Yozuwee 7:1-26
7 Ɛlɛ Izrayɛɛlɩ mba labɩ mbʋ pɩfɛyɩ siɣsiɣ yɔ mbʋ pɩɩpɔzaa se paɖɩzɩ yɔ pɩ-hɔɔlʋʋ taa, mbʋ pʋyɔɔ yɔ Akaŋ+ weyi ɛɛkɛ Karɩmii pɩyalʋ, Zabɩdii pɩyalʋ, Zeraa pɩyalʋ nɛ ɛɛlɩnɩ Yuuda cejewiye taa yɔ, ɛkpaɣ mbʋ pɩɩpɔzaa se paɖɩzɩ yɔ pɩ-taa nabʋyʋ.+ Nɛ Yehowa kɔ pana siŋŋ nɛ Izrayɛɛlɩ mba.+
2 Nɛ Yozuwee tiyi abalaa nabɛyɛ se pakʋyɩ Yeriikoo nɛ powolo Ayi+ tɛtʋ taa, tɩɩñɔtɩnɩ Bɛtɩ-Avɛɛnɩ nɛ tɩɩwɛ Betɛɛlɩ+ wɩsɩ ɖɩlɩyɛ taa. Eheyi-wɛ se: «Iwolo nɛ ɩcɔŋ tɛtʋ.» Ðɩnɛ ɛlɛ abalaa mba, powolo nɛ pɔcɔŋ Ayi tɛtʋ.
3 Papɩsɩ Yozuwee cɔlɔ lɛ, peheyi-i se: «Pɩtɩcɛyɩ se sɔɔjanaa tɩŋa iwolo. Abalaa ɛzɩ 2 000 yaa 3 000 mbʋ yɔ pɩzɩɣ nɛ pamʋ Ayi tɛtʋ. Taayele nɛ sɔɔjanaa kpeekpe wolo nɛ pɩnɩɩ-wɛ yem, mbʋ pʋyɔɔ yɔ ɛyaa pazɩ yem wɛnɩ tɩ-taa.»
4 Pʋyɔɔ lɛ, abalaa ɛzɩ 3 000 mbʋ yɔ kpanɩ peeɖe, ɛlɛ pese Ayi abalaa ɛsɩndaa.+
5 Ayi mba kʋ abalaa 36, nɛ pɔɖɔɔnɩ lalaa kpaɣnɩ tɛtʋ nɔnɔɔ nɛ piwolo pɩtalɩ ɖooo Sebarim,* nɛ pɛwɛɛ-wɛ kʋʋ yɔɔ alɩwaatʋ ndʋ petikaɣ yɔ. Piiyeba nɛ samaɣ abalɩtʋ* yoli nɛ tikpe ɛzɩ lɩm yɔ.
6 Peeɖe Yozuwee cɩyɩ e-tokonaa nɛ ɛhɩnɩ tataa nɛ ɛpa ɛ-ɛsa nɛ tɛtʋ Yehowa Aɖakaɣ ɛsɩndaa nɛ piwolo pɩtalɩ ɖanaɣ yɔɔ, ɛ nɛ Izrayɛɛlɩ ɛzʋtʋyaa, nɛ pɛwɛɛ nɛ papɩyɩɣ puuyuu* pa-ñʋŋ taa.
7 Yozuwee yɔɔdɩ se: «Hayɩ! Kɩbaɣlʋ Kɩlɩm Yehowa, ɛbɛ yɔɔ ŋtɛzɩnɩ samaɣ kanɛ Yɔɔrdaŋ pɔɔ se ŋɖʋzɩ-ɖʋ Amoori mba nesi tɛɛ nɛ paɖɩzɩ-ɖʋ? Ye ɖɩɩnawa yɔ, ɖɩɩcaɣ Yɔɔrdaŋ pɔɔ hɔɔlʋʋ lɛɛkʋ* yɔɔ!
8 Hayɩ Yehowa, kpaɣ nɛ ŋkpeɣ-m, lɛɛlɛɛyɔ Izrayɛɛlɩ mba seɣu po-koyindinaa ɛsɩndaa yɔ,* suwe manpɩzɩɣ nɛ mɔyɔɔdɩ?
9 Alɩwaatʋ ndʋ Kanaŋ mba nɛ ɛjaɖɛ taa ɛyaa kpeekpe panɩɣ tɔm ndʋ yɔ, pakaɣ-ɖʋ cɔʋ nɛ pata nɛ pahɩzɩ ɖa-hɩɖɛ tɛtʋ yɔɔ, nɛ ña-hɩɖɛ sɔsɔɖɛ yɔ, ɛzɩma ŋkaɣ labʋ ɖɩ-tɔm?»+
10 Yehowa cosi Yozuwee se: «Kʋyɩ! Ɛbɛ yɔɔ ŋhɩnɩ tataa nɛ ŋpa ɛsa nɛ tɛtʋ?
11 Izrayɛɛlɩ labɩ kɩwɛɛkɩm. Izrayɛɛlɩ mba tɩña mɛ-ɛgbɛyɛ+ nɖɩ manɖʋ-wɛ paɣtʋ se pɔɖɔkɩ yɔ. Pakpaɣ mbʋ pɩɩpɔzaa se paɖɩzɩ yɔ pɩ-taa nabʋyʋ,+ pamɩlɩ-pʋ+ nɛ pɛmɛsɩ-pʋ po-wondu taa.+
12 Pʋyɔɔ lɛ, Izrayɛɛlɩ mba ɩɩkaɣ pɩzʋʋ nɛ pakaɖɩnɩ po-koyindinaa. Pakaɣ haʋ siɣye po-koyindinaa nɛ pese pɛ-ɛsɩndaa, mbʋ pʋyɔɔ yɔ papɩsɩ mbʋ pɩpɔzaa se paɖɩzɩ yɔ. Ye ɩtɩlɩzɩ mɩ-hɛkʋ taa mbʋ pɩɩpɔzaa se paɖɩzɩ yɔ, maakaɣ tasʋʋ wɛʋ mɩ-cɔlɔ.+
13 Kʋyɩ nɛ ŋpɩsɩ samaɣ kele kele!+ Heyi-wɛ se: “Ɩpɩsɩ mɩ-tɩ kele kele pʋcɔ nɛ cee tɛʋ fe, mbʋ pʋyɔɔ yɔ tɔm tʋnɛ Izrayɛɛlɩ tɛ Ɛsɔ Yehowa yɔɔdʋʋ: ‘Oo Izrayɛɛlɩ, mbʋ pɩɩpɔzaa se paɖɩzɩ yɔ, pɩwɛ ñɛ-hɛkʋ taa. Ŋŋkaɣ pɩzʋʋ nɛ ŋkaɖɩnɩ ño-koyindinaa, pɩkɔɔ pɩsɩɩnɩ alɩwaatʋ ndʋ ɩlɩzɩ mɩ-hɛkʋ taa mbʋ pɩɩpɔzaa se paɖɩzɩ yɔ.
14 Pɩwɛɛ se ɩkɔɔ tanaŋ tɛɛ, cejewiye cejewiye, nɛ cejewiye nɖɩ Yehowa lɩzɩɣ yɔ,+ ɖɩkaɣ ɖɩ-tɩ ñɔtʋʋ hɔʋ hɔʋ; nɛ hɔʋ ŋgʋ Yehowa lɩzɩɣ yɔ, kɩkaɣ kɩ-tɩ ñɔtʋʋ ɖɩɣa ɖɩɣa; nɛ ɖɩɣa ŋga Yehowa lɩzɩɣ yɔ, ka-taa abalaa kaɣ pa-tɩ ñɔtʋʋ kʋɖʋm kʋɖʋm.
15 Nɛ ɛyʋ weyi ɛ-cɔlɔ pakaɣ naʋ mbʋ pɩɩpɔzaa se paɖɩzɩ-pʋ yɔ, pakaɣ-ɩ miŋ ñaɣzʋʋ,+ ɛ nɛ mbʋ payɩ ɛwɛna yɔ, mbʋ pʋyɔɔ yɔ ɛtɩña Yehowa ɛgbɛyɛ,+ nɛ mbʋ pʋyɔɔ yɔ ɛlabɩ fɛyɛ lakasɩ Izrayɛɛlɩ taa.’”»
16 Nɛ tɛʋ fem tanaŋ tɛɛ lɛ, Yozuwee kʋyɩ lɔŋ nɛ eyele nɛ Izrayɛɛlɩ mba ñɔtɩ pa-tɩ cejewiye cejewiye, nɛ palɩzɩ Yuuda cejewiye.
17 Eyele nɛ Yuuda hɔŋ ñɔtɩ ɩ-tɩ, nɛ palɩzɩ Zeraa mba+ hɔʋ; pʋwayɩ lɛ, eyele nɛ Zeraa mba hɔʋ taa abalaa ñɔtɩ pa-tɩ kʋɖʋm kʋɖʋm, nɛ palɩzɩ Zabɩdii.
18 Kɛdɛzaɣ ɖeɖe lɛ, eyele nɛ Zabɩdii ɖɩɣa taa abalaa ñɔtɩ pa-tɩ kʋɖʋm kʋɖʋm, nɛ palɩzɩ Akaŋ,+ ɛɛkɛ Karɩmii pɩyalʋ, Zabɩdii pɩyalʋ, Zeraa pɩyalʋ, nɛ ɛɛlɩnɩ Yuuda cejewiye taa.
19 Ðɩnɛ ɛlɛ Yozuwee heyi Akaŋ se: «Man-pɩyalʋ, mentendi-ŋ, ɖʋ hɩɖɛ Izrayɛɛlɩ tɛ Ɛsɔ Yehowa nɛ ŋkuli ña-kɩwɛɛkɩm yɔɔ ɛ-ɛsɩndaa. Mentendi-ŋ, heyi-m mbʋ ŋlaba yɔ. Taamɛsɩ-m pʋ.»
20 Akaŋ cosi Yozuwee se: «Toovenim taa lɛ, mayʋsɩnɩnɩ Izrayɛɛlɩ tɛ Ɛsɔ Yehowa. Nɛ mbʋ malaba yɔ mbʋ yɔ:
21 Wondu ndʋ palazaa yɔ, mana tɩ-taa Siineyaarɩ+ toko kɩbaŋʋ ŋgʋ kɩmʋ ñɩm yɔ, nɛ liidiye siklinaa* 200 nɛ sika ŋga ko-yuŋ maɣnɩ siklinaa 50 yɔ, nɛ wondu ndʋ tɩlabɩ-m liu nɛ mankpaɣ-tʋ. Mɛmɛsɩ-tʋ tɛtɛɛ men-kizinziku tɛɛ, liidiye* wɛ pɩ-tɛɛ.»
22 Kpaagbaa mbʋ lɛ, Yozuwee tiyi ɛyaa nɛ pese nɛ powolo kizinziku tɛɛ, nɛ pana ɛmɛsɩ toko e-kizinziku tɛɛ, liidiye kaawɛ toko tɛɛ.
23 Peeɖe palɩzɩ wondu kizinziku tɛɛ nɛ powoni-tʋ Yozuwee nɛ Izrayɛɛlɩ mba kpeekpe, nɛ pasɩɩ-tʋ Yehowa ɛsɩndaa.
24 Ðɩnɛ ɛlɛ, Yozuwee nɛ Izrayɛɛlɩ kpeekpe pakpaɣ Zeraa pɩyalʋ Akaŋ,+ liidiye, toko ŋgʋ kɩmʋ ñɩm yɔ nɛ sika,+ pɩkpɛndɩnɩ ɛ-pɩyalaa, ɛ-pɛlaa, ɛ-nɔ, ɛ-kpaŋaɣ, e-heŋ, ɛ-pʋŋ, e-kizinziku nɛ mbʋ payɩ ɛwɛna yɔ, nɛ powoni Akɔɔrɩ Fɛɛʋ taa.+
25 Peeɖe Yozuwee yɔɔdaa se: «Ɛbɛ yɔɔ ŋkɔnɩ asɛyʋʋ* ɖɔ-yɔɔ?+ Sɔnɔ Yehowa kaɣ kɔnʋʋ asɛyʋʋ ñɔ-yɔɔ.» Ðɩnɛ ɛlɛ, Izrayɛɛlɩ kpeekpe yaɣ-ɩ pɛɛ,+ pʋwayɩ lɛ, pañaɣzɩ-wɛ miŋ.+ Mbʋ payaɣ pa-tɩŋa pɛɛ.
26 Nɛ pakpazɩ pɛɛ huuye sɔsɔyɛ naɖɩyɛ ɛ-yɔɔ nɛ ɖɩwɛ halɩ nɛ sɔnɔ. Peeɖe Yehowa pana sɔsɔna hɛwa.+ Pʋyɔɔ paya lone nɖɩ se Akɔɔrɩ* Fɛɛʋ, halɩ nɛ sɔnɔ.
Pɩ-tɛɛ tɔm
^ Pʋ-tɔbʋʋ se «Kaaŋ ɖɩyɔkɩyɛ.»
^ Piye piye, «laŋɩyɛ.»
^ Yaa «mʋzʋʋ.»
^ Pʋ-tɔbʋʋ se Yɔɔrdaŋ pɔɔ wɩsɩ ɖɩlɩyɛ hɔɔlʋʋ.
^ Yaa «Izrayɛɛlɩ mba haʋ po-koyindinaa siɣye yɔ.»
^ Sikli kʋɖʋmʋʋ maɣnɩ ɛzɩ kɩɖamnaa 11 nɛ hɔɔlʋʋ mbʋ yɔ (kɩɖamnaa 11,4). Cɔnɩ Tɔm kɩsɔzɩtʋ B14.
^ Yaa «liidiye nɛ sika.»
^ Yaa «kigiluu; kʋñɔŋ.»
^ Pʋ-tɔbʋʋ se «Asɛyʋʋ; Kigiluu.»
