Yozuwee 20:1-9
-
Ðɩjɔzɩyɛ tɛtʋ (1-9)
20 Nɛ Yehowa heyi Yozuwee se:
2 «Heyi Izrayɛɛlɩ mba se: “Ɩlɩzɩ mɩ-tɩ ɖɩjɔzɩyɛ tɛtʋ+ ndʋ maatɩŋnɩ Moyizi yɔɔ nɛ meheyi-mɩ tɩ-tɔm yɔ,
3 nɛ weyi ɛkʋ ɛyʋ nɔɔyʋ ɛlɛ ɛtɩɖʋna yaa pɩkpɛdɩsɩ-ɩ kɩkpɛdɩsʋʋ* nɛ ɛkʋ nɔɔyʋ* yɔ, ese nɛ ewolo peeɖe. Nɛ tɛtʋ ndʋ tɩkaɣ-mɩ kɛnʋʋ ɖɩjɔzɩyɛ nɛ ɩlɩɩ calɩm kɩmɩyɛ kpayʋ+ nesi tɛɛ.
4 Pɩwɛɛ se weyi ɛkʋ ɛyʋ ɛlɛ ɛtɩɖʋna yɔ, ese nɛ ewolo tɛtʋ ndʋ tɩ-taa natʋyʋ taa+ nɛ ɛsɩŋ tɩ-nɔnɔɔ taa+ nɛ ɛkɛdɩ tɩ-taa ɛzʋtʋyaa mbʋ pɩlaba yɔ. Nɛ pamʋ-ɩ tɛtʋ taa nɛ paha-ɩ lone nɛ ɛcaɣ pɔ-cɔlɔ.
5 Ye pɩlaba se calɩm kɩmɩyɛ kpayʋ ɖʋ ɛ-wayɩ kɔyɔ, pɩfɛyɩ se ɛzʋtʋyaa ɩɖʋzɩ weyi ɛkʋ ɛyʋ yɔ e-nesi tɛɛ, mbʋ pʋyɔɔ yɔ pɩkpɛdɩsɩ-ɩ kɩkpɛdɩsʋʋ nɛ ɛkʋ* e-koobu nɛ ɛtaapaɖɩɣ-ɩ pʋcɔ nɛ pɩlakɩ mbʋ.+
6 Pɩwɛɛ se ɛcaɣ tɛtʋ ndʋ tɩ-taa nɛ pɩkɔɔ pɩtalɩ alɩwaatʋ ndʋ ɛlɩ samaɣ ɛsɩndaa nɛ pahʋʋnɩ-ɩ tɔm yɔ,+ nɛ pɩwɛɛ se ɛcaɣ peeɖe nɛ pɩkɔɔ pɩsɩɩnɩ alɩwaatʋ ndʋ cɔjɔ kɩlɩm weyi ɛwɛ alɩwaatʋ ndʋ tɩ-taa yɔ ɛsɩkɩ yɔ.+ Pʋwayɩ lɛ, weyi ɛkʋ ɛyʋ yɔ, ɛpɩzɩɣ nɛ ɛpɩsɩ tɛtʋ ndʋ tɩ-taa ɛɛkʋyaa nɛ ese yɔ, ɛpɩzɩɣ nɛ ɛpɩsɩ ɛ-tɛtʋ taa nɛ ɛsʋʋ ɛ-ɖɩɣa taa.”»+
7 Pʋyɔɔ palɩzɩ kɩjaʋ* Kedɛɛsɩ+ ŋgʋ kɩwɛ Galilee, Naftalii pʋŋ egeetiye taa yɔ, Sekɛɛm+ ŋgʋ kɩwɛ Efrayim pʋŋ egeetiye taa yɔ, nɛ Kiriyatɩ-Arba,+ pʋ-tɔbʋʋ se Ebrɔŋ, ŋgʋ kɩwɛ Yuuda pʋŋ egeetiye taa yɔ.
8 Yɔɔrdaŋ egeetiye taa, Yeriikoo wɩsɩ ɖɩlɩyɛ taa lɛ, palɩzɩ Bezɛɛrɩ+ ŋgʋ kɩkɛ Rubɛɛnɩ cejewiye tɛtʋ nɛ tɩwɛɛ kañɩmbusuu taa piyaɣ ŋga ka-ñʋʋ taa wɛ landamm yɔ kɔ-yɔɔ yɔ, Ramɔɔtɩ+ ŋgʋ kɩkɛ Gaadɩ cejewiye tɛtʋ nɛ tɩwɛɛ Galaadɩ yɔ, nɛ Golaŋ+ ŋgʋ kɩkɛ Manaasee cejewiye+ tɛtʋ nɛ tɩwɛɛ Basaanɩ yɔ.
9 Tɛtʋ ndʋ palɩzɩ Izrayɛɛlɩ mba kpeekpe nɛ agɔma mba pɛwɛ pɛ-hɛkʋ taa yɔ, se ye pɩlaba se nɔɔyʋ kʋ ɛyʋ* nɛ ɛtɩɖʋna yɔ, ese nɛ ewolo peeɖe+ nɛ ɛtaasɩ calɩm kɩmɩyɛ kpayʋ nesi tɛɛ nɛ patɩhʋtɩ ɛ-tɔm samaɣ ɛsɩndaa.+
Pɩ-tɛɛ tɔm
^ Yaa «yaa ɛtɩna.»
^ Yaa «kalɩzaɣ nakɛyɛ.»
^ Yaa «mbʋ pʋyɔɔ yɔ ɛtɩna pʋcɔ nɛ ɛkʋ.»
^ Yaa «Pʋyɔɔ papɩsɩ kele kele.»
^ Yaa «kalɩzaɣ nakɛyɛ.»