Yozuwee 22:1-34
22 Nɛ Yozuwee yaa Rubɛɛnɩ mba, Gaadɩ mba, nɛ Manaasee cejewiye hɔɔlʋʋ
2 nɛ eheyi-wɛ se: «Paɣtʋ ndʋ Yehowa lɩmɖʋyʋ Moyizi kaaɖʋ-mɩ yɔ, ɩɖɔm tɩ-tɩŋa tɩ-yɔɔ,+ nɛ paɣtʋ ndʋ manɖʋ-mɩ yɔ, ɩñam ɖɔɖɔ tɩ-tɩŋa.+
3 Ɩtɩlɔ mi-koobiya alɩwaatʋ ndʋ tɩ-tɩŋa tɩ-taa nɛ pɩkɔɔ pɩtalɩ sɔnɔ;+ nɛ ɩɖɔkɩ mɩ-Ɛsɔ Yehowa paɣtʋ kpam.+
4 Lɛɛlɛɛyɔ lɛ, mɩ-Ɛsɔ Yehowa ha mi-koobiya hɛzɩyɛ, ɛzɩ ɛɛlabʋ-wɛ tamaɣ yɔ.+ Pʋyɔɔ lɛ, lɛɛlɛɛyɔ ɩpɩzɩɣ nɛ ɩpɩsɩ mi-kizinzikiŋ tɛɛ, ɛjaɖɛ nɖɩ Yehowa lɩmɖʋyʋ Moyizi kaacɛlɩ-mɩ se ɖɩkɛ mɩ-ñɩm Yɔɔrdaŋ hɔɔlʋʋ lɛɛkʋ* taa yɔ ɖɩ-taa.+
5 Ɛlɛ pɩwɛɛ se ɩkpa mɩ-tɩ nɛ ɩɖɔ kpalɩtʋ nɛ Paɣtʋ ndʋ Yehowa lɩmɖʋyʋ Moyizi cɛlɩ-mɩ yɔ tɩ-yɔɔ,+ nɛ ɩsɔɔlɩ Yehowa mɩ-Ɛsɔ,+ ɩɖɔ ɛ-nʋmɔŋ kpeekpe taa,+ ɩɖɔkɩ ɛ-kpalɩtʋ,+ ɩñɔɔnɩ-ɩ kpam,+ nɛ ɩɖʋ-ɩ lɩm+ nɛ mɩ-laŋɩyɛ kpeekpe nɛ mɩ-kalɩzaɣ* kpeekpe.»+
6 Pʋwayɩ lɛ, Yozuwee wazɩ-wɛ nɛ eyele-wɛ nɛ pɛɖɛɛ, nɛ papɩsɩ pe-kizinzikiŋ tɛɛ.
7 Moyizi kaaha ñɩm Manaasee cejewiye hɔɔlʋʋ Basaanɩ taa,+ nɛ cejewiye hɔɔlʋʋ lɛɛkʋ lɛ, Yozuwee ha-kʋ tɛtʋ Yɔɔrdaŋ wɩsɩ ɖɩɖʋyɛ hɔɔlʋʋ taa,+ pa nɛ po-koobiya. Pɩtasɩ lɛ, alɩwaatʋ ndʋ Yozuwee yebi-wɛ se papɩsɩ pe-kizinzikiŋ tɛɛ yɔ, ɛwazɩ-wɛ
8 nɛ eheyi-wɛ se: «Ɩpɩsɩ mi-kizinzikiŋ tɛɛ, ɩkpɛndɩnɩ ñɩm sakɩyɛ, kpɩna sakɩyɛ, liidiye nɛ sika, ñɩɣyʋʋ kɩsɛɛmʋʋ nɛ ñɩɣtʋ, nɛ tokonaa sakɩyɛ.+ Mɩ nɛ mi-koobiya, ɩtayɩ mbʋ ɩmʋ+ mi-koyindinaa cɔlɔ yɔ.»
9 Pʋwayɩ lɛ, Rubɛɛnɩ mba, Gaadɩ mba, nɛ Manaasee cejewiye hɔɔlʋʋ pakʋyɩ Izrayɛɛlɩ mba lalaa cɔlɔ Siiloo, Kanaŋ ɛjaɖɛ taa, nɛ papɩsɩ Galaadɩ egeetiye taa,+ ɛjaɖɛ nɖɩ paacɛlɩ-wɛ se ɖɩpɩsɩ pa-ñɩm nɛ pacaɣ ɖɩ-taa ɛzɩ Yehowa kaatɩŋnʋʋ Moyizi yɔɔ nɛ ɛɖʋ paɣtʋ yɔ.+
10 Rubɛɛnɩ mba, Gaadɩ mba, nɛ Manaasee cejewiye hɔɔlʋʋ patalɩ Yɔɔrdaŋ ageeta taa Kanaŋ ɛjaɖɛ taa lɛ, pama altaaru nakʋyʋ Yɔɔrdaŋ cɔlɔ, kɩɩkɛ altaaru sɔsɔʋ, kɩɩpaɣlɩ kpem.
11 Pʋwayɩ lɛ, Izrayɛɛlɩ mba lalaa nɩɩ+ pɔyɔɔdaɣ se: «Ɩna! Rubɛɛnɩ mba, Gaadɩ mba nɛ Manaasee cejewiye hɔɔlʋʋ pama altaaru nakʋyʋ Kanaŋ ɛjaɖɛ kamaɣ yɔɔ Yɔɔrdaŋ ageeta taa, Izrayɛɛlɩ mba hɔɔlʋʋ taa.»
12 Izrayɛɛlɩ mba nɩ-tʋ lɛ, pa-samaɣ kpeekpe kpeɣli Siiloo+ se kowolo nɛ koyooni-wɛ.
13 Peeɖe Izrayɛɛlɩ mba tiyi Fineyaasɩ,+ weyi ɛkɛ cɔjɔ Eleyaazaarɩ pɩyalʋ yɔ Rubɛɛnɩ mba, Gaadɩ mba nɛ Manaasee cejewiye hɔɔlʋʋ cɔlɔ Galaadɩ egeetiye taa,
14 ɛ nɛ sɔsaa 10, paa Izrayɛɛlɩ cejewiye nɖɩ ɖɩ-taa lɛ, sɔsɔ kʋɖʋm, pa-taa paa weyi kaakɛ hɔŋ ñʋʋdʋ Izrayɛɛlɩ mba cejewe* taa.+
15 Patalɩ Rubɛɛnɩ mba, Gaadɩ mba nɛ Manaasee cejewiye hɔɔlʋʋ cɔlɔ Galaadɩ egeetiye taa lɛ, peheyi-wɛ se:
16 «Tɔm tʋnɛ Yehowa samaɣ kpeekpe yɔɔdʋʋ: “Ɛbɛ yɔɔ ɩlabɩ lakasɩ nzɩ sɩfɛyɩ siɣsiɣ yɔ+ Izrayɛɛlɩ tɛ Ɛsɔ ɛsɩndaa? Ɩha Yehowa siɣye nɛ iyele ɛ-wayɩ tɩŋʋʋ sɔnɔ nɛ ɩma mɩ-tɩ altaaru nɛ ɩkaɖɩnɩ Yehowa.+
17 Peyɔɔrɩ kɩdɛkɛdɩm tɩɖɔɔ-ɖʋ? Halɩ nɛ sɔnɔ pɩwɛ ɖɔ-yɔɔ, ɖɩtɩtɩɩtɛmtɩ ɖa-tɩ pɩsʋʋ kele kele, paa kʋñɔŋ ɛɛkɔm Yehowa samaɣ yɔɔ kɔyɔ.+
18 Nɛ sɔnɔ mɩ mɩcaɣ se ɩha Yehowa siɣye nɛ iyele ɛ-wayɩ tɩŋʋʋ na? Ye ɩkaɖɩnɩ Yehowa sɔnɔ yɔ, cee lɛ, ɛ-taa kaɣ wɩnʋʋ Izrayɛɛlɩ samaɣ kpeekpe.+
19 Ye ɛjaɖɛ nɖɩ ɖɩkɛ mɩ-ñɩm yɔ, nɖɩ ɛfɛyɩnɩ kele kele nɛ ɩlakɩ mbʋ yɔ, ɩtɛzɩ nɛ iwolo ɛjaɖɛ nɖɩ ɖɩkɛ Yehowa ñɩm yɔ ɖɩ-taa,+ ɖenɖe Yehowa kɩɖanɖʋʋ wɛɛ yɔ,+ nɛ ɩcaɣ ɖɛ-hɛkʋ taa, ɛlɛ ɩtaakaɖɩnɩ Yehowa, nɛ itaayele nɛ ɛzɩma ɩma mɩ-tɩ altaaru nɛ pɩtasɩnɩ ɖɛ-Ɛsɔ Yehowa altaaru yɔ pʋyɔɔ lɛ, ɖɩpɩsɩ ñʋʋ taa ɖoŋ tɩnaa.+
20 Zeraa pɩyalʋ Akaŋ+ kaalabɩ lakasɩ nzɩ sɩfɛyɩ siɣsiɣ yɔ mbʋ pɩɩwɛɛ se paɖɩzɩ yɔ pɩ-hɔɔlʋʋ taa lɛ, pɩtɩkɛ Izrayɛɛlɩ samaɣ kpeekpe yɔɔ pana kaakɔma?+ Pɩtɩkɛ e-ɖeke ɛɛsɩbɩnɩ ɛ-kɩdɛkɛdɩm yɔɔ.”»+
21 Peeɖe Rubɛɛnɩ mba, Gaadɩ mba nɛ Manaasee cejewiye hɔɔlʋʋ pocosi Izrayɛɛlɩ mba cejewe* ñʋndɩnaa se:+
22 «Ɛsɔnaa taa Ɛsɔ Yehowa!* Ɛsɔnaa taa Ɛsɔ Yehowa+ sɩma, nɛ Izrayɛɛlɩ ɖɔɖɔ kaɣ tɩlʋʋ. Ye ɖɩkaɖɩnɩ Yehowa nɛ ɖɩfɛyɩ siɣsiɣ ɛ-ɛsɩndaa yɔ, Ɛsɔ ɛtaafɛɛ-ɖʋ sɔnɔ.
23 Ye ɖɩma ɖa-tɩ altaaru se ɖɩha Yehowa siɣye nɛ ɖiyebi-i tɩŋʋʋ nɛ ɖɩlaa kɩlaŋ kɩñaɣzɩŋ, tɔɔnaɣ pee kɩlaŋ, nɛ laŋhɛzɩyɛ kɩlaŋ kɩ-yɔɔ yɔ, Yehowa kaɣ ɖa-nɩŋgbaŋʋʋ hɔm.+
24 Aayɩ, lɩmaɣzɩyɛ lɛɛɖɛ yɔɔ ɖɩlabɩ mbʋ, mbʋ pʋyɔɔ yɔ ɖɩmaɣzaa se: “Cee wayɩ, mɩ-pɩyalaa kaɣ ɖa-pɩyalaa pɔzʋʋ se: ‘Mɩ nɛ Izrayɛɛlɩ tɛ Ɛsɔ Yehowa suwe?
25 Yehowa sɩ Yɔɔrdaŋ pɔɔ se kɛkɛ kamaɣ ɖa nɛ mɩ Rubɛɛnɩ mba nɛ Gaadɩ mba ɖɛ-hɛkʋ taa. Ɩfɛyɩnɩ ɖeɖe naɖɩyɛ Yehowa cɔlɔ.’ Nɛ mɩ-pɩyalaa kaɣ nʋmɔʋ ɖɩɣʋ ɖa-pɩyalaa se pataasɛɛ* Yehowa.”
26 «Pʋyɔɔ ɖɩyɔɔdaa se: “Pɩwɛɛ se ɖɩñaɣ pana nɛ ɖɩla nabʋyʋ, ɖɩma altaaru nakʋyʋ; pɩtɩkɛ kɩlaŋ kɩñaɣzɩŋ yaa kɩlaŋ lɛɛŋ laʋ yɔɔ ɖɩmaɣ-kʋ,
27 ɛlɛ ɖɩmaɣ-kʋ se kɩkɛnɩ aseɣɖe tʋ ɖa nɛ mɩ+ nɛ ɖa-lʋlʋʋ taa mba* ɖɛ-hɛkʋ taa, se ɖɩkaɣ labʋ tʋmɩyɛ nɖɩ Yehowa ɖʋ-ɖʋ yɔ ɛ-ɛsɩndaa nɛ ɖɩlaa-ɩ ɖa-kɩlaŋ kɩñaɣzɩŋ nɛ ɖa-laŋhɛzɩyɛ kɩlaŋ nɛ ɖa-kɩlaŋ lɛɛŋ,+ nɛ mɩ-pɩyalaa itaaheyi ɖa-pɩyalaa cee wayɩ se: ‘Ɩfɛyɩnɩ ɖeɖe naɖɩyɛ Yehowa cɔlɔ.’”
28 Nɛ ɖɩmaɣzaa se: “Ye peheyi tɔm ndʋ ɖa nɛ ɖa-lʋlʋʋ taa mba* cee wayɩ yɔ, ɖɩkaɣ cosuu se: ‘Ɩna, Yehowa altaaru ŋgʋ ɖɔ-cɔzɔnaa kaamawa yɔ, kɩ-ɖɔndɩ yɔ; pɩtɩkɛ kɩlaŋ kɩñaɣzɩŋ yaa kɩlaŋ lɛɛŋ laʋ yɔɔ ɖɩma-kʋ, ɛlɛ ɖɩma-kʋ se kɩkɛnɩ aseɣɖe tʋ ɖa nɛ mɩ ɖɛ-hɛkʋ taa.’”
29 Ðɩɩpɩzɩɣ kpa nɛ ɖɩkaɖɩnɩ Yehowa nɛ ɖɩha Yehowa siɣye+ sɔnɔ nɛ ɖiyele ɛ-wayɩ tɩŋʋʋ nɛ ɖɩma altaaru se ɖɩlaa kɩ-yɔɔ kɩlaŋ kɩñaɣzɩŋ, tɔɔnaɣ pee kɩlaŋ nɛ kɩlaŋ lɛɛŋ nɛ pɩtasɩnɩ ɖɛ-Ɛsɔ Yehowa altaaru ŋgʋ kɩwɛ ɛ-kɩɖanɖʋʋ ɛsɩndaa yɔ!»+
30 Cɔjɔ Fineyaasɩ, samaɣ taa sɔsaa,* nɛ Izrayɛɛlɩ cejewe* ñʋndɩnaa mba ɛ nɛ wɛ paawoba yɔ panɩ tɔm ndʋ Rubɛɛnɩ lʋlʋʋ taa mba, Gaadɩ lʋlʋʋ taa mba nɛ Manaasee lʋlʋʋ taa mba pɔyɔɔdaa yɔ lɛ, pɔ-yɔɔ hɛɛ.+
31 Peeɖe cɔjɔ Eleyaazaarɩ pɩyalʋ Fineyaasɩ heyi Rubɛɛnɩ lʋlʋʋ taa mba, Gaadɩ lʋlʋʋ taa mba nɛ Manaasee lʋlʋʋ taa mba se: «Sɔnɔ, ɖɩnawa se Yehowa wɛ ɖɛ-hɛkʋ taa, mbʋ pʋyɔɔ yɔ ɩtɩla lakasɩ sɩnɛ, nzɩ sɩfɛyɩ siɣsiɣ yɔ Yehowa yɔɔ. Lɛɛlɛɛyɔ, ɩyabɩ Izrayɛɛlɩ mba ñʋʋ Yehowa nesi tɛɛ.»
32 Pʋwayɩ lɛ, cɔjɔ Eleyaazaarɩ pɩyalʋ Fineyaasɩ nɛ sɔsaa pakʋyɩ Rubɛɛnɩ mba nɛ Gaadɩ mba cɔlɔ Galaadɩ egeetiye taa nɛ papɩsɩ Kanaŋ ɛjaɖɛ taa, nɛ pɛkɛdɩ tɔm ndʋ Izrayɛɛlɩ mba lalaa.
33 Nɛ Izrayɛɛlɩ mba taa la leleŋ nɛ tɔm ndʋ pɛkɛdɩ-wɛ yɔ. Nɛ Izrayɛɛlɩ mba sa Ɛsɔ, nɛ patɩtasɩ yɔɔdʋʋ se powoki nɛ poyooni Rubɛɛnɩ mba nɛ Gaadɩ mba nɛ paɖɩzɩ ɛjaɖɛ nɖɩ ɖɩ-taa pɛwɛɛ yɔ.
34 Pʋyɔɔ Rubɛɛnɩ mba nɛ Gaadɩ mba paya altaaru ŋgʋ hɩɖɛ,* mbʋ pʋyɔɔ yɔ pɔtɔŋaɣ se: «Kɩkɛ aseɣɖe tʋ ɖɛ-hɛkʋ taa se Yehowa kɛnɩ Ɛsɔ toovenim tʋ.»
Pɩ-tɛɛ tɔm
^ Pʋ-tɔbʋʋ se Yɔɔrdaŋ wɩsɩ ɖɩlɩyɛ hɔɔlʋʋ.
^ Cɔnɩ Tɔm pee sɔsɔna tɔbʋʋ lɩzʋʋ.
^ Piye piye, «kudokiŋ.»
^ Piye piye, «kudokiŋ.»
^ Yaa «Ɛsɔ, Ɛsɔ, Yehowa.»
^ Piye piye, «pataase sɔɔndʋ.»
^ Piye piye, «nɛ ɖa-kpaɖɩŋ.»
^ Piye piye, «ɖa-kpaɖɩŋ.»
^ Yaa «ñʋndɩnaa.»
^ Piye piye, «kudokiŋ.»
^ Ɛzɩ palɩzʋʋ pɩ-taa yɔ, pɩtʋʋ fɛyɩ se payaɣaɣ altaaru ŋgʋ se Aseɣɖe Tʋ.
