩ Bɛtɩ-Avɛɛnɩ+ kañɩmbusuu taa.
13 Nɛ kamaɣ kʋyɩnɩ peeɖe nɛ kɛɖɛɛnɩ Luuz, pʋ-tɔbʋʋ se Betɛɛlɩ,+ Luuz hadɛ kiŋ kajalaŋa taa; nɛ kamaɣ ɖɛɛ ketii Atarɔtɩ-Adarɩ,+ pʋʋ ŋgʋ kɩwɛ Bɛtɩ-Horonɩ Pɩ-tɛɛ Ñɩŋgʋ+ hadɛ kiŋ yɔ kɩ-yɔɔ.
14 Nɛ kamaɣ kaawɛ wɩsɩ ɖɩɖʋyɛ hɔɔlʋʋ taa nɛ kokotini hadɛ kiŋ kpaɣnɩ pʋʋ ŋgʋ kɩha ɛsa nɛ Bɛtɩ-Horonɩ yɔ, hadɛ kiŋ; nɛ kɛɖɛɛ kasɩɩnɩ Kiriyatɩ-Baalɩ, pʋ-tɔbʋʋ se Kiriyatɩ-Yeyarim,+ Yuuda tɛtʋ natʋyʋ. Wɩsɩ ɖɩɖʋyɛ taa hɔɔlʋʋ kɛlɛ.
15 Hadɛ kiŋ lɛ, kamaɣ kaapaɣzɩnɩ Kiriyatɩ-Yeyarim tɩnaɣ yɔɔ, nɛ kɛɖɛɛnɩ wɩsɩ ɖɩɖʋyɛ taa; nɛ katalɩ Nɛftowa lɩm hiɖe cɔlɔ.+
16 Kamaɣ ɖɛwa nɛ ketii pʋʋ ŋgʋ kɩha ɛsa nɛ Hinɔɔm Pɩyalʋ Fɛɛʋ+ yɔ kɩ-tɩnaɣ yɔɔ, ŋgʋ kɩwɛ Refayim Fɛɛʋ+ taa yɔ, hayo kiŋ, nɛ ketii Hinɔɔm Fɛɛʋ taa, nɛ kɛɖɛɛ Yebuusi tʋ+ kajalaŋa taa, hadɛ kiŋ, nɛ ketii Ɛn-Rogɛɛlɩ.+
17 Nɛ kamaɣ kaawɛ hayo kiŋ nɛ kɛɖɛɛnɩ Ɛn-Semɛɛsɩ nɛ katalɩ Gelilɔtɩ, ŋgʋ kɩwɛ Adumim ɖɩgbayɛ+ ɛsɩndaa yɔ, nɛ ketii Rubɛɛnɩ pɩyalʋ Bowaanɩ pɩyɛ+ cɔlɔ.
18 Nɛ kɛɖɛɛnɩ hayo kiŋ kajalaŋa ŋga kɛwɛ Araba ɛsɩndaa yɔ ka-taa, nɛ kɛɖɛɛ ketibini Araba.
19 Nɛ kamaɣ ɖɛɛnɩ Bɛtɩ-Hogɩla+ hayo kiŋ kajalaŋa taa, nɛ kowolo kasɩɩnɩ Ðɔm Teŋgu*+ hayo kiŋ kidiiliŋ,* ɖenɖe Yɔɔrdaŋ sɩɣnɩ hadɛ kiŋ yɔ. Hadɛ kiŋ kamaɣ kɛlɛ.
20 Nɛ wɩsɩ ɖɩlɩyɛ hɔɔlʋʋ taa lɛ, Yɔɔrdaŋ kaakɛnɩ ɖɩ-kamaɣ. Bɛnjamɛɛ lʋlʋʋ taa mba ñɩm kɛlɛ, paa hɔʋ ŋgʋ lɛ, kɩ nɛ ki-ɖeɖe, nɛ pe-egeetiye kamasɩ kɛlɛ, hɔɔlɩŋ tɩŋa yɔɔ.
21 Tɛtʋ ndɩ ndɩ ndʋ paacɛlɩ Bɛnjamɛɛ cejewiye taa hɔŋ yɔ, ndʋ yɔ: Yeriikoo, Bɛtɩ-Hogɩla, Emɛɛkɩ-Keziz,
22 Bɛtɩ-Araba,+ Zemarayim, Betɛɛlɩ,+
23 Aviim, Para, Ofɩra,
24 Kefar-Amoni, Ofnii nɛ Geba+—tɛtʋ sɔsɔtʋ 12 nɛ tɩ-tɛtʋ cikpetu.
25 Gabawɔɔ,+ Ramaa, Beerɔɔtɩ,
26 Mizpee, Kefira, Mozaa,
27 Rekɛɛm, Irpeyɛɛlɩ, Tarala,
28 Zelaa,+ Ha-Elɛɛf, Yebuusi, pʋ-tɔbʋʋ se Yeruzalɛm,+ Gibeyaa+ nɛ Kiriyatɩ—tɛtʋ sɔsɔtʋ 14 nɛ tɩ-tɛtʋ cikpetu.
Bɛnjamɛɛ lʋlʋʋ taa mba ñɩm kɛlɛ, paa hɔʋ ŋgʋ lɛ, kɩ nɛ ki-ɖeɖe.
