Yozuwee 2:1-24
2 Pʋwayɩ lɛ, Nuuni pɩyalʋ Yozuwee kʋsɩ abalaa 2 Sitiim+ mɛsaɣ tɛɛ nɛ etiyi-wɛ se powolo pɔcɔŋ. Eheyi-wɛ se: «Iwolo nɛ ɩcɔŋ ɛjaɖɛ, kɔzɩ kɔzɩ Yeriikoo tɛtʋ.» Nɛ pakʋyɩ pɛɖɛɛ nɛ patalɩ halʋ weyi payaɣ-ɩ se Rahaabɩ+ yɔ ɛ-ɖɩɣa taa nɛ pacaɣ peeɖe, ɛɛkɛ hayitu laɖʋ.
2 Nɛ tɔm talɩ Yeriikoo wiyaʋ se: «Na! Izrayɛɛlɩ abalaa kɔm cɩnɛ ɖoo taa se pɔcɔŋ ɛjaɖɛ.»
3 Peeɖe Yeriikoo wiyaʋ tiyaa se peheyi Rahaabɩ se: «Lɩzɩ abalaa mba pɔkɔma nɛ pɛwɛɛ ña-ɖɩɣa taa yɔ, mbʋ pʋyɔɔ yɔ pɔkɔma se pɔcɔŋ ɛjaɖɛ kpeekpe.»
4 Ɛlɛ halʋ kaakpaɣ abalaa mba pa-naalɛ nɛ ɛmɛsɩ. Nɛ ecosi se: «Toovenim, abalaa mba, paakɔm mɛn-tɛ cɩnɛ, ɛlɛ mantɩtɩlɩ ɖenɖe paalɩnaa yɔ.
5 Nɛ ɖoo paɣzɩ yuu, alɩwaatʋ ndʋ pacaɣaɣ ɖɩɣʋ tɛtʋ nɔnɔɔ lɛ, abalaa mba palɩɩ nɛ pɛɖɛɛ. Maasɩŋ ɖenɖe abalaa mba pɛɖɛwa yɔ, ɛlɛ ye ise pa-wayɩ lɔŋ yɔ, ɩkaɣ-wɛ hiɣu.»
6 (Ɛlɛ toovenim taa lɛ, ɛɛkpanɩ abalaa mba kuduyuu ñʋʋ taa nɛ ɛmɛsɩ-wɛ ñɩtʋ natʋyʋ* ɖaŋ weyi paapɩlɩ canzɩ peeɖe yɔ ɩ-tɛɛ.)
7 Ðɩnɛ ɛlɛ, abalaa mba wiyaʋ tiyaa yɔ paɖʋ pa-wayɩ, pakpaɣ nʋmɔʋ nɛ pɛɖɛɣnɩ Yɔɔrdaŋ pɔɔ ɖɩdɛzɩyɛ+ yɔɔ kiŋ; patɩɩlɩwa lɛ paɖɩɣ tɛtʋ nɔnɔɔ.
8 Nɛ pʋcɔ nɛ abalaa mba pahɩnɩ se poɖou lɛ, Rahaabɩ kpa pɔ-cɔlɔ kuduyuu ñʋʋ taa.
9 Nɛ eheyi-wɛ se: «Manawa se Yehowa kaɣ-mɩ cɛlʋʋ ɛjaɖɛ,+ nɛ mɩ-yɔɔ lɛ, ɖɩwɛ sɔɔndʋ taa.+ Mɩ-yɔɔ lɛ, ɛjaɖɛ taa ñɩma tɩŋa payɩ laŋɩyɛ lɩɣ,+
10 mbʋ pʋyɔɔ yɔ ɖɩnɩ ɛzɩma Yehowa yeba nɛ Teŋgu Kɩsɛɛmʋʋ taa lɩm sɔɔ mɩ-ɛsɩndaa alɩwaatʋ ndʋ ɩlɩ Ejipiti yɔ,+ nɛ ɖɩnɩ mbʋ ɩlabɩ Amoori mba awiya 2, Sihɔɔnɩ+ nɛ Oogi+ yɔ, mba ɩɖɩzɩ Yɔɔrdaŋ hɔɔlʋʋ lɛɛkʋ* taa yɔ.
11 Ðɩnɩ tɔm ndʋ lɛ, sɔɔndʋ kpa-ɖʋ,* nɛ mɩ-yɔɔ lɛ, nɔɔyʋ tɩtasɩ wɛnʋʋ abalɩtʋ,* mbʋ pʋyɔɔ yɔ mɩ-Ɛsɔ Yehowa kɛ Ɛsɔ ɖooo ɛsɔdaa nɛ tataa cɩnɛ.+
12 Lɛɛlɛɛyɔ lɛ, mentendi-mɩ, iɖuuni-m Yehowa hɩɖɛ taa, se ɛzɩ mawɩlʋʋ-mɩ sɔɔlɩm siɣsiɣ ñɩmbʋ yɔ, mbʋ ɖɔɖɔ ɩkaɣ wɩlʋʋ sɔɔlɩm siɣsiɣ ñɩmbʋ man-caa ɖɩɣa; nɛ pɩpɔzʋʋ se ɩha-m yʋsaɣ nakɛyɛ nɛ mentisi mɩ-tɔm yɔɔ.*
13 Pɩwɛɛ se ɩfɛɛ man-caa nɛ mon-ɖoo pe-weziŋ, mon-koobiya abalɩñɩma nɛ halɩñɩma, nɛ pa-ñɩma tɩŋa, nɛ pɩwɛɛ se ɩlɩzɩ-ɖʋ* sɩm nesi tɛɛ.»+
14 Peeɖe abalaa mba pocosi-i se: «Ðɩkaɣ ɖe-weziŋ cɛlʋʋ mi-weziŋ yɔɔ!* Ye itiheyi nɔɔyʋ mbʋ pɩ-wayɩ petiyi-ɖʋ cɩnɛ yɔ, ɖɩnɛ ɛlɛ, ɖɩkaɣ-mɩ wɩlʋʋ sɔɔlɩm siɣsiɣ ñɩmbʋ nɛ siɣsiɣ wɛtʋ alɩwaatʋ ndʋ Yehowa cɛlɩɣ-ɖʋ ɛjaɖɛ yɔ.»
15 Pʋwayɩ lɛ, eyele nɛ patɩŋnɩ nimiye naɖɩyɛ yɔɔ nɛ petibini mondoɖebɔʋ, mbʋ pʋyɔɔ yɔ ɛ-ɖɩɣa kaawɛ tɛtʋ koloŋa hɔɔlʋʋ nakʋyʋ yɔɔ. Toovenim taa lɛ, koloŋa yɔɔ ɛɛwɛɛ.+
16 Pʋwayɩ lɛ, eheyi-wɛ se: «Ɩkpa pʋŋ egeetiye taa nɛ ɩmɛlɩ peeɖe kɩyakɩŋ 3, nɛ mba peɖiɣni-mɩ tam yɔ pataapɩzɩ nɛ pana-mɩ. Nɛ mba peɖiɣni-mɩ tam yɔ papɩsɩɣ nɛ pɔkɔɔ lɛ, ɩpɩzɩɣ nɛ ɩkpaɣ mɩ-nʋmɔʋ nɛ ɩɖɛɛ.»
17 Nɛ abalaa mba peheyi-i se: «Ðɩkaɣ labʋ ɖo-ɖoŋ ɖeɖe nɛ ɖɩɖɔ ɖuutu ndʋ ŋyeba nɛ ɖiɖuu yɔ tɩ-yɔɔ,+ nɛ ɖɩɩkaɣ ɖɔʋ wɛɛ
18 ye alɩwaatʋ ndʋ ɖɩkɔŋ tɛtʋ taa yɔ, ŋtam nimaɣ kɩsɛɛmaɣ cɩɩɩ kanɛ mondoɖebɔʋ ŋgʋ ŋyeba nɛ ɖitibina yɔ kɩ-yɔɔ yɔ. Pɩwɛɛ se ŋkpeɣli ña-caa, ño-ɖoo, ño-koobiya nɛ ña-caa ɖɩɣa taa mba tɩŋa payɩ ña-ɖɩɣa taa nɛ ña nɛ wɛ ɩwɛɛ.+
19 Nɛ ye pɩlaba se nɔɔyʋ tɛzɩ ña-ɖɩɣa nɔnɔsɩ nɛ ɛlɩɩ awayɩ yɔ, ɛ-calɩm kaɣ caɣʋ ɛ-maɣmaɣ ɛ-ñʋʋ taa, nɛ ɖɩɩkaɣ ɖɔʋ wɛɛ naayɛ. Ɛlɛ mba ña nɛ wɛ ɩwɛɣ ɖɩɣa taa yɔ, ye kɩdɛkɛdɩm nabʋyʋ ɛtalɩ* pa-taa nɔɔyʋ yɔ, pʋdʋ calɩm kaɣ caɣʋ ɖa-ñʋŋ taa.
20 Ɛlɛ ye ŋheyi nɔɔyʋ mbʋ pɩ-wayɩ petiyi-ɖʋ cɩnɛ yɔ,+ pɩɩkaɣ-ɖʋ kɛnʋʋ kɩjɛyʋʋ se ɖɩɖɔ ɖuutu ndʋ ŋyeba nɛ ɖiɖuu yɔ tɩ-yɔɔ.»
21 Nɛ halʋ cosi-wɛ se: «Pɩla ɛzɩ ɩyɔɔdʋʋ yɔ.»
Peeɖe lɛ, eyebi-wɛ nɛ pakpaɣ pa-nʋmɔʋ. Pʋwayɩ lɛ, ɛta nimaɣ kɩsɛɛmaɣ cɩɩɩ ŋga mondoɖebɔʋ yɔɔ.
22 Ðɩnɛ ɛlɛ, pɛɖɛɛ nɛ pakpa pʋŋ egeetiye taa nɛ pacaɣ peeɖe kɩyakɩŋ 3 nɛ pɩkɔɔ pɩsɩɩnɩ alɩwaatʋ ndʋ mba pataŋaɣ-wɛ yɔ papɩsaa yɔ. Mba pataŋaɣ-wɛ yɔ, paañɩnɩ-wɛ habɛɛ tɩŋa yɔɔ ɛlɛ patɩna-wɛ.
23 Pʋwayɩ lɛ, abalaa mba pa-naalɛ palɩɩnɩ pʋŋ egeetiye taa nɛ petii nɛ pɛtɛzɩ pɔɔ nɛ powolo Nuuni pɩyalʋ Yozuwee cɔlɔ. Nɛ pɛkɛdɩ-ɩ mbʋ payɩ pɩɩtalɩ-wɛ yɔ.
24 Nɛ peheyi Yozuwee se: «Yehowa ɖʋzɩ ɛjaɖɛ kpeekpe ɖe-nesi taa.+ Toovenim taa lɛ, ɖɔ-yɔɔ lɛ, ɛjaɖɛ taa mba tɩŋa wɛ sɔɔndʋ taa.»+
Pɩ-tɛɛ tɔm
^ Pɩɩkɛnɩ ñɩtʋ ndʋ pahayaɣ-tʋ ɖooo caanaʋ taa yɔ. Palakaɣnɩ-tʋ tʋmɩyɛ nɛ palʋʋnɩ wondu kususutu.
^ Pʋ-tɔbʋʋ se Yɔɔrdaŋ wɩsɩ ɖɩlɩyɛ hɔɔlʋʋ taa.
^ Piye piye, «ɖa-laŋa yoli.»
^ Piye piye, «nɛ mɩ-yɔɔ lɛ fezuu tɩtasɩ kpaʋ abalʋ nɔɔyʋ taa.»
^ Yaa «yʋsaɣ ŋga papɩzɩɣ nɛ pataa liu yɔ.»
^ Yaa «ɩlɩzɩ ɖa-kalɩzasɩ.»
^ Yaa «Ða-kalɩzasɩ kaɣ sɩbʋ mi-lone taa!»
^ Yaa «ye nesi nasɩyɩ ɛkpa.»
