Yozuwee 8:1-35
8 Nɛ Yehowa heyi Yozuwee se: «Sɔɔndʋ ɛtaakpa-ŋ nɛ taaseli.+ Kpaɣ you laɖaa kpeekpe nɛ ŋkpa nɛ ŋyooni Ayi. Na, manɖʋzɩ ñe-nesi tɛɛ Ayi wiyaʋ, ɛ-samaɣ, ɛ-tɛtʋ nɛ ɛ-ɛjaɖɛ.+
2 La Ayi tɛtʋ nɛ ti-wiyaʋ ɛzɩ ŋŋlabʋ Yeriikoo tɛtʋ nɛ ti-wiyaʋ yɔ,+ ɛlɛ ɩpɩzɩɣ nɛ ɩlazɩ nɛ ɩkpaɣ ti-wondu nɛ tɩ-kpɩna. Pɩwɛɛ se ɩpabɩ tɛtʋ nɛ wayɩ.»
3 Peeɖe Yozuwee nɛ you laɖaa tɩŋa pɛɖɛwa nɛ pakpa se poyooni Ayi. Yozuwee lɩzɩ you laɖaa ɖoŋ tɩnaa 30 000 nɛ etiyi-wɛ nɛ ɖoo.
4 Ɛɖʋ-wɛ paɣtʋ se: «Ɩnaɣ, pɩwɛɛ se ɩpabɩ tɛtʋ nɛ tɩ-wayɩ. Ɩtaakɩlɩ tɛtʋ posinuu, nɛ pɩwɛɛ se mɩ-tɩŋa, ɩñɔɔzɩ mɩ-tɩ nɛ ɩɖaŋ.
5 Ma nɛ samaɣ ŋga kɛwɛ mɔn-cɔlɔ yɔ ka-tɩŋa ɖɩkaɣ ñɔtɩnʋʋ tɛtʋ, nɛ palɩɣ se poyooni-ɖʋ ɛzɩ paalabʋ kajalaɣ taa yɔ lɛ,+ ɖɩkaɣ seu pɛ-ɛsɩndaa.
6 Palɩɣ nɛ paɖʋ ɖa-wayɩ lɛ, ɖɩkaɣ yebu nɛ poposi pa-tɩ nɛ tɛtʋ, mbʋ pʋyɔɔ yɔ pakaɣ yɔɔdʋʋ se: “Peɖiɣni seu ɖɛ-ɛsɩndaa ɛzɩ paaseu kajalaɣ taa yɔ.”+ Nɛ ɖɩkaɣ seu pɛ-ɛsɩndaa.
7 Ðɩnɛ ɛlɛ, pɩwɛɛ se ɩkʋyɩnɩ mɩ-ɖɩbabɩyɛ nɛ iwolo nɛ ɩmʋ tɛtʋ; mɩ-Ɛsɔ Yehowa kaɣ-tʋ ɖʋzʋʋ mi-nesi tɛɛ.
8 Ɩñɩtɩɣ nɛ ɩmʋ tɛtʋ lɛ, pɩwɛɛ se ɩñaɣzɩ-tʋ miŋ.+ Pɩwɛɛ se ɩla ɛzɩ Yehowa yɔɔdʋʋ yɔ. Paɣtʋ ndʋ manɖʋ-mɩ yɔ, ndʋ lɛ.»
9 Nɛ Yozuwee tiyi-wɛ, nɛ pɔɖɔ nɛ powolo lone nɖɩ ɖɩ-taa pɩwɛɛ se papabɩ yɔ; paapabɩ Betɛɛlɩ nɛ Ayi pɛ-hɛkʋ taa, Ayi wɩsɩ ɖɩɖʋyɛ taa, ɛlɛ Yozuwee sʋʋ sɔɔjanaa lalaa cɔlɔ ɖoo ana.
10 Pʋwayɩ lɛ, Yozuwee kʋyɩ tanaŋ tɛɛ pala nɛ ekpeɣli sɔɔjanaa; nɛ ɛ nɛ Izrayɛɛlɩ ɛzʋtʋyaa powoni-wɛ Ayi.
11 You laɖaa mba pa-tɩŋa+ paawɛ ɛ-cɔlɔ yɔ, pɔɖɔ nɛ pakpa nɛ patalɩ tɛtʋ ɛsɩndaa. Powolo nɛ pekpeɣli Ayi hayo kiŋ, fɛɛʋ kaawɛ pa nɛ Ayi pɛ-hɛkʋ taa.
12 Ɛlɛ ɛɛtɛm lɩzʋʋ abalaa ɛzɩ 5 000 mbʋ yɔ nɛ eyele nɛ papabɩ+ Betɛɛlɩ+ nɛ Ayi pɛ-hɛkʋ taa, tɛtʋ wɩsɩ ɖɩɖʋyɛ taa.
13 Mbʋ sɔɔjanaa hɔɔlʋʋ sɔsɔʋ kaawɛ tɛtʋ nɛ hayo,+ nɛ wayɩ feŋiyaa ñɛwɛɛ tɛtʋ wɩsɩ ɖɩɖʋyɛ taa,+ nɛ Yozuwee tii ɖoo ana a-taa fɛɛʋ hɛkʋ taa.
14 Ayi wiyaʋ tɩɩna mbʋ lɛ, ɛ nɛ tɛtʋ taa abalaa pakʋyɩ tanaŋ tɛɛ pala nɛ palɩɩ kpɛdɛyɛ se poyooni Izrayɛɛlɩ lone naɖɩyɛ taa, kañɩmbusuu kɛdɛɛŋa ɛsɩndaa. Ɛlɛ ɛtaana se nabɛyɛ kaapabɩ-ɩ tɛtʋ nɛ wayɩ.
15 Ayi abalaa kpɛzaa se poyooni-wɛ lɛ, Yozuwee nɛ Izrayɛɛlɩ ñɩma mba paawɛ ɛ-cɔlɔ yɔ pe-kpeekpe papaɣzɩ seu nɛ pakpaɣ kañɩmbusuu taa nʋmɔʋ.+
16 Peeɖe paya ɛyaa mba paawɛ tɛtʋ taa yɔ pa-tɩŋa se paɖʋ pa-wayɩ; nɛ pɛwɛɛ nɛ paɖʋʋ Yozuwee wayɩ lɛ, pɛwɛɛ nɛ poposuuni tɛtʋ.
17 Pɩtaakazɩ abalʋ nɔɔyʋ Ayi nɛ Betɛɛlɩ se ɛtɩlɩɩ nɛ ɛɖʋ Izrayɛɛlɩ mba wayɩ. Paatʋlɩ tɛtʋ nɔnɔsɩ nɛ peyele yem wamm nɛ paɖʋ Izrayɛɛlɩ mba wayɩ.
18 Peeɖe Yehowa heyi Yozuwee se: «Kɩgbɛzɛŋ ŋgʋ kɩwɛ ñe-nesi taa yɔ, kpazɩ-kʋ nɛ Ayi tɛtʋ yɔɔ kiŋ,+ mbʋ pʋyɔɔ yɔ ñe-nesi tɛɛ mankaɣ-tʋ ɖʋzʋʋ.»+ Mbʋ Yozuwee kpazɩ kɩgbɛzɛŋ ŋgʋ kɩɩwɛ e-nesi taa yɔ nɛ tɛtʋ yɔɔ kiŋ.
19 Alɩwaatʋ ndʋ esezi e-nesi lɛ, mba paapabaa yɔ pakʋyɩ pa-ɖɩbabɩyɛ taa kpaka nɛ pese nɛ pasʋʋ tɛtʋ taa nɛ pamʋ-tʋ. Pañaɣzɩ tɛtʋ ndʋ miŋ kpaagbaa.+
20 Alɩwaatʋ ndʋ Ayi abalaa kisaa lɛ, panaɣ ñɔsɩ lɩɣnɩ tɛtʋ taa nɛ sɩkpaɣ ɛsɔdaa, piyeba nɛ po-ɖoŋ tɛ nɛ pataapɩzɩɣ se patasɩ seu nɛ pɛɖɛɛnɩ ɖoli. Ðɩnɛ ɛlɛ Izrayɛɛlɩ ñɩma mba peseɣaɣ nɛ pɛɖɛɣnɩ kañɩmbusuu taa yɔ, papɩsɩ nɛ papa ɛsa nɛ mba pataŋaɣ-wɛ yɔ.
21 Yozuwee nɛ Izrayɛɛlɩ ñɩma mba payɩ paawɛ ɛ-cɔlɔ yɔ, panawa se mba paapabaa yɔ pamʋ tɛtʋ, nɛ pana ɖɔɖɔ se ñɔsɩ lɩɣaɣnɩ tɛtʋ taa nɛ sɩkpaɣ ɛsɔdaa lɛ, papɩsɩ nɛ papa ɛsa nɛ Ayi abalaa nɛ poyooni-wɛ.
22 Nɛ Izrayɛɛlɩ mba lalaa lɩɩnɩ tɛtʋ taa se pakatɩ-wɛ, piyeba nɛ paɖʋ Ayi mba hɛkʋ, Izrayɛɛlɩ mba nabɛyɛ kaawɛnɩ hɔɔlʋʋ kʋnɛ kɩ-yɔɔ nɛ Izrayɛɛlɩ mba lalaa ñɛwɛɛnɩ hɔɔlʋʋ lɛɛkʋ yɔɔ, nɛ pakʋ Ayi mba nɛ pɩtɩkazɩ pa-taa nɔɔyʋ, nɛ pa-taa nɔɔyʋ tɩtʋlɩ.+
23 Ɛlɛ pakpa Ayi wiyaʋ+ nɛ ɛ-ɛsa nɛ powoni-i Yozuwee ɛsɩndaa.
24 Izrayɛɛlɩ mba kʋ Ayi mba kpeekpe tɛtʋ nɛ wayɩ, kañɩmbusuu taa ɖenɖe paatam-wɛ nɛ powona yɔ nɛ pakʋ pa-taa kɛdɛzaɣ tʋ nɛ laɣɖɛ nɛ pɩtɛ lɛ, Izrayɛɛlɩ mba kpeekpe pɩsɩ Ayi tɛtʋ taa nɛ paɖɩzɩ-tʋ nɛ laɣɖɛ.
25 Ɛyaa mba payɩ paakʋ puwiye yɔ, pɛkpɛndɩ 12 000, abalaa nɛ halaa, Ayi mba tɩŋa.
26 Yozuwee tɩpɩsɩnɩ e-nesi nzɩ ɛɛɖɔkɩnɩ kɩgbɛzɛŋ nɛ ɛkpazɩ yɔ+ nɛ pɩkɔɔ pɩsɩɩnɩ alɩwaatʋ ndʋ ɛɖɩzɩ Ayi mba tɩŋa payɩ yɔ.+
27 Ɛlɛ Izrayɛɛlɩ mba kpaɣ kpɩna nɛ tɛtʋ ndʋ ti-wondu ndʋ palazaa yɔ, ɛzɩ Yehowa kaaɖʋʋ paɣtʋ Yozuwee yɔ.+
28 Nɛ Yozuwee ñaɣzɩ Ayi tɛtʋ miŋ nɛ ɛpɩsɩ-tʋ njɛyɛ tambaɣ huuye tam,+ nɛ mbʋ tɩwɛ halɩ nɛ sɔnɔ.
29 Epuzi Ayi wiyaʋ ɖaʋ* yɔɔ nɛ ɖanaɣ kɔɔ kaɖanɩ, nɛ wɩsɩ caɣaɣ ɖʋʋ lɛ, Yozuwee ɖʋ paɣtʋ se petisi e-tomnaɣ kɩsɩbaɣ ɖaʋ yɔɔ.+ Pʋwayɩ lɛ, powoni-kɛ nɛ pɔlɔ tɛtʋ nɔnɔɔ taa nɛ pakpazɩ pɛɛ huuye sɔsɔyɛ naɖɩyɛ kɔ-yɔɔ, nɛ ɖɩwɛ peeɖe halɩ nɛ sɔnɔ.
30 Alɩwaatʋ ndʋ tɩ-taa Yozuwee kaama altaaru nakʋyʋ Izrayɛɛlɩ tɛ Ɛsɔ Yehowa Ebaalɩ Pʋʋ yɔɔ,+
31 ɛzɩ Yehowa lɩmɖʋyʋ Moyizi kaaɖʋʋ paɣtʋ Izrayɛɛlɩ mba yɔ, nɛ ɛzɩ pamaʋ Moyizi Paɣtʋ takayaɣ+ taa yɔ: «Altaaru ŋgʋ pamanɩ pɛɛ ɖeke yɔ, pɛɛ wena ñɩɣtʋ wonuu nakʋyʋ titukuna yɔ.»+ Altaaru ŋgʋ, kɩ-yɔɔ pala kɩlaŋ kɩñaɣzɩŋ nɛ laŋhɛzɩyɛ kɩlaŋ Yehowa.+
32 Pʋwayɩ lɛ, Yozuwee ma Paɣtʋ ndʋ Moyizi kaama Izrayɛɛlɩ mba ɛsɩndaa yɔ+ pɛɛ yɔɔ peeɖe.+
33 Izrayɛɛlɩ mba kpeekpe, pɛ-ɛzʋtʋyaa, pa-ñʋndɩnaa nɛ pɔ-tɔm hʋyaa paasɩŋ Aɖakaɣ hɔɔlɩŋ 2 yɔɔ, cɔjɔnaa Leevi ñɩma mba paahɔɔlɩ Yehowa ɛgbɛyɛ ɖʋʋ aɖakaɣ yɔ pɛ-ɛsɩndaa. Agɔma nɛ Izrayɛɛlɩ piya maɣmaɣ pa-tɩŋa paawɛ peeɖe.+ Samaɣ hɔɔlʋʋ kaasɩŋ Gerizim Pʋʋ ɛsɩndaa nɛ hɔɔlʋʋ lɛɛkʋ ñasɩŋ Ebaalɩ Pʋʋ+ ɛsɩndaa (ɛzɩ Yehowa lɩmɖʋyʋ Moyizi kaatɛm paɣtʋ ɖʋʋ yɔ),+ se pawazɩ Izrayɛɛlɩ samaɣ.
34 Pʋwayɩ lɛ, ɛkalɩ Paɣtʋ taa tɔm tɩŋa nɛ nɔɔ kɩkʋyaɣ,+ wazasɩ+ nɛ nɔɔ kɩdɛkɛdaɣ lɔʋ+ tɔm tɩŋa, ɛzɩ pamaʋ Paɣtʋ takayaɣ taa ɖeyi ɖeyi yɔ.
35 Paɣtʋ ndʋ payɩ Moyizi kaaɖʋwa yɔ, tɩ-taa natʋyʋ tɩkazɩ se Yozuwee tɩkalɩ-tʋ nɛ nɔɔ kɩkʋyaɣ Izrayɛɛlɩ samaɣ kpeekpe ɛsɩndaa;+ halaa, piya nɛ agɔma+ mba paawɛ* Izrayɛɛlɩ mba hɛkʋ taa yɔ,+ paawɛ peeɖe ɖɔɖɔ.
