Yozuwee 3:1-17
-
Izrayɛɛlɩ tɛzɩ Yɔɔrdaŋ (1-17)
3 Nɛ Yozuwee kʋyɩ tanaŋ tɛɛ cu, nɛ ɛ nɛ Izrayɛɛlɩ mba* kpeekpe pakʋyɩnɩ Sitiim+ nɛ powolo Yɔɔrdaŋ. Pasʋ peeɖe ɖoo taa pʋcɔ nɛ pɛtɛzɩ.
2 Kɩyakɩŋ 3 wayɩ lɛ, ñʋndɩnaa+ cɔɔ ɖigbeɣliye* kpeekpe taa
3 nɛ paɖʋ paɣtʋ samaɣ se: «Ɩñɩtɩɣ nɛ ɩna se cɔjɔnaa Leevi mba hɔɔlɩ mɩ-Ɛsɔ Yehowa ɛgbɛyɛ ɖʋʋ aɖakaɣ lɛ,+ pɩwɛɛ se ɩkʋyɩ mi-lone taa nɛ ɩtɩŋ ka-wayɩ.
4 Ɛlɛ iposini-kɛ nɛ nuŋgolonzi 2 000* mbʋ yɔ; ɩtaañɔtɩnɩ-kɛ nɛ pɩkɩlɩ mbʋ, se pɩsa nɛ ɩtɩlɩ nʋmɔʋ ŋgʋ pɩwɛɛ se ɩtɩŋ yɔ, mbʋ pʋyɔɔ yɔ ɩtɩtɩɩɖɔmtɩ nʋmɔʋ ŋgʋ nɛ ɩna.»
5 Ðɩnɛ ɛlɛ, Yozuwee heyi samaɣ se: «Ɩpɩsɩ mɩ-tɩ kele kele,+ mbʋ pʋyɔɔ yɔ cee Yehowa kaɣ labʋ piti lakasɩ mɩ-hɛkʋ taa.»+
6 Nɛ Yozuwee heyi cɔjɔnaa se: «Ɩkpaɣ ɛgbɛyɛ ɖʋʋ aɖakaɣ+ nɛ ɩɖɛɛ samaɣ nɔɔ.» Nɛ pakpaɣ ɛgbɛyɛ ɖʋʋ aɖakaɣ nɛ pɛɖɛɛ samaɣ nɔɔ.
7 Pʋwayɩ lɛ, Yehowa heyi Yozuwee se: «Sɔnɔ manpaɣzɩɣ-ŋ kpazʋʋ Izrayɛɛlɩ kpeekpe ɛsɩndaa,+ se pɩsa nɛ patɩlɩ se mankaɣ wɛʋ ñɔ-cɔlɔ+ ɛzɩ maawɛʋ Moyizi cɔlɔ yɔ.+
8 Pɩwɛɛ se ŋɖʋ paɣtʋ tʋnɛ cɔjɔnaa mba pɔhɔɔlʋʋ ɛgbɛyɛ ɖʋʋ aɖakaɣ yɔ: “Ɩtalɩɣ Yɔɔrdaŋ lɩm nɔɔ lɛ, pɩwɛɛ se ɩsɩŋ Yɔɔrdaŋ taa.”»+
9 Nɛ Yozuwee heyi Izrayɛɛlɩ mba se: «Ɩkɔɔ cɩnɛ nɛ iwelisi mɩ-Ɛsɔ Yehowa tɔm.»
10 Ðɩnɛ ɛlɛ, Yozuwee yɔɔdɩ se: «Pʋnɛ ɩkaɣ tɩlɩnʋʋ se Ɛsɔ ɛsadʋ nɔɔyʋ wɛ mɩ-hɛkʋ taa,+ nɛ ɩkaɣ tɩlʋʋ ɖɔɖɔ se paa pɩɩlabɩ ɛzɩma yɔ ɛkaɣ ɖɔɔnʋʋ mɩ-ɛsɩndaa Kanaŋ mba, Hɛɛtɩ mba, Hivi mba, Perizi mba, Girgasɩ mba, Amoori mba nɛ Yebuusi mba.+
11 Ɩna! Tɛtʋ kpeekpe Kɩbaɣlʋ tɛ ɛgbɛyɛ ɖʋʋ aɖakaɣ ɖɛɣ-mɩ nɔɔ Yɔɔrdaŋ pɔɔ taa.
12 Lɛɛlɛɛyɔ ɩlɩzɩ abalaa 12 Izrayɛɛlɩ cejewe taa, abalʋ kʋɖʋm paa cejewiye nɖɩ lɛ ɖɩ-taa,+
13 nɛ cɔjɔnaa mba pɔhɔɔlʋʋ tɛtʋ kpeekpe Kɩbaɣlʋ Yehowa Aɖakaɣ yɔ, pa-naataŋ ñɩtɩɣ nɛ itukuni Yɔɔrdaŋ lɩm lɛ,* Yɔɔrdaŋ lɩm mbʋ pɩlɩɣnɩ hayo kiŋ nɛ pikpeŋ yɔ, pɩkaɣ sɩŋʋʋ nɛ pɩkaɣ wɛʋ ɛzɩ koloŋa yɔ.»+
14 Pʋyɔɔ alɩwaatʋ ndʋ samaɣ lɩ ke-kizinzikiŋ tɛɛ se kɛtɛzɩ Yɔɔrdaŋ lɛ, cɔjɔnaa mba pɔhɔɔlɩ ɛgbɛyɛ ɖʋʋ aɖakaɣ yɔ,+ pɛɖɛɛ samaɣ nɔɔ.
15 Cɔjɔnaa mba pɔhɔɔlɩ Aɖakaɣ yɔ pañɩtaa nɛ patalɩ Yɔɔrdaŋ nɔɔ nɛ petisi pa-nɩŋgbanzɩ lɩm taa kidiiliŋ yɔɔ lɛ (Yɔɔrdaŋ pɔɔ wadɩɣ ke-kidiiliŋ yɔɔ+ kʋmtʋ alɩwaatʋ tɩŋa taa),
16 lɩm mbʋ pɩlɩɣaɣnɩ hayo kiŋ nɛ pikpeŋ yɔ pɩsɩŋ. Lɩm kpa nɛ pɩwɛɛ ɛzɩ koloŋa yɔ ɖooo poliŋ taa Aɖam, tɛtʋ ndʋ, tɩɩñɔtɩnɩ Zarɩtaanɩ; nɛ lɩm mbʋ pikpeŋaɣni Araabaa Teŋgu taa, pʋ-tɔbʋʋ se Ðɔm Teŋgu* taa kiŋ yɔ pikpe nɛ pɩsɔɔ. Lɩm yele kpem nɛ samaɣ tɛzɩ; Yeriikoo ɛsɩndaa pɩɩlabɩ mbʋ.
17 Cɔjɔnaa mba pɔhɔɔlɩ Yehowa ɛgbɛyɛ ɖʋʋ aɖakaɣ yɔ, pasɩŋ Yɔɔrdaŋ hɛkʋ taa tɛtʋ waɣwaɣ yɔɔ+ lɛ, Izrayɛɛlɩ mba kpeekpe ɖɔ tɛtʋ waɣwaɣ yɔɔ+ nɛ pɛtɛzɩ nɛ pɩkɔɔ pɩsɩɩnɩ alɩwaatʋ ndʋ samaɣ kpeekpe tɛzɩ Yɔɔrdaŋ pɔɔ yɔ.
Pɩ-tɛɛ tɔm
^ Piye piye, «Izrayɛɛlɩ pɩyalaa.»
^ Yaa «maalika.»
^ Pɩmaɣnɩ mɛtanaa 890 mbʋ yɔ. Cɔnɩ Tɔm kɩsɔzɩtʋ B14.
^ Piye piye, «nɛ ɩtaɣ Yɔɔrdaŋ lɩm taa lɛ.»
^ Pʋ-tɔbʋʋ se Teŋgu Kɩsɩbʋʋ.