Yozuwee 6:1-27
6 Izrayɛɛlɩ mba yɔɔ lɛ, paaɖɩɣ Yeriikoo tɛtʋ nɔnɔsɩ cɩŋ cɩŋ; nɛ nɔɔyʋ taalɩɣ nɛ nɔɔyʋ taasʋʋ ɖɔɖɔ.+
2 Peeɖe Yehowa heyi Yozuwee se: «Na, manɖʋzɩ ñe-nesi taa Yeriikoo nɛ ki-wiyaʋ nɛ ki-yoyaa ɖoŋ tɩnaa.+
3 Mɩ you laɖaa, pɩwɛɛ se mɩ-tɩŋa ɩɖɔ nɛ ɩcɔɔ tɛtʋ, ɩcɔɔ-tʋ tam kʋɖʋm nɛ ɩta. Mbʋ pɩwɛɛ se ɩla kɩyakɩŋ loɖo.
4 Pɩwɛɛ se ŋyele nɛ cɔjɔnaa 7 ɖɔkɩ ɛyaŋ hɩŋ 7 Aɖakaɣ ɛsɩndaa. Ɛlɛ kɩyakʋ 7 ñɩŋgʋ wiye lɛ, pɩwɛɛ se ɩɖɔ nɛ ɩcɔɔ tɛtʋ nɛ ɩta tam 7 nɛ pɩwɛɛ se cɔjɔnaa ɩhʋlɩ nɔndɔŋ.+
5 Pahʋlʋʋ ɛyaʋ hɩlʋʋ lɛ—ɩñɩtɩɣ nɛ ɩnɩɩ nɔndɔʋ taŋ lɛ—pɩwɛɛ se sɔɔjanaa kpeekpe ɩma you kubusi sɔsɔsɩ. Ðɩnɛ ɛlɛ tɛtʋ koloŋa kaɣ kpɛzʋʋ nɛ kaɖa,+ nɛ pɩwɛɛ se sɔɔjanaa ɩsʋʋ tɩ-taa, paa weyi lɛ ɛpam ɛsa nɛ ɖenɖe yɔ, ɛɖɛɛnɩ peeɖe kpaagbaa.»
6 Pʋyɔɔ Nuuni pɩyalʋ Yozuwee kpeɣli cɔjɔnaa nɛ eheyi-wɛ se: «Ɩkpaɣ ɛgbɛyɛ ɖʋʋ aɖakaɣ, nɛ cɔjɔnaa 7 ɩɖɔkɩ ɛyaŋ hɩŋ 7 Yehowa Aɖakaɣ ɛsɩndaa.»+
7 Pʋwayɩ lɛ, eheyi sɔɔjanaa se: «Ɩɖɛɛ nɛ ɩɖɔ nɛ ɩcɔɔ tɛtʋ nɛ ɩta. Abalaa mba pɔɖɔkɩ you wondu yɔ+ pɩwɛɛ se pɛɖɛɛ Yehowa Aɖakaɣ nɔɔ.»
8 Nɛ ɛzɩ Yozuwee kaaheyuu sɔɔjanaa yɔ, cɔjɔnaa 7 mba pakpaɣ ɛyaŋ hɩŋ 7 Yehowa ɛsɩndaa yɔ pɛɖɛɛ nɛ pahʋlʋʋ nɔndɔŋ, nɛ Yehowa ɛgbɛyɛ ɖʋʋ aɖakaɣ kaawɛɛ nɛ katɩŋɩɣ pa-wayɩ.
9 Nɛ abalaa mba pɔɖɔkɩ you wondu yɔ, pɛɖɛɛ cɔjɔnaa mba paawɛɛ nɛ pahʋlʋʋ nɔndɔŋ yɔ nɔɔ, nɛ wayɩ feŋiyaa ñaawɛɛ nɛ patɩŋɩɣ Aɖakaɣ; nɛ cɔjɔnaa ñɛwɛɛ nɔndɔŋ hʋlʋʋ yɔɔ.
10 Ɛlɛ Yozuwee kaaɖʋ paɣtʋ sɔɔjanaa se: «Ɩtaama kubusi nɛ itaayele nɛ nɔɔyʋ nɩɩ mɩ-nɔsɩ. Tɔm piye naɖɩyɛ ɛtaalɩɩnɩ mɩ-nɔsɩ taa nɛ pɩkɔɔ pɩsɩɩnɩ kɩyakʋ ŋgʋ meheyiɣ-mɩ se: “Ɩma kubusi!” yɔ. Alɩwaatʋ ndʋ tɩ-taa pɩpɔzʋʋ se ɩma kubusi.»
11 Yozuwee kaayeba nɛ pakpaɣ Yehowa Aɖakaɣ nɛ pɔɖɔ nɛ pɔcɔɔ tɛtʋ nɛ pata; pɔcɔ tɛtʋ nɛ pata tam kʋɖʋm lɛ, papɩsɩ pe-ɖigbeɣliye* taa nɛ poɖoo ɖoo taa peeɖe.
12 Tɛʋ fem tanaŋ tɛɛ lɛ, Yozuwee kʋyɩ lɔŋ nɛ cɔjɔnaa kpaɣ Yehowa Aɖakaɣ,+
13 nɛ cɔjɔnaa 7 mba pɔɖɔkɩ ɛyaŋ hɩŋ 7 yɔ pɔɖɔ Yehowa Aɖakaɣ ɛsɩndaa, nɛ pɛwɛɛ nɔndɔŋ hʋlʋʋ yɔɔ. Abalaa mba pɔɖɔkɩ you wondu yɔ, paaɖɛ-wɛ nɔɔ nɛ wayɩ feŋiyaa ñɛwɛɛ nɛ patɩŋɩɣ Yehowa Aɖakaɣ wayɩ; alɩwaatʋ ndʋ tɩ-taa lɛ, cɔjɔnaa ñaawɛ nɔndɔŋ hʋlʋʋ yɔɔ.
14 Pɔɖɔ tam kʋɖʋm nɛ pɔcɔɔ tɛtʋ nɛ pata evemiye 2 ñɩnɖɛ wiye, nɛ pʋwayɩ lɛ, papɩsɩ pe-ɖigbeɣliye taa. Palabɩ mbʋ kɩyakɩŋ 6.+
15 Kɩyakʋ 7 ñɩŋgʋ wiye lɛ, pakʋyɩ lɔŋ tanaŋ tɛɛ cu nɛ pɔɖɔ nɛ pɔcɔɔ tɛtʋ nɛ pata ɛzɩ paatɛm labʋ yɔ tam 7. Kɩyakʋ ŋgʋ ki-wiye ɖeke pɔɖɔma nɛ pɔcɔɔ tɛtʋ nɛ pata tam 7.+
16 Pɔɖɔma nɛ pɔcɔɔ tɛtʋ nɛ pata tam 7 ɖeɖe lɛ, cɔjɔnaa hʋlɩ nɔndɔŋ, nɛ Yozuwee heyi sɔɔjanaa se: «Ɩma kubusi,+ mbʋ pʋyɔɔ yɔ Yehowa ɖʋzɩ tɛtʋ mi-nesi taa!
17 Pɩwɛɛ se ɩɖɩzɩ tɛtʋ nɛ mbʋ payɩ pɩwɛ tɩ-taa yɔ;+ Yehowa tɩnɩ tɩ-tɩŋa. Hayitu laɖʋ Rahaabɩ+ wezuu ɖeke pɩwɛɛ se ɩfɛɛ, halʋ ɛnʋ nɛ mba payɩ pa nɛ ɩ pɛwɛ ɛ-tɛ yɔ, mbʋ pʋyɔɔ yɔ ɛɛmɛsɩ mba ɖiitiyaa yɔ.+
18 Ɛlɛ ɩkpa mɩ-tɩ nɛ wondu ndʋ pɩpɔzʋʋ se paɖɩzɩ yɔ,+ nɛ mi-liu ɛtaawɛɛ wondu ndʋ pɩpɔzʋʋ se paɖɩzɩ yɔ tɩ-taa nakʋyʋ nɛ ɩkpaɣ-kʋ,+ nɛ ɩkɔnɩ asɛyʋʋ* Izrayɛɛlɩ samaɣ yɔɔ nɛ kapɩsɩ mbʋ pɩpɔzʋʋ se paɖɩzɩ yɔ.+
19 Ɛlɛ liidiye, sika, ñɩɣyʋʋ kɩsɛɛmʋʋ wondu nɛ ñɩɣtʋ wondu, pɩtɩŋa pɩkɛ mbʋ pɩwɛ kele kele Yehowa ɛsɩndaa yɔ.+ Pɩwɛɛ se powoni wondu ndʋ Yehowa ñɩm ɖɩzɩyɛ taa.»+
20 Alɩwaatʋ ndʋ pahʋlɩ nɔndɔŋ lɛ, sɔɔjanaa ma kubusi.+ Sɔɔjanaa tɩɩnɩ nɔndɔʋ taŋ nɛ pama you kubusi sɔsɔsɩ lɛ, koloŋa kpɛzɩ nɛ kɔtɔlɩ.+ Pʋwayɩ lɛ, sɔɔjanaa sʋʋ tɛtʋ taa, paa weyi lɛ ɛpam ɛsa nɛ ɖenɖe yɔ, ɛɖɛɛnɩ peeɖe kpaagbaa, nɛ pamʋ tɛtʋ.
21 Paɖɩzɩ mbʋ payɩ pɩɩwɛ tɛtʋ taa yɔ nɛ laɣɖɛ, abalaa nɛ halaa, evebiya* nɛ akpadɩyaa, naŋ, heŋ nɛ kpaŋasɩ.+
22 Yozuwee heyi abalaa 2 mba paacɔŋ tɛtʋ yɔ se: «Iwolo halʋ hayitu laɖʋ ɛnʋ ɛ-ɖɩɣa taa nɛ ɩlɩzɩ ɛ nɛ ɛ-ñɩma tɩŋa payɩ, ɛzɩ iiɖuunuu-i yɔ.»+
23 Peeɖe cɔŋɩyaa evebiya mba, powoba nɛ palɩzɩ Rahaabɩ, ɛ nɛ ɛ-caa, e-ɖoo, e-koobiya abalɩñɩma nɛ ɛ-ñɩma tɩŋa payɩ; ɛɛɛ, palɩzɩ ɛ-hɔʋ tɩŋa payɩ,+ palɩzɩ-wɛ cɩŋgɩlɩm nɛ pasɩɩ-wɛ lone naɖɩyɛ taa Izrayɛɛlɩ mba ɖigbeɣliye wayɩ.
24 Nɛ pañaɣzɩ miŋ tɛtʋ nɛ mbʋ payɩ pɩɩwɛ tɩ-taa yɔ. Ɛlɛ liidiye, sika, ñɩɣyʋʋ kɩsɛɛmʋʋ wondu nɛ ñɩɣtʋ wondu lɛ, pɛcɛlɩ-tʋ se powoni Yehowa ɖɩɣa ñɩm ɖɩzɩyɛ taa.+
25 Hayitu laɖʋ Rahaabɩ, ɛ-caa ɖɩɣa nɛ ɛ-ñɩma tɩŋa ɖeke Yozuwee fɛwa;+ nɛ halʋ ɛnʋ ɛwɛ Izrayɛɛlɩ halɩ nɛ sɔnɔ,+ mbʋ pʋyɔɔ yɔ ɛɛmɛsɩ mba Yozuwee kaatiyaa se pɔcɔŋ Yeriikoo tɛtʋ yɔ.+
26 Alɩwaatʋ ndʋ tɩ-taa Yozuwee ɖuu ɖuutu tʋnɛ:* «Abalʋ weyi ɛkʋyʋʋ se ɛɖaɣnɩɣ Yeriikoo tɛtʋ tʋnɛ maʋ yɔ, pɔlɔ ɛ-yɔɔ nɔɔ kɩdɛkɛdaɣ Yehowa ɛsɩndaa. Ɛ-kajalaɣ pɩɣa kaɣ sɩbʋ alɩwaatʋ ndʋ ɛsɩɣ tɛtʋ ndʋ ti-tigiɖe yɔ, nɛ ɛ-tɩnʋʋ kaɣ sɩbʋ alɩwaatʋ ndʋ ɛɖʋʋ tɩ-pɔɔyɩŋ yɔ.»+
27 Mbʋ Yehowa kaawɛ Yozuwee cɔlɔ,+ nɛ ɛ-hɩɖɛ sɛɛ tɛtʋ kpeekpe yɔɔ.+
Pɩ-tɛɛ tɔm
^ Yaa «pa-maalika.»
^ Yaa «kigiluu; kʋñɔŋ.»
^ Yaa «evebiya nɛ pɛlaa.»
^ Pɩpɩzɩɣ pɩkɛ, «Yozuwee yeba nɛ samaɣ ɖuu ɖuutu tʋnɛ.»
