Yozuwee 4:1-24
-
Pɛɛ wena akaɣ-wɛ tɔzʋʋ mbʋ pɩɩlaba yɔ pɩ-yɔɔ yɔ (1-24)
4 Samaɣ kpeekpe tɩɩtɛm Yɔɔrdaŋ pɔɔ tɛzʋʋ lɛ, Yehowa heyi Yozuwee se:
2 «Ɩlɩzɩ abalaa 12 samaɣ taa, abalʋ kʋɖʋm paa cejewiye nɖɩ lɛ ɖɩ-taa,+
3 nɛ ɩɖʋ-wɛ paɣtʋ tʋnɛ: “Ɩtɔzɩ pɛɛ 12 Yɔɔrdaŋ pɔɔ hɛkʋ taa, ɖenɖe cɔjɔnaa kaasɩŋaa yɔ+ nɛ ɩkpɛndɩnɩ-yɛ nɛ ɩsɩɩ ɖenɖe ɩkaɣ sʋʋ ɖoo taa yɔ.”»+
4 Nɛ Yozuwee yaa abalaa 12 mba ɛɛlɩzɩ Izrayɛɛlɩ mba taa yɔ, abalʋ kʋɖʋm paa cejewiye nɖɩ lɛ ɖɩ-taa,
5 nɛ Yozuwee heyi-wɛ se: «Iwolo mɩ-Ɛsɔ Yehowa Aɖakaɣ ɛsɩndaa Yɔɔrdaŋ pɔɔ hɛkʋ taa, nɛ pɩwɛɛ se mɩ-taa paa weyi lɛ, ɛkpaɣ pɩyɛ naɖɩyɛ ɛ-hazaɣ yɔɔ, Izrayɛɛlɩ mba cejewe ñʋŋ taa,
6 se pɩkɛ yʋsaɣ mɩ-hɛkʋ taa. Ye mi-piya* ɩpɔzɩ-mɩ pʋwayɩ se: “Ɛbɛ yɔɔ ɩsɩ pɛɛ anɛ yɔ cɩnɛ?” yɔ+
7 pɩwɛɛ se icosi-sɩ se: “Mbʋ pʋyɔɔ yɔ Yɔɔrdaŋ lɩm kaasɩŋ Yehowa ɛgbɛyɛ ɖʋʋ aɖakaɣ ɛsɩndaa.+ Kɛtɛzaɣ Yɔɔrdaŋ lɛ, Yɔɔrdaŋ lɩm kaayebi kpem. Pɛɛ anɛ yɔ akaɣnɩ tɔzʋʋ Izrayɛɛlɩ samaɣ tɔm ndʋ tɩ-yɔɔ paa ɛzɩmtaa.”»+
8 Ðɩnɛ ɛlɛ Izrayɛɛlɩ mba la ɖeyi ɖeyi ɛzɩ Yozuwee kaaɖʋʋ paɣtʋ yɔ. Pakpaɣ pɛɛ 12 Yɔɔrdaŋ pɔɔ hɛkʋ taa, Izrayɛɛlɩ mba cejewe ñʋŋ taa, ɛzɩ Yehowa kaaheyuu Yozuwee yɔ. Pakpaɣ-yɛ nɛ powoni pasɩɩ ɖenɖe pɩɩwɛɛ se pasʋʋ ɖoo taa yɔ.
9 Yozuwee ɖɔɖɔ kaasiɣ pɛɛ 12 Yɔɔrdaŋ pɔɔ hɛkʋ taa, ɖenɖe cɔjɔnaa mba paahɔɔlɩ ɛgbɛyɛ ɖʋʋ aɖakaɣ yɔ paasɩŋaa yɔ,+ nɛ pɛɛ ana awɛ peeɖe halɩ nɛ sɔnɔ.
10 Cɔjɔnaa mba paahɔɔlɩ Aɖakaɣ yɔ, pasɩŋ mbʋ Yɔɔrdaŋ pɔɔ hɛkʋ taa nɛ pɩkɔɔ pɩsɩɩnɩ alɩwaatʋ ndʋ samaɣ labɩ mbʋ payɩ Yehowa ɖʋ Yozuwee paɣtʋ se eheyi-kɛ nɛ kala yɔ, nɛ pɩla nɔɔ kʋɖʋmaɣ nɛ paɣtʋ ndʋ payɩ Moyizi kaaɖʋ Yozuwee yɔ. Alɩwaatʋ ndʋ lɛ, samaɣ tɛzaɣ lɛɛ lɛɛ.
11 Samaɣ kpeekpe tɩɩtɛm tɛzʋʋ lɛ, cɔjɔnaa kpɛndɩnɩ Yehowa Aɖakaɣ nɛ pɛtɛzɩ, samaɣ kaawɛɛ nɛ kɔcɔŋnɩ-wɛ.+
12 Nɛ Rubɛɛnɩ mba, Gaadɩ mba nɛ Manaasee cejewiye hɔɔlʋʋ pɔñɔɔzɩ pa-tɩ se pala you+ nɛ pɛɖɛɛ Izrayɛɛlɩ mba lalaa nɔɔ nɛ pɛtɛzɩ, ɛzɩ Moyizi kaaɖʋʋ-wɛ paɣtʋ yɔ.+
13 Sɔɔjanaa ɛzɩ 40 000 mbʋ yɔ, mba paañɔɔzɩ pa-tɩ se pala you yɔ, pɛtɛzɩ Yehowa ɛsɩndaa nɛ powolo Yeriikoo kañɩmbusuu kɛdɛɛnzɩ taa.
14 Kɩyakʋ ŋgʋ ki-wiye, Yehowa kpazɩ Yozuwee Izrayɛɛlɩ kpeekpe ɛsɩndaa,+ nɛ pañamɩ-ɩ siŋŋ* e-wezuu caɣʋ kɩyakɩŋ kpeekpe, ɛzɩ paañam Moyizi siŋŋ yɔ.+
15 Pʋwayɩ lɛ, Yehowa heyi Yozuwee se:
16 «Ðʋ paɣtʋ cɔjɔnaa mba pɔhɔɔlɩ Aseɣɖe Lɩzʋʋ aɖakaɣ+ yɔ se palɩɩ Yɔɔrdaŋ pɔɔ taa.»
17 Pʋyɔɔ Yozuwee ɖʋ paɣtʋ cɔjɔnaa se: «Ɩlɩɩ Yɔɔrdaŋ pɔɔ taa.»
18 Alɩwaatʋ ndʋ cɔjɔnaa mba paahɔɔlɩ Yehowa ɛgbɛyɛ ɖʋʋ aɖakaɣ yɔ+ palɩnɩ Yɔɔrdaŋ pɔɔ hɛkʋ taa nɛ cɔjɔnaa naataŋ tukuni tɛtʋ waɣwaɣ lɛ, Yɔɔrdaŋ pɔɔ taa lɩm ɖaɣnɩ paɣzʋʋ kpem nɛ pɩwadɩ kidiiliŋ yɔɔ+ ɛzɩ ɖooo lɛ yɔ.
19 Samaɣ lɩnɩ Yɔɔrdaŋ pɔɔ taa fenaɣ kajalaɣ ñɩŋga kɩyakʋ 10 ñɩŋgʋ wiye nɛ kesiɣ kizinzikiŋ Gilgaalɩ,+ Yeriikoo wɩsɩ ɖɩlɩyɛ taa kamaɣ yɔɔ.
20 Piyele nɛ pɛɛ 12 wena paakpaɣ Yɔɔrdaŋ pɔɔ taa yɔ, Yozuwee siɣ-yɛ Gilgaalɩ.+
21 Nɛ eheyi Izrayɛɛlɩ mba se: «Cee wayɩ, alɩwaatʋ ndʋ mi-piya pɔzʋʋ sɩ-caanaa se: “Ɛbɛ yɔɔ pesiɣ pɛɛ anɛ yɔ?” lɛ,+
22 pɩwɛɛ se ɩlɩzɩ mi-piya pɩ-taa se: “Izrayɛɛlɩ mba ɖɔm tɛtʋ waɣwaɣ yɔɔ+ nɛ pɛtɛzɩ Yɔɔrdaŋ pɔɔ
23 alɩwaatʋ ndʋ mɩ-Ɛsɔ Yehowa laba nɛ Yɔɔrdaŋ pɔɔ lɩm sɔɔ pɛ-ɛsɩndaa nɛ pɩkɔɔ pɩsɩɩnɩ alɩwaatʋ ndʋ pɛtɛzɩ-kɛ yɔ, ɛzɩ mɩ-Ɛsɔ Yehowa kaalabʋ Teŋgu Kɩsɛɛmʋʋ yɔ, alɩwaatʋ ndʋ ɛɛlaba nɛ kɩsɔɔ ɖɛ-ɛsɩndaa nɛ pɩkɔɔ pɩsɩɩnɩ alɩwaatʋ ndʋ ɖɩtɛzɩ-kʋ yɔ.+
24 Ɛlabɩ mbʋ se pɩsa nɛ tɛtʋ yɔɔ ajɛɛ tɩŋa tɩlɩ ɛzɩma Yehowa nesi wɛ ɖoŋ pɩdɩɩfɛyɩ yɔ,+ nɛ pɩsa ɖɔɖɔ nɛ ise sɔɔndʋ mɩ-Ɛsɔ Yehowa tam.”»
